yah katha ek aisi nari ki hai jiske jivan ka aranbh atyant nirdhan parivar men hua. lekin uski kismat n keval use ek samriddh parivar men le gai, apitu use jivan ka vah rang bhi dikhaya jiski kalpana shayad usne kabhi nahin ki thi. sumti ka bachapan atyant garibi men bita. uske pita ek choti si naukri karte the jisse ek atyant bare parivar ka gujar basar kafi mushkil se hota tha.
anek bar unhen dhan kut kar chaval se hi santusht hona parta. solah sal ki umra men hi sumti ka vivah shridhar se ho gaya. ankhon men apne sunhre bhavishya ke sapne sanjoe sumti apni sasural chali gai. shridhar van rakshak ke pad par asin the ve apne kam men atyant vyast rahte. vivah ke kuch din tak to unhonne ghar ke prati adhik dhyan diya jisse ki navvivahita ko achcha lage lekin dhire-dhire ve apni purani duniya men vapas lautne lage. kahte hain sharab aur shabab ka chaska ek bar lag jae to churae nahin chutta. sumti ka jadu adhik din tak nahin chala aur use adhikatar samay pati ke intjar men hi bitana parta.
vivah ke ek varsh bad hi sumti ne ek putri ko janm diya aur uska khali samay putri ke sath bitne laga. lekin jivan ke sabhi aisho airam hote hue bhi pati ki berukhi use marmahat kar deti. as paraus men logon ko athva apne mayke men apni bahnon evan bahnoiyon ko chuhlbaji karte ya hanste bolte dekhti to uska man tis se bhar jata.
vah atyant dukhi rahne lagi. kya sukhi jivan ka arth achcha khana, pahnna evan pati ke prati apne kartavya pure karna hi hai? kya uski ichchaon athva kamnaon ki koi kadra nahin? vah bhi apne pati ke sath apne man ki bat karna chahti thi, hansna chahti thi, par unhen to bat karne ka samay hi nahin tha. aise hi chalte-chalte jane kab panch varsh bit gae aur vah tin bachchon ki man ban gai. chunki vah bilkul anapadh thi aur pati ke pas parivar ke lie samay nahin tha, so ghar par bachchon ko parhane ke lie ek adhyapak ki vyavastha ki gai. shikhar, jo vahin sarkari kaelej men pravakta ke pad par asin the, sumti ke ghar uske bachchon ko parhane ane lage.
sumti ke jivan men mano basant ka ek jhonka sa a gaya. bachchon ke parhne ke bad vah unhen jabaran rok leti aur ghanton unse batiyati. aur dhire-dhire kab usne shikhar ke tan aur man par adhipatya sthapit kar liya, vah jan hi nahin pai. ab to jivan ke rang mano badl-se gae. shridhar ki vyastata evan udasinta dinanudin barhti gai. unki jarurat sumti pahle ki tarah puri karti rahi.
uski apni jindgi men mano fir se bahar a gai thi. agle varsh sumti fir se man bani aur is bar man banne ka sukh uske rom-rom se jhalak raha tha. triya charitra ko samjhna bahut mushkil hai. kaha hai: strayaah charitran purushasya bhagyan devo n janati kuto manushya. arthat stri ke charitra aur purush ke bhagya ko manushya ki kaun kahe bhagvan bhi nahin samajh pate. sumti ne bhi shridhar ke samne shikhar ki itni tarif ki ki shridhar ne unhen apne hi ghar men makan, bina kisi kirae ke, de diya.
sumti ko mano munh mangi daulat mil gai aur aj itne varsh bad bhi jab sumti ke sabhi bachchon ka vivah ho chuka hai, shikhar apne parivar sahit abhi bhi unke ghar men rahte hain. is katha ke dusre pahlu par gaur kar to shastranusar, feron par die gae vachnanusar par purush ki kalpana karna bhi pap hai aur sumti ne jo kritya kiya vah nishchit rup se samaj men anuchit tha. shayad ishvar bhi (chahe ham use manen athva nahin) hamare kukrityon ka fal hamen isi janm men de deta hai jise hamen bhogna hi parta hai.
sumti ke vivahit putra ko in sab baton ka pata chala to usne atm hatya kar li aur uski patni ne anyatra vivah kar liya. sumti apni poti ka laln-palan kar rahi hai. shridhar sab kuch janakar bhi maun rahakar pashchatap ke ag men jalte hue sumti ke sath rah rahe hain. sumti ki janmakundli men surya nichasth hokar guru ke sath lagn men baitha hai aur dvitiya bhav men nichasth chandrama budh, shukra, ketu aur mangal ke sath vidyaman hai. falasvarup is kundli men anek aise yog ghatit ho rahe hain jo sumti ke charitra evan uske svabhav ko nishchit rup se prabhavit kar rahe hain.
jatak parijat ke stri jatkadhyay men varnit shlok 9 ke anusar visham rashi men lagn ho aur surya mangal, guru, chandrama, budh aur shukra bali ho tatha shani sadharan ho to aisi stri ke bahut se pati hote hain. sumti ki kundli men bhi yahi ghatit ho raha hai. sath hi is kundli men shashthesh guru pap grah surya se yukt hai tatha lagnesh shukra bhi mangal arthat pap grah se yukt hai jiske falasvarup ismen atikami yog bhi ban raha hai.
sarvarth chintamni a.-6/shlo.-14 ke anusar yadi janmapatrika men saptamesh uchch, vakra adi bahut gunon se yukt ho athva lagnasth ho to purush ka bahut si striyon se aur stri ka bahut se purushon se sanpark hota hai. sumti ki chandra kundli men chandra lagn se saptamesh shukra lagn men vakri hokar anya grahon se yuti bana raha hai. islie yah bahupti yog bhi falit ho raha hai. shridhar ki kundli men panchmesh surya pap grahon ke bich hai tatha santan karak grah guru bhi pap yukt hai, islie putra nash yog ghatit ho raha hai.
sumti ki kundli men veshi yog bhi vidyaman hai arthat surya se dvitiya bhav men anek grah sthit hone se use rajyog bhi prapt hua aur usne rajrani ki tarah sukh bhoga. sumti aur shridhar donon ki kundliyon men guru purn ast hone se kamjor avastha men hai. putra karak guru ne putra ka sukh to diya par keval kuch varshon ke lie. vah burhape men unka sahara nahin ban saka. shridhar ki kundli men panchmesh surya apne ghar se chathe bhav men sthit hai, islie ve putra sukh se vanchit hue aur lagnesh mangal ki shani ke sath dvadash men sthiti, ashtam bhav men rahu ki sthiti evan shani aur mangal par uski drishti tatha jaya karak grah shukra aur chandrama ka ast hona ye sare yog unke charitra par bhi prashn chihn lagate hain.
sumti ki lagnakundli men panchmesh shani yogkarak trikon ka svami hokar kendra men sthit hai jisse sumti ne chah kanyaon ko janm diya aur putra keval ek hi hua jiska sukh burhape men nahin mila. sumti ki chandrakundli men guru dvadash men purn ast hai. pati ke sthan saptam bhav se pancham ke svami surya ke nich rashi men hone se uske sanbandh parpurush se hue aur usse santan hui. ashtam bhavasth pap grah rahu, saptam bhav par pap grah shani ki drishti aur nichasth chandra ke sath char anya grahon ki yuti ne uski buddhi ko bhramit kiya.