shashthi devi vrat (30 disanbar 2011) pan. brajkishor sharma brajvasi shashthi devi ka vrat pratyek mas men shashthi tithi ke avasar par yatnapurvak karne v manane ka vidhan hai. balkon ke prasav grih men chathe din, ikkisven din tatha annaprashan ke manglik avasar par bhi shashthi devi vrat ka vidhan devi bhagavat men varnit hai. bhagvti shashthi mul prakriti ke chathe ansh se prakat hone ke karan ‘shashthi’ devi nam se prasiddh hai. devarshi narad ji ke puchne par bhagvan narayan ne svayan shrimukh se dharmadev ke mukh se varnit upakhyan ko narad ji ko sunaya. upakhyan v puja vidhi priyavrat namke ek raja ho chuke hain. unke pita ka nam tha - svayambhuv manu.
priyavrat yogiraj hone ke karan vivah karna nahin chahte the. tapasya men unki vishesh ruchi thi. parantu brahmaji ki agya tatha satprayatn ke prabhav se unhonne vivah kar liya. mune ! vivah ke bad sudirgh kalatak unhen koi santan nahin ho saki. tab kashyapji ne unse putreshtiyagya karaya. raja ki preysi bharyaka nam malini tha. muni ne unhen charu pradan kiya. charubhakshan karne ke pashchat rani malini garbhavati ho gayin. tatpashchat suvarn ke saman pratibhavale ek kumar ki utpatti hui; parantu sanpurn angon se sanpann vah kumar mara hua tha. uski ankhen ulat chuki thin. use dekhakar samast nariyan tatha bandhvon ki striyan bhi ro parin. putra ke ashay shok ke karan mata ko muchrcha a gayi. mune !
raja priyavrat us mrit balak ko lekar shmashan men gaye. us ekantbhumi men putra ko chati se chipkakar ankhon se ansuane ki dhara bahane lage. itne men unhen vahan ek divya viman dikhai para. shuddh sfatik mani ke saman chamkne vala vah viman amulya ratnon se bana tha. tej se jagmgate hue us viman ki reshmi vastron se anupam shobha ho rahi thi! anek prakar ke adbhut chitron se vah vibhushit tha. pushpon ki mala se vah susajjit tha. usi par baithi hui man ko mugdh karne vali ek param sundri devi ko raja priyavrat ne dekha. shvet champa ke ful ke saman unka ujjaval varn tha. sada susthir tarunya se shobha pane vali ve devi muskara rahi thin. unke mukh par prasannata chayi thi. ratnamay bhushan unki chavi barhaye hue the. yogshastra men parangat ve devi bhakton par anugrah karne ke liye atur thin. aisa jan parta tha ve mano murtimti kripa hon. unhen samne virajman dekhakar rajane balak ko bhumi par rakh diya aur bare adar ke sath unki puja aur stuti ki. narad ! us samay skand ki priya devi shashthi apne tej se dedipyaman thin. unka shant vigrah grishmakalin surya ke saman chamchma raha tha. unhen prasann dekhakar raja ne pucha.
raja priyavrat ne pucha - shushobhne ! kante ! suvrate ! vararohe ! tum kaun ho, tumhare patidev kaun hain aur tum kiski kanya ho? tum striyon men dhanyavad evan adar ki patra ho. narad ! jagat ko mangal pradan karne men pravin tatha devtaon ke ranmen sahayta pahunchane vali ve bhagvti ‘devsena’ thi. purva samay men devta daityon se grast ho chuke the. in devi ne svayan sena banakar devtaon ka paksh le yuddh kiya tha. inki kripa se devta vijyi ho gaye the. ataev inka nam ‘devsena’ par gaya. maharaj priyavrat ki bat sunakar ye unse kahne lagin. bhagvti
devsena ne kaha - rajan! main brahmaki mansi kanya hun. jagatapar shasan karne vali mujh devi ka nam ‘devsena’ hai. vidhata ne mujhe utpann karke svami kartikey ko saunp diya hai. main sanpurn matrikaon men prasiddh hun. skandki pativrata bharya hone ka gaurav mujhe prapt hai. bhagvti mul prakritike chathe ansh se prakat hone ke karan vishva men devi ‘shashthi’ namse meri prasiddhi hai. mere prasad se putrahin vyakti suyogya putra, priyahin jan priya, daridri dhan tatha karmashil purush karmon ke uttam fal prapt kar lete hain. rajan ! sukh, dukh, bhay, shok, harsh, mangal, sanpatti aur vipatti - ye sab karm ke anusar hote hain. apne hi karm ke prabhav se purush anek putron ka pita hota hai aur kuch log putrahin bhi hote hain. kisi ko mara hua putra hota hai aur kisi ko dirghajivi - yah karm ka hi fal hai. guni, anghin, anek patniyon ka svami, bharyarhit, rupvan, rogi aur dharmi hone men mukhya karan apna karm hi hai. karm ke anusar hi vyadhi hoti hai aur purush arogyavan bhi ho jata hai. ataev rajan ! karm sabse balvan hai- yah bat shruti men kahi gayi hai. mune ! is prakar kahakar devi shashthi ne us balak ko utha liya aur apne mahan gyan ke prabhav se khel-khel men hi use punah jivit kar diya.
ab raja ne dekha to suvarn ke saman pratibhavala vah balak hans raha tha. abhi maharaj priyavrat us balak ki or dekh hi rahe the ki devi devsena unse anumti le chalne ko taiyar ho gayin. brahman ! us samay devi ne raja se karmanirmit vedokt vachan kaha. devi ne kaha- tum svayambhuv manuke putra ho. triloki men tumhara shasan chalta hai. tum sarvatra meri puja karao aur svayan bhi karo. tab main tumhen kamal ke saman mukhvala manohar putra pradan karungi. uska nam suvrat hoga. usmen sabhi gun aur vivekashakti vidyaman rahegi. vah bhagvan narayan ka kalavtar tatha pradhan yogi hoga. use purvajanm ki baten yad rahengi. kshatriyon men shreshth v balak sau ashvamedh yagya karega. sabhi uska samman karenge. uttam bal se sanpann hone ke karan vah aisi shobha payega, jaise lakhon hathiyon men sinh. vah dhani, guni, shuddh, vidvanon ka prembhajan tatha yogiyon, gyaniyon evan tapasviyon ka siddh rup hoga. triloki men uski kirti fail jayegi. vah sabko sab sanpatti pradan kar sakega. is prakar raja priyavrat se kahne ke pashchat bhagvti devsena unhen putra pradan karne ke liye tatpar ho gayin.
raja priyavrat ne puja ki sabhi baten svikar kar lin. yon bhagvti devsena ne unhen uttam var de svarg ke liye prasthan kiya. raja bhi prasann hokar mantriyon ke sath apne ghar laut aye. akar putravishgyayak vrittant sabse kah sunaya. narad ! yah priya vachan sunakar stri aur purush sab-ke-sab param santusht ho gaye. raja ne sarvatra putra-prapti ke upalakshya men manglik karya aranbh kara diya. bhagvti ki puja ki. brahmanon ko bahut-sa dhan dan kiya. tabse pratyek mas men shuklapaksh ki shashthi tithi ke avasar par bhagvti shashthi ka mahotsav yatnapurvak manaya jane laga. balkon ke prasvgrih men chathe din, ikkisven din tatha annaprashnke shubh samayapar yatnapurvak devi ki puja hone lagi. sarvatra iska pura prachar ho gaya. svayan raja priyavrat bhi puja karte the. upchar arpan karne ke purva ‘un hrin shashthidevyai svaha’ is mantra ka uchcharan karna vihit hai. pujak purushko chahiye ki yathashakti is ashtakshar mahamantra ka jap bhi karen.
tadanantar manko shant karke bhaktipurvak stuti karne ke pashchat devi ko pranam kare. fal pradan karne vala yah uttam stotra samved men varnit hai. jo purush devi ke uparyukt ashtakshar mahamantra ka ek lakh jap karta hai, use avashya hi uttam putra ki prapti hoti hai. jo purush bhagvti shashthi ke is stotra ko ek varsh tak shravan karta hai, yah yadi aputri ho to dirghajivi sundar putra prapt kar leta hai.
jo ek varsh tak bhaktipurvak devi ki puja karke inka yah stotra sunta hai, uske sanpurn pap vilin ho jate hain. mahan vandhya bhi iske prasad se santan sukh karne ki yogyata prapt kar leti hai. vah bhagvti devsena ki kripa se guni, vidvan, yashasvi, dirghayu evan shreshth putra ki janni hoti hai. kakavandhya athva mritavatsa nari ek varsh tak iska shravan karne ke falasvarup bhagvti shashthi ke prabhav se putravti ho jati hai. yadi balak ko rog ho jaye to usak mata-pita ek mas tak is stotra ka shravan karen to shashthi devi ki kripa se us balak ki vyadhi shant ho jati hai. is vrat men pratahkal hi nitya naimittik karmon se nivritt hokar vidhivat sankalp len ki aj main amuk kamna siddhi ke lie man shashthi devi ke vrat ka palan karunga.
is prakar sanpurn din shashthi devi ke mantra ka smaran karta hua shodshopchar pujan suryast se praranbh kar man ki aradhna v stotradi ka path karen aur punah man ko arpit naivedya men se balak balikaon v brahmanon ko dakshina sahit naivedya arpan kar svayan bhi prasad grahan karane, to nishchit hi man ki anupam kripa hoti hai. ratri men jagaran karte hue mantra jap v sundar charitron ka baranbar shravan karen. yah sanpurn kamnaon ko siddh karne vala vrat hai.