shanivar vrat shanivar vrat kisi bhi shanivar se praranbh kiya ja sakta hai. manav apne kalyan ke lie samay ka chintan n kar shubhta v mangal hetu vrat ka palan karen. shanivar ka vrat shani, rahu aur ketu grahon ki kop-shanti ke lie kiya jata hai. maharshi yagyavaklya ne in tinon grahon ke svarupon ka varnan karte hue aisi sammati pradan ki hai. shani vrat ka palan karne vale vyapar vriddhi, dhan, sukh-shanti samriddhi ko to prapt hote hi hain, apitu unke jivan men shani dev ki kripa se man pratishtha, aishvarya evan dharm, arth, kam, moksh rupi purusharth bhi sahjta se siddh ho jate hain. shanivar ka vrat am jivan men visheshtah shani ki sarhesati, shani ki dhaiyya, shani ki mahadsha-antardasha, pratyantardasha se grasit jatak hi karte hain, parantu aisa bahut vidvanon ka manna hai ki shani vrat sabhi ko karna chahie. shri shani dev apne vishisht gunon ke karan navagrahon men sarvadhik charchit hai. puranon ke anusar shani bhagvan surya ke putra hain.
chaya (savarna) inki mata hain. bhartiya jyotish men shani ko krur grah mana gaya hai. inki drishti men jo krurta hai, vah inki patni ke shap ke karan hai. is sandarbh men brahmavaivartapuran men katha is prakar hai, 'bachpn' se hi shanidev atyant dharmik hone ke karan sansarik vishyon se sada dur rahte the. vyask hone par inki ichcha n hone par bhi inka vivah kar diya gaya. patni param sundri, pativrata evan tejasvini thi. parantu shanidev unki or kabhi ankh uthakar bhi nahin dekhte the. ek rat jab patni shringar karke unke nikat putra-prapti ki abhilasha se ai tab bhi shanidev ne unki or dhyan nahin diya tatha vah ishvar ke chintan men nimagn rahe. apni upeksha se kruddh hokar sadhvi ne pati shanidev ko shap de diya- 'ap jis par bhi drishti daloge vah nasht ho jaega' sati ka shap amogh hota hai.
uske pratikar ki shakti kisi men bhi nahin hai. isi se shani ki drishti sanharak ban gai. shastriya vichardhara se 'shani' ke adhidevta unke bhai 'yamraj' tatha pratyadhidevta 'prajapti' hain. lekin jyotish ke suprasiddh granth 'lal kitab' ne bhairav ji ko shani ka devta mana hai. kaliyug ke niyantrak grah hone ke karan aj shanidev ka svatantra rup se pujan prachlit ho gaya hai. shani-mandiron ka nirantar nirman hone se unhonne navagrahon ki sima langhakar janastha men sanpurn devatva grahan kar liya hai. adhyatmik jyotish men shani ko purvajanm ke sanchit karmon ka adhishthata bataya gaya hai.
shani ki sarhesati, dhaiyya athva shani ki dasha men hamen pichle dushkarmon ka hi dand prapt hota hai. jis prakar ag men tap kar sona kundan ho jata hai usi prakar shani balpurvak prayashchit karva ke jivatma ko shuddh kar deta hai. bhautik drishti men shani bhale hi atikrur dikhai pare parantu sachche arthon men vah hamari agni-pariksha lekar hamen ishvar ke samip le jate hain. sahi maynon men shani ishvariya shasan ke 'dandadhikari' hain.
nitya pratah dhyanpurvak shani stotra ka path karne se shani ki sarhesati ya dhaiyya men shanikrit pira shant ho jati hai. shanivar ke din pipal ke per ki jar ko sinchakar uske niche dip-dan karne ke bad vriksh ki sat parikrama karne se bhi shani ki badha dur hoti hai. kale ghore ki nal athva nav ki kil se bane challe ko dahine hath ki madhyama men dharan karna hitkari siddh hota hai.
shani ki upasna-shani mantra ke jap se shani ki pratikul sthiti men prakop ka shaman hone ke sath-sath sukh samriddhi ki prapti hoti hai atah shani ki prasannata ke lie unke nimn mantra ka jap karna shighra faldayak siddh hoga -kk ain hrin shrin shanaishcharay namah . kaliyug se purva matra 23000 jap karne se mantra siddh ho jata tha parantu kaliyug men pap ka bal dharm se char guna adhik hone ke karan uparyukt sankhya ke char guna 92000 jap karne ke uprant hi mantra ka shastrokt fal prapt hoga. jap ke bad dashansh havan - dashansh tarpan - dashansh marjan evan dashansh brahman bhojan bhi avashya karayen. jap rudraksh ki mala par karna uchit rahega.
havan shami ke samidha se karen. shani ki shanti hetu nilam, loha, tel, urad, kala kapra, kulthi, kali gay, bhains, kharaun (charnpaduka), kala til, surma nile rang ke pushp, kasturi aur svarn adi ke dan ka shastriya vidhan hai. ap apni samarthya evan suvidha ke anusar vastuon ka dan shanivar ko kar sakte hain. jyeshth mas ki bhishan garmi men kisi nirdhan ke nange pairon men chappal athva juta pahnana bahut achcha fal dega. shani ke pratinidhi sevak (naukr) ka dhyan rakhen. shani ke vahan kaue ko nitya bhojan se purva gras dene se bari rahat milti hai.
shanivar ko karve tel se bhare lohe ke patra men apni pratibinb dekhakar uska dan dene se shanikrit arisht ka nivaran hota hai. shanivar ko lohe ka tava aur chimta dan karne se bhi shani ke karan ho raha kasht kam ho jata hai. shani se pirit vyakti sharab bilkul n pie, anyatha koi bhi upay falibhut nahin hoga. shani vayu tatva ka svami hai. iski viprit sthiti se ahankar udit ho jata hai jo ki bad men vinash ka karan ban jata hai. pratikul shani krodhavesh ke karan kalh-kalesh utpann karta hai, atah vyakti ko dhairya, sanyam aur vivek se kam lena chahie. shani ke ashubh hone par jaldabaji men kie gae faisle galat sabit hote hain. islie uttejna men nirnay lene se bachen.
jokhim lene par labh ke sthan par hani hi hath lagti hai. vastutah shani hamare dushkarmon ke lie hi dandit karte hain. shani ki sarhesati, dhaiyya adi pratikul dasha men apne sanchit karmon ka fal avashya bhogna parta hai. ve nishpaksh nyayadhish ki tarah hamen galat kamon ke lie hi saja dete hain. is prakar shani praniyon ko satkarm karne hetu prerit karte hain. unki adalat men sadaiv insaf hota hai. jis shanivar se vrat praranbh karna ho, us din dainik krityon ko purn kar shastrokt vidhi se shani vrat ke palan hetu sankalp avashya karen. sankalp hi siddhiyon ka mul hai.
shanidev ke pujan se purva ganesh gauryadi dev pujnoprant shani dev ka pujan karne se uttam labh ki prapti hoti hai. isdin shani ke stotra, shani charitra evan katha adi ka shravan karen. vratktha : ek samay surya, chandrama, mangal, budh, brihaspati, shukra, shani, rahu evan ketu adi grahon men paraspar vivad ho gaya- ki ham sab men bara kaun hai? sabhi grah apne apko bara kahne lage. devraj indra grahon ka yah prashn sunakar bhaybhit ho gae tatha kahne lage ki mujhmen itni samarthya nahin ki main kisi ko chota batla sakun. is samay prithvi par raja vikramaditya hain, ve sabki samasyaon ka samadhan atyant buddhimani se karte hain.
atah ap sabhi unke pas jaen. sabhi grah devta svarg lok se chalakar vikramaditya ki sabha men pahunche tatha apna prashn raja ke samne rakha. vivad niptane ke lie raja vikramaditya ne ek upay socha. raja ne sona, chandi, kansa, pital, sisa, ranga, jasta, abhrak tatha loha nau dhatuon ke nau asan banvae tatha sabhi asnon ko unke mulya ke anusar vichaya gaya. iske pashchat raja ne navagrahon se kaha ki ap sab apna-apna asan grahan karen. jiska asan sabse age vah sabse bara tatha jiska asan sabse piche vah sabse chota janie. loha ka asan sabse piche tha jo shanidev ka asan tha islie shanidev ne socha ki raja ne mujhe sabse chota bana diya hai.
raja ke is nirnay par shanidev ko bahut krodh aya. unhonne kaha ki raja tu mere parakram ko nahin janta. surya ek rashi par ek mahina, chandma sava do din, mangal derh mahina. budh aur shukra ek mas ke lagabhag brihaspati terah mahine vicharan karte hain parantu main ek rashi par dhai varsh tatha tin rashiyon par lagatar sarhe sat varsh tak rahta hun. bare-bare devtaon ko bhi mainne bhishan dukh diya hai. suno rajan- ramchandra ji ko sarhesati ai to unhen banvas ho gaya. ravan par ai to ram ne vanron sahit uski lanka par charhai kar uske kul ka sarvanash kar diya. he rajan ! tumne mujhe apmanit kiya hai.
atah ab tum savdhan rahna. raja vikramaditya ne kaha - jo kuch bhagya men hoga dekha jaega. aisa sunakar sabhi grah apne-apne sthan ko chale gae. kuch kal vyatit hone par jab vikramaditya par sarhe sati ai to shanidev ghoron ke saudagar banakar sundar ghoron ke sath raja vikramaditya ki rajdhani men ae. jab raja ne ghoron ke saudagar ke ane ki khabar suni to unhonne apne ashvapal ko achchi-achchi nasla ke ghore kharidne ki salah di. ashvapal itne achche dhore dekhakar tatha unka mulya sunakar chakit ho gaya tatha turant hi raja ko suchna di. raja vikramaditya ne un ghoron ko dekha tatha un ghoron men se ek achchi nasla ke ghore ko chunakar savari ke lie us par charhe. raja ke pith par charhte hi ghora teji se bhaga. ghora bahut dur tak ghane jangal men jakar raja ko chorakar antardhyan ho gaya.
iske pashchat raja vikramaditya akele jangal men bhatkte rahe. bhukh pyas se vyakul raja ne ek gvale ko dekha. gvale ne raja ko pani pilaya. raja ne prasann hokar apni anguli se ek anguthi nikalakar gvale ko di tatha svayan shahar ki or chal diye. raja shahar men jakar ek seth ki dukan par jakar baith gae tatha unhonne use apna nam vika bataya. seth ne use ek kulin vyakti samajhakar jaladi pilaya, bhagyavash us din seth ki dukan par bahut bikri hui. seth use bhagyavan purush samajhakar apne ghar bhojan ke lie le gaya. bhojan karte samay raja ne ek ashcharyajanak ghatna dekhi, jis khunti par har latak raha tha vah khunti har ko nigal rahi thi.
bhojan ke pashchat jab seth kamre men aya to use khunti par har nahin mila. usne socha ki vika ke atirikt kamre men koi nahin aya atah usne hi har chori kiya hai. parantu vika ne har ki chori se mana kar diya. tab kuch vyakti use pakar kar nagar faujdar ke pas le gae. faujdar ne use raja ke samne upasthit kiya tatha kaha ki yah vyakti bhala pratit hota hai kintu seth is par chori ka arop laga raha hai. raja ne agya di ki iske hath-pair katvakar chaurangiya kiya jae. raja ki agya ka turant palan hua tatha vika ke hath pair kat diye gae.
kuch kal vyatit hone par ek teli ne raja ko dekha tatha dayavash vah use apne ghar le gaya. teli ne use kolhu par baitha diya. vika us par baitha hua apni jaban se bailon ko hankta rahta tha. is kal men raja ki shani ki dasha samapt ho gai. varsha ritu ke samay chaurangiya raja vikramaditya malhar rag gane laga. yah rag sunakar shahar ke raja ki priya putri man bhavni uski vani par mugdh ho gai. rajakanya ne apni dasi se malhar rag gane vale ki khabar lane ke lie bhej diya.
dasi sare shahar men ghumti rahi. jab vah teli ke ghar ke paksh se nikli to usne dekha ki raja chaurangiya malhar rag ga raha hai. dasi ne lautakar rajkumari ko sab vritant kah sunaya. usi samay rajkumari manbhavni ne apne man men yah pran kar liya ki chahe kuch bhi ho main isi chaurangiya ke sath vivah karungi. pratahkal hote hi dasi ne jab rajkumari manbhavni ko jagaya to vah anashan vrat lekar bistar par pari rahi. rajkumari ki anashan ki bat dasi ne jakar rani ko batai. rani aisa sunakar rajkumari ke pas ai aur putri se karan pucha. rajkumari boli -mata mainne yah pran liya hai
ki teli ke ghar jo chaurangiya hai main usse vivah karungi. mata ne sunakar ashcharya vyakt kiya aur kaha ki kya tu pagal hui hai? tera vivah to kisi bare raja se hoga. rajkumari boli- he mata! yah mera atal pran hai jise main nahin todungi. chintit ho rani ne yah bat raja ko batai. raja ne putri ko samjhaya- he putri ! ye kaisi jid hai tumhari? tumhara vivah to kisi bare raja se hoga. tumhen aisi bat nahin sochni chahie. parantu rajkumari bhi apne pran par adig thi. usne kaha-pitaji pran de sakti hun par apna pran nahin tor sakti. yah sunakar raja ne kaha- yadi tere bhagya men aisa likha hai to yahi sahi . raja ne teli ko bulakar kaha ki tere ghar jo chaurangiya rahta hai main apni putri ka vivah uske sath karunga.
teli ne ashcharya se kaha-maharaj ap ye kya kah rahe hain?
kahan rajkumari aur kahan ek chaurangiya. raja ne kaha- ye sab bhagya ka khel hai. tum jakar vivah ki taiyariyan karo. raja ne shubh muhurt dekhakar rajkumari ka vivah chaurangiya ke sath kar diya. rat ko jab vikramaditya mahal men so rahe the to shanidev ne vikramaditya ko svapn men darshan die aur kaha- he raja ! mujhe chota batlakar tumne kitne kasht uthae. raja ne shanidev se kaha prabhu mere apradh ke lie mujhe kshama kar do. shanidev raja se prasann ho gae tatha unhonne raja ko kshama kar diya aur raja ko uske hath -pair vapis kar die. tab raja ne hath jorakar shanidev se vinay ki - he shanidev ! meri apse vinti hai
ki apne jaise kasht mujhe die aise kisi ko kabhi nahin dena. shanidev ne prasann hokar kaha- rajan! tumhari vinti mujhe svikar hai. jo vyakti nitya prati mera dhyan karega. meri katha sunega, kahega use meri dasha men kabhi koi dukh nahin hoga tatha jo bhi manushya pratidin mera dhyan kar chitiyon ko ata dalega uske sabhi manorath purn honge. yah kahakar shanidev antardhyan ho gae. pratahkal jab rajkumari manbhavni ki ankh khuli to usne chaurangiya ko hath-pair sahit dekha to uske ashcharya ki sima n rahi. usne vikramaditya ko jagaya aur iska karan pucha. tab raja ne sara vritant rajkumari ko kah sunaya. yah sunakar rajkumari ati prasann hui. pratah kal manbhavni ki sakhiyon ne pichli ratri ka hal-chal pucha to usne ratri ki ghatna ka tatha uske hath-pair sahi ho jane ka sara vritant kah sunaya. jab us seth ko yah ghatna pata chali to vah vikramaditya ke pas aya aur usne raja se kshama mangi aur kaha- he maharaj ! mainne ap par chori ka jhutha arop lagaya. mujhe kshama kar dijiye.
raja ne kaha-yah sab mere bhagya tatha shanidev ji ke kop ke karan hua, ismen tumhara koi dosh nahin tha. tab seth ne kaha- he maharaj ! yadi apne vastav men mujhe kshama kar diya hai to fir mere ghar chalakar bhojan grahan karen, tabhi mujhe shanti prapt hogi. raja ne kaha-jaisa ap uchit samjhen. vyanjan banvae aur jab raja vikramaditya ko amantrit kiya. jab raja tatha rajkumari bhojan kar rahe the, to sabne ek bari ashcharyajanak ghatna dekhi. jo khunti pahle har nigal chuki thi vahi khunti har ugal rahi thi. bhojan ki samapti par seth ne hath jorakar raja se kaha-maharaj meri shrikanvri nam ki ek kanya hai.
ap use patni ke rup men varan karen. raja vikramaditya ne seth ki bat svikar kar li aur seth ne apni kanya ka vivah raja se kar diya aur bahut si bhent raja ko di, is prakar anandpurvak kuch samay tak seth ke rajya men rahne ke pashchat raja vikramaditya ne apne shvasur raja se kaha ki ab meri ujjain jane ki ichcha hai. kuch din bad vida lekar rajkumari manbhavni, seth ki kanya shrikanvri tatha donon jagah se dahej men prapt anek das-dasi, rath aur palkiyon sahit raja vikramaditya ujjain ki taraf chal pare. jab ve shahar ke nikat pahunche aur ujjainvasiyon ne raja ke ane ka samachar suna to ujjain ki praja agvani ke lie ai. prasannata se raja apne mahal men padhare. sare nagar men bhari utsav manaya gaya aur ratri ko dipmala ki gai. dusre din raja ne apne pure rajya men ghoshna karvai ki shani devta sab grahon men sarvopri hain.
mainne inko chota batlaya isi se mujhko yah dukh prapt hua. is prakar sare rajya men sada shanidev ki puja aur katha hone lagi. raja aur praja anek prakar ke sukh bhogti rahi. jo koi shanidev ki is katha ko parhta ya sunta hai, shanidev ki kripa se uske sab dukh dur ho jate hain. vrat karne vale ko shanidev ki katha ko avashya parhna chahie.