uddhavaji vrishnivanshiyon men ek pradhan purush the. ve sakshat brihaspati ji ke shishya aur param buddhiman the. ve bhagvan shrikrishn ke pyare sakha tatha mantri bhi the. ek din bhagvan shrikrishn ne apne priya bhakt aur ekantapremi uddhavaji ka hath apne hath men lekar kaha. uddh v ! tum vraj men jao. vahan mere pita-mata nandbaba aur yashoda maiya hain, unhen anandit karo; aur gopiyan mere virah ki vyadhi se bahut hi dukhi ho rahi hain, unhen mere sandesh sunakar us vedna se mukt karo. pyare uddhava! gopiyon ka man nitya-nirantar mujhmen hi laga rahta hai.
unke pran, unka jivan, unka sarvasva main hi hun. mere liye unhonne apne pati-putra adi sabhi sage-sanbandhiyon ko chod diya hai. unhonne buddhi se bhi mujhko apna pyara, apna priyatm-nahin, nahin; apni atma man rakha hai. mera yah vrat hai ki jo log mere liye laukik aur parlaukik dharmon ko chod dete hain, unka bharn-poshan main svayan karta hun. main un gopiyon ka param priyatam hun. mere yahan chale ane se ve mujhe durasth manti hain aur mera smaran karke atyant mohit ho rahi hain, bar-bar muchrchit ho jati hain. ve mere virah ki vyatha se vihval ho rahi hain, prati kshan mere liye utkanthit rahti hain. jab bhagvan shrikrishn ne yah bat kahi, tab uddhavaji bade adar se apne svami ka sandesh lekar rath par savar hue aur nandganv ke liye chal pade. jab bhagvan shrikrishn ke pyare anuchar uddhavaji vraj men aye, tab unse milakar nandbaba bahut hi prasann hue. unhonne uddh vaji ko gale lagakar unka vaise hi samman kiya, mano svayan bhagvan shrikrishn a gaye hon. nandbaba ka hriday yon hi bhagvan shrikrishn ke anurag-rang men ranga hua tha.
jab is prakar ve unki lilaon ka ek-ek karke smaran karne lage, tab to unmen prem ki badh hi a gayi, ve vihval ho gaye aur milne ki atyant utkantha hone ke karan unka gala rundh gaya. ve chup ho gaye. yashoda rani bhi vahin baithakar nandbaba ki baten sun rahi thin, shrikrishn ki ek-ek lila sunakar unke netron se ansu bah rahe the. uddh vaji nandbaba aur yashoda rani ke hriday men shrikrishn ke prati kaisa agadh anurag hai- yah dekhakar anandamagn ho gaye. gopiyan bhagvan shrikrishn ke darshan ke liye atyant utsuk-lalayit ho rahi thin, unke liye tadap rahi thin.
unki baten sunakar uddhavaji ne unhen unke priyatam ka sandesh sunakar santvana dete hue is prakar kaha. uddhavaji ne kaha - gopiyon ! tum krit-kritya ho. tumhara jivan safal hai. deviyon ! tum sare sansar ke liye pujniya ho; kyonki tumlogon ne bhagvan shrikrishn ko apna hriday, apna sarvasva samarpit kar diya hai.
dan, vrat, tap, hom, jap, vedadhyayan, dhyan, dharna, samadhi aur kalyan ke anya vividh sadhnon ke dvara bhagvan ki bhakti prapt ho, yahi prayatn kiya jata hai. yah bade saubhagya ki bat hai ki tumlogon ne pavitrakirti bhagvan shrikrishn ke prati vahi sarvottam premabhakti prapt ki hai aur usi ka adarsh sthapit kiya hai, jo bade-bade rishi-muniyon ke liye bhi atyant durlabh hai.
mahabhagyavti gopiyon! bhagvan shrikrishn ke viyog se tumne un indriyatit parmatma ke prati vah bhav prapt kar liya hai, jo sabhi vastuon ke rup men unka darshan karata hai. tumhare priyatam bhagvan shrikrishn ne tumlogon ko param sukh dene ke liye yah priya sandesh bheja hai.
kalyaniyon ! vahi lekar main tumlogon ke pas aya hun. is prakar kai mahinon tak vraj men rahakar uddhavaji ab mathura jane ke liye gopiyon se, nandbaba aur yashoda maiya se agya prapt ki. uddhav ji mathurapuri laut aye. vahan pahunchakar unhonne bhagvan shrikrishn ko pranam kiya aur unhen vrajvasiyon ki premmyi bhakti ka jaisa unhonne dekha tha, kah sunaya.