mandir se utpann vastu dosh: karan aur nivaran hemant sharma bhagvan vishvakarma dvara pratipadit vastu shastra ke siddhanton ko raja bhoj ne apne shreshth vidvanon ki sahayta se praja ki sukh-samriddhi ki kamna se ‘samrangan vastu shastra’ ke rup men sangrihit kiya. samrangan vastu shastra men ek safal vyakti, parivar, kutunb, samaj, nagar tatha rajya ke samagra vikas ke sukshmatam vastu siddhanton ka ullekh hai. vastu shastra ke siddhant ke anusar kisi bhavan ke as-pas kisi devi ya devta ka mandir shubh nahin hota. yahan bhavan ki kis disha men kis devi ya devta ke mandir ka prabhav ashubh hota hai, iska sankshipt vivaran prastut hai. bhavan ki kisi bhi disha men tin sau kadam ki duri par sthit shiv mandir ke prabhav ashubh hote hain. bhavan ke bayin or sthit durga, gayatri, lakshmi ya kisi anya devi ka mandir ashubh hota hai. yadi usmen sthapit pratima ki drishti bhi ukt bhavan par ho, to yah ek atyant hi ganbhir vastu dosh hai. bhavan ke prishth bhag men bhagvan vishnu ya unke kisi avtar ka mandir hona bhi ganbhir vastu dosh hota hai. rudravtar bhagvan hanuman ji ka mandir bhi shiv mandir ki tarah vastu dosh karak hota hai. bhagvan bhairav, nag devta, sati mata, shitla mata adi ke mandir yadi bhumi se aur grih svami ke kad se kuch chote hon, to unka vastu dosh nahin hota. mandir ke parisar men sthit kisi vriksh ki chaya ka bhavan par parna bhi ek vastu dosh mana jata hai. dushprabhavon se mukti ke upay ghar ki jis disha men shiv mandir ho, us disha ki or bhagvan ganesh ki pratima sthapit karni chahie. yah pratima grihasvami ke dayen hath ke anguthe ke akar ki honi chahie. ganesh ki ankhen pratima par spasht rup se utkirn ki jani chahie. is tarah sthapit ganesh pratima par sindur aur ghi avashya lagana chahie. shiv mandir yadi samne ho aur uska mukhya dvar ghar ke thik samne ho, to ghar ki mukhya dahlij men tanbe ka sarp gar dena chahie. yah sarp samne mandir men sthit shivling par sthapit sarp ki akriti jaisa hona chahie. bhagvan bhairvnath ka mandir yadi thik samne ho to kuÿo ko apne mukhya dvar par roj roti khilani chahie. kisi devi mandir ke karan utpann vastu dosh ke shaman ke lie us devi ke astra ke pratik ki sthapna pramukh dvar par karni chahie. yah pratik bans, lakri, mitti ya chandi, tanbe athva mishra dhatu ka hona chahie. iske abhav men rangon se pratik ki akriti banai ja sakti hai athva uska chitra lagaya ja sakta hai. patthar tatha lohe ka bana pratik kadapi nahin lagana chahie. yadi devi pratima astrahin ho, to devi ke vahan ka pratik dvar par lagaen. prayah mata sita, radha, rukmini, lakshmi adi ki pratimaen astrahin hoti hain. aisi deviyon ke sath unke svami ki pratima bhi astra vihin honi chahie. atah unhin ka mukhya mandir man kar hi upay karna chahie. bhagvti lakshmi ka mandir ho, to dvar par kamal ka chitra banaen ya bhagvan vishnu ka chitra lagakar unhen nitya kamalagatte ki mala pahnaen ya ghar ke angan men nitya rangoli banaen. bhagvan vishnu aur unke avtaron ke karan utpann vastu doshon ke shaman ke upay is prakar hain. yadi mandir bhagvan vishnu ka ho aur vastu dosh utpann karne vala ho, to bhavan ke ishan kon men chandi ya tanbe ke adhar par dakshinavarti shankh ki sthapna kar usmen niyamit jal bharna v uska pujan karna chahie. pratahkal shankh men bhare jal ke ghar men sarvatra chinte karne chahie. is shankh ko sadaiv jal se bhar kar rakhna chahie. yadi pratima chaturbhuj ki ho, to mukhya dvar par grihasvami ke anguthe ke barabar pital ki gada bhi lagani chahie. bhagvan vishnu ke avtar ram ke mandir ke karan utpann vastu dosh ke shaman ke lie ghar ke mukhya dvar par tir vihin dhanush ka divya chitra banana chahie. bhagvan krishn ka mandir ho, to aisi sthiti men ek golakar chunbak ko sudarshan chakra ke rup men pratishthit karke sthapit karna chahie. yadi kisi anya avtar ka mandir ho, to mukhya dvar par panchmukhi hanuman ka chitra lagana chahie. bhavan par mandir ke parisar men sthit vriksh ki chaya parne ke karan utpann vastu dosh ke nivaran ke lie bhavan ke dakshin-pashchim ke madhya sthit rnaitya kon ko sabse uncha karke us par trishul, lal jhanda ya ekakshi shrifal sthapit karna chahie. ghar ke samip sthit mandir men darshan hetu niyamit rup se jana chahie. is hetu pujan samagri dudh, fal, mithai, prasad, ful adi ghar se hi lekar jana chahie. dhyan rahe, charnamrit, prasad, tulsi patra adi lie bagair mandir se vapas nahin ana chahie. mandir men devtaon ke dayen hath ki taraf hi khare hokar darshan karen tatha baithakar hi pranam karen.
Kya aapko lekh pasand aaya?
Subscribe