sabka malik ek

Dr. Arun Bansal

Views : 5156 | May 2015

jamane men kahan tuti hui tasvir banti hai. tere darbar men bigri hui takdir banti hai..

sain jivan parichy

vishva ko ‘sabka malik ek’ ka updesh dene vale chamatkari sant sain baba ke janm sthan v tarikh ke bare men kuch bhi praman upalabdh nahin hai. parantu kuch logon ke matanusar ve 1835 ya 1838 men paida hue the. kuch kahte hain ki ye ramnvmi ko paida hue hain to kuch shraddhapaksh ki amavasya aur kuch log falgun, kuch chaitra to kuch ashvin mas ko inka janm mas mante hain. parantu adhisankhya manyata anusar inka janm 28 sitanbar 1838 ko maharashtra ke pathri ganv men hua tha. 15 aktubar 1918 ko inhonne mahasmadhi li. inki jivan katha ke lekhak shri narsimha svami ji ke anusar ye ek brahman parivar men janme the.

svayan sain baba ne aisa kaha tha ki unke mata-pita brahman the aur unhonne unhen unka palan poshan karne ke lie ek fakir ko de diya tha. islie ye ek muslim vatavaran men pale barhe. yahi karan hai ki sain baba ke vyaktitva men yah sandeh bana rahta hai ki ve muslim the ya hindu. aisa bhi mana jata hai ki sain baba jhansi ki rani lakshmibai ki sena men 1857 ki larai men sath rahe the.

sain baba ek vedpathi brahman ki santan the. islie unki parhai ki shuruat ghar se vedadhyayan se hui. bad men jab pathri ke gurukul men inhonne adhyayan kiya to kushagra buddhi sain baba keval 7-8 varsh ki avastha men hi apne gurukul ke guru se shastrarth kiya karte the. jab inke mata-pita ne inhen kisi fakir ko de diya tha to muslim fakir ke sang men ane ke pashchat inhonne kuran ko mukhagra kar liya tha. sira, sunna, hadis, fakka, shariyat tarikhan ko bhi yad kar liya. islam ki in dharmik shikshaon men ve pakke ho gae, tab unki umra thi matra 12-13 varsh.

is prakar choti avastha men hi inhonne islam aur sufivad ke rahasyon ko bhi jan liya parantu bhitar se ye pakke vedanti hi rahe. in par dharm parivartan karne ka bhi dabav para parantu ye dharm parivartan ke kattar virodhi the. jab ve lagabhag 20 varsh ke the to san 1858 men punah shirdi laut ae the aur tabhi se unhonne ghutnon tak lanba kurta pahnna shuru kar diya tha. is prakar ki poshak ke karan bhi log baba ko muslim samjhte the aur aj bhi aisa hi sochte hain. kahte hain char se panch varsh tak shirdi ke janglon men ek nim ke vriksh ke niche baith kar baba rojana dhyan lagaya karte the.

ise bhi padhen: janie, vaivahik jivan par kya prabhav dalta hai manglik dosh ?

sain ke chamatkar

unke jivan se juri anek kahaniyan hain jahan par unhonne chamatkar dikhakar bhakton ko achanbhit kar diya. kahte hain baba ko mandir v masjid men die jalane ka chav tha. iske lie ve dukandaron se tel manga karte the. roj-roj tel dene se thakakar dukandaron ne ek din kah diya ki tel khatm ho gaya hai. baba bina tel lie vapis a gae aur tel ke abhav men diyon men pani bhar diya. dipak jalae to sabhi jal uthe aur der rat tak jalte rahe. unki is karni ko dekhakar dukandar bahut sharminda hue.

isi prakar ek bar sain baba ne apne janmadivas par logon ko ramnvmi ka utsav manane ka agrah kiya. utsav men ayojkon ko pani ki kami mahsus hui. baba ne prasad diya aur use kuen men dalne ko kaha. prasad dalte hi kuan pani se bhar gaya aur baba ka janm divsotsav nirvighn sanpann ho gaya. ek bar inke bhakt ne baba se godavri nadi men snan ki ijajat mangi. baba ne kaha koi avashyakta nahin hai godavri mere pairon tale hai. unhonne shraddhalu bhakt ko bulaya aur kaha mere pair ke niche apne hath rakho aur tabhi joron se vahan se pani niklna shuru ho gaya.

sain baba ki jivan katha se anya anekon chamatkar jure hue hain jinmen ek sath do sthanon par upasthit hona, logon ke mastishk ko parhna, sharir ko jamin se upar uthana, hava men kuch bhi padarth paida kar dena, ichchanusar samadhisth ho jana, sharir ke ang v anten bahar nikalakar punah vapas laga dena, marnasann rogi ko svasth kar dena, bhakton ki sharirik aur mansik taklifon ko apne upar le lena, girti hui masjid ko rokakar logon ko chamatkari dhang se bacha lena adi pramukh hain.

shikshaen

baba ka ek hi kahna tha ki ‘‘sabka malik ek’’ jo ki unke sabhi dharmon men atut vishvas ko darshata hai. ve muslim ko kuran aur hindu ko bhagavadgita v ramayan parhne ke lie protsahit karte the. dan men unka drirh vishvas tha. unka manna tha ki yadi bhukhe ko khana, pyase ko pani v nange ko kapra den v yatri ko aram karne ka sthan den to bhagvan prasann hote hain.

sain baba ne hindu v muslim dharm granthon ka adhyayan kiya. unhonne advait vedant ke adhar par dharm granthon ka vivechan kiya. unke darshan men bhakti ke bhi ansh pae jate hain. ve bhakti yog, gyan yog v karmayog tinon se prabhavit the. ve dharm ki kattarapanthi vichardhara ko nakarte the. baba apne bhakton ko ishvar ke nam ka kirtan, bhajan v dharmagranthon ka adhyayan karne ki salah dete the.

sain baba apne bhakton ko shraddha (guru ke prati bhakti bhav) v saburi (prem se dhairya rakhna) ka path parhate the.

sain baba ke bare men parhne se pata chalta hai ki ve alaukik sant v vidvan the jo apni shaktiyon se din dukhiyon ke kashton ka nivaran kar dete the. unki shaktiyon ke karan hi unke shraddhalu unhen bhagvan shiv ka avtar mante the. ve avashya hi ek dharmanirpeksh ke rup men lokapriya v pratishthit the. unki shikshaon men ‘‘sabka malik ek’’ men sarvadharm sambhav ki jhalak milti hai. yadi aj ke yug men is shiksha ko sachche rup men grahan kar liya jae to avashya hi dharmik ashishnuta ki samasya samapt ho sakti hai aur samaj men bhaichare ki sthapna ho sakti hai.

sain baba ke gyarah vishvaprasiddh vachn

jo shirdi aega uska kabhi patan nahin hoga.
jo meri samadhi par aega uske sabhi dukh dard samapt ho jaenge.
chahe main is sharir men n rahun parantu main apne bhakton ki sada sarvada raksha karta rahunga.
mujhmen vishvas rakho apki prarthana svikar hogi.
mujhe sada jivit jano aur ise anubhav karo.
meri sharan men ane vala khali hath nahin jata.
jo mujhe jis rup men bhajta hai main use usi rup men prapt hota hun.
main apne bhakton ka bojh sada svayan uthata hun.
jo mere dvar par ata hai vah kabhi khali hath nahin jata.
jo mere prati samarpit ho jaega main uska hamesha rini rahunga.
vah bhakt sarvada dhanya hai jiski mujhmen ananya bhakti hai.