shani shatru nahin mitra bhi ashok saksena shani ki sarhe sati evan dhaiya (laghu kalyani) ko lekar tathakthit jyotishiyon ne itni bhrantiyan faila rakhi hain ki pratyek jatak bhaybhit hone par majbur ho jata hai, jabki vastavikta aisi nahin hai. aie, pahle shani ke svarup evan gun par najar dalte hain. shani ka sharir lanba, patla tatha nason se yukt hai. iski ankhen bhuri aur gahri tatha snayuen pusht hain. yah ek vat prakriti ka vriddh grah hai. iska varn kala hai. svabhav se yah alsi, chuglkhor, nirdayi, malin veshdhari, cheshtahin, apvitra, bhayanak aur krodhi hai. iske vastra kale hain. ayu, mrityu, bhay, patitta, dukh, apman, rog, daridrata, badnami, nindit karya, apvitrata, vipatti, sthirta, nich logon se prapt sahayta, bhainse, alasya, karj, lohe, dasta, krishi ke upakaran, jel yatra v bandhan ka vichar shani se karen. bali hone par ye chijen pratikul tatha nirbal hone par anukul hoti hain. shani ka arth hai shanaishchara - dhire-dhire chalne vala. shani ek rashi men lagabhag dhai sal rahta hai. yah kundli ke bhav 3, 6, 7, 10 ya 11 men ho to shubh fal deta hai. yah tula rashi men uchch ka hota hai. makar v kunbh iski svarashiyan hain. mesh rashi men shani nich ka hota hai. budh, shukra aur rahu iske mitra evan surya, chandra tatha mangal shatru hain. iska samay sari rat tatha andhera din aur devta bhairav hain. bhainsa, kikar, ak v shami ke vriksh loha, faulad, koyla, nilam urad evan urad ki dal, kala namak, adi iska pratinidhitva karte hain. yah shmashan, viran jagah athva madirapan men vas karta hai. shani ko bhagvan shivji dvara mrityulok ke nyayadhish ka pad diya gaya hai. atah yah vyakti ko uske karmanusar dand deta hai. lekin, isse bhaybhit hone ki koi avashyakta nahin hai. yadi vyakti ke karm achche hon to shani use shubh fal pradan karta hai. yadi karm bure hon to kshama nahin karta dand deta hai. thik vaise hi, jaise ek nyayadhish karta hai. jyotish shastra men yah mana jata hai ki grahon men svatantra fal dene ki kshamata nahin hoti, ve to jatak ke purva karmafal ke bhog matra ki suchna dete hain. jatak ki lagn patrika men grahon ki sthiti se banne vale yogon ka nirdharan unhin karmafalon ke anusar vidhata dvara kiya jata hai. kundli men shubh grahon ki shreni men ane vale grahon chandra, budh, guru evan shukra bhi bhavon ki sthiti ke anusar anishtakari ho sakte hain. atah sara dosh akele shani ko hi dena uchit nahin, n hi iske sarhesati ya dhaiya ke nam par bhaybhit hone ki jarurat hai. dvadash lagnon men shani ke falon ka varnan is prakar hai. 1. mesh lagn men karmesh evan ayesh hone se naisargik rup se shani ashubh hota hai, lekin dhan ke kshetra men labh deta hai. 2. vrishabh lagn manen kendra evan trikon ke svami (navam evan dasham bhav) hokar prabal karak hota hai, atah rajyog karak hokar sab sukh pradan karta hain. mithun lagn men shani, ashtamesh aur navmesh hota hai, fir bhi shubh fal deta hai. kark lagn ke lie saptamesh hone se svasthya aur ayu ki hani karta hai. sinh lagn uske pita aur shatru surya ka hai, atah bhav 6, 7 ka svami hone se rog, rin tatha hani deta hai. s kanya lagn men shani pancham evan chathe bhav ka svami hokar mishrit fal deta hai. tula lagn men, chaturthesh evan panchmesh hone (kendra-trikon) se ati shubh fal deta hai. shani vrishchik lagn men tritiyesh evan chaturthesh hota hai, is karan milajula fal deta hai. dhanu lagn men yah dvitiya evan tritiya bhavon ka svami hota hai, atah ashubh fal deta hai. makar evan kunbh lagn men kark rashiyon ka svami hone ke karan yah purn shubh fal deta hai. min lagn men labhesh evan vyayesh hone se yah dhan to deta hai, par svasthya ki hani kara deta hai. panch mahapurush yog: yadi kundli men shani kendra men, apni rashi makar ya kunbh men sthit ho athva mul trikon men, uchch rashi men ho to panch mahapurush yog ke antargat ‘‘shash yog’’ banta hai. yah yog mesh, vrish, kark, sinh, tula, vrishchik, makar ya kunbh lagn men hi banta hai. is yog men janma jatak bhale hi garib parivar men paida hua ho, age chalakar shani use safal v prasiddh bana deta hai. aisa jatak sundar evan akarshak bhi hota hai. shri atal bihari vajpeyi (purva pradhanmantri), sardar patel, kundan lal sahagal, guljar, em. karunanidhi, manoj kumar, dharmendra, govinda, kanshiram adi ki kundli men shash yog hai. yadi janm lagn men shani tisre, chathe ya 11ven bhav men ho to samanya rup se har prakar se jatak ko sukh sanpatti tatha labh pradan karta hai. gochar ke shani ke sarhe sati men vibhinn rashiyon par parne vale prabhav ka vivaran nimn talika men prastut kiya gaya hai. talika se yah spasht ho jata hai ki shani ki sarhe sati ka keval ek charan hi ashubh hota hai, baki do charan samanya evan shubh hote hain. keval do rashiyon (kark aur sinh) men hi do charan ashubh hote hain. is tarah sarhesati ka keval adha bhag kharab hota hai. puri sarhesati ashubh parinam nahin deti. fir fal is par bhi nirbhar karta hai ki patrika men shani kis bhav men sthit hai vah rashi mitra ki hai, shatru ki hai ya svarashi hai. iske atirikt rashi men shani ke paye ke anusar bhi parinam men parivartan hota hai. sone aur chandi ke paye se ho to fal shubh aur tanbe ke paye se ho to samanya hota hai. kintu yadi lohe ka paya hai to atikashtakarak hota hai. gochar men shani ke sath dusre bare grah guru ka gochar bhi dekha jata hai. yadi guru bhi shatru rashi men gochar kar raha ho to donon grahon ka parinam ashubh hoga. yadi guru ka gochar shubh bhav men ho to jatak ko kashton se kuch rahat nishchit rup se prapt hoti hai. shani ki ashubhta ko kam karne hetu jatak ko apna acharan shuddh rakhna chahie. satvik bhojan karna aur mans-madira se dur rahna chahie. apne se baron ka adar evan seva tatha mata-pita ki agya ka palan karna chahie. apang, ashay logon tatha rogiyon ki sahayta karni chahie. inke atirikt kai anya upay bhi hain, jaise- chayadan karen, shanivar ko dakaut ko tel, loha aur kapra dakshina sahit dan karen. gay, kaue v kutte ko apne khane se purva bhojan den. sanbhav ho to roj, anyatha manglvar evan shanivar ko hanuman chalisa ka path, evan hanuman ji ka darshan karen tatha prasad charhaen. pipal ke per ke niche shanivar ki sham ko tel ka dipak jalaen tatha sat parikramaen karen. bhainse ko hara chara khilaen. shani chalisa ka path tatha ‘‘¬ shan shanaishcharay namah’’ mantra ka jap karen. maharaja dasharath krit shani stotra ka path karne se har prakar ke abhisht ki prapti tatha badhaon ka ant hota hai. is tarah is vivechna se spasht ho jata hai ki shani keval shatru hi nahin, mitra bhi hai. vah sadachariyon, dusron ke hiton ka dhyan rakhne valon, dayabhav rakhne valon, bujurgon evan mata-pita ki agya ka palan karne valon aur ashayon, apangon, tatha rogiyon ki seva sahayta karne valon ko apni sarhe sati evan dhaiya athva dasha men shubh fal deta hai. iske viprit acharan karne vale logon ko vah ashubh parinam deta hai. tatparya yah ki shani raja se rank aur rank se raja banane ki samathrya rakhta hai. shani devadhidev bhagvan mahadev ka bhakt hai. yadi bhagvan shiv ki puja evan unke ‘‘¬ namah shivay’’ mantra ka ek mala jap niyamit rup se karen tatha samay samay par unhen dudh, dahi, gangajal adi se snan karaen, rudrabhishek karaen to shani ke shubh fal avashya prapt honge. sath hi, apne puja sthal men ek parad shivling aur ek shaniyantra ki sthapna bhi karen.