sitamrhi ka paribhraman, upalabdh sakshya ka adhyayan aur bhaugolik-pauranik vrittant ke adhar par spasht hota hai ki jis van-prant kshetra men jagat janni ne nirvasit hokar lav ko janm diya aur jahan donon bhai lav-kush ne milakar shri ram ka ashvamedhi ghora rokakar yuddh kiya aur bad men sita ji bhu-pravesh kar gain, vah sthan gaya-navada marg par basa manjhve se 8 kimi. aur hisua se karib 10 kimi. dakshin-pashchim hai. gaya aur rajgir ke bich avasthit navada jila ke meskaur prakhand men virajman sitamrhi men prachya itihas sanskriti ki kitni hi baten aj bhi dekhi samjhi ja sakti hain. aise tirtharaj ilahabad se 60 kimi. duri par sant ravidas nagar jila men bhi ek sitamrhi hai to uttar bihar men ek jila sitamrhi ke nam se charchit hai jo sakhndei nadi ke kinare hai.
panjab ka ramtirth mandir parisar, madhya pradesh ka karila kshetra, uttar pradesh ka vidur ke samip sita tirth v jambhkaranya tirth ki prasiddhi bhi ma sita se hai par spasht sakshya aur upalabdh kriti sitamrhi ki aitihasikta ko svatah sthapit-pramanit karta hai. ramayan kalin katha se yah jankari milti hai ki jab shriram ne sita ji ko nirvasit kar diya tab jagat janni ne balmiki ashram ke sannikat aranya bhumi men apna shesh jivan vyatit kiya. aitihasik vrittant se spasht hota hai ki sitamrhi ke pas pravahit nadi ‘tilaiya’ ramayan kalin tamsa hi hai jahan pas ka ganv saray varat (vart) men shri valmiki ka ashram sthal tha. inke gurudev maharshi atri ka ashram tapovan men tha aur aj bhi gaya jile ke 24 prakhand men ek ‘atri’ inhin ke nam se prakhyat hai.
tamsa nadi ke purab narahat ke pas kusha gram kush ki sharn-sthali bani to lav ke nam se dhvanit lavaura ganv ko ajakal ‘lakhaura’ kaha jata hai. angrej sarveyar v puratatvavid alekjendar kaningham, bukanan haimiltan, el. es. es. omaili aur bhartiya vidvanon ke riport ka adhyayan anushilan spasht karta hai ki ramayan kal se purva jalrashi, parvatiya khand v saghan van prantar se parivritt yah ek sadhna sthal raha jahan rajgir se gaya jane ke kram men n sirf tathagat varan unke shishya prashishya ka bhi agaman hua hai. pradhan rajmarg se andar jate hi man puratan smritiyon men vismrit ho jata hai. sitamrhi ka sarvapradhan akarshan hai yahan ka gufa mandir jo ek bare pashar khand ko khodakar banaya gaya hai. is pashan khand men 16 fit lanba v 11 fit chaira ek pashan gufa hai jiske upar ki divar vakrakar hai. pravesh dvar 56 se. mi. chaira aur 130 se. mi. lanba hai. is gufa ki banavat v antrik paelish barabar parvat ke gufa ke ekadam saman hone ke karan prayshah itihasvid ise mauryakalin svikarte hain.
mandir ke thik bahar hi tin sate bare chattan man sita ke bhu-pravesh sthan ke rup men charchit hai. mandir ke bahri divar par ankit vivaran ke anurup san 1954 men is mandir ka navnirman baba shri ram kishun das ji ne karvaya. sitamrhi ke is tirth ki prasiddhi madhyakal se barhi hai, tab se harek sitanvmi, ramnvmi, shravni purnima v sarasvati puja ko yahan vishesh mela laga karta hai. mandir ke piche ka prachin tila ab samatal ho chala hai to mandir ke piche ek bare talab ke pas hi vishal dharmashala ka darshan kiya ja sakta hai jo thakurbari ke nam se bhi kshetra men charchit hai. mandir ke thik sate bajrang bali ke mandir ka nirman kiya gaya hai, age shri chandravanshiya kshetriya mahapanchayat bhavan banaya gaya hai. pradhan dev sthal se karib adhe ki.mi. duri par ek pahari khand v uske talhti men bane ramayan kalin pokhar ko dekha ja sakta hai jiske do taraf purane sirhi bhi shobhit hain. vivaran hai ki isi pokhar men kapra dhokar mata sita usi parvatiya khand men vastron ko sukhati aur varsha ke dinon men unhin kandaraon men svayan ko barsat se bachati thin. vivaran spasht karta hai
ki isi aranya kshetra men lav v kush ne shriram ke ashvamedh yagya ke ashva ko pakar kar bandh diya tha. ise aj bhi raslpur ganv men lambavat pashan stanbh ke rup men dekha ja sakta hai. isi raslpur (rassi se ghora bandhne ke karan raslpur) men age shekh muhammad namak sant ka dargah bana. gadadhar prasad ambasht ‘vidyalankar’ ki kriti ‘bihar darpana’ men iska spasht ullekh hai ki is dargah ka nirman hindu mandir ke sthan par kiya gaya hai.
kahin-kahin aisa bhi ullekh hai ki mata-sita sitamrhi men aur putra dvay raslpur ke parvatiya kandaraon men raha karte the. ajadi ke bad anyanya magdhi tirth ki bhanti yahan ka bhi nav shanrigar hua par upeksha ka alam tab dur hua jab gaya se katakar varsh 1963 men navada jila bana aur yahan ke jilapdadhikari ar. vi. mahto ne yahan ke vikas hetu yathochit prayas kiya tab mandir ke bhumi kshetra ko saf karaya gaya, maiskor prakhand mukhyalay v sitamrhi mandir kshetra men yahan ke aitihasik vrittant ko pashan khand par ankit karaya gaya aur pradhan rajmarg par sitamrhi dvar banaya gaya. aise to yahan sal ke sabhi purnima ko vishesh puja hoti hai par agahan mas men purnima ke utsav men hajaron nar-nari shamil hote hain.
sanprati yahan tin nae devalay banae ja rahe hain. sath hi marg ko aur bhi durust kiya gaya hai. bharat desh ke mauryakalin devalyon men ek hai sitamrhi ka gufa mandir jahan ki divya smriti ghumne valon ke man men sadaiv jivant bana rahta hai. gaya, patna, navada v rajgir-nalanda se sitamrhi jana sahaj hai. iske aspas shrihar shiv mandir, sonsa pahar, pahari dargah-manjhve v kakolat ka jalaprapat bhi paryatak jarur jate hain. sachmuch dharm, itihas v puratatva ka sangam sthal hai sitamrhi, jahan mata sita ki upasthiti ka bodh pratyek din brahm muhurt men hota hai, aur ise sabhi sthaniya dhvani mat se svikarte bhi hain.