om gan ganptye namah gajannan bhutgnadi sevitan kapitthajambuflcharu bhakshanam umasutan shokvinashkarkan namami vighneshvar pad pankajam..
arthat
he gaj ke sir vale, sabhi ganon dvara pujit kaith aur jamun khane vale, shok ka vinash karne vale parvati putra vighneshvar ganpti main apke charan kamlon men naman karta hanu.
shri ganesh nam vyakhya
ganpti shabd do shabdon gan aur pati se milakar bana hai. maharshi panini ke anusar ath vasuon ke samuh ko gan kahte hain. vasu ka abhipray disha svami aur dikpal se hai. atah ganpti ka arth hai dishaon ke devta. dusre devta bina ganpti ki agya ke puja sthal par nahin pahunchte isilie kisi bhi shubhkarya ya devpujan ka arambh ganpti ki puja kie bina nahin kiya jata.
jab ganpti sabhi dishaon ki badhaon ko dur kar dete hain tabhi dusre upasya dev puja sthal par pahunchte hain. ise mahadvarpujan ya mahagnpti pujan bhi kahte hain. kuch vidvanon ke anusar un shabd ka arth ganesh hi hai. islie pratyek mantra ke arambh men hi ganpti ka nam a jata hai. bhagvan ganpti ke namon men ganesh, ganpti, vighnaharta aur vinayak sarvapramukh hain.
pauranik kathaen
pauranik kathaon ke anusar ganesh ji ki riddhi, siddhi aur buddhi ye tin patniyan mani gai hain tatha kshem (aishvarya) aur labh do putra hain. inke pita shiv, mata parvati tatha bhai kartikey mane gae hain. pauranik manyataon ke mutabik bhagvan ganesh ka janm arbud parvat (maunt abu) yani arbudaranya par hua tha.
isilie maunt abu ko ardhakashi bhi kaha jata hai. skand puran ke arbud khand men ganesh ke pradurbhav ki katha is prakar hai. man parvati ne bhagvan shankar se putra prapti ka var manga. bhagvan shankar ne unhen putra prapti ka vardan diya. 33 karor devi-devtaon ke sath bhagvan shankar ne arbudaranya ki parikrama ki.
rishi-muniyon ne devi-devtaon ke sahyog se gobar ganesh ki pratima sthapit ki jo aj siddhignesh ke nam se jana jata hai. is mandir ko lambodar mandir, siddhivinayak mandir, gobar ganesh mandir ya fir siddhi ganesh mandir ke nam se jana jata hai. bhagvan shiv ne pure parivar ke sath is jagah par vas kiya islie ise vasthan ji tirth ke nam se bhi jana jata hai.
shri ganesh ji ka janm bhadrapad shukla chaturthi ko abhijit muhurt men vrishchik lagn men hua. unka janmotsav vinayak chaturthi ke nam se vishesh harshollas se manaya jata hai. ganesh chaturthi ka tyauhar das din pashchat anant chaturdashi ke din inki mitti se banai gai murtiyon ko jal men visarjit karke sampann kiya jata hai.
shiv puran men varnit katha ke anusar ek bar mata parvati jab snan ke lie ja rahi thin to angarakshakon ki anupasthiti ke chalte unhonne haldi ka ek but banaya aur usmen jivan dal diya aur is prakar se unhonne apni suraksha hetu bhagvan shri ganesh ko janm diya aur parvati ne ganesh ko adesh diya ki vah kisi ko bhi ghar ke andar nahin ane dane aur ganesh ne agyakari banakar man ke adesh ka palan kiya.
kuch samay bad jab bhagvan shiv bahar se ghar laute to ganesh ne unhen andar jane se roka. bhagvan shiv ko is bachche par krodh aya. bhagvan shiv ne ganesh ka sir trishul se kat diya. jab mata parvati bahar ayin to ve apne putra ka mrit sharir dekhakar atyant dukhi huin aur unhonne bhagvan shiv se agrah kiya ki vah ganesh ko punarjivit karen. tatpashchat bhagvan shiv ne hathi ka sir ganesh ke dhar men jor diya aur ganeash ji punarjivit ho gaye.
anya pauranik kathaen
ek dusri katha ke anusar ek gajasur namak daitya ne tapasya karke bhagvan shiv se yah var manga ki bhagvan shiv unke pet men nivas karen. bhagvan shiv ne tathastu kaha aur vah gajasur ke pet men kaid ho gaye. mata parvati ne bhagvan vishnu se shiv ka pata pucha to unhonne bataya ki vah gajasur ke pet men hain.
unhonne nandi bail ko gajasur ke samne nritya karne ko bheja aur svayan bansuri bajane lage. isse prasann hokar gajasur ne bansuri bajane vale ko prasann hokar kaha ki vah kya chahta hai, is par bansuri vadak (vishnu) ne kaha ki apne pet men kaid bhagvan shiv ko mukt karo. gajasur samajh gaya ki bansuri vadak aur koi nahin apitu svayan vishnu hain.
vah bhagvan shri hari ke charnon men gir para aur usne shiv ko mukt karke shiv se kaha ki meri antim ichcha yah hai ki mere marne ke bad bhi sabhi log mujhe yad karen aur mere sir ki puja karen. uske aisa kahne par bhagvan shiv apne putra ko lekar a gaye aur unhonne gajasur ke sar ko katakar apne putra ko laga diya. brahmavaivart puran men varnit ek anya katha ke mutabik shiv ke nirdeshanusar shani ne jaise hi parvati putra ganesh ke janm avasar par drishti dali usi kshan is balak ka sir dhar se alag ho gaya.
shiv aur parvati ko shok-santapt dekh bhagvan vishnu ne ek chote hathi ka mastak is balak ke dhar par jor kar use punarjivit kar diya is balak ka nam isilie ganesh para aur sabhi devtaon ne inhen shakti aur samriddhi ka ashirvad diya.
aisa kaha jata hai ki maharshi vyas ne ganesh se mahabharat likhne ki vinti ki thi. tab ganesh ne is shart par ki yadi maharshi vyas bolte hue rukenge nahin to unhen unka yah agrah svikarya hoga. tatpashchat maharshi vyas bina ruke anavarat bolte gaye aur ganesh ji likhte gaye. likhte-likhte achanak unki kalam tut gai to unhonne shighrata se apna ek dant torakar use kalam ke rup men prayog karke likhna jari rakha. tabhi se ve ekdant nam se prasiddh hue.
ek din vishnu ke avtar bhagvan parshuram bhagvan shiv se milne ke lie gaye to marg men ganesh ne unhen rok liya. parshuram ne jab farse se ganesh par prahar kiya to shiv dvara pradatt is farse ko samman dene hetu ganesh ji age se nahin hate aur is prakriya men inhonne apna dant kho diya.
ek bar devtaon men ganon ke mukhiya ka nirnay karne hetu pratiyogita hui. is pratiyogita men ganon ko pure brahmand ki pariekrama karke shighratishighra vapas bhagvan shiv ke charnon men pahunchna tha. sabhi devta apna-apna vahan lekar is pratiyogita men kud pare. ganesh ji ne brahmand ki parikrama karne ki apeksha bhagvan shiv ki hi parikrama kar li aur yah kaha ki shiv ki parikrama brahmand ki parikrama hai.
bhagvan shiv ganesh ke is uttar se santusht hue aur unhonne ganesh ko vijeta ghoshit karke ganpti ke pad par niyukt kar diya. tab se hi pratyek karya ke shubharambh jaise devpuja, vyapar ka arambh, prarthana, janmakundali rachna, vivah, grih pravesh, shiksharambh, yagyaopvit, karnaveddh ityadi sabhi shubh avsron par ganpti ki puja karna parmavashyak hai.
shri ganeshji ki pujan samagri
unhen prasann karne hetu laddu, lal chandan, lal pushp, durva adi arpit kie jate hain. unhen laddu aur jamun vishesh rup se priya hain.
ganesh ki aradhna ke lie prayog kiye jane vale ganpti sahastranam ke pratyek nam ka alag abhipray hai aur yah bhagvan ke bhinna-bhinn rupon ko prakat karta hai.
vighnanashak shri ganesh mantra
adi pujya ganpti ki vandana men likha gaya nimnankit shlok sab hi karyon men ane vale vighnon ko dur karta hai.
vakratund mahakay suryakoti samaprabhah.
nirvighnam kurume dev sarvakaryeshu sarvada..