brahm ka sagun avtar bahya drishti se shri sain baba sarhe tin hath lambe ek samanya purush the, fir bhi pratyek ke hriday men ve virajman the. andar se ve asakti-rahit aur sthir the, parantu bahar se jan-kalyan ke liye sadaiv chintit rahte the. andar se ve sanpurn rup se niahsvarthi the. bhakton ke nimitt unke hriday men param shanti virajman thi, parantu bahar se ve ashant pratit hote the. ve antas se brahm gyani, parantu bahar se sansar men uljhe hue dikhlai parte the. ve kabhi premdrishti se dekhte to kabhi patthar marte, kabhi galiyan dete aur kabhi hriday se lagate the. ve gambhir, shant aur sahnshil the. ve sadaiv drirh aur atmalin rahte the aur apne bhakton ka sadaiv uchit dhyan rakhte the. ve sada ek asan par hi virajman rahte the. ve kabhi yatra ko nahin nikle. unka dand ek choti si lakri tha, jise ve sadaiv apne pas sanbhal kar rakhte the. vicharshunya hone ke karan ve shant the. unhonne kanchan aur kirti ki kabhi chinta nahin ki tatha sada hi bhikshavritti dvara nirvah karte rahe. unka jivan hi is prakar ka tha. ‘allah malik’ sadaiv unke hothon par rahta tha. unka bhakton par vishesh aur atut prem tha. ve atma-gyan ki khan aur param divya svarup the.
shri sain baba ka divya svarup is tarah ka tha. baba ka dhyey aur updesh satrahvin shatabdi (1608-1681) men sant ramdas prakat hue aur unhonne yavnon se gayon aur brahmanon ki raksha karne ka karya paryapt sima tak safltapurvak kiya. parantu do shatabdiyon ke vyatit ho jane ke bad hindu aur muslmanon men vaimanasya barh gaya aur ise dur karne ke liye hi shri sain baba pragat hue. unka sabhi ke liye yahi updesh tha ki ram (jo hinduon ke bhagvan hanai) aur rahim (jo muslmanon ke khuda hain) ek hi hain aur unmen kinchit matra bhi bhed nahin hai. fir tum unke anuyayi kyon prithk-prithak rahakar paraspar jhagrte ho. agyani balkon ! donon jatiyan ekta sadh kar aur ek sath miljulakar raho. shant chitt se raho aur is prakar rashtriya ekta ka dhyey prapt karo. kalah aur vivad vyarth hai. islie n jhagro aur n paraspar pranghatak hi bano. sadaiv apne hit tatha kalyan ka vichar karo. shri hari tumhari raksha avashya karenge. yog, vairagya, tap, gyan adi ishvar ke samip pahunchne ke marg hanai. yadi tum kisi tarah safal sadhak nahin ban sakte to tumhara janm vyarth hai. tumhari koi kitni hi ninda kyon n kare, tum uska pratikar n karo.
yadi koi shubh karm karne ki ichcha hai to sadaiv dusron ki bhalai karo. sankshep men yahi shri sain baba ka updesh hai ki upyukt kathnanusar acharan karne se bhautik tatha adhyatmik donon hi kshetron men tumhari pragti hogi. guru to anek hain. kuch guru aise hain, jo dvar-dvar hath men vina aur kartal liye apni dharmikta ka pradarshan karte firte hain. ve shishyon ke kanon men mantra funkte aur unki sampatti ka shoshan karte hain. ve ishvar bhakti tatha dharmikta ka keval dhong hi rachte hain. ve vastutah apvitra aur adharmik hote hain. shri sain baba ne dharmik nishtha pradarshit karne ka vichar bhi kabhi man men nahin kiya. daihik buddhi unhen kinchitmatra bhi chu n gai thi. parantu unmen bhakton ke lie asim prem tha .
guru do prakar ke hote hain: 1. niyat aur 2. aniyat . aniyat guru ke adeshon se apne men uttam gunon ka vikas hota hai tatha chitt ki shuddhi hokar vivek ki vriddhi hoti hai. ve bhakti-path par laga dete hain. parantu niyat guru ki sangti matra se dvait buddhi ka hras shighra ho jata hai. guru aur bhi anek prakar ke hote hain, jo bhinna-bhinn prakar ki sansarik shikshayen pradan karte hain. yatharth men jo hamen atmasthit banakar is bhavsagar se par utar de, vahi sadguru hai. shri sainbaba isi koti ke sadguru the. unki mahanta avarnaniya hai. jo bhakt baba ke darshanarth ate, unke prashn karne ke purva hi baba unke samast jivan ki trikalik ghatnaon ka pura-pura vivaran kah dete the. ve samast bhuton men ishvar-darshan kiya karte the. mitra aur shatru unhen donon ek saman lagte the. ve niahsvarthi tatha drirh the. bhagya aur durbhagya ka un par koi prabhav n tha. ve kabhi sanshayagrast nahin hue. dehdhari hokar bhi unhen deh ki kinchitmatra asakti n thi. deh to unke lie keval ek avaran matra tha. yatharth men to ve nitya mukt the.
baba ki vinyshilta aisa kahte hain ki bhagvan men 6 prakar ke vishesh gun hote hain, yatha: 1. kirti 2. shri 3. vairagya 4. gyan 5. aishvarya aur 6. udarta shri sainbaba men bhi ye sab gun vidyaman the. unhonne bhakton ki ichcha-purti ke nimitt hi sagun avtar dharan kiya tha. unki kripa (daya) bari hi vichitra thi. ve bhakton ko svayan apne pas akarshit karte the anyatha unhen koi kaise jan pata. bhakton hetu ve apne shrimukh se aise vachan kahte,jinka varnan karne ka sarasvati bhi sahas n kar sakti. baba ati vinamrata se is prakar bolte dasanudas, main tumhara rini hun, tumhare darshan matra se mujhe santvana mili, yah tumhara mere upar bara upkar hai ki jo mujhe tumhare charnon, ka darshan prapt hua . tumhare darshan kar main apne ko dhanya samjhta hun. kaisi vinamrata hai ye. drishti se baba vishy-padarthon ka upbhog karte hue pratit hote the,parantu unhen kinchitmatra bhi unki gandh n thi aur n hi unke upbhog ka gyan tha. ve khate avashya the, parantu unki jihna ko koi svad n tha. ve netron se dekhte the, parantu us drishya men unki koi ruchi n thi. kam ke sanbandh men ve hanuman sadrish akhand brahmachari the. unhen kisi padarth men asakti n thi.
ve shuddh chaitanya svarup the, jahan samast ichchaen, ahankar aur anya cheshtaen vishram pati thin. sankshep men ve niahsvarth, mukt aur purn brahm the. is kathan ko samjhne ke hetu ek rochak katha ka udaharan yahan prastut hai: shirdi men nanavalli nam ka ek vichitra aur anokha vyakti tha. vah baba ke sab karyon ki dekhbhal kiya karta tha. ek samay jab baba gadi par virajman the, vah unke pas pahuncha. vah svayan hi gadi par baithna chahta tha isliye usne baba ko vahan se hatne ko kaha. baba ne turant gadi chor di aur tab nanavalli vahan virajman ho gaya. thore hi samay vahan baithakar vah utha aur baba ko apna sthan grahan karne ko kaha. baba punah asan par baith gaye. yah dekhakar nanavalli unke charnon par gir para aur bhag gaya. is prakar anayas hi agya diye jane aur vahan se uthaye jane ke karan baba men kinchitmatra bhi aprasannata ki jhalak n thi. yadyapi bahya drishti se shri sainbaba ka acharan samanya purushon ke sadrish hi tha,parantu unke karyon se unki asadharan buddhimatta aur chaturai spasht hi pratit hoti thi. unke samast karm bhakton ki bhalai ke nimitt hi hote the. unhone kabhi bhi apne bhakton ko kisi asan ya pranayam ke niyamon athva kisi upasna ka adesh kabhi nahin diya aur n unke kanon men koi mantra hi funka.
baba ka vichitra bistar shri nana saheb dengle ek char hath lamba aur ek hatheli chaira lakri ka takhta shri sainbaba ke shayan hetu laye. takhta kahin niche rakh kar us par sote, aisa n kar baba ne purani chindiyon se masjid ki balli se use jhule ke saman bandhakar us par shayan karna prarambh kar diya . chindiyon ke bilkul patli aur kamjor hone ke karan logon ko uska jhula banana ek paheli-sa ban gaya. chindiyan to keval takhte ka bhi bhar vahan nahin kar sakti thi. fir ve baba ke sharir ka bhar kis prakar sahan kar sakengi. jis prakar bhi ho, yah to ram hi janen, parantu yah to baba ki ek lila thi, jo fati chindiyan takhte tatha baba ka bhar sanbhal rahi thi. takhte ke charon konon par dipak ratri bhar jala karte the. baba ko takhte par baithe ya shayan karte hue dekhna durlabh drishya tha. sab ashcharyachkit the ki baba kis prakar takhte par charhte honge aur kis prakar niche utrte honge. kautuhalavash log is rahasyodghatan hetu drishti lagaye rahte the, parantu yah samjhne men koi bhi safal n ho saka aur is rahasya ko janne ke liye bhir uttarottar hi barhne lagi. is karan baba ne ek din takhta torakar bahar fenk diya. yadyapi baba ko asht siddhiyan prapt thi, parantu unhonne kabhi bhi unka prayog nahin kiya aur n kabhi unki aisi ichcha hi hui. ve to svatah hi svabhavik rup se purnata prapt hone ke karan unke pas a gai thin.