soniya aj bahut hi tanha mahsus kar rahi thi. bhara-pura ghar hote hue bhi uska koi apna nahin tha vaise to sab uske apne the par use shayad koi apna nahin manta tha. uska apna pati vivek jo us par jan chirkta tha aj uski or dekhta bhi nahin. vah apne kamre men upekshit si pari rahti hai. sochte-sochte use ashru barabas ankhon se bahne lage aur uska pura jivan uski ankhon men tairne laga.
bachapan se use parhai ka shauk tha. mata-pita ne achche skul men parhaya aur fir 12vin kaksha ke bad injiniyaring men edmishan le liya. kaelej men hi uski mulakat vivek se bhi hui. vah bhi parhne men bahut hoshiyar tha. man hi man donon ek dusre ko pasand karne lage.
kaelej khatm hote-hote donon ki achchi naukri lag gai aur donon hi apni naukri men vyast ho gaye.
ek din achanak soniya ne vivek ki man ko apne pita ke pas aya dekha to uski khushi ka thikana n raha. vivek ki mata uska hath mangne uske pita ke pas ai thi aur uske pita ne bhi khushi-khushi hami bhar di aur dhum-dham se 2005 men donon ka vivah ho gaya.
vivah ke pashchat soniya aur vivek bahut khush the aur ek dusre ko behad chahte the lekin kahte hain ki adhik khushi bhi adhik din kayam nahin rahti. najar lag hi jati hai shayad aisa hi soniya ke sath hua. agast 2007 men jab soniya apni kar se karyalay se ghar a rahi thi to uska achanak aiksident ho gaya aur use kafi chotane ain. uska haespital men kafi ilaj chala. vah sharirik rup se to thik ho gai lekin yah eksident kabhi bhi man n ban sakne ka nasur de gaya. vivek use lekar bahut bare daektaron ke pas gaya par kahin se koi saflta nahin mili.
soniya ab bahut udas rahne lagi use rah-rah kar yahi dukh satata ki kaise vah vivek ki vansh vriddhi kare. vivek use bahut samjhata aur bachcha god lene ki bat karta par uska dil nahin manta tha aur fir usne 2008 men vivek ke bahut mana karne par bhi usko dusre vivah ke lie larki talash karna shuru kar diya aur 2009 men usne usha se uska vivah bhi kara diya.
soniya ko lagta tha ki uska vivek ke vansh ke lie kiya gaya balidan shayad vivek hamesha yad rakhega aur unka pyar kabhi kam nahin hoga. lekin koi bhi vyakti do navon men pair rakhakar nahin chal sakta.
shuru-shuru men to vivek ne apni donon patniyon ke bich kafi santulan banaya par dhire-dhire vah usha ki or khinchne laga aur 2010 men jab usha ne use ek khubsurat putra bhi de diya to uski khushi ka thikana n raha. ab aefis se ane ke bad uska pura samay usha aur bachche ke sath bitta.
soniya chahakar bhi unke bich shamil nahin ho pati thi. usne apne ap ko apne men samet liya. usha use bulati thi par jab usne kamre se bahar ana band kar diya to usha ka dhyan bhi apne parivar meen lag gaya. soniya ne jab vivek se bat karni chahi aur use yad dilaya ki vahi usha ko is ghar men lai thi to vivek ne use bahut khari khoti sunai aur apni shakla n dikhane ki bat kah kar kamre se chala gaya.
soniya buri tarah se tut chuki thi use jine ka koi sabab dikhai nahin de raha tha aur vah apne ko is ghar ke lie anavashyak manne lagi thi aur tabhi usne gusse men ek faisla liya. usne kasam khai ki ab main apna chehra vivek ko nahin dikhaungi aur jhatke se usne nind ki goliyon ki puri shishi halak men urel li aur apne akhiri not men itna hi likha.
prem ko samjhna atyant mushkil hai. prem ki sanjidgi samay ke sath badlte rahti hai. kisi bhi kami ko koi dusra bhar de to prem vahin dam tor deta hai.
mainen apne prem ke lie aur patni dharm ko nibhane ke lie apne pati ke lie dusri dulhan tak lakar di lekin mere is sahyog ke lie, vafa ke badle mujhe aj apni jan deni par rahi hai.
aiye dekhe soniya ki kundli men baithe grahon ki chal jisne use apni jan lene ko majbur kar diya.
soniya ki janmakundli men lagnesh ashtamasth hai, shubh grah chathe aur athven ghar men baithe hain. saptamesh chandrama kemadrum yog v pap grahon ki drishti se grast hai. saptam bhav men pap grah rahu adhishthit hai tatha saptam ka karak bhi ashubh bhav men sthit hai.
lagn, lagnesh, shubh grah v mangal in sabhi grahon ke nirbal hone ke karan atmabal ki shunyata hai.
n hi lagn, lagnesh, lagn ka karak v shubh grahon men bal hai aur n hi saptam bhav, saptamesh v saptam ke karak grahane men kisi prakar ki takat hai.
yadi atmabal ki kami ho to jivan sathi ka sahyog jivnishakti lekar ata hai. donon ke hi n hone ki sthiti men jatak santan ya prem ko sahara man leta hai. parantu ise bhagya ki vidanbna hi kahenge ki soniya ki kundli men prem v santan ke pancham bhav men ashtamesh sthit hai jo shani se drisht hai tatha sath hi panchmesh v pancham ka karak ye donon grah bhi ashubh bhav men sthit hai jismen panchmesh papakartari men tatha pancham ka karak pap grahon se yukt hai islie santan ki prapti nahin hui v prem ka bhi asafal ant hua.
prem me asflta ki pira n sahan hone par inhonne svayan hi apne jivan ka ant kar diya.
pancham bhav men surya shani ke prabhav ke chalte inhonne injiniyaring ki. 2005 men saptam bhav men shani v chandrama se saptam bhav par guru ka gochar hone par inka vivah hua tha.
saptam bhav ki atyant kharab sthiti ke sath-sath ashtakavarg men sabse kam keval 16 bindu hain jo asafal prem ka karak banne men ek atirikt kari ka kam kar rahe hain.
2009 men gochriya guru nich rashisth tatha shani janmakalin shani, mangal v guru ke upar ashtam bhav men baithakar unke pancham bhav men sthiti ashtamesh surya ko dekh raha tha aur falasvarup inhonne svayan hi apne pati ka dusra vivah karva kar apne prem v apne khushhal jivan ki hatya kar di.
parantu inka balidan inki svayan ki kundli ke balhin hone ke karan purnatah vyarth siddh hua aur inke pati inke prati purnataya beprvah ho gae aur is pira ke asadhya ho jane par inhonne apni jivnlila hi samapt kar di.