mata akhil brahmand ki adamya shaktisvarupa hoti hai. samagra srishti ka svarup mata ki god men hi ankurit, pallavit, pushpit evan viksit hota hai. vishva ka ujjval bhavishya mata ke snehanchal men hi fulta-falta hai. yadi kaha jae ki nikhil sansar ki sarjana-shakti mata hai, to koi atishyokti nahin hogi. balak janm se purva garbh men hi mata se sanskar grahan karne lag jata hai aur janm ke bad vah mata ke sanskar ka anugami ho jata hai. balak ke bachapan ka adhikansh samay mata ki vatsalyamyi chaya men hi vyatit hota hai. karniya-anukrniya, uchit-anuchit, hit-ahit sabhi sanskaron ka prathmakshar vah mata se hi sikhta hai. santan ke charitra-nirman men mata ki bhumika adharshilasvarup hai. mata ke snehil apanatva se bhige anchal men hi bachcha divya anand evan tripti ki anubhuti karta hai. isilie mahiyasi mata ko pratham guru ka samman diya gaya hai. anjnadevi param sadacharini, tapasvini evan sadgun-sampann adarsh mata thin. ve apne putra shrihnumanji ko shlaghniya tatparata se adarsh balak ka svarum pradan karne ki disha men satat jagat aur sachesht rahti thin. pujnoprant aur ratri men shayan ke purva ve apne pranadhik priya putra ko puranon ki prernaprad kathaen sunaya kartin thin. ve adarsh purushon ke charitra shrihnumanji ko punah-punah sunatin aur apne putra ka dhyan unki or akrisht karti rahtin. ve mahamanvon ka jo charitra sunati, use punah punah shrihnumanji se bhi puchtin. aur shrihnumanji ko kya sikhna tha ! sarvagya aur sarvantaryami shiv se gopniya kya hai ? kintu lilavash kabhi-kabhar shrihnumanji anjan banakar thik uttar nahin dete to mata us charitra ko punah sunakar unhen kanthagra kara detin. karunavrunalay ke divyavtaron ki samast kathaen shrihnumanji ko mukhasth thin. matri mukh se suni hui un kathaon ko shrihnumanji apne kapi-kishoron ko ativ prem evan utsah se sunaya karte. mata anjnadevi jab bhagvan shriram ke avtar ki katha sunana prarambh kartin, tab balak shrihnumanji ka sampurn dhyan ukt katha men hi kendrit ho jata. nidra evan kshudha unke lie koi arth nahin rakhtin. mata ko jhapki ati to shrihnumanji unhen jhakjhor kar shriram se sambaddh katha-kram ko age badhane ko kahte. mata anjna shrihnumanji ko punah shriram-katha sunane lag jatin. shriram-katha ke shravan se shrihnumanji ko tripti hi nahin hoti thi. ve man se punah-punah shriram-katha hi sunane ka agrah karte. mata anjna sollas katha kahtin aur shrihnumanji us katha ke shravan se bhav-vibhor ho jate. unke netron men ashru bhar ate, ang fadkne lagte. ve sochte-‘kash ! main bhi vahi hanuman hota. katha kahte-kahte mata anjnadevi puch baithtin-‘beta ! tu bhi vaisa hi hanuman banega ?’ han, man ! avashya main vahi hanuman banuga.’ shrihnumanji uttar dete. par shriram aur ravan kahan hain. yadi ravan ne jagajjanani man sitaji ki or kudrishti dali to main use dhumisat kar dunga.’ mata anjna kahtin-‘beta ! tu bhi vahin hanuman ho ja. ab bhi lanka men ek ravan rajya karta hai aur ayodhyanresh dasharath ke putra ke rup men shriram ka avtar bhi ho chuka hai. tu shighra sayana ho ja. shriram ki sahayta karne ke lie apar bal aur prachand paurush ki anivaryata hai. tu yathashighra apekshit bal evan parakram ayatt kar.’ ‘man ! mujhmen balabhav kahan hai ?’ shrihnumanji ratri men shayya se kud padte aur apna bhujadand dikhakar man ke sammukh virat balshali hone ka praman prastut karne lagte. mata anjna muskura uthtin aur punah apne putra shrihnumanji ko apni god men sametakar thapkiyan dekar madhur svar se prabhu-stavan sunati hui sulane lagtin. shrihnumanji mata anjna ke vaksh se lagakar sukhpurvak nidradevi ki god men ja virajte. sahjanurag se shrihnumanji punah-punah shriram-katha ka shravan karte. punah-punah shriram-katha ka shravan karte. punah-punah shriram-katha ka shravan karne se ve bar-bar bhagvan shriram ka smaran aur chintan karte. faltah unka shriram-smaran uttarottar pragadh hota gaya. kalakramen unka adhikansh samay shriram ke dhyan aur smaran men hi vyatit hone laga. ve kabhi van men, kabhi giri-gavahar men, kabhi sarita-kul par aur kabhi saghan kunj men dhyanasth baith jate. shriram ka dhyan karte samay shrihnumanji ki ankhon se premashru pravahit hota rahta. is prakar, dhyan ki tivra tanmayata ke karan unhen bhukh-pyas ki bhi sudh-budh nahin rahti. mata anjna madhyahn aur sayankal apne hridyhar shrihnumanji ke anveshan men nikal padtin. unhen vidit tha-mera putra kahan hoga. ve aranya, parvat, sarita, nirjhar evan van men ghum-ghumakar apne putra ko dhudh latin, tab kahin mata ke snehagrah se unke mukh men gras ka pravesh hota. aur, yah kram pratidin chalne laga. shrihnumanji apne parmaradhya shriram ke prem men itne tallin rahne lage ki unhen apne tan ki sudh-budh bhi nahin rah jati . unke muh se satat shriram ka nam hi uchcharit hota rahta. apne putra ki nirankush mansik sthiti ke karan mata anjna anupal unmana-udas raha karti thin. shrihnumanji ki ayu bhi vidyadhyayan ke yogya ho gayi thi. mata anjnidevi evan vanrraj kesri ne vichar kiya- ‘ab hanuman ko vidyarjan ke nimitt kisi yogya guru ke hathe saunpna hi hoga. kadachit isi se iski uddandata ko viram mile.’ yadyapi unhen apne gyanmurti putra ki vidya-buddhi evan bal-paurush tatha brahmadi devon dvara pradatt amogh ashirvachyon ka purn gyan tha, tathapi unhen yah bhi gyat tha ki samanya jan mahamanvon ka anukaran karte hain aur samaj men kuvyavastha utpann n ho jae, islie mahamanvon ke achrnon men sanyam aur sadhuta hoti hai. ve satat shastranumodit acharan karte hain. yahi karan hai ki jab-jab karunanidhan prabhu dharadham par avtrit hote hain, ve sarvagya hone par bhi vidyoparjan ke lie guru-grih ki sharan lete hain tatha guru ki sabhakti seva kar ativ shraddhapurvak unse gyan-prapti karte hain. sach to yah hai ki guru ko seva se santusht kar amit shraddha evan avichal bhakti se arjit vidya hi falvti hoti hai, ataev mata anjna aur kapishvar kesri ne shrihnumanji ko gyanopalabdhi ke lie guru-grih bhejne ka nirnay kiya. apar ullas ke sath mata-pita ne apne priya shrihnumanji ka upnyn-sanskar karaya aur unhen vidyarjan ke lie guru-charnon ki sharan men jane ka snehil adesh kiya, par samasya yah thi ki shrihnumanji kis sarvagun-sampann adarsh guru ka shishyatva angikrit karen. mata anjna ne premal svar men kaha- ‘‘putra ! sabhi devtaon men adidev bhagvan bhaskar ko hi kaha jata hai. ve sansar-sagar ke andhkar ko vidhvast kar sab lokon aur dishaon ko alokit karte hain. ve sabhi dharmon men shreshth dharmasvarup hain. ve pujyatam hain. brahma, vishnu, shiv adi sabhi devta, asur, gandharva, sarp pakshi adi tatha indradi devta, brahma, daksh, kashyap sabhi ke adikaran bhagvan aditya hi hain. bhagvan aditya sabhi devtaa men shreshth aur pujit hain. aur fir, saklshastramarmagya bhagvan suryadev tumhen samay par vidyadhyayan karane ka kripapurn ashvasan bhi to de chuke hain. ataev, tum unhin ke sharnagat hokar shraddha-bhaktipurvak shiksharjan karo.’’ kaupin-kachni kache, munj ka yagyaopvit dharan kie, palashadand evan mrigacharm lie brahmachari shrihnumanji ne suryadev ki or drishti-nikshep kiya aur kuch sochne lage. mata anjna rishiya ke shap se avagat thin hi, unhon avilamb kaha- ‘‘are putra ! tera samathrya asim hai. ye to vahi suryadev hain, jinhen arun-fal samajhakar tu balapan men hi uchalakar niglne pahunch gaya tha. bhagvan surya ke sath to tum krida kar chuke ho. tumhare atank se rahu devraj indra ki sharan men dauda-dauda pahuncha tha aur svayan devraj indra bhi tumhara bal dekhakar gae the. beta ! is sakal brahmand men aisa koi karya nahin hai, jise tu sanpadit n kar sake. tumhare sharirik, mansik aur atmik bal ki iyatta nahin hai. tum dev, danav aur manav adi samast praniyon ke lie ajey ho. tumhara bal kalantar ke sadrish hai. tu bhagvan savita se samyak gyan prapt karne ja. tera kalyan sunishchit hai.’’ shrihnumanji man ke ye vachan sunakar utsah se ullasit ho uthe aur mata-pita ke shrichrnon men apne pranam sadar nivedit kar akash men uchle to samne suryadev ke sarthi arun mile. shrihnumanji ne pita ka nam lekar apna parichay diya aur arun ne unhen anshumali ke pas jane ko kaha. anjney ne ativ shraddhapurvak bhagvan suryadev ke charnon ka sparsh karte hue unhen apna hardik naman nivedit kiya. vinit shrihnumanji ko banddhajli khade dekh bhagvan bhuvnbhaskar ne snehil shabdon men pucha- ‘beta ! agaman ka prayojan kaho.’ shrihnumanji ne vinamra svar men nivedan kiya- ‘prabho ! mera yagyaopvit sanskar sampann ho jane par mata ne mujhe apke charnon men vidyarjan ke lie bheja hai. ap kripapurvak mujhe gyandan kijie.’ suryadev bole- ‘‘beta ! mujhe tumhen apna shishya banane men amit prasannata hogi, par tum to meri sthiti dekhte hi ho. main to aharnish apne rath par savar daudta rahta hu. arunji rath ki gati dhimi karna jante hi nahin. aisi dasha men main tumhen gyandan dena to dur, tumse thodi bhi der ke lie rukakar vartalap tak kar sakne ki sthiti men nahin han ’ suryadev ki bat sunakar pavnatmaj bole-‘prabho ! vegpurvak chalta apka rath kahin se bhi mere adhyayan ko badh t nahin kar sakega. han, apko kisi prakar ki asuvidha nahin honi chahie. main apke sammukh rath ke veg ke sath hi age badhta rahanga.’ shrihnumanji suryadev ki or mukh karke unke age-age svabhavik rup men chal rahe the. bhanuson padhan hanuman gaye bhanu man- anumani sisukeli kiyo ferfar so. pachile pagni gam gagan magn-man, kram ko n bhram, kapi balk-bihar so..
Kya aapko lekh pasand aaya?
Subscribe