safal vaivahik jivan aur shubh muhurt pan. sunil joshi junnarakar sundar aur sushil stri dharm, arth aur kam (trivarga) ka sadhan hoti hai. koi larki achchi jivan sangini tabhi ban pati hai jab shubh lagn men vivah ho. isilie vivah ka muhurt ganbhirta vishleshan kar hi nikalna chahie. yah bahut ashyak hai kyonki samast dharm, karm evan sansarik shubh falon ki prapti vivah lagn ke adhin hai. vivah ek pramukh sanskar hai. jivan ko sukhamay banane ke lie vaivahik jivan ka sukhamay hona jaruri hai. is hetu prakriti ne stri aur purush ki rachna ki hai. aj ka tathakthit viksit aur pragtishil samaj iska bhale hi virodh kare, par iska apna mahatva hai. yahi karan hai ki jahan kahin bhi iska virodh hota hai, vahan uchchrinkhlta ati hai aur jivan dukhamay ho jata hai. is uchchrinkhlta se manav samaj ko bachane ke lie hi rishi muniyon ne vivah ka pravdhan kiya. safal vaivahik jivan ke lie janm kundli evan nakshatra milan tatha shubh muhurt aur shubh lagn par ganbhirta se vichar karna avashyak hai. yahi is alekh ka abhisht bhi hai. vivah mas vivah hetu chandra mas magh, falgun, vaishakh tatha jyeshth shubh hain. kartik v margashirsh madhyam hain. chaitra, paush v asharh mas men vivah vajrya hai. chandra mason men bhi vivah tabhi karna chahie jab surya mesh, vrish, mithun, vrishchik, makar ya kunbh men ho. samanyatah uttarayan surya men minark chaitra ko chorakar asharh shukla dashmi tak vivah sarvatra manya hai. mithun ka surya ho to asharh shukla dashmi tak vivah shubh hai. yadi paush men surya makar ka, chaitra men mesh ka aur kartik men vrishchik ka ho to vivah shastrasammat hota hai. kartik men devotthan ekadshi se purnima tak panch din ki avdhi vivah ke lie shubh hoti hai. ismen tula ke surya ka dosh nahin hota. jyeshth mas v jyeshtha nakshatra men utpann jyeshtha santanon ka vivah jyeshth mas men nahin karna chahie kyonki tin jyeshth milne se trijyeshth namak dosh hota hai. bara larka, bari larki aur jyeshth mas ashubh aur do jyeshth madhyam hote hanai. tribal shuddhi vichar ismen var v kanya ki janm rashi se surya, chandra v guru ke gochar ka vichar kiya jata hai. vivah muhurt ke dinon men jis din triblshuddhi ho vah shubh hota hai. kanya ke lie gurubal v var ke lie suryabal ka vichar aur chandrabal ka vichar donon ke lie karna chahie. varasya bhaskar balan vivah ke samay var ke lie surya ka balvan aur shubh hona ati avashyak hai. surya ke balvan hone se dampatya jivan men pati ka patni par prabhav v niyantran rahta hai. donon men vaicharik samanjasya rahta hai evan jivan ke kathin samay men sangharsh karne ki kshamata prapt hoti hai. surya ki shubhta se sanpurn vaivahik jivan sukhamay ho jata hai. vivah ke samay var ki janm rashi se bhav 3, 6, 10 ya 11 men surya ka gochar shreshth hai. bhav 4, 8 ya 12 men is gochar ke anisht hone ke karan tyajya hai. yadi surya bhav 1, 2, 5, 7 ya 9 men ho to vivah se pahle uski puja v laldan karne se vivah shubh hota hai. inmen 1, 7 ven sthan ka surya var dvara vishesh pujya mana gaya hai. sukhi dampatya jivan ke lie surya ke uttarayan hone ke dinon men shukla paksh v diva lagn men vivah karna chahie. divalagn men bhi abhijit muhurt sarvashreshth hai. surya jis rashi men ho usse chaturth rashi ka lagn abhijit lagn kahlata hai. yah sthaniya suryoday ke madhyahn kal men parta hai. sthaniya samyanusar din ke 12 bajne se 24 minat purva v 24 minat pashchat tak 48 minat ka abhijit muhurt hota hai. brahmanon v kshatriyon ke lie yah vivah lagn shreshth mana jata hai. dakshin bhartiya brahman abhijit lagn men hi vivah karte hain, yahi karan hai ki uttar bhartiyon ki apeksha unka vaivahik jivan adhik safal rahta hai. janmagat jati ke adhar par hi nahin balki janm nakshatra ke anusar yadi var ka varn brahman ya kshatriya ho to bhi abhijit lagn men hi vivah karna shubhfldayi hota hai. vivah lagn men surya yadi ekadash bhav men ho to yah sone men suhaga hota hai. vivah hetu anya lagn shuddhi n mile to abhijit muhurta/lagn men vivah sabhi vargon ke lie shubh hai. kanyayan gurau balan kanya ke dampatya sukh v pati bhav ka karak guru hai, islie guru ki shuddhi men kanya ka vivah shubh hota hai. kanya ki janmarashi se bhav 2, 5, 7, 9 ya 11 men sthit guru vivah hetu shubh mana jata hai, kyonki in sthanon men guru balvan hota hai. bhav 1, 3, 6 ya 10 men sthit guru madhyam hota hai. is sthiti ke guru ki puja se vah shubh ho jata hai. kanya se pila dan karake vivah karna chahie. bhav 4, 8 ya 12 men sthit guru ashubh hota hai, yah puja se bhi shubh nahin hota. atah kanya ki janm rashi se bhav 4, 8 ya 12 men sthit guru vivah hetu varjit hai. mithun ya kanya rashisth guru kanya ke lie hanikarak aur kark ya makar rashi mane ho to kanya ke lie duahkhdayi hota hai. kintu yadi ukt sthanon men svarashisth ya parmochch ho to shubh hota hai. guru sinh rashi ke navansh men ho to vivah nahin karna chahie. kanya ke vivah hetu guru shuddhi ka itna gahan vichar to us samay kiya jata tha jab uska vivah das varsh ya isse bhi kam ki ayu men hota tha. ajakal to larki ka vivah atharah varsh ke bad hi hota hai. is umra tak vah kanya nahin rahti, vah to rajasvala hokar yuvti ho jati hai. islie gurubal ki shuddhi n hone ki sthiti men bhi puja kar larki ka vivah karna shastrasammat hai. aise men vivah lagn shuddhi ke lie chandrabal dekhna hi anivarya hai. vivahe chandrablan shri badrayan ke anusar guru aur shukra ke balya dosh men kanya ka aur vriddhatva dosh men purush ka vinash hota hai. guru ast ho to pati ka, shukrast men kanya ka tatha chandrast men donon ka anisht hota hai. atah vivah ke samay donon ke lie chandrabal ki shuddhi avashyak hai. donon ki janmarashi se chandra ka gochar bhav 3, 6, 7, 10 ya 11 men shubh (uttama) hota hai. chandra bhav 1, 2, 5, 9 ya 12 men sthit ho to uski puja karni chahie. bhav 4, 8 ya 12 men sthit chandra donon ke lie ashubh hai. ekargaladi vivah sanbandhi dosh chandra evan surya ke balyukt hone ke karan nasht ho jate hain, arthat donon uchchasth ya mitrakshetriya hokar vivah lagn men sthit hon to sare dosh nasht ho jate hain. budh ke sath chandra shubh aur guru ke sath sukhdayak hota hai. vivah lagn men chandra ke nimnokt sthitiyan doshpurn hoti hanai, inka tyag karna chahie. surya aur chandra ki yuti men vivah ho to dampati ko daridrya ka samna karna parta hai. mangal ke sath yuti men hone par mrityutulya pira hoti hai. shukra ke sath men vivah ho to patni ko sautan ka dukh jhelna parta hai. shani ki yuti vairagya deti hai. rahu se yut chandra kalhkari aur ketu se yut kashtakari hota hai. yadi vivah lagn men chandra do pap grahon se yut ho to mrityukarak hota hai. vivah nakshatra rohini, mrigshira, magha, uttarafalguni, uttarashadha, uttarabhadrapad hast, svati, anuradha, mul aur revti nakshatra vivah hetu shubh hanai. in nakshatron ke papagrahon se vedhit n hone par vivah hetu shreshth, kintu vedhit hone par varjit hote hain. janm nakshatra, karm nakshatra (janm se 10van), sanghatik (16van), vainashik (23 van), nidhan tara (7, 12 ya 25 van nakshatra) adi nishiddh hain. nakshatra vedh panchshlaka chakra men ek rekha par parne vale nimnokt nakshatron men grah hone se nakshatron ka paraspar vedh ho jata hai. rohini-abhijit, bharni-anuradha, uttarasharha-mrigshira, shravn-magha, hasta-uttarabhadrapad, svati-shatbhisha mul-punarvasu, revti-uttarafalguni, chitra-purvabhadrapad, jyeshtha-pushya, purvasharh-adrra dhanishtha-ashlesha, ashvini-purvafalguni, vishakha-krittika ka apas men vedh hota hai. yadi vivah nakshatra men shubhagrah ka vedh ho to ‘pad vedh’ hota hai. padvedh men pura nakshatra dushit nahin hota, sirf charan dushit hota hai. yadi nakshatra ke chaturth charan par grah ho to samne vale nakshatra ke pratham charan par vedh hoga. yadi grah dvitiya charan par ho to samne vale nakshatra ke tritiya charan par vedh hoga. vivah muhurt men padvedh ke kal ka hi tyag karen, sanpurn nakshatra ka nahin. vedh dosh koi bhi nakshatra pap grahon se vedhit ya bhukt ho to vah nakshatra dushit (ashubh) ho jata hai, jise vedhdosh kahte hain. papagrahon dvara bhogakar chore hue nakshatra ko yadi chandra bhog le to nakshatra shuddh ho jata hai. ‘ravi vedhe ch vaidhkan, putrashoko bhavet kuje.’ arthat surya ke vedh men vivah karne se kanya vidhva ho jati hai aur mangal vedh se putra shok prapt hota hai. shani ke vedh se mritsantan utpann hoti hai, rahu ke vedh se stri kulta ho jati hai aur ketu ka vedh sarvanash karne vala hota hai. nakshatra vedh dosh vivah muhurt men sarvadhik vicharniya hai. is dosh ki sarvabhaumik manyata hai, atah vivah lagn men iska parityag avashya hi karna chahie. vivah men vishesh dosh vivah lagn men mukhyarup se 10 dosh varjit hain- 1. lata (lat) 2. pat 3. yuti, 4. vedh, 5. jamitra, 6. vanpanchak 7. ekargal (kharjur), 8. upagrah, 9. krantisamya, aur 10. dagdha. inmen bhi vedh v krantisamya bare hanai, atah vivah lagn men inka avashya vichar karen, har jagah v har samay inka tyag karna chahie. krantisamya jab spasht chandrakranti suryakranti ke bilkul saman ho tab krantisamya dosh hota hai. ek hi ayan men spasht chandra v surya ka yog 360 ansh par krantisamya hone par vaidhriti namak mahapat hota hai tatha vibhinn aynon men spasht chandra v surya ka yog 180 ansh par krantisamya hone par yah vyatipat sangyak hota hai. krantisamya ka nirdharan ganit vidhi se siddhantokt patadhyayon ke anusar kiya jata hai. sadharan taur par mesh-sinh, vrish-makar, tula-kunbh, kanya-min, karka-vrishchik aur dhanu-mithun in rashi yugmon men ek men surya v ek men chandra ho to krantisamya dosh ho sakta hai. krantisamya dosh shubhkaryon men sabhi shubh gunon ko nasht kar deta hai. vivah patal ke anusar shastra se katakar, agni men jalakar ya sarp ke dansh se pirit vyakti to jivit bach sakta hai, kintu krantisamya men vivah karne par donon (var-vadhu) hi jivit nahin rah pate. atah lagn shubh (shuddha) hone par bhi ukt doshane (krantisamya, vedhdosh) men vivah nahin karna chahie. kis lagn men karen vivah? lagn ka arth hai laga rahna. surya jis rashi men sthit rahta hai, vahin suryoday kalin lagn udit hota hai. udykalin lagn men uske bad ke lagn ke bhogyakal ko jorakar, uske age ka lagn gyat kar sakte hain. lagabhag 2 ghante ek rashi ka lagn rahta hai. is prakar din-rat ke 24 ghanton men 12 rashiyon ke 12 lagn hote hai. sabhi muhurto men lagn ki sarvadhik pramukh hota hai. vivah adi shubhkaryan men lagn ka shodhan ganbhirta se kiya jata hai. vrish, mithun, kanya, tula aur dhanu lagnon men vivah uttam faldayi hota hai. lagn shuddhi vivah lagn men shubh grah kendra, trikon ya dvitiya aur dvadash men hon aur pap grah bhav 3, 6 aur 11 men hane to shubhafal dete hain. lagn (pratham bhav) se shashth men shukra v ashtam men mangal ashubh hota hai. saptam bhav grah rahit ho aur vivah lagn se chandra bhav 6, 8 ya 12 men n ho to lagn shubh hota hai. lagn bhang muhurt chintamni ke anusar- jis lagn ke vyay bhav men shani ho, usmen vivah nahin karna chahie. dasham men mangal, tritiya men shukra, lagn men chandra ya pap grah ho ya lagnesh, surya, chandra chathe sthan men hane athva chandra, lagn ke svami ka koi shubh grah athven sthan men ho athva saptam sthan men koi bhi grah ho to lagn bhang kaha jata hai. ismen vivah karna ashubh hota hai. navansh shuddhi vivah lagn men kanya, mithun, tula aur dhanu ka purvardh navansh shubh hota hai, basharte ye antim navansh n hon. ukt rashiyon ka navansh ho to dampati ko putra, dhan v saubhagya ki prapti hoti hai. dampati ki janm rashi ya lagn se ashtam ya dvadash bhav ka navansh yadi anek gunon se yukt ho to bhi tyajya hai. shri ramdaivagya ke anusar lagn ka svami lagn men sthit ho ya use dekhta ho, athva navansh ka svami navansh men sthit ho ya use dekhta ho to vah var ko shubhafal pradan karta hai. isi prakar navansh ka saptamesh saptam bhav ko dekhta ho ya usmen sthit ho, athva lagnesh lagn se saptam bhav ko dekhta ho to vadhu ke lie shubhfldayak hota hai. kartari dosh aur uska parihar vivah lagn se bhav 2 ya 12 men yadi pap grah ho to kartari dosh hota hai. yah kainchi ki tarah donon or se lagn ki shubhta ko katta hai. lagn se dvitiya sthan men prapagrah vakri aur dvadash men papagrah margi ho to yah dosh mahakartari hota hai. dampati ke jivan ko katne vala hone ke karan yah tyajya hai. lagn men balvan shubhagrah ho to kartari dosh bhang ho jata hai. kendra ya trikon men guru, shukra ya budh ho, ya kartarikarak grah nichagat athva shatrukshetri ho to kartari dosh ka kuprabhav kam ho jata hai. pangu, andh aur badhir lagn tula aur vrishchik din men tatha dhanu evan makar lagn ratri men badhir (bahri) hote hanai. badhir lagn men vivah karne se dampatya dukhamay hota hai. mesh, vrish aur sinh din men aur mithun, kark tatha kanya lagn ratri men andhe hote hain. kunbh din men evan min ratri men pangu (viklang) hota hai. pangu lagn men vivah hone par dhan ka nash hota hai. diva andh lagn men kanya vidhva ho jati hai aur ratri andh lagn santan ke lie mrityukarak hota hai. islie in doshpurn lagnon se bachna chahie. han, yadi lagn ka svami ya guru lagn ko dekhta ho to pangu, badhir adi lagn dosh nahin hote. godhuli lagn surya rashi udykalin lagn se saptam lagn godhuli kahlata hai. suryast se 15 pal purva aur 15 pal bad adhi ghati (12 mint) ka ka kal godhuli kal hota hai. yadyapi kuch vidvan sanpurn ek ghati (24 mint) ko godhuli mante hain. arthat suryast se purva adhi ghati (12 mint) tatha suryast ke pashchat adhi ghati (12 mint) godhuli bela mante hain. yah ek prashast muhurt hai. godhuli lagn men nakshatra, tithi, karan, lagn evan jamitra dosh svatah hi dur ho jate hain, inki shuddhi ki avashyakta nahin rahti hai. kintu godhuli men kulik, krantisamya aur bhav 1, 6 athva 8 men sthit chandra tyajya hai. lagn se pratham, shashth ya ashtam men chandra ho to kanya ka nash hota hai. bhav 2, 3 ya 11 men chandra ho to dampatya jivan ke lie sukhad hota hai. guruvar ko suryast ke bad evan shanivar ko suryast se purva ki godhuli bela shubh hoti hai. yadi shuddh lagn milta ho to uska tyagakar godhuli men vivah vishesh shubh nahin hai. lagn shuddhi prapt n ho to godhuli men vivah karna prashast hai. godhuli lagn shudron v vaishyon ke lie shubh hai, brahman adi uchchavarg ke lie nahin. vanshanugat jati ke alava yadi natra ke adhar par var ki jati brahman ya kshatriya ho tab bhi godhuli lagn men vivah nahin karna chahie. uttam lagn milna to saubhagya ki bat hai. 21 mahadoshon aur gunon ko ganit dvara nishchit karke jis lagn men dosh kam v gun adhik hane, usmen vivah adi mangal karya karen. vivah ki rasmen (saptapadi, fere aur panigrahan sanskar) jyotishi dvara sujhae gae muhurt v lagn men hi puri kar leni chahie, anyatha vivah muhurt niklvane ka koi auchitya nahin rah jata hai.