pauranik kathaon men guru ko bhrigu ririshi ka putra bataya gaya hai. jyotish shastra men guru ko sarvadhik shubh grah mana gaya hai. guru ko agyan dur kar sadmarg ki or le jane vala kaha jata hai. saur mandal men guru sarvadhik dirghakar grah hai. dhanu v min iski svarashiyan hain. dhanu v min dvisvabhav rashiyan hain. atah guru dvisvabhav rashiyon ka svami hone ke karan ismen sthirta evan gatishilta ke gunon ka prabhav hai. yah kark rashi men uchch ka v makar rashi men nich ka hota hai. kark v makar rashi donon hi char rashiyan hain jiske karan guru apni uchchata v nichta ka fal badi teji se dikhata hai. surya, chandra, mangal iske mitra hain. nirbal, dushit v akela guru saptam bhavasth hone par vyakti ko svarthi, lobhi v avishvaniya banata hai. vahin shubh rashisth saptamasth guru vyakti ko vinamra, sushil sammanit banata hai. jivan sathi bhi sundar v sushil hota hai. ‘‘sthan hani karo jiva’’ ke siddhant ke adhar par guru shubh v sabal hone par bhi, jis sthan men baithta hai us sthan ki hani karta hai. parantu jin sthanon par drishti dalta hai un sthanon ko balvan banata hai. saptam sthan pramukh rup se vaivahik jivan ka bhav mana gaya hai. samanyatah saptam bhavasth guru ko ashubh falaprad kaha jata hai. purush rashiyon men hone par jatak ka apne jivan sathi se matbhed ki sthiti banti hai.
vahin stri rashiyon men hone par jivan sathi se algav ki sthati la deta hai. saptamasth guru jatak ka bhagyoday to karata hai parantu vivah ke bad. prastut hai vibhinn lagnon men saptamasth guru ke falon ka ek sthul vivechan.
1. mesh lagn mesh lagn men guru navmesh v dvadshesh hokar saptamasth hota hai tatha lagn, labh v parakram bhav men drishtipat karta hai. saptam bhav men tula rashi ka hota hai. atah bhagyesh, saptamasth hone ke karan nishchay hi vivah ke bad bhagyoday hota hai. samaj ke bich milnsar hota hai. jiske karan jivan sathi se bhautik duri bani rahti hai.
2. vrish lagn vrish lagn men guru ashtamesh v ekadshesh hokar vrishchik rashi men saptamasth hokar labh, lagn evan parakram bhav par drishtipat karta hai. iski mul trikon rashi ashtam sthanagat hone ke karan svasthya sanbandhi pareshaniyan utpann hoti haie. sasural dhanadhya hota hai parantu svayan dhan ke mamle men apekshit saflta prapt nahin kar pata.
3. mithun lagn mithun lagn men guru saptam v dasham bhav ka svami hokar saptam bhavasth hokar hans yog ka nirman karta hai. hans yog ko raj yog kaha ja sakta hai jiska parinam guru ki dasha-antardasha men prapt hota hai. parantu is lagn men guru ko sarvadhik kendresh hone ka dosh lagta hai atah vivah evan vaivahik jivan ke mamlon men prithkta deta hai. guru yadi vakri ya ast ho to sthiti aur adhik bigad jati hai.
4. kark lagn kark lagn men guru shashtm evan navam bhav ka svami hokar apni nich rashi men saptamasth hota hai. nishchay hi navmesh hone ke karan vivah ke bad bhagyoday hota hai. parantu mul trikon rashi shashtam bhav men padne ke karan jivan sathi ka svasthya pratikul hi rahta hai. dhan ke mamlon men, labh ki jagah hani ka samna karna padta hai.
5. sinh lagn sinh lagn men guru panchmesh v ashtamesh hokar kunbh rashi men saptamasth hota hai. panchmesh hone ke karan ati shubh hota hai. sasural paksh dhanadhya hota hai. parantu ashtamesh hone ke karan jivan sathi ko udar ki pida deta hai. jivan sathi ka svabhav chidchida hota hai. parivar se tal mel nahin baith pata.
6. kanya lagn kanya lagn men guru chaturth v saptam bhav ka svami hokar saptam bhav men hans yog ka nirman karta hai jiske karan jatak ka vivah uchch kul ke dhanadhya parivar men hota hai. parantu is lagn men guru ko kendresh hone ka dosh hota hai jiske karan vivahoprant jivan sathi se matbhed v nirashajanak parinam prapt hone shuru ho jate hain. is sthiti men guru, yadi vakri ya ashubh prabhav men hota hai to jivan sathi se algav ki sthiti a sakti hai.
7. tula lagn tula lagn men guru tritiya v shashth bhav ka svami hokar mesh rashi ka saptam bhavagat hota hai. bhavesh ki drishti se yah purnatah akarak rahta hai. mesh rashi men saptamasth hone se jatak nidar, sahsi banta hai. apne parakram se dhanarjan karta hai. aishvarya pradan karta hai. parantu jivan sathi ke lie marak hokar, uska svasthya prabhavit karta hai.
8. vrishchik lagn vrishchik lagn men guru dvitiyesh v panchmesh hokar vrish rashi men saptamasth hota hai. panchmesh hone ke karan guru shubh rahta hai. dhan ke mamlon men achcha parinam deta hai. parantu santan paksh se vivad ki sthiti paida karta hai jiske karan jivan sathi se takrav ki naubat ati hai. vastutah jatak ko sansarik sukhon ka sukh prapt nahin ho pata.
9. dhanu lagn dhanu lagn men guru lagnesh v chaturthesh hokar saptamasth hota hai. guru ki lagn par purn drishti lagn ko balvan banati hai. vastutah jatak sundar v sushil, jivan sathi prapt karta hai. mata-pita ka sukh evan bhumi, bhavan, santan ka sukh prapt karta hai. jivan sathi, mata pita v santan ka sahyog prapt karta hai. sasural se sanpatti prapt karne ke yog bante hai.
10. makar lagn makar lagn men guru dvadash evan tritiya bhav ka svami hokar, saptam bhav men hans yog ka nirman karta hai. vastutah jatak vidvan hota hai. jivan sathi sundar v sushil hota hai. mukhmandal men tej hota hai. jivan sathi ke prati samarpit hota hai.
11. kunbh lagn kunbh lagn men guru dhan v labh bhav ka svami ho kar apne mitra surya ki rashi men saptamasth hota hai. sath hi guru ki purn drishti, labh sthan ko majbuti pradan karti hai. dvi tiya v ekadash bhav donon hi dhan se sanbandhit bhav hain. atah dhan labh evan dhanarjan ki disha men guru bahut hi shubh fal karta hai. yadi guru par anya kisi shubh ya yogkarak grah ki drishti ho to yah sthiti sone men suhaga hoti hai. jatak ka vivah dhanadhya parivar men hota hai tatha sasural ya jivan sathi se dhan labh hota hai.
12. min lagn min lagn men guru lagnesh v dashmesh hota hai. kanya rashi men saptamasth hokar lagn ko bal pradan karta hai. vastutah jatak arogya evan achchi ayu prapt karta hai. labh sthan men drishti hone ke karan svaarjit dhan prapt karta hai. logon men pratishtha ka patra banta hai. vivah ke bad bhagyoday hota hai. jatak ka vivah uchch kul men hota hai. saptam sthan men kanya rashi ka guru hone ke karan jivan sathi ko matibhram ki sthiti se samna karna pad sakta hai. uprokt lagn ke adhar par saptamasth guru nishchit hi ‘sthan hani karo jiva’ ka siddhant deta hai. arthat saptamasth guru nishchit hi sundar jivan sathi deta hai. parantu vivahoprant, vaivahik jivan sukhad nahin rahne deta. fir bhi navmansh kundli men guru yadi balvan hokar virajit ho, to kafi had tak visham sthitiyon ko jatak samadhan kar leta hai. isi prakar guru yadi ashtak varg men 4 se adhik rekhaen le kar baitha ho to bhi lagn kundli men saptamasth guru ke pratikul prabhavon men kami ati hai tatha guru apni dasha-antardasha men achcha fal deta hai. astu saptamasth guru ke falon ka vivechan karne ke purva navmansh v ashtak varg men guru ki sthiti ko dekhakar hi antim nirnay par pahunchna chahie.
fir bhi saptamasth guru apni dasha-antardasha men yadi viprit prabhav de, to nimn upayon ko kar, guru ke anishtakari prabhavon se bacha ja sakta hai.
upay
1. mesh lagn a. sone ki anguthi men pukhraj ratn dharan karen. b. sadaiv pile kapde pahnne ko prathmikta den. c. manglvar ko sundrkand ka path karen.
2. vrish lagn a. panch mukhi rudraksh dharan karen. b. bhagvan shiv ke kisi mantra ka pratidin ek mala jap karen. c. sadaiv shvet rang ke kapde pahnne ko prathmikta den.
3. mithun lagn a. sone ki anguthi men pukhraj ratn dharan karen. b. un brin brihaspataye namah mantra ka ek mala jap karen. c. sadaiv pile rang ka rumal paeket men rakhen.
4. kark lagn a. sone ki anguthi men pukhraj ratn dharan karen. b. guru se sanbandhit vastuon ka dan karen. c. bhagvan vishnu ki sadhna karen.
5. sinh lagn a. tanbe ki anguthi men guru yantra utkirn kara, dharan karen. b. ghar men guru yantra sthapit karen. c. haldi ka dan karen. parantu bhikhari ko bhulakar bhi n den.
6. kanya lagn a. panch mukhi rudraksh dharan karen. b. ‘guru gayatri’ mantra ka jap karen. c. ghode ko chane ki dal v gud khilaen.
7. tula lagn a. ghar men guru yantra ki sthapna karen. b. chote bhaiyon ko sneh den. apman n karen. c. shakti sadhna karen.
8. vrishchik lagn a. nyunatam 16 somvar ka vrat dharan karen. b. haldi ki ganth takie ke niche rakhakar soyen. c. shiv ji ki sadhna karen.
9. dhanu lagn a. manikya, pukhraj v munga se nirmit trishakti laeket dharan karen. b. vishnustotra ka path karen. c. 43 din tak jal men haldi milakar snan karen.
10. makar lagn a. gyarah mukhi rudraksh dharan karen. b. ghar ki chat men surjmukhi ka paudha ropit karen tatha pratidin jal den. c. bhagvan bhaskar ko pratidin tanbe ke patra se jal ka aghrya den.
11. kunbh lagn a. bhagvan shiv ke mahamrityunjay mantra ka pratidin jap karen. b. pukhraj dharan karen. c. reshmi pila rumal sadaiv apne pas rakhen.
12. min lagn a. manikya, pukhraj evan munga ratn se nirmit ‘trishakti laeket’ dharan karen. b. bhagvan surya ko nitya jal ka aghrya den. c. guruvar ko vishnu mandir jakar pile rang ke ful bhagvan vishnu ko arpit karen tatha kanyaon ko mishriyukt khir khilaen. not: guru ki sthiti kundli men chahe jaisi ho; jatak yadi nimn mantra ka jap pratidin karta hai to guru ki vishesh kripa bani rahti hai tatha ashubh guru ke doshon se mukti payi ja sakti hai. mantra: un angirshay vidmahe, divya dehay, dhimhi tanno jivah prachodyat.