sansar bhar ke viron men advitiya, gyaniyon men sarvashreshth, ashtasiddhi ke svami shri ramabhakt hanuman ki aradhna prachin kal se lekar aj tak sanpurn bhartiya prayadvip men nirbadh rup se jari hai jo bhakton ke kalyanarth is bhu-dhara par shiv shankar ke ekadash rudravtar ke rup men avtrit hain. kisi karya ko karne ki urja, shakti, bal v antrik prerna dene vale param kalyanak jo hain vahi hanuman ji hain jo yug yugantar se bhartiya samaj men sanpurn sanatan bhakton ke bich bhakt pravar v bhaktaraj ke rup men pujit hain.
dharm jagat men samanyatah shri hanuman ji ke ek mukh ki pujarchana v sadhna-upasna sarvatra ki jati hai par bal, buddhi, vidya v sadvichar se paripurn aivashvaryayukt shri sanpann hanuman ji ke ‘panchmukh’, ‘sapramukh’ v ‘ekadsh’ upasna ki apni mahatta sanatan sanskriti men puratan hai jismen shri hanuman ji ke panchmukhi rup ki upasna ka vishesh mahatva hai. aise to pure desh men panchmukhi hanuman ke pujan archan ke nae-purane kitne hi sthan hain par in sabon ke bich gaya ke shri vishnupad mandir parisar men virajman panchmukhi hanuman ayufldata hain. shri hanuman se jure kisi prakar ka jap-tap, puja-path, hom-havan se yahan tvarit labh milta hai. gaya ke shri vishnupad ke purane marg jo panchamahalla, suryakund hote aya hai, se shri vishnupad mandir men pravesh karne par shri gayashvari devi mandir ke bad ke angan ke age shri hanuman ji ke panchmukhi rup ka prachin mandir pal kalin hai jiske thik bagal men hi gaya gadadhar ji ka aitihasik devalay virajman hai.
gaya ka gaurav shri vishnupad ke kul 21 devalyon men shri panchmukhi hanuman mandir sadhna upasna ka jagrit sthal hai jahan dur desh ke bhakton ka salon bhar agaman hota rahta hai aur manglvar ko bhakton ke agaman se mela jaisa drishya utpann ho jata hai. is devalay se jure sakshyon ke adhyayan anushilan aur purane jankaron se li gai jankari se spasht hota hai ki puratan kal men shri vishnupad ke pancham devalyon men ek panchmukhi ji ka yah sthan panchkoshi moksh tirth gaya ke gayapal parijnon ke lie khasakar kushti, akhare v malla vidya se jure maharthiyon ke lie ati pujyaniya bana raha aur aj bhi kamobesh yah paranpra jari hai.
pahle shri gadadhar mandir ke bagal men uttar ki or se ek patli sirhi se hanuman ji ke is mandir men pahunch ka rasta thora kashtakar tha. takriban satrah varsh pahle bhakton ki kripa v pujariyon ke sahyog se is mandir ka nav shringar hone ke bad yahan ka kalevar hi badal gaya hai. is kaksh men hanuman ji ki ek murti divar men lagi hai pahle yahin se pravesh dvar tha jinke garbhagrih ke prachin dvar ke upar ‘shriram un shriram’’ ankit hain. jalidar gril lagne se yahan ki shobha men ashatit nikhar a gaya hai. gaya ke khyatnam sahitya sevi pan. mohan lal mahto viyogi ki agadh astha panchmukhi hanuman se juri thi. nae jamane men mandir men seva dene valon men gayapal madho lal gurda batate hain ki pret-badha, vish-shaman, shatru-sankat nivaran, mahamari, amanglnashak, grah dosh, bhut-pichash dosh adi ke nivaran ke lie yah ek manyataprapt sthal hai jahan ke bhakt bharat hi kya videshon men bhi nivas karte hain. mandir men pravesh khand ke sirhi ke kinare par takhe men siddhi vinayak shri ganesh virajman hain. age chabutre ke bad pratham kaksh men ate hi hanumat bhakti ka bhav svatah jagrit hota hai
jahan sankat mochan hanumanashtak, shri hanuman chalisa, shri hanumat sahastranam stotra aur bajrang ban sangamaramar ke plet par ankit kar divar se laga diya gaya hai. yahin takhe par hanuman ji se jure nae-purane pustak v dharm granth hain jiska upyog path karte samay bhakt log bhi karte hain. dakshin mukhi hone ke karan yahan ki mahima bahut hi adhik hai. mandir ke garbhagrih men shri hanuman ji ki pratima lal sindur lepit hai. yahan prabhu ke panchon mukh ka sajiv chitran hua hai.
mantra maharnav ke varnit tathyon ke anusar yahan prabhu ka rup dekha ja sakta hai jinke uttar ka mukh shukar, dakshin mukh nrisinh, purva ka mukh vanar, pashchim ka mukh garur aur upar men samne ka mukh ghore ka hai. vivaran hai ki gaya gadadhar mandir pal raja govid pal (1161-1175 i.) dvara banvae jane ke samay is mandir ko naya rup diya gaya. iske bad takriban sat sau varshon tak mandir ke aise hi rup men puja-path, jap-tap chalta raha aur isi rup ka darshan bhakt shiromni chaitanya mahaprabhu, gurunanak, raja man sinh, maharani ahilyabai sarikhe mahan logon dvara kiya gaya. bad men 1934-35 men bhakton ki sadkripa aur pujari gayapal ke vimarsh se iske shikhar sahit agrabhag ka nav shringar karaya gaya aur tab se yahan ki prasiddhi khub barh gai hai.
aj sanpurn gaya ji mane panchmukhi hanuman ji ke aur bhi tirth sthapit hain par jinki sarvadhik prasiddhi aj tak bani hai, vah hain shri vishnupad ke panchmukhi hanuman ji jahan ki mul pratima matra sava hath lanba aur itna hi chaira bataya jata hai. yahan se jure purane jankar v dharmagyata sva. babu govind lal dhokri batate the ki yah sthan itna faldayi hai ki 21 mangal nishchit samay se kisi karya siddhi ke lie kiya gaya koi path purnata ki prapti avashya kara deta hai aur agar karya nahin hona hai to bich men hi akasmat koi vighn badha a jati hai. aj bhi yahan dur-dur ke sadhak, tantrik, tapasvi v vitragi akar hanuman ji ke shri charnon men apni shraddha nivedit karte hain. shri panchmukhi hanuman ji ke pashchim men shri ram darbar thakur bari ka ullekh avashyak ho jata hai
jahan puratan mahatva ke dev vigrah ke sath palkalin hathi ki utkrisht pratima dekhi ja sakti hai jo kabhi indrapad ki shobha barhata tha. shri hanuman ji ke chaturdik shankracharya math, gadadhar mandir, sakshi mahadev, ahilyabai mandir v shri kal bhairav aur samne men mai lalita devi ka mandir virajit hai. pratyek varsh shri hanuman jayanti (do bar chaitra v kartik mas men), shri ramnvmi, shri sita navmi v vivah panchmi men yahan ki saj-sajja v raunak dekhte banti hai aur is kram men akhand, vishesh bhog v bhandara ki vyavastha bhi ki jati hai.
astu ! desh bhar men varansi, ujjain, chitrakut, prayagraj, ayodhya, haridvar, rameshvaram, jagannathpuri, onkareshvar, gorkhpur, trayambakeshvar, khera, salasar, silvasa, ajmer, kurnul, yamuna nagar, atigupp, banglur, raychur, aujan, kota, kanyakumari, nasik, devaghar jaise khyatiprapt hanuman tirth sthalon ke bich gaya ke shri vishnupad men virajit panchmukhi panchanan hanuman ji ka vishisht mahatva prachya kal se akshunn hai jahan ki yashah kripa se samast klesh ka nivaran ho sarvakarya safal ho jate hain. mangal murti maruti nandan. sakal amangal mul nikandan..