shabar mantra am gramin bol-chal ki bhasha men aise achuk evan svayansiddh mantra hain jinka prabhav achuk hota hai. shabar mantra shastriya mantron ki bhanti kathin nahin hote tatha ye har varg evan har vyakti ke lie prabhavshali hain jo bhi in mantron ka labh lena chahta hai. thore se jap se bhi ye mantra siddh ho jate hain tatha atyadhik prabhav dikhate hain. in mantron ka prabhav sthayi hota hai tatha kisi bhi mantra se inki kat sanbhav nahin hai. parantu ye kisi bhi vyakti dvara prayog kie gae anya shaktishali mantra ke dushprabhav ko asani se kat sakte hain. shabar mantra saral bhasha men hote hain tatha inke prayog atyant sugam hote hain. shabar mantra se pratyek samasya ka nirakaran sahaj hi ho jata hai. upyukt vidhi ke anusar mantra ka prayog karke svayan, parivar, apne mitron tatha anya logon ki samasyaon ka samadhan asani se kar sakte hain. fyuchar samachar ke agami ankon men ham inhin shabar mantron ko ek shrinkhla ke rup men prastut karne ja rahe hain jismen in mantron ke sadhan ki vidhi tatha isse milne vale labh ki vistrit vivechna ki jaegi. vaidik, pauranik evam tantrik mantron ke saman ‘shabr-mantra’ bhi anadi hain. sabhi mantron ke pravartak mul rup se bhagvan shankar hi hain, parantu shabar mantron ke pravartak bhagvan shankar pratyakshataya nahin hain, fir bhi in mantron ka avishkar jinhonne kiya ve param shiv bhakt the. guru gorkhnath tatha guru machandar nath shabr-tantra ke janak hain.
apne sadhan, jap-tap-siddhi ke prabhav se ve bhagvan shiv ke saman pujya mane jate hain. ye mantra pravartak rishiyon ke saman vishvas v shraddha ke patra hain, pujniya v vandniya hain. shabar mantron men ‘an aur shap’ tatha ‘shraddha aur dhamki’ donon ka prayog kiya jata hai. sadhak yachak hota hua bhi devta ko sab kuch kahne ki samathrya rakhta hai aur usi se sab kuch karana chahta hai. vishesh bat yah hai ki uski yah ‘an’ bhi faldayi hoti hai. an mane saugandh. abhi vah yug gae adhik samay nahin bita hai, jab saugandh ka prabhav ashcharyajanak v amogh hua karta tha. samantashahi yug men gramin kshetron men nivas karne vale log anadhikrit krityon ke lie sadharntya ganv ke thakur, gay ya bete adi ki saugandh dilane par hi avaidh karyon ko rok dete the. nyayalay, lok sabha, rajya sabha, vidhan sabha men aj bhi bhagvan ki ‘shapth’ lekar bayan dene ki pratha hai. adhikansh log aj bhi apni bat ka vishvas dilane ke lie saugandh khaya karte hain. yah us samay ki smritiyan hain, jab choti-choti janjati tatha ult-fer ke karya karne vale bhi saugandh ko nahin torte the.
aj parivartan ho gaya hai- saugandh logon ke lie koi mahatva nahin rakhti, kintu ‘shabr’ mantron men jin devi -devtaon ki ‘shapth’ dilayi jati hai, ve aj bhi vaise hi hain. un devon par jamane ki beimani ka koi asar nahin hua hai. shastriya prayogon men ukt prakar ki ‘an’ nahin rahti, kintu shabar mantron men jis prakar ek abodh balak apne mata-pita se gusse men akar chahe jo kuch bol deta hai, hath kar baithta hai. uske andar chal-kapat nahin hota, vah to yahi janta hai ki mere mata-pita se main jo kuch kahunga, use pura karenge hi. thik isi prakar ka atal vishvas ‘shabr’ mantron ka sadhak mantra ke devta ke prati rakhta hai. jis prakar alpagya, agyani, abodh balak ki kutilta v abhadrata par uske mata-pita apne vatsalya, prem v nirmalata ke karan koi dhyan nahin dete, thik usi prakar bal sulabh sarlta, atmiyata aur vishvas ke adhar par nishkapat bhav se shabar mantron ki sadhna karne vala param lakshya siddhi ko prapt kar leta hai. shabar mantron men sanskrit - hindi - malyalam - kannar - gujrati ya tamil bhashaon ka mishrit rup ya fir shuddh kshetriya bhashaon ki gramya shaili aur kalpana ka samavesh bhi drishtigochar hota hai.
samanyatya ‘shabr-mantra’ hindi men hi milte hain. pratyek shabar mantra apne ap men purn hota hai. updeshta ‘rishi’ ke rup men gorkhnath, suleman jaise siddh purush hain. kai mantron men inke nam ka pravah pratyaksh rup se to kahin keval guru nam se hi karya ban jata hai. shabar mantra shastriya manyata se pare hote hue bhi ashastriya rup men apne labh v upyogita ki drishti se vishesh mahatva ke hain. shabar mantra gyan ki uchch bhumika nahin deta, n hi mukti ka madhyam hai. inmen to keval ‘kamya prayog’ hi hain. in mantron men viniyog, nyas, tarpan, havan, marjan, shodhan adi jatil vidhiyon ki koi avashyakta nahin hoti. fir bhi vashikaran, sammohan, uchchatan adi sahakarmon, rog-nivaran tatha pret-badha shanti hetu jahan shastriya prayog koi fal turant ya vishvasniya rup men nahin de pate, vahan ‘shabr-mantra’ turant, vishvasniya, achcha aur pura kam karte hain.
shabar mantra sadhna ke mahatvapurn bindu
1. is sadhna ko kisi bhi jati, varn, ayu ka purush ya stri kar sakte hain.
2. in mantron ki sadhna men guru ki itni avashyakta nahin rahti kyonki inke pravartak svayansiddha-sadhak rahe hain. fir bhi koi purnatva ko prapt nishthavan sadhak guru ban jae ya mil jae to sone pe suhaga siddh hoga aur usmen hone vali kisi bhi pareshani se asani se bacha ja sakta hai. shatkarmon ki sadhna to bina guru ke n karen.
3. sadhna samay nitya-naimittik karmon ko purn karke shvet ya rakt vastra ya fir sadhna ke mantra prayog men varnit vastra dharan karna chahie.
4. asan un ya kanbal ka shvet, raktavarni ya panchavarni grahan karen tatha ek bar asan par sukhasan men baithakar jap ki niyat sankhya purn kar hi asan se uthen.
5. sadhna men ghi ya mithe tel ka dipak ek patal par navin vastra bichakar uske upar jalayane, jab tak mantra jap chale.
6. agarabatti ya dhup kisi bhi prakar ki prayukt ho sakti hai parantu shabar mantra sadhna men gugal tatha loban ki agarabatti ya dhup ki mahatta mani gayi hai.
7. pushp, shuddh jal, naivedya yathashakti arpan karen. manas bhav utsah v shraddha se purn hon to mantra shighra hi jagrit ho jate hain.
8. jahan disha ka nirdesh n ho vahan purva tatha uttar disha ki or mukh karke sadhna karni chahie. islami sadhna men pashchim disha ka mahatva hai. jab tak disha nirdesh n ho dakshin ki or munh n karen.
9. jahan mala ka nirdesh n mile vahan koi bhi mala prayog men la sakte hain. vaise tulsi, chandan, rudraksh, sfatik ki mala vishesh faldayi hai. islami shabar mantra sadhna men ‘sipiyon ya hakik’ ki mala ka vidhan hai. yadi mala n ho to kar rupi manoank mala ka prayog kiya ja sakta hai. niyamanusar mala 108 mankon vali hi ho.
10. jap ki gati madhyam ho, n tej n kam. tanmayata, shraddha, vishvas mantra siddhi ke achuk sadhan hain. avishvas, adhura vishvas v ashraddha se fal prapt nahin hoga. mantra bari hi sarlta se siddh ho jate hain, parantu sath hi vishmta yah hai ki in mantron ki sadhna karte samay vichitra prakar ki bhayanak avajen sunayi parti hain ya daravni shaklen dikhne lagti hain. islie in sadhnaon men dhairya aur sahas bahut hi avashyak hai.
11. jap ke samay kisi bhi paristhiti men ghabraen nahin. n hi jap v asan chodane.
12. sadhna-kal men ek samay bhojan karen tatha brahmacharya ka palan karen.
13. sadhna din ya ratri men kisi bhi samay kar sakte hain. shabar mantra sadhna surya grahan, chandra grahan, dashhra, ganga dashhra, shivratri, holi, dipavli, ravivar, manglvar, parvakal, surya sankranti ya navratriyon se praranbh ki ja sakti hai.
14. mantra ka jap jaisa hai vaisa hi karen, apni taraf se koi parivartan n karen. uchcharan ki shuddhata ka vishesh dhyan rakhen.
15. mantra jap ghar ke ekant kamre men, mandir men, nadi-talab-gaushala, pipal vriksh ya jap vidhi men nirdeshit sthan par hi karen.
16. sadhna praranbh karne ki tithi-din yad rakhen. prativarsh unhin tithiyon men mantra ka punah jagaran karen. jagaran men kam se kam ek mala jap ke sath hom (yagya) bhi karen. adhik jap karne par adhik faldayi hota hai.