santan sukh manushya ki sabse bari kamna hoti hai. santan ke prati uska moh usse sab kuch kara leta hai, par jab uske is sukh men badha ati hai, to uske dukh ki sima nahin rah jati. kiran ji ne apne aur apni beti ke parivar ke sukh ke lie kya kuch nahin kiya? unhen sukh mila, unki beti nira ko bhi sukh mila, lekin fir nira ko apni pahli santan ke sukh se vanchit hona para. ishvar ki daya se uski god fir hari hui. kaise hua yah sab? kaise unki khushiyan chinin, kaise fir vapas ain? aie, janen... ek purani kahavat hai ki sahukar ko mul se jyada pyara byaj hota hai aur vah byaj nahin chorta. isi prakar kaha jata hai ki nana-nani aur dada-dadi ko apne bachchon se jyada priya apne nati-natin aur pote-poti hote hain aur ve unhen apni jan se bhi jyada pyar karte hain.
unka moh chahe apne bachchon men kam ho par chote nati ya pote se ve kabhi bhi mukh nahin mor pate. kitne hi aise parivar hain, jahan mata-pita ke unke vivahit bachchon se sanbandh achche n hone par bhi nati ya pote ke janm ke bad sanbandh sudhrte dekhe gae hain. hamare samaj men inhin bhavnatmak sanbandhon ki majbut ninv ne sanyukt parivar paddhati ki mahatta ko banae rakha hai. lekin kabhi-kabhi grah-nakshatra aisa khel khel jate hain ki vyakti bebas ho jata hai aur apne ap se yahi saval karta hai ki aisa mere sath hi kyon hua? abhi hal hi men meri mulakat kiran ji se hui. bahut akarshak vyaktitva tha unka. unhen dekh kar mujhe yahi laga ki vah kisi achche pad par karyarat hain aur achche sanpann parivar se hain. unhonne adhyatm aur jyotish men kafi ruchi dikhai. mere yah puchne par ki unki yah ruchi kab se hai, unki ankhen bhar ain aur barabas hi unki rulai fut pari. mujhe pahle to laga ki shayad mainne kuch galat puch liya hai, lekin jab unhen dharhas bandhaya, to vah khul parin aur apne atit men kho gain. kiran ji ka vivah 32 varsh ki ayu men hua tha aur vah ek sarkari baink men uchch adhikari ke pad par asin thin. vivah ke turant bad unke yahan putri nira ne janm liya jiska laln-palan unhonne bare pyar se kiya. samay sukhpurvak gujar raha tha ki achanak unke pati ko ek asadhya rog ho gaya aur unka kuch varsh pashchat hi svargavas ho gaya. fir parivar ki sari jimmedari kiran ji ne akele hi nibhai. nira ka unhonne khas khayal rakha, use pure jatan se uchch shiksha dilai, sari sukh-suvidhaen pradan kin aur bare hone par uska vivah uski pasand ke larke mudit se kar diya. vivah ke pashchat nira aur mudit astreliya chale gae aur vahin bas gae. vivah ke panch varsh bitne par bhi jab nira garbhavati nahin hui, to unhonne uska kritrim garbhadhan karaya aur us par lakhon ka kharch kiya.
akhirkar unhen achchi khabar mili, aur vah fauran astreliya gain aur vahan kuch mahine rah kar nira ki seva ki. unki khushi ka thikana n raha, jab pratish ne janm liya. unhonne bhagvan ka lakh-lakh dhanyavad kiya ki prabhu ne unki sun li aur vah apne nati aur beti tatha damad ke sath vapas bharat a gain. ab tak pratish sat ath mahine ka ho gaya tha. vah atyant chapal aur samjhdar tha aur ghutnon ke bal chalne laga tha. ek din unhin ke samne pratish gubbare se khel raha tha aur vah usse baten karti hui use khila rahi thin. tabhi achanak gubbara fut gaya aur pratish ne fute gubbare ka rabar apne munh men dal liya. unhonne fauran us rabar ko nikal kar dur fenk diya. isi bich unke fon ki ghanti baji aur vah fon sunne ke lie gain, to unki pith pratish ki taraf ho gai. pratish ko to mano kal bula raha tha. vah fauran ghutnon ke bal chalta hua usi gubbare ke tukre ke pas pahunch gaya aur fauran use nigal liya. jab kiran ji ki najar us par pari tab tak gubbara uski sans ki nali men fans chuka tha. unhonne bahut koshish ki ki vah uske halak se nikal jae par tab tak bahut der ho chuki thi aur unke kaleje ke tukre ne unki bahon men hi dam tor diya. kiran ji to mano pagal ho gain. pratish ke pita, dada aur yahan tak ki unki apni beti ne unhen hi pratish ki maut ka jimmedar thahraya aur un par aise iljam lagae ki unhen laga ki dharti fat jae aur vah usmen sama jaen. unhen pratish ki maut ka itna gahra sadma laga ki vah behosh ho gain aur koma men jate jate bachin. is halat men vah lagabhag bis din tak aspatal men rahin. unke apne mata-pita ne unki dekhbhal ki - beti aur damad ne to bat bhi nahin ki. kiran ji ne uske bad se apne ko sab taraf se, sab se alag kar liya. aj vah bas itna janna chahti hain ki unke nati ki maut ka kalank unhen kyon laga? uski maut ka karan vah kyon banin? vah har vakt prabhu se yahi prarthana karti rahti hain ki unki beti ki god fir se bhar jae taki vah pratish ki maut ko kuch had tak bhul saken.
unki prarthana prabhu ne sun li aur ab unki beti fir se garbhavati hai aur unse bat bhi karne lagi hai. kiran ji is bat se atyant khush hain ki uski suni god fir se bharegi aur uske ghar men kilkariyan gunjengi. mere yah puchne par ki kya vah astreliya nahien jaengi, unhonne kaha ki vah fir se apshkun nahin karna chahtin. vah to dur se hi apne nati aur beti ko ji bhar ke ashirvad dekar khush ho lengi. is nani ke dard ko shayad ap samajh sakte hain. aie, dekhen pratish, nira, mudit aur kiran ji ki kundliyan. pratish ke bhagya ke tar is sabhi se jure the ya yon kahen ki pratish ke agaman ne kis tarah se apne parivar ke anya sadasyon ko prabhavit kiya. pratish ki kundli ke anusar lagnesh shani duahsthan ashtam men ketu ke sath aur ashtamesh surya lagn men budh ke sath sthit hai. lagnesh aur ashtamesh ka sthan parivartan aur rahu aur shani ki paraspar drishti pratish ki ayu par prashn chihn laga rahi hai. kutunb bhav men krur grah rahu sthit hai. rahu jis bhav men baithta hai us bhav se sanbandhit fal deta hai aur dvitiya bhav men ho, to jatak ka rishtedaron se algav karata hai.
is kundli men rahu kutunb bhav men sthit hai aur shani (krur grah) se drisht bhi hai. rahu ki is sthiti ne kutunb bhav ko pratikul rup se prabhavit kiya. lagn men surya ki shatru rashi men sthiti aur us par mangal ki drishti bhi pratish ke svasthya ko pratikul rup se prabhavit kar rahi hai. shubh grah shukra aur guru ki dvadash bhav men sthiti bhi shubh nahin hai. mrityu ke samay 22 aktubar, 2008 ko lagnesh shani ashtam bhav men sinh rashi par janmakundli men janmakalik shani ke upar gochar kar raha tha aur sath hi gocharasth mangal v nich rashsthi surya ko tritiya drishti se dekh raha tha. nira ki kundli ke anusar ashtamesh chandra ki lagn men sthiti, panchmesh (santan bhav ke svami) mangal ki dvadash bhav men sthiti aur us par shani v rahu ki drishti aur rahu ki ashtam bhav men sthiti tatha kutunb bhav par uski drishti santan ke lie shubh nahin hai. kutunb bhav kalasarp yog se bhi grast hai. pancham bhav par nich rashi sthit surya v vakri budh ki drishti bhi hai aur ekadash bhav pap katrtari yog se bhi pirit hai. navansh kundli men bhi pancham bhav men rahu sthit hai. falasvarup santanotpatti ki kshamata bhi prabhavit hui hai. nira ki kundli men chunki ashtamesh chandra bhi lagn men sthit hai, islie sabhi grah lagn tatha chandra donon se hi pratikul prabhav dal rahe hain. saptamesh budh v bhagyesh surya apni nich rashi men pap katrtari yog men hain, islie uske vaivahik jivan men bhi kuch uthl-puthal ke sanket mil rahe hain. sath hi 22 aktubar, 2008 ko, jis din pratish ki mrityu hui, nira par surya ki dasha men guru ki antardasha prabhavi thi. surya apni nich rashi men hi janmakalik surya ke upar gochar kar raha tha.
gochar men panchmesh mangal surya ke sath tula rashi men sthit tha. mangal svayan gochar ke shani se drisht tha aur nira ke pancham bhav ko purn drishti se dekh raha tha. in sare pratikul yogon ke falasvarup nira ko putra ki mrityu ka sadma jhelna para. mudit ki kundli men panchmesh budh shashth bhav men mangal aur surya ke sath sthit hai. saptam sthan men chandra, rahu v purn ast shukra apni shatru rashi men sthit hain. is kundli men bhi shani kutunb bhav men sthit hai. kiran ji ki kundli ke anusar shukra men rahu ki antardasha chal rahi hai. rahu surya v ast budh ke sath ashtam bhav men sthit hai. pratish ki mrityu ke samay rahu pancham bhav men aur shani dvadash men ashtamesh mangal ke upar gochar kar rahe the aur gochar ke dvadshesh surya ko bhi tritiya drishti se dekh rahe the. yahan bhi kutunb bhav men gocharasth surya nich rashi men sthit hai, jise ashtam bhav se rahu, surya v budh dekh rahe hain.
spasht hai ki pratyek kundli men kutunb bhav pratikul rup se prabhavit hai aur har kundli men rahu, surya, mangal tatha shani ki krur drishti kutunb bhav ko prabhavit kar us bhav se sanbandhit samasya ki or spasht sanket kar rahe hain. kiran ji to durbhagyavash is dukhad ghatna ki sakshi ban gain anyatha pratish aur nira ki kundli men is dukhad ghatna ke ghatne ke prabal sanket mil rahe hain. pratish ki kundli ka ashtamesh v lagnesh ka sthan parivartan yog yah darshata hai ki uski kundli atyadhik nakaratmak urjaon se yukt hai. yahi karan hai ki vah apni mrityu ke bad samast parivar ke jhagre, kalah aur shok ka karan bana. kiran ji ki janmapatri men aisa koi yog nahin hai, jiske karan unhen apne nati ki mrityu ke kalank ka dansh jhelna pare. unki kundli ke dvadash bhav men mahan akarak mangal ashtam v ashtam se ashtam bhav ka svami ho kar sthit hai jiske upar shani ka ashubh bhav men gochar yah dukhad parinam lekar aya. aie, ab kiran ji ke anya prashnon par vichar karen. ab kiran ji is bat ko lekar chintit hain ki nira ki bhavi santan ko koi dosh to nahin hai?
vah matritva sukh bhog paegi ya nahin? yadyapi nira ki kundli men kuch grahon ki pratikul sthiti ke karan uski pratham santan ki hani hui, lekin santan ke karak guru ka lagnesh hokar bali hona is bar santan sukh ki abhivriddhi karega. shani v guru ka gochriya prabhav ane vale samay men ane vali santan ki raksha nishchit rup se karega. mudit ki kundli men bhi santan sukh ke purn yog bane hue hain. santan ka karak guru kendra men hai, lagnesh v shubh grah guru aur shukra kendra men hain tatha bhagyesh v karmesh shani par guru ki purn drishti hai. ye sare yog nira ko bhagyashali santan denge.