ganga tat par bharat mata mandir  

ganga tat par bharat mata mandir uttaranchal ke haridvar nagar men anya mandiron ke alava bharat mandir bhi hai jo bharat mata ko samarpit hai. iski sthapna svami satyamitranand ne ki aur udghatan purva pradhanmantri sva. shrimti indira gandhi ne 15 mai, 1983 ko kiya. mandir ka bhavan ath manjilon ka hai aur iski lanbai lagabhag 175 fut hai. mandir ka samast vastu shilp manglik tantrik sanketon aur sadhna paddhatiyon ko dhyan men rakhakar kiya gaya hai. bhutal par bhartmata ki pratima sthapit hai. shvet sangamaramar ki 198 se. mi. ki is pratima ke ek hath men anaj ki baliyan aur dusre men dugdh patra hain jo kramshah harit aur shvet kranti ke parichayak hain. pratima ke samne bharatavarsh ka kanpyutar se bana manchitra hai. itihas sanjone ka svapn : pahli manjil par bharat ke sabhi sanpradayon ke shreshth santon aur acharyon ki pratimaon aur chitron ka mandir hai. dusri manjil par bharat ki sannariyon, satiyon, sadhviyon ko arpit sati mandir hai. tisri manjil par shurmandir hai, jahan shreshth balidani viron ke vigrah sthapit hain. chauthi manjil par ek vishal sabhagar hai aur panchvin par navdurgaon ke sath shakti ke vibhinn svarup hain. chathi manjil vishnu ke dashavtaron ke vigrahon ki hai. sarvochch shikhar manjil par asin hain ashutosh bhagvan shiv, sadshiv ki anand mudra ke sath-sath ardhanarishvar aur natraj ki vibhinn mudraon ki pratimaen. upar ki tinon manjilon men ganmanya dharmacharyon, rajpurushon, vidvanon, kalakaron aur desh videsh ke hajaron vyaktiyon ki upasthiti men pran pratishtha ka karyakram romanch utpann karta hai. bharat mata mandir men jain, bauddh, muslim, sikh, parsi, isai adi vibhinn dharmon aur sanpradayon ke shreshth santon aur mahatmaon ka chitramay jivan bhi ankit hai. desh ki sabhi sanskritiyon ki dhara ki ek bhartiya dhara ke rup men spasht abhivyakti hai. is virat mandir men kahin bhi paranprik dan patra nahin rakhe gae hain. bhartiya sanskriti ki raksha shur viron, satiyon evan santon ne ki hai. ye tinon varg kisi bhi desh ke shraddha kendra hote hain. parisar men santon, shur viron, satiyon evan shakti ko samarpit mandir bhi hain. sant mandir : jin mahapurushon ne is desh ko ekta ke sutra men piroya, manushya jati ko samy-samay par naya jivan pradan kiya, prem, bhakti aur gyan ki ajasra manglmyi dhara pravahit ki, un santon ka yahan ek vishisht mandir hai. ismen tathagat buddh, mahashraman mahavir, jagadguru shri shankracharya, shri ramanujacharya, shri ballabhacharya, shri nimbarkacharya, shri madhvacharya, shri chaitanya mahaprabhu, guru nanak, gosvami tulsidas, sant ravidas, sant gyaneshvar, sant kabir, narsi mehta, svami dayanand, svami vivekanand, satya sain baba aur jalaram baba ki murtiyan hain. shakti mandir : sant mandir ke upar ke tal par shakti mandir hai. ismen prachin granthon men varnit nav durga ki nau murtiyon ke atirikt dakshin ki minakshi, gujrat ki anba, gayatri aur sarasvati ki murtiyan sthapit hain. shur mandir : upar ke pratham tal par guru govind sinh, maharana pratap, vir shivaji, mahatma gandhi, subhash chandra bos, chandrashekhar ajad aur bhagat sinh jaise shur viron ki murtiyan hain. bharat mata ke darshan ke bad shraddhalu jan in shur viron ke darshan karte hain. sati mandir : shur mandir ke bad bharat ki mahimamyi matrishakti ke darshan karane vala sati mandir hai. yahan vaidik kal se lekar adhunik yug tak ki sati mataon ki murtiyan sthapit hain. nariyon ke prati samman vyakt karte hue rishiyon ne kaha hai, 'yatra naryastu pujyante ramante tatra devta' arthat jahan striyon ka samman hota hai, vahin devtagan vas karte hain. yah mandir bhartiya samaj men nari ke mahatva ko darshata hai. ismen gargi, savitri, anusuya, urmila, damyanti, mira aur maharani lakshmi bai ki murtiyan hain. vishnu mandir : yahan bhagvan vishnu ka bhi ek mandir hai jismen sitaram, radhakrishn, lakshminarayan, shri venktesh, bhagvan shrinath aur ranchor ki pratimaen sthapit hain. shiv mandir : parisar men ek mandir devadhidev mahadev ko bhi samarpit hai. samudra manthan ke samay jab halahal vish samudra se nikla, tab sabhi surasur bhagvan shankar ke pas gae. us vish ko aur koi dharan nahin kar sakta tha. sabko kalyan pradan karne vale bhagvan shiv ne uska pan karna svikar kiya. bhagvan shankar ne vichar kiya ki yadi yah vish unke kanth ke niche jata hai to hriday men virajman unke aradhya bhagvan shri ram ko kasht hoga aur pan nahin karte hain to sara vishva samapt ho jaega, atah unhonne use kanth men hi rok liya. isi karan unki ek sangya nilkanth hai. sansar ke param shiv, kalyan aur sukh ke pradata bhagvan shankar ke darshan kar, us param kripalu nilkanth ko pranam kar ham dhanya banen isi uddeshya se sabse upri khand men shiv mandir ka nirman hua. ismen shiv ki rajtmurti, ardhanarishvar aur natraj ki bhavya pratimaen sthapit hain. adhik unchai sthit is mandir men jane ke lie lift ki vyavastha hai. sanskriti mandap : mandir ke parisar men ek vishal evan akarshak mandap hai, jahan bharat ki sanskritik garima, vaibhav tatha anya deshon men uske prachar-prasar ko drishya-shravya ke adhunikatam madhyam se pradarshit kiya jata hai. yah sanskriti mandap ke nam se vikhyat hai. sannyasi yadi sachmuch karmath, lokopkari aur samaj tatha sanskriti ka hit sadhak ho, to har yug men pujya hota hai. is drishti se svami satyamitranand param pujya hain. haridvar men bharat mata mandir ke rup men funka hua unka samanvay mantra desh, samaj aur sanskriti ke prati nishtha ka pratik hai.