shriram ki janmakundli evan jivan chakra  

shriram ki janmakundli evan jivan chakra ram ka janm kark lagn men hua tha. kark lagn vyakti ke satkarmi, nishkalank aur yashasvi hone ka parichayak hai. kark lagn ke sath-sath yadi lagnesh chandra bhi lagn men ho, to jatak samriddh, susanskrit, nyayapriya, satyanishth, kshamashil aur vidvan hota hai. vah bhagyashali tatha jivan men uchch sthan ko prapt karne vala hota hai. use desh-videsh men samman ki prapti hoti hai. kark lagn men chandra ke sath guru bhi isi bhav men sthit ho, to vyakti satyanishth v nyayapriya hai aur uska vyavhar mridu hota hai. kark rashi men guru ke uchchasth hone ke karan jatak jivn-mulyon ki pratishtha banae rakhne ke lie koi bhi balidan kar sakta hai. aisa vyakti aisi adrishya dhal se yukt hota hai jise kharaunch tak bhi nahin lagti. vah atm samman ko vishva ki sakal sanpda se bhi adhik samjhta hai. isi kark lagn men avtrit bhagvan ram men ye sare gun vidyaman the. isilie vah maryada purushottam ram kahlae. bhagvan ram ki kundli men mangal ke saptam bhav men uchchasth hone ke karan unka vivah mata sita jaisi divya kanya se hua. kundli men mangal sthit rashi makar ka svami shani bhi uchchasth hai tatha shani sthit rashi ka svami shukra bhi uchchasth hai. shukra patni ka pratinidhi grah hai. atah bhagvan ram ka mata sita jaisi divya kanya se vivah hona svabhavik hai. bhagvan ram ki janm kundli men mangal saptam bhav men hone se manglik hai. kintu uske uchch rashisth hone se uska dosh nishprabhavi to raha kintu saptam bhav evan uske karkesh shukra par rahu ki drishti aur ketu ki sthiti tatha saptam bhav men vidhvansak mangal ki sthiti ke karan patni viyog ka dukh jhelna para. shani, mangal v rahu ki dasham bhav evan surya par drishti pita ki mrityu ka karan bani. shani ki chaturth bhav men sthiti aur chandra evan chandra rashi kark par drishti ke karan mataon ko vaidhavya dekhna para. chote bhai ka pratinidhi grah mangal saptam bhav men uchch ka hai aur us par guru ki drishti hai, jiske falasvarup chote bhaiyon ne bhagvan ram ki patni arthat mata sita ko mata ka adar diya. uchch ke grah se hans yog, shani se shash yog, mangal se ruchak yog aur chandra ke lagn men hone ke falasvarup gajkesri yog hai. guru aur chandra ke prabal hone ke karan yah gajkesri yog atyant prabal hai. punarvasu ke antim charan men hone se chandra svakshetri hone ke karan vargoÿam men hai. atah bhagvan shri ram ke samne jo bhi kathinaiyan ain unka unhonne safltapurvak samna kiya. panch grahon ke uchch ke hone ke karan bhagvan avtari purush hue. chandra aur lagn ke bali guru se prabhavit hone ke karan bhagvan ne maryadaon ka palan kiya. maharshi valmiki ke bhagvan ram ke janmachakra ke varnan men rahu, ketu evan budh ki sthiti ka gyan nahin hota. kintu bhagvan ram ke jivan charitra ke anusar anuman lagaya ja sakta hai ki ye grah kis bhav evan kis rashi men honge. bhagvan ram atyant pratapi hue. isse pata chalta hai ki unki janmakundli men rahu ki sthiti tritiya bhav kanya rashi men hogi kyonki tritiya bhav ka rahu jatak ko parakrami evan pratapi banata hain. iske anusar ketu navam bhav men uchch ke shukra se yut hai. isi shukra ke karan bhagvan ram ke parakrami evan pratapi banne men unki patni mata sita madhyam evan karan banin. panchmesh mangal ke pancham se tisre sthan par hone ke karan bhagvan ram ke putra bhi atyant parakrami hue. budh evan shukra kabhi bhi surya se 28 ansh se adhik duri par nahin jate islie donon ko surya ke sath athva irda-gird hi mana jaega. bhagvan ram ke jivan charitra ke anusar shukra ko navam bhav ke min rashi men hona upyukt mana jaega. budh nirbal grah hai. kintu brishabh rashi men hone par vah nirbal nahin rah jata kyonki brishabh rashi ka svami shukra budh ka mitra hai jo uchch rashisth hai aur jis rashi men vah hai uska svami guru bhi lagn men uchch rashisth hai. yahin par grahon ki shrinkhla samapt hoti hai. iske alava budh dvadash bhav ka svami hai aur dvadash bhav se dvadash hone ke karan ati bali hai. atyant bali budh ki rashi kanya men rahu ki sthiti ne hi bhagvan ram ko parakrami banaya. lagnesh bhagyesh ka yog aur un par panchmesh, saptamesh aur dashmesh ki drishti se prabal rajyog bana. uchch ka sukhesh shukra bhagya sthan men hai aur us par bhagyesh guru ki drishti hai. inhin yogon ke karan bhagvan chakravarti samrat bane. chaturthesh shukra ke uchch hone ke karan bhagvan ram sansarik hue. chaturth bhav se shani ki drishti lagn sthit guru par hone ke karan vah vairagi hue arthat saÿaa ke adhikari hote hue bhi vah vairagi raja siddh hue. chandrama punarvasu nakshatra ke chaturth charan men hai jiske karan unka janm guru ki 16 varshon ki mahadsha men hua. punarvasu nakshatra ke chaturth charan men janm hon ke karan guru ki mahadsha shesh adhik se adhik char varsh rahi hogi. tatpashchat shani ki mahadsha 19 varsh ki ai jo 23 varsh ki ayu tak chali. puranon ke anusar bhagvan shri ram ka vivah 18 varsh ki ayu men hua. us samay saptamesh shani ki mahadsha aur antardasha svami gochar ka guru saptam sthan men tha. puranon ke anusar 27 varsh ki ayu men bhagvan ko chaidah varshon ka banvas hua aur unke viyog men unke pita maharaj dasharath ka svargavas hua. us samay bhagvan shri ram budh ki mahadsha ke prabhav men the. budh tritiyesh evan vyayesh hone ke karan kashtakarak tha. gochar men sinh ka shani dusre bhav men tha. yah sarhe sati ka antim charan tha. guru chandrama se chaithi rashi tula men tha. yah budh tritiyesh shashthesh pita ke bhav se hokar dusre bhav men tha. atah pita ke lie marak tha aur bhagvan ram tatha kutunb ke lie kashtakarak tha. budh ki dasha men hi sitaharan hua. vyayesh ki dasha men shayya sukh ka nash hota hai aur kashtakarak yatra hoti hai. ketu ke navam bhav men svakshetri hone ke karan lanka vijay karke punah ayodhya ke samrat bane. jaimini jyotish ke anusar lagnesh aur ashtamesh yadi char rashi ke hote hain to jatak dirghayu hota hai. bhagvan shri ram ka lagnesh chandra char rashi ka hai tatha ashtamesh shani bhi tula rashi men char rashi ka hai. lagn men guru v chandra ke bali hone ke falasvarup bhagvan ne amit ayu prapt ki aur iska sadupyog bhi kiya. is prakar grahon ki shubhashubh sthiti ke falasvarup maryada purushottam ram ne anek kasht jhele, ravan jaise shatru par vijay prapt ki aur ram rajya ki sthapna ki.