punarjanm men hinduon ka vishvas devtaon ke avtaron par adharit hai. jab prithvi par papon ka bhar ashniya ho jata hai, to santulan banane ke lie arthat dharm sthapna ke lie ishvar hamare is mrityulok men avtrit hote hain. ishvar ke avtaron ko janm ke chakra men fanse samanya manav ki vednaon, vyathaon se alag rakhna hoga. manav rup men avtar lene par ishvar bhale hi manvochit vyavhar karte hain, kintu fir bhi unke sarva-shaktiman hone ki jhalkiyan avashya hi drishtigochar hoti hain. ishvar ke avtaron ki kathaen hindutva ke rup men prachlit bhartiya dharm athva sanatan dharm ko sarvadhik ashavadi, sangitamay, anandamay aur parvon jaisi indradhnushi abhayukt bana deta hai.
apne matanusar pratyek dharm manushya ko adhyatm ki or le jata hai. hinduon men aise anek panth hain aur unmen se anek ati manmohak hain. sabhi panthon men apna-apna ek ajib akarshan hai. isi karan hinduon ko kisi dharm men aisi koi nai bat nahin dikhai deti, jise ve pahle se hi n jante hon. ishvar ke avtar lene ke karan bhinn bhinn tarah ke ho sakte hain. ye karan ek mahakalp se dusre mahakalp (manushya ke kharbon varsh ka ek mahakalpa/ ek mahan yug hota hai) men ye alag ho sakte hain. ye kathaen padhne men ruchikar, prernadayak tatha bhakti ke lie bhakt ko ot-prot karne vali hoti hain. aisi sthiti men samanya jan ishvar ko apne parivarik ghere men sangharsh v shraddha ke sath svikar karta hai, yadyapi vah ishvar ko anupam aur mahan bhi manta hai.
ab sita mata ko hi dekhie. sita purva janm men kaun thi ? ek bar lankadhipti ravan ne ativ sundar nari ko kathin adhyatmik tapasya men lin dekha. uski alaukik evan anokhe saundarya ko dekh kar mohit ho gaya aur usko apni sahchri banane ka prastav uske sammukh rakha. kintu us sundari ne, jiska nam vedvti tha, rakshasaraj ravan ke prastav ko thukra diya. usne bataya ki vah guru-putra kushadhvaj ki kanya hai. uske janm ke samay uske pita pratidin ved-path karte the. usko ved ka sampurn gyan ho gaya tha, isilie uska nam vedvti rakha gaya. jab vah navyauvnavastha ko prapt hui to uske sath vivah karne ke lie anek mahan v shaktishali parivaron ke navyuvkon ke prastav ae.
kintu vedvti ke pita ki hardik ichcha thi ki uski putri vedvti matra bhagvan vishnu ki patni bane. yah janakar ek daityaraj ne ek ratri ko uske pita ki hatya kar di. tab uski man pati-viyog ko sahan n kar saki aur usne apna sharir tyagne ka nirnay liya. falasvarup vah apne pati ke mrit sharir ke sath hi chita ki agni men pravesh kar gai. tabhi se vedvti ne bhagvan vishnu ko pati rup men pane ka sankalp le liya. yah bat ravan ko bilkul bhi achchi nahin lagi, aur usne vedvti ki veni (chutiya) pakad li. vedvti ne turant ravan ke dvara sparsh kie hue kesh kat diye tatha sharir tyagne ke lie agni men pravesh kar liya.
marne se purva usne kaha tha ki:-
1. uska punarjanm hoga aur vah ravan ki mrityu ka karan banegi.
2. sharirik shakti se ek nari purush ka vadh nahin kar sakti, vah usko shap dekar apni sanchit adhyatmik shakti ko nasht nahin karna chahti thi.
3. vah ayonija (nishpap garbhadharn) ke rup men ek pavitratma pita ki putri ban kar janm legi.
4. agle janm men vah ek kamal se utpann hui.
ravan ne use shighra pahchan liya aur use apne raj-mahal men le gaya, parantu ek buddhiman mantri ne shishu ko dekha aur usne ravan ko bataya ki us kanya men uske rajya ko nasht karne ke sabhi lakshan vidyaman hain. tatkal ravan ne us kanya ko samudra men fenk diya. sagar se us shishu ka sharir tairta-tairta, raja janak ke rajya ke ek khet men pahanuch gaya. raja janak ke rajya men akal pad gaya. varsha n hone ke karan janta men trahi-trahi mach gai. vidvan rishi-muniyon ne bataya ki raja janak svayan khet joten, to varsha sambhav hai. atah raja janak ne saharsh khet jota. khet jotte samay ek shishu dikhai pada aur raja janak ne turant shishu ko utha kar gale se laga liya.
putri rup men uska laln-palan karna prarambh kar diya. yah kanya satyug men vedvti thi aur tretayug men vah raja janak ki putri sita ke nam se vikhyat hui. khet jotte samay hal ki fal se jo lakir banti hai, use sita kahte hanai aur kuch log hal ke fal ke agle bhag ko sita kahte hain. raja janak jab hal chala rahe the, tabhi hal ke fal ke agle bhag par shishu dikhai pada aur tabhi us shishu ka nam sita rakha gaya. is prakar vedvti apne agle janm men sita nam se sare vishva men ujagar hokar ravan tatha uske rajya ke vinash ka karan bani.
bhagvan vishnu ko ram rup men avtar kyon lena pada ? mrityulok men bhagvan ke avtar ki katha ke piche ek manmohak katha hai. prachin kal men suron aur asuron ke madhya yuddh ke daramyan daityon ne maharshi bhrigu ki patni ka apaharan kar liya tha. vastav men rishi-patni ne daityon ko sharan di thi, jis karan kupit vishnu ne apne astra sudarshan chakra se uska sir kat diya tha. is par bhrigu krodhit ho gaye aur unhonne vishnu ko shap diya ki unhen mrityulok men manav rup men janm lena hoga aur kai varshon tak patni viyog ki pida sahan karni hogi. bhagvan vishnu ne yah shap saharsh svikar kar liya. unhonne surya-vansh men ayodhya samrat raja dasharath ke ghar men janm liya.
ek bar maharshi narad raja janak ke darbar men ae aur unhen bataya ki bhagvan nishachrpti dashanan ka vadh karne ke lie raja dasharath ke charon putron ram, lakshman, bharat v shatrughn ke rup men avtrit ho chuke hain. sita ke rup men yogmaya ne videh ke ghar men janm liya hai aur unhen sita ka vivah ram se karna hai. aisi bhavishya vani kar narad ji chale gae. shriram ko do bar apni patni sita ke viyog ki vedna jhelni padi. pahli bar jab ravan ne sita ka apaharan kiya aur dusri bar jab svayan unhonne apne mahal se nishkashit karne ki agya di, jiska palan lakshman ji ko karna pada tha. maharshi durvasa ne in ghatnaon ke ghatit hone se kafi purva raja dasharath ko ye sab baten bata di thin.