sansar men jo do mahayuddh lare gae unke piche dharmik kattarataon ka hath hai. svayan isai mat ki anek dharaon ke bich sadiyon tak sangharsh chalta raha. in sangharshon ke karan rashtron ki nitiyan prabhavit hoti rahin. unke bich apsi vaimanasya barhta gaya aur anttah vyapak star par narsanhar hua. is prakar prabhu yishu ke mul sandesh ka hi ghor apman hua. jis dharm ke masiha hanste hanste suli par charh gae hon, uske anuyayi svayan ko asli isai siddh karne ke lie dusre ko nicha dikhane ke prayas men mahayuddh karva diya. soviyat kranti ke samay rus ke nirankush shasak jar nikolas dvitiya ki patni jarina ek isai padri ke mohpash men fansi hui thi. jarina aur us padri ke vyavhar ne kranti ki ag men ghi ka kam kiya. yah keval ek isai mat men matantar ki bat nahin hai balki islam men bhi log shiya aur sunni panth ke bich takrahat men fanse hue hain. apne-apne mat ko shreshth sabit karne ke lie khuni sangharsh jari rakhe hue hain. hindu log bhi bahut dinon tak shaiv aur vaishnav ke sangharsh men uljhe rahe. ek samay to is sangharsh ne aisa rup le liya ki kanchipuram nagar ke bich men divar dala gaya. ek bhag ko shiv kanchi kaha gaya aur dusre ko vishnu kanchi. dakshin margi log vammargiyon se uljhte rahte the.
baba ne in sabse bachne ke lie kaha - ‘sabka malik ek’. yah parmeshvar ki or se diya gaya ek aptavachan hai. iske palan se is sansar men shanti sthapit hogi. duniya ko abhi ek hi nara ki avashyakta hai jo amogh mantra ki shakti rakhta hai. use hi sainbaba ke bhakt kahte hain - sabka malik ek. jo allah aur shrihri ko do mante hain ve ek aisa drishtant dikha den ki kabhi allah aur shrihri ne yuddh kiya ho. adhyatm aur kattarata ek dusre ke virodhi hain. jo kattar hoga, vah adhyatmik nahin ho sakta. kattarata ka adhar ghrina hai aur adhyatmikta ka adhar prem. jo sabse prem karega, vahi ishvar se prem karega kyonki sabmen vahi parmatma hai. yadi sabko ek hi parmatma ne banaya hai to sabka malik ek hi hai aur sabse prem karna us parmatma se prem karna hai. sain to yahan tak kah dete hain ki kisi mat ke khandan ke vyarth vad-vivad men nahin parna chahie. shastrarth satsang ki bhavna se karen taki ham sabhi sath milakar satya tak pahunchne ka prayas karen. ‘shraddha, saburi aur sabka malik ek’ sain bhakti ke sindhu ke tin bindu hain. in tin binduon se parmanand ka jo tribhuj banta hai usmen har koi pravesh kar sakta hai; chahe uska dharm, jati, rashtriyata, astha kuch bhi kyon n ho. vah apni sanskritik, majhbi aur rashtriya pahchan khoe bina sain ka sannidhya prapt kar sakta hai.
kuch log advaitvad ki mul bhavna ko bhulakar usko bahya taur par samjhne lagte hain. aise log kahte hain ki sainbaba to dharti ke kan-kan men hain, fir shirdi ya kisi vishesh mandir men jane ki avashyakta kya hai? is sanbandh men adi shankracharya ka mat dhyan dene yogya hai. ve kahte hain- bhav advaitam karniyam vyavhar advaitam ch karniyam. arthat bhav ke star par advaitvadi hona achcha hai ki jo kuch hai brahm hai, uske siva kuch nahin - sabmen brahm hi hai. lekin vyavhar men advaitvadi hona uchit nahin. yadi sachmuch men dharti ke kan-kan men kisi ko brahm ke darshan hone lagen to uske lie kisi anya sadhna ki avashyakta nahin lekin alasya athva pramad se grast hokar shreshth jan, gurujan aur isht ki seva se ji churane ke lie advaitvadi hona uchit nahin. vyavhar men advaitvadi hone se vishva vyavastha shithil par jaegi, log akarmanya ho jaenge. mahan purush aur mahan sadhak apne guru, isht aur shreshthajan ki seva adhik tallinta se karen kyonki unka anukaran dusre log karte hain. shriman shankracharya yahan tak kahte hain- ‘‘tum sanpurn sansar ke sath advaitvadi ho sakte ho lekin apne guru ke sath nahin. sainbaba to guruon ke bhi guru hain. baba sadguru hain. unhonne kisi ke kan men mantra nahin die.
kadachit prabhu ki ichcha sainbhakti ko guruon ki paranpra se mukt rakhne ki rahi hogi. kisi panth ya bhakti marg men guru ki avashyakta tabhi hoti hai jab acharya yani us marg ke pravartak ki mrityu ho jati hai. baba kahte rahte hain- ‘mujhe sada jivit hi jano.’ is sanbandh men ae din hone vale bhaktanubhav bhi sakshi hain ki baba pratyaksh rup se janakalyan kar rahe hain, logon ko mukti de rahe hain. sain bhakti ke acharya bhi baba hi hain aur sada vidyaman rahne vale sadguru bhi vahin hain. baba ke updesh hi hamare lie guru updesh hai. halanki baba ki mahasmadhi ke bad kai logon ne unka sthan lene ka prayas kiya lekin unhen saflta nahin mili. baba ke marg men bhakt aur bhagvan ke bich koi nahin hai. yahan par bhagvan svayan sadguru hain. han yadi kisi ne pahle kisi ko apna guru bana liya hai to unko sanpurn adar den, isse sain baba unse prasann hi rahenge. keval paripati ya paranpra banne se parhej hai. jaise madhyakal men padri log bholi bhali janta ko gumrah karne ke lie svarg ka tikat diya karte the, vaisa nahin hona chahie. sadguru sainnath svayan apka margadarshan karenge. keval unki sharan men chale jaie, ve prerna dete rahenge ki isse age kya karna chahie. jitna vyakti ko svayan ki chinta hai usse kahin adhik uski chinta baba karte hain.
vyakti ko apne bhavishya ki chinta hai lekin baba iske hajaron sal pichle aur agle janmon tatha uske lekha-jokha ko dekh rahe hain. sain ki najar kai brahmandon ke ar-par ke sansar ko dekh rahi hai. un najron men sab kuch hai. baba upvas adi rakhne se mana karte the. ve kaha karte the vyakti jab upvas mane rahta hai to uska man ashant rahta hai. ashant man se brahm ko nahin paya ja sakta hai. upvas ka arth hai ishvar ke samip rahna. up ka arth hai nikat aur vas ka arth hai rahna. ishvar ka sannidhya prapt karna hi vastavik upvas hai. ann tyag to upvas ka vikrit rup hai. kaha gaya hai ki ‘kalau annagat pranah’ arthat kalyug men ann men hi pran hai. ann ke bina sharir men pran tatva kshin ho jaenge. iska tatparya yah nahin hai ki bhog men lipt ho jaya jae, ‘udaradharmam sarvadharm pradhanam’ n ghoshit kar diya jae. pet hi sarvopri hai aisa bhi n mana jae. n adhik bhog karen aur n hi anavashyak sanyam karen. santulit jivan jien. baba ke nam par upvas adi karmakand ko n failaya jae. sath hi yathasanbhav sabke poshan ka dhyan rakha jae kyonki dharti ke pratyek jiv ko bhojan milna chahie aur pratyek manushya ko bhojan ke atirikt vastra aur avas milna chahie. iske lie brahm bhav se jiv ki seva karni chahie - ann, vastra adi se seva sarahniya hai.
lekin manushyopyogi ann adi ki jamakhori athva galat tarike se dhan sangrah karke apne pap ko kam karne ke bhav se kie jane vale bhandare se sain prasann nahin ho sakte. yadi ghor pap ke bavjud kisi ne sachmuch pashchattap kiya hai aur uska hriday parivartit ho gaya hai to us par sain ki kripa avashya hogi. uska diya hua patra-pushp sain avashya svikar karenge. jo vastav men parivartit ho gaya, uska sachmuch punarjanm ho gaya. kisi ko jo bhi vastu den, vah shraddha purvak den. kisi yachak ko n de saken to uska apman bhi n karen. kisi ki ninda n karen kyonki ninanda se man men vikar utpann hote hain. baba ki bhakti men koi vishesh bandhan nahin, koi vishesh karmakand nahin. log apni nishtha ke anurup baba ki seva karen. yadi bhakt ko suvidha hoti hai ki ve bhojan karke baba ke mandir jaen to ja sakte hain athva kisi ko vaise hi jane se suvidha hoti hai, vaise hi jaen. lekin svayan ko ashant karke bhakti n karen athva baba ke nam par svayan ko bhog men lipt n karen. buddh vakya ko dhyan men rakhen - ‘vina ke tar ko itna n kaso ki vah tut jae aur use utna n dhila choro ki vah bajne n pae.’ han, yadi vyakti baba ko arpit karne ke bad hi bhojan kare to baba ko prasannata hoti hai. baba kahte hain- ‘‘jo mujhe arpit kie bina kuch bhi nahin khata, uska to main das ho jata hun.’’
jahan baba ki pratima athva chitra hai to vahan unke age bhog lagakar bhojan karna shreyaskar hoga anyatha jahan yah upalabdh nahin hai, vahan man hi man sain ko arpit karke bhojan kiya ja sakta hai. baba ke chitra ke age dhup-dip dikhane se svayan ka jivan prakashamay hota hai jivan men sugandh failta hai. vastav men ham jab kisi pratima ko dip dikhate hain to us dip ke alok men ham svayan ke jivan ko alokit karte hain. baba apne chitra tatha pratima men sadaiv pratyaksh rup se vidyaman rahte hain. iske saikron praman mil chuke hain. mandiron ki apni maryada hoti hai. vahan par baba ko snan, bhog, arti bahut hi maryadapurvak karaya jata ye. ye sabhi vidhan is bhav se pure kie jate hain jaise ki baba pratyaksh rup se sab kuch grahan kar rahe hon. baba sakshat sab kuch grahan karte hain. is sanbandh men kai bhaktanubhav hain. sankshep men, sabhi prakar ke chaturya ka tyag kar jo baba ki sharan men chala jata hai, baba uski sab prakar se raksha karte hain- uske is lok ko to anandamay bana hi dete hain, uska parlok bhi sanvar dete hain; use mukt kar dete hain.