vidhi ke likhe lekh aisi gurh lipi men likhe hote hain jiski bhavarth, shabdarth sahit purn vyakhya kabhi sanbhav nahin ho sakti. faltah manushya ke karm kshetra men upayon ki gunjaish bani hi rahti hai. un upayon ko karne par hi vidhi ke lekh sakar rup lete hain. bhagvan ne jab garbh men pravesh ke samay hi sab kuch likh diya hai to baki sab prayas to bekar hi kahe jayenge.
agar yah sach hai to manushya ke karm karne ki koi sarthakata hi nahin hai ya fir use karm karne hi nahin chahie. gita men bhagvan krishn ne kaha ki jo hoga achcha hoga aur jo hua achcha hua, tum keval karya karo, fal ki ichcha mat karo aisa kahakar karya karne ki hi agya di taki manushya duahkh rahit jivan vyatit karen.
aisa kahakar unhonne manushyon ke liye upay rupi karm ki gunjaish banaye rakhi. manushya ki anant jigyasaon ka samadhan jyotish ya vedon ke alava kahin aur prapt nahin hua. devyog, divya drishti ya anrtagyan ko agar chor den to jyotish ke bina aisa koi gyan-vigyan nahin hai jo bhavishya ki jankari de saken aur manushya ke bhagya ko badal sake.
jaise vaidya rog ko janakar davai v parhej se rog thik karta hai aur marte hue prani ko bachakar dirghayu deta hai, usi prakar jyotish bhi manushya ke bhagya ko batakar use labh deta hai. yah to keval jyotish ki den hai ki bhagya men kuch bhi likha ho, use badla ja sakta hai. iske kai udaharan hamare pas dekhne-sunne men ate hain- jaise savitri ne alpayu satyavan ki dirghayu karke pati sukh paya aur rishi markandey ne tap-jap se shiv ki kripa se chiranjivi pad ko paya.
aur melapak bhi to bhagya badlne aur sukh pane ka hi upay hai. agar sabhi ke bhagya men parivar ka sukh hota to ham kundli ka milan kyon karte aur sharirik lakshana-samudrik shastra se pariksha kyon karte. muhurt men bhi to yahi hota hai ki hamara bhagya kitna hi khara kyon n ho parantu ham jo bhi karya karen, vah purnataya safal rahe aur sukh bhoge.
agar hamare bhagya men sukh nahin ho, to ham karmakand ayurved tantra-mantra- yantra tirtha-snan, jap-tap, dan- yog, satya, seva, sadachar, shishtachar, dev- devi-pujan ityadi karm karke hi to kashton ka nivaran kar sukh pane ki cheshta kyon karte. agar aisa hota hai tabhi ham aisee upay lakhon-karoron sal se karte a rahe hain. daektar ke yah kahne par bhi ki bachne ka koi upay nahin hai, ham puja-path, mahamrityunjay jap adi karvate hain aur yah sochte hain ki kisi n kisi tarah se bach jayen.
yah ummid aur kahan se ati hai, yah keval jyotish aur karmakand se milti hai. islie jyotish ka aur sabhi upayon ka mahatva barh jata hai. jab bat hamare bas men n ho, to upay se ya davai se bimari ka hal nikalte hain. chot-aiksidaint-alpayu ke lie koi bhi vaigyanik upay nahin hai aur n hi vigyan kisi aiksidaint ya chot mukadmebaji ki koi bhavishyavani ya upay nahin bata sakta magar jyotish men iske lie yog-ratna-japa-dan-yagya snan dvara bacha ja sakta hai.
aise upay jinmen kuch bhi kharch nahin hota aur manushya ko labh ho jata hai. jaise ratn dharan, uparatna-rudraksh dharan, yantra dharan karna shulabh upay hai jise dhire-dhire vigyan bhi svikar kar raha hai agar gaur se dekhen to har agla uth raha kadam upay hi to hai. bina upay yah sansar sajiv nahin ho sakta fir to sab kuch sthir hi rahega.