surya putra shani hamare saur mandal men surya se sabse dur sthit grah hai. is karan vah krishn varn, urja rahit aur shit prakriti grah hai. uski drishti ashubh faldayi hoti hai. is bare men pauranik katha ke anusar putra janm sunakar surya dev dekhne ke lie apne rath par savar hokar gaye. bara puraskar milne ki lalsa men sathi age chala. shani ki sarthi par drishti parte hi vah apang ho gaya, jis par surya ne turant hi putra ko tang se pakar kar use brahmand men fenk diya. yah katha pita putra ki shatruta ke karan par bhi prakash dalti hai.
apne naisargik gunon ke anusar shani shit pradatt, dirghakalin v kashtakari rog, eksident, avrodh, avsad aur daridrata ka karak hai. is karan use param ashubh grah mana gaya hai. vah ek rashi ka gochar dhai sal men pura karta hai. uski vinshottari dasha 19 sal ki hoti hai. vah svayan sthit rashi ko sthirta pradan karta hai, parantu vahan se 3, 7, 10 bhav par ashubh drishti dalta hai, jisse vyaktiyon ko lanbe samay tak kasht bhogna parta hai. vah kundli ke 3, 6, 11 bhav men sthit hone par shubh fal deta hai aur gochar men chandra rashi se 3, 6, 11 bhav men shubh fal deta hai. shani makar v kunbh rashi men svakshetri, tula rashi men uchch v mesh rashi men nich ka hota hai. vah vrish aur tula rashi ke lie yogkarak hokar ati shubh fal deta hai. chandrama ko ‘man’ ka karak mana gaya hai.
manashchandrah, shani ke chandrama se 12ven bhav, chandrama ke upar se, tatha chandrama se dusre bhav men gochar karte samay man ko ati vichlit karta hai. is sarhe 7 sal ke samay ko sarhesati kahte hain. shani ka chandrama se chaturth men (dhai varsha) gochar ‘kantak shani’ aur chandrama se ashtam bhav men gochar ko ‘ashtak shani’ kahte hain. uprokt samay sab prakar se kashtakari siddh hote hain. jivan men sarhesati adhikatam tin bar a sakti hai. tisri sarhesati vriddhavastha men jivan ka ant kar deti hai.
vartaman men gochar karte hue shani grah ne 26-1-2017 ko vrishchik rashi se dhanu rashi men pravesh kiya, fir vakri hokar 26-6-2017 ko punah vrishchik rashi men a gaya tha. 28-8-2018 ko vah vakri hokar sidhe chalte hue anttogatva 26-10-2018 ko dhanu rashi men pravesh kar uttarottar age barhta jayega. dhanu rashi men shani ka gochar kark (chandra) rashi men janme vyaktiyon, tula rashi tatha kunbh rashi vale vyaktiyon ke lie shubh faldayi hoga. parantu makar rashi men janme vyaktiyon ki sarhesati, kanya rashi valon ka kantak shani aur vrish rashi valon ke lie ashtam shani ashubh faldayi aur kashtakari hoga.
shani ke 18-4-2018 se 6-9-2018 tak vakri rahne ke samay ashubh falon aur kashton men vriddhi hogi. gyatavya hai ki shani svayan satvik v dharmik grah hai, jisse prasann hokar devadhidev mahadev ne unhen praniyon ke karmafal ka nirnayak banaya tha. atah shani imandar aur dharmik acharan vale vyaktiyon ko adhik kasht nahin deta. vah apna fal dasha aur gochar ke samay deta hai. shani pradat kashton ko sahnshil banane ke lie vyakti ko sarvapratham mans madira ke sevan ka purn tyag kar satvik bhojan lena chahie. suryast ke bad pipal ke per ke niche sarson ke tel ka dipak jalakar rudraksh mala par ek se tin mala ‘‘un shan shanaishcharay namah’’ mantra ka jap karna chahie.
shanivar ko shani mandir men murti ka tailabhishek aur ek dipak prajjvalit kar vahin mantra jap karna chahie. ant men mandir ke samne baithe korhi v apang bhikhariyon ko 4-5 urad ki dal ke bare khane ko dena chahie. paise n den. subah jagne par nimn shlok ka 11 bar path vishesh labhkari hota hai: un konasth pinglo vabhru krishno rodantko yamah, sauri shanaishcharo mandah pipladen sanstutah. aitani dashnabhani pratahutyay ya pathet, shanaishchar krit pira kadachit n bhavishyati..