chandavti devi, naina devi aur mayavti nam anek lekin vyaktitva ek hain. samarthakon men mayavti bahan ji ke nam se mashhur rahi sushri mayavti ji 1995 se lekar aj tak bhartiya rajniti ka ek jana-mana chehra rahi hain. mayavti ji ko dalit varg ki pratham mahila mukhyamantri banne ka saubhagya prapt hua hai. vartaman men mayavti ji bahujan samaj parti ki adhyaksha hain. bhartiya rajniti men safal kuch chuninda mahilaon men inka nam agrani hai. dabe-kuchle aur kamjor varg ke logon ki madad karne, apradh mukt shasan dene tatha sanpurn samaj ki bhalai karne ke sankalp ke sath apne rajnaitik kariyar ki shuruat karne vali baspa adhyaksh sushri mayavti ji char bar uttar pradesh ke shasan ki bagdor sanbhal chuki hain. 1995 men uttar pradesh ki mukhyamantri pad par ye niyukt huin to bharat ki rajniti men ek bari halachal ka karan bani.
garib aur pichri jati ke parivar ki ek antarmukhi larki ke lie vishva ke sabse bare loktantra ke sabse bare rajya ki mukhyamantri banne tak ka safar tay karna sahaj nahin tha. inki mata ramvti svayan anaparh thin, fir bhi apne bachchon ko shikshit aur yogya banane men unhonne koi kami nahin ki. pita prabhudyal ji dak-tar vibhag men ek varishth lipik pad se sevanivritt hue the.
mayavti ji ne el. el. bi aur bi. ed ki shiksha dilli rajya se puri ki. apne pita ki ichcha ko pura karne ke lie sushri mayavti ji abhi bhartiya prashasnik seva ki taiyari kar hi rahi thin, ki inke jivan men ek badlav aya aur inhonne shikshika ke rup men karya karna shuru kar diya. sal 1977 inke jivan ka fir ek sabse bara tarning paint sabit hua aur inki vichardhara kanshiram ji ki vichardhara se prabhavit hone lagi. isi ke chalte inhonne rajniti ke kshetra men kadam rakha. mana jata hai ki mayavti ji ko rajniti men lane ka karya kanshiram ji ne hi kiya. pita sankuchit vichardhara ke chalte apni beti ke rajniti men ane se bilkul khush nahin the. yahan se pita aur beti ki vichardharaen do alg-alag bhagon men vibhajit ho gain. 1977 se lekar aj tak kuchek avsron ko chor den to mayavti ji ka rajnaitik kariyar prarambh men sangharsh bhara raha parantu ek bar jo saflta ne inke kadam chume to fir inhonne piche mur kar nahin dekha. 1995 se 2007 tak lagatar 4 bar ve uttar pradesh ki mukhyamantri chuni gayin jo nishchit rup se kisi bhi rajneta ke lie bahut bari upalabdhi hai.
2012 se lekar 2018 ke madhya tak ka safar inke lie avashya anukul nahin raha. parantu samay ke sath mayavti dalit varg ki pahchan ban chuki hain. apne rajnaitik karyakal ki avdhi ke dauran mayavti ne daliton ke utthan ke lie anek karya kie.
chunavi tikat ke lie dhan lene, parti ke mantriyon ke galat dhang se dhan lene aur vishalkay murtiyon par dhan ka vyay karne jaise vivadon ke karan inki garima dhumil bhi hui. inki parti ke satta men n ane ka ek karan inke shasan ka nirankush hona bhi raha.
sushri mayavti ne apna jivan ek samanya dalit parivar se shuru kiya tha, aj ye dalit varg ki rajniti ka chamkta sitara kahi ja sakti hain. yah mukam inhonne apni mehanat, karmathata aur apne lakshyon ke prati date rahne par hi prapt kiya hai. ye dalit varg ki sabse bari sashakt neta hain tabhi to inke samarthakon ne bhi avashyakta parne par apna sahyog inhen sadaiv diya hai. dalit varg ka vishvas sada inke sath raha hai, daliton ke dil men inhonne apne lie ek khas sthan bana liya hai. aiye dekhen ki inki kundli 2019 ke pradhanmantri pad ki mukhya davedar ke rup men kya kahti hai-
janm kundli vishleshn
sushri mayavti ka janm kark lagn evan makar rashi men hua. janm kundli men rajyesh evan panchmesh mangal v saptamesh shani ka pancham bhav men yuti sanbandh parashri rajyog hai, jo krur grah mangal v shani se bana hai tatha inke sath rahu ka sanyukt hona unhen daliton ka prabal sahyog milne ka sanket deta hai. navagrahon men shani dalit varg ke karak grah hain, shani ki dashmesh ke sath yuti vyakti ka karyakshetra dalit varg se bana rahi hai. janmapatri men surya vargottam hai. shasan chalane ke lie surya evan mangal ka balvan hona jaruri hota hai. chalit kundli men surya v budh saptam kendra sthan men sthit hain. shani ka kendresh hokar trikon bhav men yogkarak mangal ke sath yog men hona inke kariyar ke lie shubhfldayak sabit hua.
ayesh shukra ka ashtam bhav men hona inke ghoshit evan aghoshit donon tarah ki sanpatti ka svami hone ka suchak hai. ay bhav men sthit ketu bal dene ke sath-sath manobal bhi de raha hai kyonki yahan ketu mangal ke mrigshira nakshatra men sthit hai. ay bhav ko yadi ek se adhik grah dekhte hon ya ay bhav men sthit hon to vyakti bahut adhik mahatvakankshi banata hai. kundli men mangal, shani aur rahu ay bhav ko dekh rahe hain tatha ketu svayan vahan sthit hai. yah bhav samarthakon ka bhi hai, samajik chavi ke lie chaturth bhav aur chaturthesh ki sthiti ka vichar kiya jata hai. chaturthesh ashtam bhav arthat badhaon ke bhav men hai islie vivadon ki sthiti bhi inke sath bani rahi. inka pancham aur saptam bhav donon bahut adhik pirit hai, saptam bhav men surya aur chandra ke ek sath hone ke karan vaivahik jivan ka sukh inhen nahin mil paya.
sushri mayavti ji ki kundli men ayesh ki dasha vishesh shubhfldayak rahegi. shani ki sarhesati inhen virodhi dal ke sarvochch neta ke rup men sthapit karne ka karya kar sakti hai. iske sath hi inke bhagyesh guru bhi aktubar 2018 se inki janmarashi se ekadash bhav par gochar karne lagenge. lagn se pancham bhav par guru ka gochar hone ke karan bhagya bhav, ay bhav aur lagn bhav sabhi ek sath sakriya ho jayenge. is samay rahu ka gochar inke janmalagn par hi chal raha hai. march 2019 se rahu dvadash bhav men gochar kar chaturth bhav aur ashtam bhav donon ko gati denge. is samay men inhen manonukul gaddi aur chupe hue labh prapt hone ke sanket mil rahe hain. kul milakar yah kaha ja sakta hai ki vartaman dasha shubh hai aur gochar inhen purn rup se apna sahyog de raha hai.
mayavti ki kundli men shani ki mahadsha men mangal ki antardasha 11-2006 se 1-2008 tak chali. yah avdhi unke lie uttam rahi. unki kundli men shani yogkarak nahin hai parantu apne hi nakshatra men vrishchik rashi men mangal ke sath sthit hai. shani ki mahadsha mai 1994 men shuru hui. shani ne kafi utar-charhav dikhae aur uski mahadsha 2012 tak vishesh shubh rahi. vartaman men budh mahadsha men ayesh shukra ki dasha prabhavi hai. yah antardasha agast 2019 tak rahegi. iske bad ane vali antardashaen surya, chandra, mangal aur rahu ki rahengi. ye sabhi dashaen inke lie shubh faldayak sabit hone vali hain. is samay in par shani sarhesati ka pratham charan chal raha hai. shani sarhesati ane vale panch sal tak rahegi aur ane vale chunav ki avdhi men inhen shani sarhesati ke prabhav men hi rahna hoga.
dalit utthan ki jo paripati mayavti ne rakhi hai usmen inhonne kanshiram aur ambedakar ke mul vichar ko prakat kiya hai. ane vale samay men mayavti sirf daliton ko hi nahin varan sabhi jatiyon ko rajnaitik prashray dekar ane vale samay men apni sthiti ko majbut kar sakti hain.
jivan ghatnakram
1977: shikshika ke rup men kariyar ki shuruat.
1984: shikshika ki naukri chor kar baspa men pravesh aur apne pahle lok sabha chunav abhiyan ka praranbh.
1989: loksbha chunav men unki parti ne 13 siton par jit hasil ki.
1995: uttar pradesh ki mukhyamantri ke rup men chuni gain.
1997: dobara mukhyamantri ke rup men chuni gain.
2001: kanshiram ki uttaradhikari ghoshit ki gain.
2002: ek bar fir uttar pradesh ki mukhyamantri banin.
2007: chaithi bar uttar pradesh ki mukhyamantri niyukt huin.