jyotish shastra jahan vivah men vilanb karak grah sthitiyon ka vishleshan karta hai, vahin shighra vivah ke lie upayon ka nirdesh bhi deta hai. sarvapratham janmakundli ka sukshm adhyayan kar yah pata lagana chahie ki vyakti ke vivah karane men kaun sa grah mukhya rup se uttaradayi hai. us grah par kin shubh evan ashubh grahon ka prabhav hai. ashubh prabhavon ko samapt karne ke lie ashubh grahon se sanbandhit dan larke ya larki ke hath se karana chahie. vivah men vilanb men shani ki pramukh bhumika hoti hai.
atah shani ka upay karne se bhi shighra vivah ki sthitiyan banti hain. prastut lekh men kuch aise achuk prayogon ka vivaran diya ja raha hai jinki sahayta se shighra vivah ki sthitiyan banti hanai.
- mesh rashi ke logon ko vivah ki varta ke samay lal ya gulabi rang ke vastra dharan karne chahie.
- vrish rashi ke logon ko vivah varta ke samay halke rang ke vastra tatha chamkile abhushan pahnne chahie. yadi koi naya vastra dharan kiya jae to bhi achcha rahega.
- mithun rashi ke logon ko vivah varta ke samay hare rang ke vastra tatha paranprik poshak hi pahnni chahie. koi naya vastra dharan nahin karna chahie.
- kark rashi ke logon ko vivah varta ke samay safed rang ka koi vastra avashya pahnna chahie. vastra naya evan chamkila nahin hona chahie.
- sinh rashi ke logon ko vivah varta ke samay halke gulabi ya halke hare rang ke vastron ka upyog karna chahie.
- kanya rashi ke logon ko vivah varta ke samay hare, safed evan saumya rang ke vastra dharan karne chahie.
- tula rashi ke logon ko vivah varta ke samay naye vastra dharan karne chahie. unhen safed, gulabi evan pile rang ke vastra dharan karne chahie.
- vrishchik rashi ke logon ke lie vivah varta ke samay lal rang ke vastra dharan karna shubh hota hai.
- dhanu rashi ke logon ke lie vivah varta ke samay pile rang ke vastra dharan karna shubh hota hai.
- makar rashi ke logon ke lie vivah varta ke samay asmani evan kuch nile rang ke vastra pahnna shubh hota hai.
- kunbh rashi ke logon ke lie vivah varta ke samay baingni ya gahre nile rang ki poshak pahnna shubh hota hai.
- min rashi ke logon ke lie vivah varta ke samay pile rang ki poshak pahnna shubh hai.
vivah varta ke samay jab var paksh ke log kanya ko aur kanya paksh ke log var ko dekhne ke lie jaen, tab var aur kanya donon ko hi apne vastrabhushnon ka vishesh dhyan rakhna chahie. unhen apni rashi se sanbandhit shubh rang ke vastra pahnne chahie. vivah varta ke sthan ka chayan karne ke lie janmakundli ke satvane bhav men sthit rashi ki prakriti ka adhyayan karna chahie. meshadi vibhinn lagnon ke logon ke lie vivah varta hetu kaun sa sthan adhik upyukt hoga iska vivaran niche diya ja raha hai.
mesh lagna: vivah ke ghar men tula rashi hone ke karan is lagn ke logon ko vivah varta ke lie kisi paryatan ya manoranjan sthal ka chayan karna chahie. kisi rishtedar ka saf suthra ghar bhi thik rahega.
vrish lagna: vivah ke ghar men vrishchik rashi hone ke karan inhen vivah varta ke lie kisi hotal, gest haus ya kisi anya mahatvapurn bhavan ka chayan karna chahie.
mithun lagna: vivah ke ghar men dhanu rashi hone ke karan is lagn ke logon ko vivah varta ke lie kisi mandir ya dharmasthal ka chayan karna chahie.
kark lagna: vivah ke ghar men makar rashi hone ke karan inhen vivah varta ke lie kisi prachin bhavan ka chayan karna chahie.
sinh lagna: vivah ke ghar men kunbh rashi hone ke karan inhen vivah varta ke lie kisi prasiddh aur prachin sthan ka chayan karna chahie.
kanya lagna: vivah ke ghar men min rashi hone ke karan inhen vivah varta ke lie kisi mandir ya dharmasthan ka chayan karna chahie.
tula lagna: vivah ke ghar men mesh rashi ke hone ke karan inke lie vivah varta ke lie kisi kuntunbi jan ka ghar upyukt rahega. iske atirikt kisi hotal, gest haus ya dharmashala ka chayan kar sakte hain.
vrishchik lagna: vivah ke ghar men vrish rashi hone ke karan is lagn ke logon ko vivah varta ke lie kisi manoranjan sthal, park ya paryatan sthal ka chayan karna chahie.
dhanu lagna: vivah ke ghar men mithun rashi hone ke karan inhen vivah varta ke lie kisi prakritik saundarya yukt sthan jaise bag, bagiche ya hare bhare sthan ka chayan karna chahie.
makar lagna: vivah ke ghar men kark rashi hone ke karan inhen vivah varta ke lie kisi nadi ya talab ke samip kisi sthan ka chayan karna chahie.
kunbh lagna: vivah ke ghar men sinh rashi hone ke karan is rashi ke logon ko vivah varta ke lie kisi prasiddh evan pratishthit sthan ka chayan karna chahie.
min lagna: vivah ke ghar men kanya rashi hone ke kan inke lie vivah varta ke lie kisi prakritik saundarya yukt sthan ya kisi mitra athva rishtedar ka ghar upyukt rahega.
jis kanya ke vivah men vilanb ho chuka ho uske mata-pita jab bhi vivah ki varta ke lie ghar se jaen, us samay use apne bal khule rakhne chahie tatha mathe par lal chandan ki bindi lagani chahie. vivah bhav ka svami grah jis samay gochar men ast ya vakri ho, us samay vivah ki batchit nahin karni chahie. aise samay men vivah tay hone ki sanbhavna nirbal rahti hai.
gochar men jab vivah bhav ka svami bali ho, us samay vivah ki batchit karne se sakaratmak parinam samne ate hain. yadi shani grah ke vivah bhav men hone ke karan ya us par shani ki drishti ke karan vilanb ho raha ho to kanya ko shanivar ko karve tel men apni parchain dekhakar tel dan karna chahie. yah prayog sat shanivar ko ninratar karna chahie.