anadi kal se hi hindu dharm men anek prakar ki manyataon ka samavesh raha hai. vicharon ki prakhrta evan vidvanon ke nirantar chintan se manyataon v asthaon men bhi parivartan hua. kya in manyataon v asthaon ka kuch vaigyanik adhar bhi hai? yah prashn baranbar buddhijivi pathkon ke man ko kachotta hai. dharmagranthon ko uddhrit karke‘ ‘babavakya pramanam’ kahne ka yug ab samapt ho gaya hai. dharmik manyataon par samyak chintan karna aj ke yug ki atyant avashyak pukar ho chuki hai. prashna: godugdh pavitra kyon hai? uttara: gau ko mata kaha gaya hai.
iska dudh paushtik v satogun pradhan hai. dharmashastron men godugdh shuchi mana gaya hai. iska bhog devtaon ko chadhta hai. godugdh se bani mithai, barfi, kalakand evan pede dev-puja men kam ate hain. atah godugdh pavitra hai. godugdh ke sevan se anek rog nasht ho jate hain. gay ka dudh sangrahni, shoth adi anek asadhya rogon ki achuk aushdhi hai. kushl-sthulta evan meda vriddhi ko dur karne men keval godugdh ka hi prayog hota hai.
pashchatya vaigyanikon ne anek parikshan ke bad godugdh men prapt protin evan vitaminon ka vishesh vishleshan karke iske tattva ko khub samjha hai, isiliye ve godugdh ke sthan par anya pashuon ke dugdh ka sevan nahin karte. prashna: gomutra pavitra kyon hai? uttara: gomutra men gandhak aur parad ke tattvik ansh prachur matra men hote hain. yakrit aur pliha jaise rog gomutra ke sevan men dur ho jate hain. gomutra kainsar rogon ko thik kar deta hai tatha sankramak rogon ko nasht kar deta hai.
prashna: gangajal pavitra kyon hai? uttara: kyonki iske pani men kide nahin lagte, yah devtaon ki nadi hai. iska pani amrit tulya mitha hai evan iska udgam sthal gomukh se hone ke karan iska jal pavitra mana jata hai. prashna: pipal ka vriksh pavitra kyon mana gaya hai? uttara: kyonki ismen vishnu bhagvan ka nivas mana gaya hai. shrimadbhagavadgita, adhyay 10, shlok 26 ke anusar bhagvan shrikrishn svayan kahte hain ki main sab vrikshon men pipal ka vriksh hun. isliye astik hindu pipal ki raksha ke liye apna sir bhi saharsh katane ko udyat ho jate hain. skandhpuran nagar 247 shlok 41-44 ke anusar- ‘‘pipal ki jad men vishnu, tane men keshav, shakhaon men narayan, patton men bhagvan hari aur fal men sab devtaon se yukt achyut sada nivas karte hain.
yah vriksh murtiman shri vishnusvarup hai. mahatma purush is vriksh ke punyamay mul ki seva karte hain. iska gunon se yukt aur kamnadayak ashray manushyon ke hajaron papon ka nash karne vala hai. prashna: pipal ki pavitrata ka vaigyanik karan kya hai? uttara: vaigyanik anusandhanon se pata chala hai ki pipal hi ek matra aisa vriksh hai jo rat-din prachur matra men jivnopyogi aeksijan ka visarjan karta hai. iski chaya sardi men ushnata pradan karti hai tatha garmi men shitlta deti hai. vishnu ko jagat ka palak kaha gaya hai. pipal pranvayu pradata hai atah svatah hi jagat ka palak siddh hai. nirantar anusandhanon dvara yah bhi siddh hua hai ki pipal ke patton se sansprisht vayu ke pravah v dhvani se bimari ke sankramak kitanu dhire-dhire nasht ho jate hain.
vaidyak granthon ke anusar iske patte, fal, chal, sabhi rog-nashak hain. rakta-vikar, kaf, pitt, dah, vaman, shoth, aruchi, vish-dosh, khansi, vishm-jvar, hichki, urahkshat, nasarog, visarp, krimi, kushth, tvacha, vran, agnidagdhavran, bagi adi anek rogon men iska upyog hota hai.