uchch tatha nich rashi ke grah bharatavarsh men adhikatar jyotishiyon tatha jyotish men ruchi rakhne vale logon ke man men uchch tatha nich rashiyon men sthit grahon ko lekar ek prabal dharna bani hui hai ki apni uchch rashi men sthit grah sada shubh fal deta hai tatha apni nich rashi men sthit grah sada nich fal deta hai. udaharan ke lie shani grah ko tula rashi men sthit hone se atirikt bal prapt hota hai tatha isilie tula rashi men sthit shani ko uchch ka shani kah kar sanbodhit kiya jata hai aur adhikatar jyotishiyon ka yah manna hai ki tula rashi men sthit shani kundli dharak ke lie sada shubh faldayi hota hai. kintu yah dharna ek bhranti se adhik kuch nahin hai tatha iska vastavikta se koi sarokar nahin hai aur isi bhranti men vishvas karke bahut se jyotish premi jivan bhar nuksan uthate rahte hain kyonki unki kundli men tula rashi men sthit shani vastav men ashubh faldayi hota hai tatha ve ise shubh faldayi manakar apne jivan men a rahi samasyaon ka karan dusre grahon men khojte rahte hain tatha apni kundli men sthit ashubh faldayi shani ke ashubh falon men kami lane ka koi prayas tak nahin karte.
is charcha ko age barhane se pahle aie ek najar men grahon ke uchch tatha nich rashiyon men sthit hone ki sthiti par vichar kar len. navagrahon men se pratyek grah ko kisi ek rashi vishesh men sthit hone se atirikt bal prapt hota hai jise is grah ki uchch ki rashi kaha jata hai. isi tarah apni uchch ki rashi se thik satvin rashi men sthit hone par pratyek grah ke bal men kami a jati hai tatha is rashi ko is grah ki nich ki rashi kaha jata hai. udaharan ke lie shani grah ki uchch ki rashi tula hai tatha is rashi se thik satvin rashi arthat mesh rashi shani grah ki nich ki rashi hai tatha mesh men sthit hone se shani grah ka bal kshin ho jata hai. isi prakar har ek grah ki 12 rashiyon men se ek uchch ki rashi tatha ek nich ki rashi hoti hai. kintu yahan par yah samajh lena ati avashyak hai ki kisi bhi grah ke apni uchch ya nich ki rashi men sthit hone ka sanbandh keval uske balvan ya balhin hone se hota hai n ki uske shubh ya ashubh hone se. tula men sthit shani bhi kundli dharak ko bahut se ashubh fal de sakta hai jabki mesh rashi men sthit nich rashi ka shani bhi kundli dharak ko bahut se labh de sakta hai. islie jyotish men ruchi rakhne vale logon ko yah bat bhali bhanti samajh leni chahie ki uchch ya nich rashi men sthit hone ka prabhav keval grah ke bal par parta hai n ki uske svabhav par.
shani navagrahon men sabse dhimi gati se bhraman karte hain tatha ek rashi men lagabhag dhai varsh tak rahte hain arthat shani apni uchch ki rashi tula tatha nich ki rashi mesh men bhi dhai varsh tak lagatar sthit rahte hain. yadi grahon ke apni uchch ya nich rashiyon men sthit hone se shubh ya ashubh hone ki prachlit dh aarna ko satya man liya jae to iska arth yah niklta hai ki shani ke tula men sthit rahne ke dhai varsh ke samay kal men janme pratyek vyakti ke lie shani shubh faldayi honge kyonki in varshon men janme sabhi logon ki janm kundli men shani apni uchch ki rashi tula men hi sthit honge. yah vichar vyavharikta ki kasauti par bilkul bhi nahin tikta kyonki desh tatha kal ke hisab se har grah apna svabhav thore-thore samay ke pashchat hi badlta rahta hai tatha kisi bhi grah ka svabhav kuch ghanton ke lie bhi ek jaisa nahin rahta, fir dhai varsh to bahut lanba samay hai. islie grahon ke apni uchch ya nich ki rashi men sthit hone ka matalab keval unke balvan ya balhin hone se samjhna chahie n ki unke shubh ya ashubh hone se. anubhav men paya gaya hai ki apni uchch ki rashi men sthit koi grah bahut ashubh fal de raha hota hai kyonki apni uchch ki rashi men sthit hone se grah bahut balvan ho jata hai, islie uske ashubh hone ki sthiti men vah apne balvan hone ke karan samanya se bahut adhik hani karta hai. anubhav men aisi bhi bahut si kundliyan dekhi gai hain jinmen koi grah apni nich ki rashi men sthit hone par bhi svabhav se shubh fal de raha hota hai kintu balhin hone ke karan in shubh falon men kuch n kuch kami rah jati hai. aise logon ko apni kundli men nich rashi men sthit kintu shubh faldayi grahon ke ratn dharan karne se bahut labh hota hai kyonki aise grahon ke ratn dharan karne se in grahon ko atirikt bal milta hai tatha yah grah balvan hokar apne shubh falon men vriddhi karne men saksham ho jate hain. vakri grah: lagabhag har dusre vyakti ki janm kundli men ek ya isse adhik vakri grah paye jate hain tatha jyotish men ruchi rakhne vale adh iakatar logon ke man men yah jigyasa bani rahti hai ki unki kundli men vakri batae jane vale is grah ka kya matalab ho sakta hai.
vakri grahon ko lekar bhinna-bhinn jyotishiyon tatha panditon ke bhinna-bhinn mat hain tatha aj ham vakri grahon ke bare men hi charcha karenge. sabse pahle yah jan len ki vakri grah ki paribhasha kya hai. koi bhi grah vishesh jab apni samanya disha ki bajae ulti disha yani viprit disha men chalna shuru kar deta hai to aise grah ki is gati ko vakra gati kaha jata hai tatha vakra gati se chalne vale aise grah vishesh ko vakri grah kaha jata hai. udaharan ke lie shani yadi apni samanya gati se kanya rashi men bhraman kar rahe hain to iska arth yah hota hai ki shani kanya se tula rashi ki taraf ja rahe hain, kintu vakri hone ki sthiti men shani ulti disha men chalna shuru kar dete hain arthat shani kanya se tula rashi ki or n chalte hue kanya rashi se sinh rashi ki or chalna shuru kar dete hain aur jaise hi shani ka vakra disha men chalne ka yah samay kal samapt ho jata hai, ve punah apni samanya gati aur disha men kanya rashi se tula rashi ki taraf chalna shuru kar dete hain. vakra disha men chalne vale arthat vakri hone vale baki ke sabhi grah bhi isi tarah ka vyavhar karte hain. vakri grahon ki paribhasha jan lene ke pashchat aie ab dekhen ki duniya bhar ke jyotishi vakri grahon ke bare men mukhya rup se kya dharnaen rakhte hain. sabse pahle charcha karte hain jyotishiyon ke us varg vishesh ki jo yah dharna rakhta hai ki vakri grah kisi bhi kundli men sada ashubh fal hi pradan karte hain kyonki vakri grah ulti disha men chalte hain islie unke fal ashubh hi honge. jyotishiyon ka ek dusra varg manta hai ki vakri grah kisi kundli vishesh men apne kudrti svabhav se viprit acharan karte hain arthat agar koi grah kisi kundli men samanya rup se shubh fal de raha hai to vakri hone ki sthiti men vah ashubh fal dena shuru kar deta hai. isi prakar agar koi grah kisi kundli men samanya rup se ashubh fal de raha hai to vakri hone ki sthiti men vah shubh fal dena shuru kar deta hai. is dharna ke mul men yah vishvas hai ki kyonki vakri grah ulti disha men chalne lagta hai islie uska shubh ya ashubh prabhav bhi samanya se ulta ho jata hai.
jyotishiyon ka ek aur varg yah manta hai ki agar koi grah apni uchch ki rashi men sthit hone par vakri ho jata hai to uske fal ashubh ho jate hain tatha yadi koi grah apni nich ki rashi men vakri ho jata hai to uske fal shubh ho jate hain. iske pashchat jyotishiyon ka ek aur varg hai jo yah dharna rakhta hai ki vakri grahon ke prabhav bilkul samanya gati se chalne vale grahon ki tarah hi hote hain tatha unmen kuch bhi antar nahin ata. jyotishiyon ke is varg ka yah manna hai ki pratyek grah keval samanya disha men hi bhraman karta hai tatha koi bhi grah samanya se ulti disha men bhraman karne men saksham nahin hota. itne sare maton aur dharnaon par charcha karne ke pashchat aie ab dekhen ki anubhav ke anusar kisi grah ke vakri hone ki sthiti men uske vyavhar men kya badlav ate hain. sabse pahle to yah jan len ki kisi bhi vakri grah ka vyavhar uske samanya hone ki sthiti se alag hota hai tatha vakri aur samanya grahon ko ek jaisa nahin manna chahie. kintu yahan par yah jan lena bhi avashyak hai ki adhikatar mamlon men kisi grah ke vakri hone se kundli men uske shubh ya ashubh hone ki sthiti men koi fark nahi parta arthat samanya sthiti men kisi kundli men shubh fal pradan karne vala grah vakri hone ki sthiti men bhi shubh fal hi pradan karega tatha samanya sthiti men kisi kundli men ashubh fal pradan karne vala grah vakri hone ki sthiti men bhi ashubh fal hi pradan karega. adhikatar mamlon men grah ke vakri hone ki sthiti men uske svabhav men koi fark nahin ata kintu uske vyavhar men kuch badlav avashya a jate hain. vakri hone ki sthiti men kisi grah vishesh ke vyavhar men ane vale in badlavon ke bare men janne se pahle yah jan len ki navagrahon men surya tatha chandra sada samanya disha men hi chalte hain tatha ye donon grah kabhi bhi vakri nahin hote. inke atirikt rahu-ketu sada ulti disha men hi chalte hain arthat hamesha hi vakri rahte hain.
islie surya-chandra tatha rahu-ketu ke fal tatha vyavhar sada samanya hi rahte hain tatha inmen koi antar nahin ata. aie ab dekhen ki baki ke panch grahon ke svabhav aur vyavhar men unke vakri hone ki sthiti men kya antar ate hain. guru: vakri hone par guru ke shubh ya ashubh fal dene ke svabhav men koi antar nahin ata arthat kisi kundli vishesh men samanya rup se shubh fal dene vale guru vakri hone ki sthiti men bhi us kundli men shubh fal hi pradan karenge tatha kisi kundli vishesh men samanya rup se ashubh fal dene vale guru vakri hone ki sthiti men bhi us kundli men ashubh fal hi pradan karenge kintu vakri hone se guru ke vyavhar men kuch badlav avashya a jate hain. vakri hone ki sthiti men guru kai bar shubh ya ashubh fal dene men deri kar dete hain. vakri hone ki sthiti men guru bahut bar kundli dharak ko dusron ko bina mangi salah ya updesh dene ki adat pradan kar dete hain. aise logon ko bahut bar apne gyan ka istemal karne ki sahi disha ka pata nahin lagta tatha isi adat ke chalte aise log kai bar apne as pas ke logon ko vyarth men hi updesh dena shuru kar dete hain. in badlavon ke atirikt am taur par vakri guru apne samanya svabhav ki tarah hi acharan karte hain. shukra: vakri hone par shukra ke shubh ya ashubh fal dene ke svabhav men koi antar nahin ata arthat kisi kundli vishesh men samanya rup se shubh fal dene vale shukra vakri hone ki sthiti men bhi us kundli men shubh fal hi pradan karenge tatha kisi kundli vishesh men samanya rup se ashubh fal dene vale shukra vakri hone ki sthiti men bhi us kundli men ashubh fal hi pradan karenge kintu vakri hone se shukra ke vyavhar men kuch badlav avashya a jate hain. vakri shukra am taur par kundli dharak ko samanya se adhik sanvednshil bana dete hain tatha aise log vishesh rup se apne prem sanbandhon tatha apne jivan sathi ko lekar bahut bhavuk tatha adhikar jatane vale hote hain. purushon ki janm kundli men sthit vakri shukra jahan unhen ati bhavuk tatha sanvednshil banane men saksham hota hai vahin par mahilaon ki janm kundli men sthit vakri shukra unhen akramkta pradan karta hai.
aisi mahilaen am taur par apne premi ya jivan sathi par apna niyantran rakhti hain tatha sanbandh tut jane ki sthiti men asani se apne premi ya jivan sathi ka picha nahin chortin aur kai bar badla lene par bhi utaru ho jati hain. in badlavon ke atirikt am taur par vakri shukra apne samanya svabhav ki tarah hi acharan karte hain. mangl: vakri hone par mangal ke shubh ya ashubh fal dene ke svabhav men koi antar nahin ata arthat kisi kundli vishesh men samanya rup se shubh fal dene vale mangal vakri hone ki sthiti men bhi us kundli men shubh fal hi pradan karenge tatha kisi kundli vishesh men samanya rup se ashubh fal dene vale mangal vakri hone ki sthiti men bhi us kundli men ashubh fal hi pradan karenge kintu vakri hone se mangal ke vyavhar men kuch badlav avashya a jate hain. vakri mangal am taur par kundli dharak ko samanya se adhik sharirik tatha mansik urja pradan kar dete hain jiska sahi disha men upyog karne men am taur par kundli dharak saksham nahin ho pate tatha islie ve is atirikt urja ko lekar pareshan rahte hain aur kai bar yah urja unke achanak hi prakat ho jane vale gusse athva chirchirepan ke rup men dekhne ke rup men bahar niklti hai. is urja ke karan aise log apne jivan men kai bar achanak hi bare apratyashit nirnay le lete hain jisse inke svabhav ke bare men koi thos dharna bana pana kathin ho jata hai.
mahilaon ki janm kundli men sthit vakri mangal am taur par unhen purushon ke gun pradan kar deta hai tatha aisi mahilaen purushon ke karya kshetron men kam karne tatha purushon ko saflta purvak niyantrit karne men saksham hoti hain. in badlavon ke atirikt am taur par vakri mangal apne samanya svabhav ki tarah hi acharan karte hain. budh: vakri hone par budh ke shubh ya ashubh fal dene ke svabhav men koi antar nahin ata arthat kisi kundli vishesh men samanya rup se shubh fal dene vale budh vakri hone ki sthiti men bhi us kundli men shubh fal hi pradan karenge tatha kisi kundli vishesh men samanya rup se ashubh fal dene vale budh vakri hone ki sthiti men bhi us kundli men ashubh fal hi pradan karenge kintu vakri hone se budh ke vyavhar men kuch badlav avashya a jate hain. vakri budh am taur par kundli dharak ki batchit karne ki kshamata tatha nirnay lene ki kshamata ko prabhavit kar dete hain. aise log am taur par ya to samanya se adhik bolne vale hote hain ya fir bilkul hi kam bolne vale. kai bar aise log bahut kuch bolna chah kar bhi kuch bol nahin pate tatha kai bar kuch n bolne vali sthiti men bhi bahut kuch bol jate hain.
aise log vakri budh ke prabhav men akar jivan me anek bar bare apratyashit tatha atpte se lagne vale nirnay le lete hain jo paristhitiyon ke hisab se lie jane vale nirnay ke ekadam viprit ho sakte hain tatha jinke lie kai bar aise log bad men pachtava bhi karte hain kintu vakri budh ke prabhav men akar ye log apne jivan men aise nirnay lete hi rahte hain. in badlavon ke atirikt am taur par vakri budh apne samanya svabhav ki tarah hi acharan karte hain. shani: samast grahon men se shani hi ekmatra aise grah hain jo vakri hone ki sthiti men kundli dharak ko kuch n kuch ashubh fal avashya pradan karte hain fir chahe kisi kundli men unka svabhav kitna hi shubh fal dene vala kyon n ho. kintu vakri hone ki sthiti men shani ke svabhav men ek nakaratmakata avashya a jati hai jo kundli dharak ke lie kuch samasyaon se lekar bahut bhari vipattiyan tak lane men saksham hoti hai. yadi shani kisi kundli men samanya rup se shubh faldayi hokar vakri hain to kundli dharak ko apekakshakrit kam nuksan pahunchate hain tatha aisi sthiti men kundli men inka svabhav mishrit ho jata hai jo kundli dharak ko kabhi labh to kabhi hani deta hai. kintu yadi shani kisi kundli men samanya rup se ashubh faldayi hokar vakri hain to kundli dharak ko apekakshakrit bahut adhik nuksan pahunchate hain.
kisi kundli men shani sabse adhik nuksan tab pahunchate hain jab ve tula rashi men sthit ho, samanya rup se ashubh faldayi hon tatha iske sath hi vakri bhi hon. tula rashi men sthit hokar shani ko atirikt bal prapt hota hai tatha ashubh hone ki sthiti men shani vaise hi is atirikt bal ke chalte samanya se adhik hani karne men saksham hote hain kintu aisi sthiti men vakri hone se unki nakaratmakata men aur bhi vriddhi ho jati hai tatha is sthiti men kundli dharak ko dusre grahon ki sthiti ko dhyan men rakhte hue bahut bhari musibton ka samna karna par sakta hai. ast grah: kisi bhi grah ke ast ho jane ki sthiti men uske prabhav men kami a jati hai tatha vah kisi kundli men sucharu rup se karya karne men saksham nahin rah jata. kisi bhi ast grah ki prabhavhinta ka sahi anuman lagane ke lie us grah ka kisi kundli men sthiti ke karan bal, surya ka usi kundli vishesh men bal tatha ast grah ki surya se duri dekhna avashyak hota hai. tatpashchat hi us grah ki karya kshamata ke bare men sahi jankari prapt ho sakti hai. udaharan ke lie kisi kundli men guru surya se 11 digri dur hone par bhi ast kahlaenge tatha 1 digri dur hone par bhi ast hi kahlaenge, kintu pahli sthiti men kundli men guru ka bal dusri sthiti ke mukable adhik hoga kyonki jitna hi koi grah surya ke pas a jata hai, utna hi uska bal kshin hota jata hai.
islie ast grahon ka adhyayan bahut dhyanpurvak karna chahie jisse ki unke kisi kundli vishesh men sahi bal ka pata chal sake. ast grahon ke purn shubh prabhav ko prapt karne hetu atirikt bal ki avashyakta hoti hai tatha kundli men kisi ast grah ke adhyayan ke bad hi yah nirnay kiya jata hai ki us ast grah ko atirikt bal kaise pradan kiya ja sakta hai. yadi kisi kundli men koi grah ast hone ke sath-sath svabhav se shubh faldayi hai to use atirikt bal pradan karne ka sabse uchit upay hai, kundli dharak ko us grah vishesh ka ratn dharan karva dena. ratn ka vajan ast grah ki prabhavhinta ka sahi anuman lagane ke bad hi tay kiya jana chahie. is prakar us ast grah ko atirikt bal mil jata hai jisse vah apna karya sucharu rup se karne men saksham ho jata hai. kintu yadi kisi kundli men koi grah ast hone ke sath-sath ashubh faldayi hai to aise grah ko uske ratn ke dvara atirikt bal nahin diya jata kyonki kisi grah ke ashubh hone ki sthiti men uske ratn ka prayog sarvatha varjit hai, bhale hi vah grah kitna bhi balhin ho. aisi sthiti men kisi bhi ast grah ko bal dene ka sabse uchit tatha prabhavshali upay us grah ka mantra jap hota hai. aisi sthiti men us grah ke mantra ka nirantar jap karne se ya us grah ke mantra jap, puja karvane se grah ko atirikt bal to milta hi hai, sath hi sath uska dushprabhav se shubhaprabhav shuru ho jata hai. kisi kundli men kisi ast tatha ashubh faldayi grah ke lie sarvapratham uske bij mantra athva ved mantra ke 1,25,000 mantron ke jap se puja karvani chahie tatha uske pashchat niyamit rup se usi mantra ka jap karna chahie jiske jap ke dvara grah ki puja karvayi gai thi.