siddheshvar shastri dvara rachit ‘‘prachin charitrakosh’ (1964) ke anusar vaidik sahitya men nirdisht ‘svarbhanu’ ka sthan hi vaidikottar puraktha shastra men rahu ke dvara liya gaya hai. shrimadbhagavat mahapuran men rahu ko chandrark pramardan (surya-chandra ke tej ko nasht karne vala) kaha gaya hai. brihad yogaratnakar granth ke prishth 28 ke anusar kai puranon men rahu ka namantaran svarbhanu bataya gaya hai. shrimadbhagavat mahapuran men rahu ki kanya ka nam svarbhanuputri kaha gaya hai. jyotish shastron men bhi anek sthanon par rahu ko svarbhanu pukara gaya hai. rahu ke udbhav ke sanbandh men shrimadbhagavat, mahabharat, padmapuran, matsyapuran, vayu puran, vishnu puran tatha chandogya upnishad ityadi men vistrit rup se varnit hai. daityaraj hiranyakashyapu ki putri sinhika viprachiti namak daitya ko byahi gai thi.
sinhika ke garbh se hi rahu ki utpatti hui thi. rahu ke sau bhai aur bhi the. rahu hi sabse bara tha. sinhika ka putra hone ke karan rahu ko sainhikey ke nam se pukara jata hai. ek samay devtaon v danvon ke madhya dirghakal tak yuddh chala. bhagvan vishnu ne donon pakshon se kuch samay ke lie yuddh rokne ke lie kaha taki samudra manthan kiya ja sake. is bat par donon paksh sahamat ho gae. samudramanthan ke lie mandachal parvat ko mathani ke rup men tatha nagraj vasuki ko rassi ke rup men lapetakar manthan kiya gaya. devraj indra ke netritva men devtagan vasuki ki punch aur daityaraj bali ke netritva men asuragan munh pakar kar manthan karne lage. samudra manthan se sarvapratham ghor kalkut halahal vish nikla jise bhagvan shiv ne svechcha se pan kar liya lekin ise apne kanth men hi roke rakha jis karan unka kanth nila ho gaya.
isi karan bhagvan shiv ko nilkanth kaha jata hai. iske pashchat manthan se kamdhenu gay, uchchaishrava namak ashva, airavat namak shreshth hathi, kaustubh mani, kalpavriksh, bhagvti lakshmi, varuni devi, apsaraen, chandrama tatha ant men amrit kalash lekar dhanvantri (ayurved ke jank) ka agaman hua. amrit kalash ko dekhte hi daitya log unke hath se kalash chinakar bhag gae. devtaon ka man dukhit ho gaya tab unhonne bhagvan vishnu se prarthana ki. vishnu ne kaha-tum log khed n karo, main apni maya se unmen apsi kalah karvakar tumhara kam bana dunga. tabhi amrit kalash ko lekar bhage daitya apas men jhagrne lage, sabhi pahle amrit pina chahte the. is prakar jab tu-tu, main-main ho rahi thi tabhi bhagvan vishnu ne advitiya saundaryavti avarnaniya sundar stri ka rup dharan kar tribhuvan mohini ke rup men prakat huye. anupam sugandh aur nupur ki dhvani se samast daityagan us mohini ki taraf akarshit ho gaye aur use hi amrit vitrit karne ka karya saunp diya aur kaha he sundri ! ham devta aur danav donon hi kashyap rishi ke putra hain.
amrit prapti ke lie ham donon ne hi purusharth kiya aur uske lie hi kalah ho raha hai. he manini! tum nyay ke anusar nishpaksh bhav se hamen yah amrit bant do. daityon ki is prarthana par mohini muskurai aur tirchi chitavan se kataksh karte hue boli- main uchit anuchit jo kuch bhi karun, vah sab yadi tumko svikar ho to main amrit ka vitaran kar sakti hun. mohini ke mithe evan mridu vachnon ko sabhi ne svikar kiya. mohini rupi bhagvan vishnu devtaon ko ek katar men, daityon ko dusri katar men, panktibaddh bithaya tatha pahle devtaon ko amritpan karana praranbh kiya. jis samay bhagvan devtaon ko amrit pila rahe the tabhi sinhika ka putra rahu jo daityon ki katar men baitha tha vah devtaon ka rup dharan kar devtaon ki pankti men ja baitha aur usne bhi amritpan kar liya. daitya rahu ki is harakat ko surya tatha chandrama ne dekh liya tatha unhonne bhagvan ke samaksh tatkal uski pol khol di.
tatkshan bhagvan ne apne tikshn sudarshan chakra se uska sir dhar se alag kar diya lekin rahu amrit ko mukh men le chuka tha islie vah dharvihin hone ke bavjud bhi jivit raha aur amar ho gaya. isi karan brahmaji ne use grah bana diya aur rahu anya grahon ke sath brahma ki sabha men baithne laga. grah banne ke bad bhi rahu vair-bhav se purnima ko chandra par aur amavasya ko surya par akraman karta hai. ise grahan kaha jata hai. sir chedan ke pashchat sir vala bhag rahu kahlaya tatha dhar vala bhag ketu kahlaya. kalantar men sir ke piche sarp ki deh utpann ho gai aur dhar ke upar sarp ka sir utpann ho gaya tatha brahma ji ne donane ko hi grah bana diya. khagoliya parichy: chandra ki kaksha krantivritt ko jin do sthanon par katti hai ve donon sthan rahu aur ketu kahlate hain.
chandra ke arohipat ko rahu tatha avrohipat ko ketu kahte hain. in pat binduon (rahu-ketu) ki sada vakra gati hoti hai aur apna ek bhraman (bhachakra ka chakkara) lagabhag 18.6 varsh men pura kar lete hain. ausatan 3 kala 11 vikla pratidin inki gati hoti hai. ye donon grah 180 digri ansh ki duri par rahte hain. adhunik gannanusar 6798 din 16 ghanta 44 minat aur 24 sekend men ye grah dvadash rashi ko bhogte hain tatha 18 mas ek rashi par, 240 din ek nakshatra par tatha 60 din ek nakshatra pad par rahte hain. jyotishiya parichy: sinhika ka bara putra rahu ashtam grah mana jata hai. paithanis gotra vala tatha barbar desh ke nairritya disha men suryakar mandal ka nivasi hai. is daitya ka sharir kajal ke pahar jaisa, andhkar rupi, bhayankar, mahablvan hai.
yah chandal jati ka hai tatha van men rahta hai. iski dhatu shisha hai, dakshin-pashchim disha ka svami hai. yah prithktavadi grah hai. yah dasham sthan men balshali mana gaya hai. jis bhav men sthit hota hai usi men badha pahunchane ki iski prakriti hoti hai. yah jis grah ke sath baithta hai usko bhi dushit kar deta hai. spasht rup se to rahu ki koi rashi nirdharit nahin hai parantu dashaflon ke nirnay hetu acharyon dvara rahu ki uchch rashi vrishabh, nich rashi vrishchik, mul trikon rashi mithun tatha rahu ki sva rashi kunbh tatha matantar se kanya mani gayi hai. adbhut vilakshan vastuon, apasmar, chechak, nasur, bhut-pret-pishach badha, aruchi, kide, korh, gupt rog aur gupt shatruon ka karak grah hai.
ratn gomed hai. mahadsha kal 18 varsh hai. rahu ka naisargik bal surya se duguna mana gaya hai. rahu tritiya, shashth v ekadash bhav men shubh mana gaya hai. patrika men rahu pirit hone par pitridosh ka prabhav deta hai. parashar rishi ke anusar rahu kendra bhav ke svamiyon ke sath kendra men ho to rajyog pradan karta hai. budh, shukra v shani mitra tatha surya, chandra, mangal v guru shatru hain. pancham, saptam v navam bhav par purn drishti mani jati hai. rahu budh ki rashiyon men shreshth fal pradan karta hai. rahu surya ya chandra ke sath hone par grahan yog, mangal ke sath angarak yog, budh ke sath jaratvayog, guru ke sath chandalyog, shukra ke sath lampat yog v shani ke sath hone se dhurt yog (mandi yog) nirmit karta hai.
surya$chandra ke sath rahu purn grahan yog nirmit karta hai. yah yuti varsh men ek bar hoti hai. kisi bhi mah ki amavasya ke din ya shukla paksh ki pratipda ke din yah yuti sanbhav hai.