sara vishva in dinon tritiya vishva yuddh ki ashanka se dara hua hai. sanpurn manvta par in dinon ek sanbhavit mahayuddh ke sankat ke badal chae hue hain. prachin jagat ke kai vaigyanikon aur jyotishiyon ne tisre yuddh ke hone par parmanu aur anvik ayudhon se samast sabhyata ke puri tarah nasht hone ki bhavishya vaniyan ki thin. is sanbhavit yuddh ke parinam kitne ghatak ho sakte hain, iski kalpana karna bahut kathin hai.
vartaman men vishva ke pramukh rashtradhyakshon ke vyavhar aur batchit men jis prakar ki sthiti samne a rahi hai, use dekhakar lagta hai ki tisra vishva yuddh manushya ke adhik samip hai. kabhi amerika, kabhi rus, kabhi uttari koriya aur kabhi chin se yuddh ko bharkane vale vaktavya samne ane lage hain. kabhi bhi kahin se koi chingari futne bhar ki der hai aur sab kuch khatm karne vala ek yuddh chir sakta hai.
tisre vishva yuddh ki nastredamas ki achuk bhavishyavani
frans men 14 disanbar 1503 ko frans men janme nastredamas ne tisre vishva yuddh ki jo bhavishyavani ki hai vah bahut hi darane vali hai. duniya ke sabse prasiddh bhavishyavakta ne apni baten dohon men kahin. nastredamas ne hiroshima par parmanu bam girae jane ki bhi bhavishyavani kar di thi. ab tak apda, maut, yuddh aur kayamat par unki bhavishyavani kafi satik rahi hai. nastredamas ne apni ek bhavishyavani men kaha hai ki jab tritiya yuddh chal raha hoga us dauran chin ke rasaynik hamle se eshiya men tabahi aur maut ka manjar hoga, aisa abhi tak kahin nahin hua.
nastredamas ki bhavishyavani ke vishleshnon ke anusar jab tritiya vishvayuddh chal raha hoga usi dauran akash se ag ka ek gola prithvi ki or barhega aur hind mahasagar men ag ka ek tufan khara kar dega. is ghatna se duniya ke kai rashtra jalamagn ho jaenge.
age ve likhte hain - ek desh men janakranti se naya neta satta sanbhalega (yah misra men ho chuka hai). naya pop dusre desh men baithega (yah bhi ho chuka hai.) mangol (chin) charch ke khilaf yuddh cherega. (chin ka amerika ke khilaf chadmayuddh to jari hai hi). naya dharm (islam) charch ke khilaf bhari markat karte hue itli aur frans tak ja pahunchega tab tritiya vishva yuddh shuru hoga.
yuddhon men kya kho chuke hain ham
1910 se ab tak lagabhag 198 bare star ke yuddh ho chuke hain evan 26 karor vyakti yuddh ki vibhishika se kal kavlit hue hain. prati vyakti marne ka kharch pratham vishva yuddh ki lagat 68 hajar rupye se barhakar 15 karor 50 lakh rupye ja pahuncha hai. itne par bhi yuddhonmad shant nahin hua hai. in dinon parmanu aur anvik shastron par ho raha kharch 675 arab dalar (5400 arab rupye) prativarsh tak ja pahuncha hai. 20 vin shatabdi ya kahen sabhi samay ka sabse bara aur khuni yuddh dvitiya vishva yuddh tha, jo lagabhag 4-5 karor logon ki mrityu ke lie jimmedar tha. pratham vishva yuddh bhi khuni tha jismen 85 lakh sainikon ki mrityu ka anuman hai tatha 1.3 karor nagrikon ki maut hui. pratham vishva yuddh ke ant men lautne vale sainikon ko bhi mahamari ka samna karna para aur yah sankhya 5-10 karor logon tak pahunch gayi. 20 vin shatabdi men hone vale khuni yuddhon men hatahat hone vale rusi nagrikon ki anumanit sankhya 90 lakh thi. yadi in manviya aur vittiya sansadhnon ka prayog sansar ke vikas men kiya gaya hota to nishchit rup se aj vishva ka prarup badal chuka hota.
jyotish ke sapeksh men grahon ki bhumika
aisa dekha gaya hai ki jab bhi brahmand men santulan bigrta hai to vah kisi n kisi rup men prithvi par bhi dikhai parta hai. jab bhi adhikansh grah ek or a jate hain to gurutvakarshan ke karan asantulan ho jata hai, jisse manav mastishk par bhi purn prabhav parta hai. iske karan manav akramak rup dharan kar leta hai aur uski sochne ki kshamata kam ho jati hai. iska prabhav jab desh pramukh par parta hai to yuddh men parivartit ho jata hai.
grahon ka asar atisukshm hota hai jisko kisi yantra dvara nahin mapa ja sakta, lekin iska prabhav udaharan ke rup men samudra dvara le sakte hain. jab bhi chandrama chaturth v dasham bhav men ata hai uske gurutvakarshan ke karan samudra men jvar bhate ate hain. jab amavasya ke din chandrama ke sath surya ka bhi mel ho jata hai to uska prabhav aur bhi barh jata hai. grahan par gurutvakarshan prabhav aur adhik ho jata hai jab chandrama v surya ke sath rahu ya ketu bhi sath a jate hain. isi prakar jab kai grah ek or ho jate hain to ye bhukanp v anya prakritik apdaon ke karan bante hain. is varsh 18 navanbar 2017 ko 7 grah 70 ansh ke andar honge aur 3 disanbar 2017 ko bhi 6 grah ketu se rahu ke madhya 70 ansh ke kon men a rahe hain, jabki chandrama unke samne sthit hoga.
is grah sthiti ke karan bare bhukanp ke asar ban rahe hain jiska riktar skel par map 8.0 ya adhik ho sakta hai. yah bhukanp 3 disanbar 2017 ya 1-2 din age piche ho sakta hai. iska kendra dekhne ke lie rahu v ketu se grahon ki sthiti ko dekhna chahie.
chunki sabhi grah ketu se rahu ke madhya hain arthat chandrama se niche honge, atah unka prabhav uttari kshetra men lagabhag 300-400 akshansh par parega. atah 3 disanbar 2017 ke aspas uttari kshetra men bhari bhukanp ki sanbhavna ban rahi hai.
is prakar ki grah sthiti ke bad lagabhag 6 mas ke antral men prayah yuddh ki bhi sthiti ban jati hai atah 2018 ke madhya men bhari yuddh ke bhi lakshan ban rahe hain. kuch isi prakar ki grah sthiti kargil yuddh (mai 1999 se julai 1999) ke madhya bani thi jab march 99 men mangal ko chor sabhi 6 grah ketu se rahu ke madhya a gaye the. bhart-chin yuddh (20 aktubar 1962 se 20 navanbar 1962) se pahle bhi 5 farvri 1962 men 8 grah ekatrit hue the jiske parinamasvarup us samay bhi ek bahut bara bhukanp iran men aya tha jismen 12000 se adhik maut hui thi.
pratham v dvitiya vishva yuddh ke samay bhi isi prakar anek grah koniya sthiti men ae the. 23 julai 1914 men bhi ek bar yahi grah sthiti bani thi. 13 julai 1942 ko dusre vishvayuddh ke samay 7 grah 70 ansh ke kon men a gaye the jiske karan dvitiya vishvayuddh ke parinam bhayavah rahe.
is sab ko dekhte hue aisa pratit hota hai ki 18 navanbar 2017 se yuddh ke badal mandrane lagenge aur prakritik apdaon ke sath-sath yuddh hone ki sanbhavna bhi ban rahi hai. 2018 aur 2019 men bhi kuch isi prakar ki grah sthiti punah banne vali hai atah nikat bhaivashya men bhukanp, prakritik apdaon aur yuddh ki sanbhavnaon se inkar nahin kiya ja sakta. kin deshon ke bich men yuddh hoga? kaun ise jitega yah kahna mushkil hai.