bhagvan vishnu jagat ke palak hain, jab bhi bhulok men nakaratmak shaktiyan utpann hokar bhakton ko kasht deti hain, tab unke nash ke lie shri hari apni yog maya sheshnag ke sath avtar lete hain v sahayak ke rup men garur aur sudarshan chakra sadaiv vidyaman rahte hain. bhagvan vishnu ne jitne bhi avtar liye hain ve sabhi kisi ek charitra athva bhumika men bandhe huye rahe jaise bhagvan shri ram maryada purushottam kahlaye. kintu shri krishn ka charitra aisa hai jo kisi bhumika ya lila men nahin bandha ja sakta.
bhagvan shri krishn ek shreshth yoddh a, saundarya ki pratimurti,shreshth rajnitigya, prempurti updeshak sakha, sarthi n jane kitne gunon se pahchane gaye. shri krishn svabhav se hi garvahari rahe, apne bhakton v ashriton men to abhiman ki gandgi nahin ane di. ek bar shri krishn ko satyabhama, garur, sudarshan chakra men garva hone ka ahsas hua. krishn ne garva bhang karne ke lie ek din garur ko agya di ki tum gandhmadan par jakar shri hanuman ji ko le jao, unse kahna ki unke aradhya ne bulaya. garur ke jate hi chakra ko agya di ki tum dvar par raho tatha kisi ko bhi andar mat ane dena. satyabhama se kaha ki maharani rukmini se kaho ki vo shri janki ka rup banakar mere samip baithen. maine pavan putra ko bulaya hai jiske samne mujhe bhi shri ram ka rup dharan karna hai. satyabhama ne kaha ‘‘kya main sita se kam sundar hun, uske saman vastrabhushan hi to badlne hain. ye main abhi kiye deti hun.’’ shri krishn ne hansakar kaha yah tum jano.
garur ji gandhmadan par pahunche to hanuman ji shri ram bhakti men tallin the. garur ji ne hanuman ji se kaha dvarika chaliye apke aradhya ne bulaya hai. meri pith par baith jaiye, mujhe sath le jane ki agya hai. hanuman ji ne kaha ap chalo main apke pahle pahunch jaunga. garur ne sagarva kaha apko mere veg ki kalpana bhi nahin hai. meri gati apke pita vayudev se bhi tej hai. meri gati ki tribhuvan men koi tulna nahin hai. meri shakti atulniya hai, sur-asur milakar bhi mere parakram ke saman nahin ho pate. ap nahin chalenge to mujhe balpurvak le jana parega, tab hanuman ji ko samjhne men der nahin lagi ki unke pas unke aradhya prabhu ne kyon garur ko unke pas bheja hai.
unhonne garur ki punch pakri aur ghumakar unhen fenk diya. garur ji tivra veg se fenke jane ke karan dvarika ke pas samudra men gire evan gahrai men dubte chale gaye. hanuman ji bhi dvarika ke lie ravana huye. dvarika bhavan ke bahidvar par pahunche to sudarshan chakra ne unhen andar pravesh ke lie rok diya aur kaha ki kisi ko bhi andar jane ki agya nahin hai. hanuman ji ne kaha mujhe treta yug men shri ram ke dvara dashagriv -vijay ke avasar par ayodhya ane par prabhu ne kaha tha ki hanuman tumhare liye antahpur ke ekant men bhi ane men koi avrodh kisi bhi samay nahin hai. sudarshan chakra ne krodhit hokar kaha treta men kisi vanar ko di gai anumti ko main manne ke lie badhya nahin hun.
hanuman ji to garur ji ke milte hi samajh gaye the ki unke svami aj kya lila kar rahe hain, jinhonne balyakal men suryadev ko mukh men rakh liya tha unhen sudarshan chakra ki jvala ki kya chinta hogi. sudarshan chakra ko unhanene uthakar mukh ke andar bayane gal men daba liya tatha bhavan men pravesh kiya jahan sinhasan par dvibhuj danddhari bane shri krishn asin the. hanuman ji ne prabhu ko dandavat pranam kiya. shri krishn ne bare sneh se uthaya tab hanuman ji charnon ke samip aise baith gaye jaise ayodhya ke sinhasan ke samip hi baithe hon. satyabhama ko prabhu ke samip baithe dekhakar hanuman ji ne sir jhukaye hue kaha ki aj man anba ke darshan nahin huye. prabhu sarva samarth hain kintu unke sthan par aj kisi dasi ko sthan dekar prabhu ne satkrit kiya hai.
yah sunakar satyabhama ka mukh lajja se lal ho gaya aur ve uthakar andar chali gain. rukmini ji ko jakar kaha ki bahin tum hi jao tumhara putra vanar aya hai, mujhe dasi hi samjhta hai. satyabhama ji ro parin. rukmini ji ain to hanuman ji ne uthakar unke pad padmon men mastak dhar diya tatha vandna ki. shri krishn ne hanuman se pucha tumhane kisi ne roka to nahin. shri maruti ne kaha dvar par ek khilauna mil gaya tha. tab sudarshan chakra ko mukh se bahar nikal kar chor diya aur kaha ki isko itna pata nahin ki mujhe apne shri charnon men pahunchne ki abadh anumti de rakhi hai. usi samay garur ji samudra jal se bhige aye. unko dekhakar hanumant ne kaha ki ap ne is durbal mand gati pakshi ko vahan bana liya yah to dhrisht ho gaya hai, jab kabhi shighra gaman avashyak ho to is sevak ko smaran kar liya karen. rukmini ji ne kaha ki hanuman tumhen dekhne ki bahut ichcha thi.
mata ko sneh bhajan sut ko dekhne ki ichcha ho, prabhu ne hanuman ji ko kyon bulaya yah garur ji, sudarshan chakra v satyabhama ji ki samajh men aya evan samajh liya ki shakti gati saundarya sadgun ke nityadham to shri dvarikadhish hi hain jis par vo kripa karen vahi inse sanpann rahta hai. is prakar in tinon ka shri krishn ne garva bhang kiya.