grahon ki kahani grahon ki jubani shri shri ravishankar ji pan. sharad tripathi aj ke is adhunik yug men shri shri ravishankar ji ko kaun nahin janta. aurt auf living ke sansthapak evan adhyatm guru shri shri ravi shankar ji ki khayati desh evan videsh har jagah hai. grahon ki kahani aur grahon ki jubani stanbh men ham unke jivan ke divya paksh ko jyotishiya aine men dekhne ka prayas karte hain. adrniya shri shri ravishankar ji ka janm 13 mai 1956 ko pratah 05:45 baje tamilnadu ke papnasham namak kasbe men hua. kahte hain is pavitra sthan par snan karne se shri ramchandra ke brahm hatya dosh ka nivaran v unke papon ka nash hua. isi karan is sthan ka nam papnasham para. shri shri ravi shankar vaidik vidvan ar. vi. esaratnam v man vishal lakshmi ki santan the. shri shri ravi shankar ka nam rakhne ke piche ek kahani hai. inka janm ravivar ke din pratah vela men hua tha tatha us din akshay tritiya ka parva tha. is parva ke tin din bad parivar ke purohit ne unke namakaran ke din adi shankracharya tatha ramanujacharya ki jayanti hone ke karan, inke nam men shankar aur narayan ko bhi jor diya.
so is balak ka pura nam ravi shankar narayan hua. is balak ko sabhi pyar se ravi bulate the aur yahi shri ravi aurt auf living faundeshan ke sansthapak shri ravi shankar ji hain jinhen log guruji ya shri shri bhi kahte hain. apki narsari ki parhai bainglor ke ek skul men hui. parhai men ve hamesha avval rahe. 17 varsh ki ayu men unhonne sent josaif kalej benglor se mardan fijiks se bi.es.si. ki digri li aur vaidik sahitya men bhi parangat hue. naukri to unhen karni nahin thi. ek bar ve man ki jidd par baink men intaravyu dene gaye. intaravyu bord men 3 log the. inhonne unka hi intaravyu le liya. darasal bord men ek sadasya ne unse pucha ki ap kya karte hain to inhonne bataya ki dhyan sikhata hun. bas fir kya tha, der tak unse sadhna ka vyakhyan chal para. ek bar bainglor men seminar ho raha tha. har kshetra ke khayati prapt vidvan jute the. vishay tha, vaidik gyan v vigyan. jab inki bari ai tab inhonne apni adbhut shaili men mand muskan-madhur avaj ki behatar prastuti ki v ek bar bhi pani nahin piya. us seminar men ek aur bhi gyani, mahan vyakti tha jo inse prabhavit hue bina nahin rah paya. unhonne apne pas bulaya aur bat ki. apne sath ane ka nyauta diya. vah vyakti maharshi mahesh yogi the. us samay shri shri ki umra matra 19 varsh ki thi.
yah bat san 1975 ki hai. aiye, ab unki in ghatnaon ko jyotish ke najriye se dekhte hain- unki janm kundli dekhne matra se hi pata chalta hai ki yah kundli kisi mahan vyakti ki hai. janmakundli ka sabse mahatvapurn pahlu yah hai ki ismen mul trikon ke svami arthat lagnesh mangal apni uchch rashi makar men digbali hokar 10ven sthan men tatha panchmesh surya uchch ka hokar lagn men baitha hai. navmesh brihaspati apni uchch kark rashi men chaturth men sthit hai. is yog ki purnata yahin samapt nahin hoti. agar ham navansh kundli ka bariki se adhyayan karen to ye tinon hi grah surya, mangal aur brihaspati navansh kundli men apni rashi ya ek-dusre ki rashi men baithe hain. yah ek sanpurn gyani v yogi hone ke jyotishiya lakshan hain. ab bat karte hain yogi se mahan sadhak banane vale grahon ki. jyotish men gahrai aur mahan sadhna ka bhav hai, ashtam bhav. mesh lagn men lagnesh aur ashtamesh ek hi grah mangal hota hai arthat ashtamesh bhi uchch ka hai. atah ashtam bhav men sthit rahu v shani grah ke bare men agar ham vichar karte hain to shani ayu ka pradata grah hai tatha apne sabse achche bhav ashtam men sthit bhi hai aur lagnesh mangal ki rashi men baithakar lagnesh mangal ko apni tisri drishti se dekh bhi raha hai tatha vrishchik rashi men 06:49 arthat apne hi nakshatra anuradha men vakri hokar sthit hai jo ki is kundli men shani ki vishalta ka parichayak hai.
isi ke sath baitha hua dusra grah rahu bhi vakri avastha men hote hue 14:54 kala ka hokar shani ke hi anuradha nakshatra men sthit hai. shani is kundli men karmesh aur labhesh bhi hai jo ki inke karya kshetra aur usse milne vale labh ki mahanta ko darshata hai. san 1992 se shani ki 19 varsh ki mahadsha bhi chal rahi hai. isi shani ki mahadsha men inhonne faundeshan ko ek vishalkay rup dene men madad ki hai. 150 deshon men aurt auf living ki shakhaen hain, jahan karya chal raha hai. sare karya trast ke madhyam se hote hain. art auf living sanstha prakritik vipda men sahayta ka karya karti hai. iska mukhyalay jineva men hai. shrilanka ke jafna aur vyakti kalova men shanti mishan ke tahat karya ho raha hai. 1999 men iski shuruat hui. punah inki janmapatri ka adhyayan karte hain to inmen kai sthan parivartan bhi dikhai dete hain. pahla sthan parivartan ashtamesh mangal v dashmesh shani ka hai. dusra sthan - parivartan dvitiyesh shukra v tritiyesh budh ka hai. yah sthan parivartan jis vyakti ki kundli men hota hai, vah vyakti apne sundar aur sukshm gyan ke parakram se dhan arjit karne men jivan men safal hota hai tatha apne karya ki gahrai se apne karya kshetra ko ek vishalatam rup dene men saksham hota hai. ab ham bat karte hain ki inki kundli men kaun sa aisa yog hai jiski vajah se inhonne apne desh men hi nahin balki videsh men bhi apni sanstha ko yahan se jyada age barhaya.
jyotish men videsh ka bhav hai 3, 9 aur 12van. yahan par 12van bhav videsh men jivan ko darshata hai tatha tisre bhav ki mahatta do karnon se hoti hai. pahla karan yah hai kin 3, 4 ka dvadash bhav hota hai arthat chaturth ka vyay aur tisra bhav 12ven ka chautha bhav bhi hota hai arthat videsh ka ghar. ab bat karte hain 9ven bhav ki. videsh ke lie 9ven bhav ke do karan mane jate hain pahla nauvan bhav, 12ven bhav se 10ven bhav men bhi parta hai. arthat videsh (12van) karm kshetra (10van) bhav bhi navam bhav hota hai. inki janmapatri men 12ven ka svami brihaspati apni purn drishti se 12ven bhav ko dekh raha hai tatha sath hi sath apni 5vin v 7vin drishti se dashmesh shani aur lagnesh mangal ko bhi dekh raha hai. videsh yatraon ka pratinidhitva karne vala anya grah rahu bhi ashtam bhav men baithakar dvadash bhav ko tatha dvadshesh brihaspati ko bhi dekh raha hai. navansh kundli men bhi chandrama navmesh hokar dvadash men sthit hai. inki janm patri men sthit grahon ke inhin yogon ke karan desh men hi nahin varan videsh men bhi jyada khayati prapt hui. aiye, ab dekhte hain inki janm patrika ke kuch mahatvapurn yog.
hans yog : yadi janm patrika men svarashi athva uchch ka hokar brihaspati kendra men sthit ho, to aisa yog banta hai. rajkul men utpann rajyog : yadi janmang men 3 ya usse adhik grah apni uchch rashi men hon, to aisa vyakti rajkul men utpann hokar raja hota hai. mahadani yog : yadi janm patrika men lagnesh ya lagn par navmesh ki drishti ho aur navmesh bhi kendra ya trikon men ho to jatak mahadani hota hai. nishkapat yog : yadi janmapatri men chaturth sthan men shubh grah apne uchch ya mitra ki rashi men hon athva shubh grah ki rashi men hon, to jatak nishkapat hota hai. uprokt visheshtaon ke alava shri shri ravishankar ji ne yog ki ek nai vidhi nikali jise sudarshan kriya kaha jata hai. sudarshan kriya ek upyogi abhyas hai tatha ve apne sadhkon se apeksha karte hain ki ve isko prakat nahin karenge. shri shri ravishankar ke ashtam bhav men pare shani tatha rahu grah ke karan tatha ashtamesh se ashtam arthat tritiyesh budh ki drishti bhi ashtam bhav par parne ki vajah se tatha sudarshanadhari bhagvan vishnu jo ki grahon men brihaspati ka sthan rakhte hain uski drishti bhi ashtam bhav tatha lagnesh ke upar parne ki vajah se shri shri ravi shankar ji is sudarshan kriya ka vikas vishva men pramukh rup se kar paye. kul milakar jyotish ke madhyam se yah nav grah hi hamen kisi mahan vyakti ke jivan ki jubani bata sakte hain.