adhikansh log ank jyotish ko pashchatya den mante hain, parantu yah unka bhram hai. ank jyotish multah bhartiya vidya hai, parantu ajakal jis rup men yah bharat men prasiddh aur prachlit ho rahi hai, iska vah svarup avashya hi pashchatya hai. adhunik yug ka mahan bhavishyavakta kiro pashchatya vidvan tha. vah bharat men varshon raha aur usne yahan jyotish ke sath-sath ank vidya ka bhi adhyayan kiya. usne likha- ‘‘main gyan-prapti ke praranbhik varshon men purva men gaya aur vahan anek brahmanon ke sanpark men aya.
ve pragaitihasik kal se is gurh aur rahasyapurn vidya ko jante the. unhonne mujhe anya vidyaon ke sath-sath ankon ke gurh rahasya ka gyan bhi diya aur bataya ki unka kya mahatva hai tatha manv-jivan se unka kya sanbandh hai.’’ paithagoras ne bhi kaha- ‘‘is vishva ka nirman ankon ki shakti se hi hua aur is ankon ki shakti ko bhartiya vidvan bhali-bhanti jante the.’’ paithagoras ko pashchimi jagat men ankshastra ka janmadata mana gaya hai.
tritiya ank jyotish ‘seferiyal’ arthat hibru yani yahudi ki panrpragat namank paddhati hai. chaturth men ‘adhunik ank jyotish’ ata hai, ‘pancham men ‘yunit paddhati’ ati hai jo purnataya ‘bhartiya ank jyotish’ par adharit hai. itihas ke prachin granthon ke adhyayan se pata chalta hai ki ‘bhartiya jyotish’ men parangat kuch vidvanon ko arab deshon men is ‘ilme-gaib’ ki jankari prapt karne v ise sikhne ke lie bulaya gaya. ve vahan gaye tatha vahan unhonne is vidya ka prachar-prasar kiya. isi prakar un deshon se bhi anek jigyasu bharat akar is vidya ka adhyayan karte rahe tatha apne desh vapas jane se pahle, bharat ke jansadharan ke sath apne sanpark ke karan apni bhasha ke bahut se shabd yahan chor gaye tatha bhartiya bhashaon ke anek shabd apne sath le gaye. shayad shabdon ke bhram jal ke karan bhi kuch log is vidya ko videshi bhasha mante hain,
jabki yah shabdon ka adan-pradan matra hai. ham dekhte hain ki ank sab jagah hamara picha karte hain. janm tithi, mairej de, makan kharidne-bechne ki tarikh, mukdme-pariksha ki tathi-rol nanbar, jane ki tarikh, khushi-gam ki tarikh aur n jane kin-kin vishyon ki tarikhen hamare jivan men jurti chali jati hain, bina tarikhon arthat ankon ke, hamare jivan men kuch bhi shesh nahin rah jata hai.
ham un tarikhon ke ankon ko pirhi dar pirhi bhula nahin pate, unke pas men uljhe aur uljhaye rahte hain. vishva ke sabhi deshon men 13 ke ank ko ashubh mana jata raha hai. kisi makan-plaet, kamre adi ka nanbar 13 nahin rakha jata hai, vahan 12 ke bad 12 e kar diya jata hai. iske viprit amerika ke jivan men 13 ka sarvadhik mahatva hai. ameriki rashtra dhvaj men 13 dhariyan hain, 13 ban hain, igal ke upar 13 sitare hain aur jhande men bhi 13 hi pattiyan hain.
amerika jab svatantra hua, to vahan 13 rajya the aur svatantrata ke ghoshanapatra par bhi 13 vyaktiyon ke hi hastakshar the. parantu yahudi log 13 ke ank ko ashubh mante hain, kyonki ve kahte hain ki isa ke balidan se purva bhoj hua, jismen 13 vyakti the. ve 13 nanbar ke bajay 7 ke ank ko atyadhik mahatva dete hain. parantu frans men 13 ank ke karan anek ashubh ghatnaen ghatin. anya aur bhi udaharan diye ja sakte hain ki ek hi ank yadi ek hi vyakti ke lie shubh ho sakta hai, to dusre vyakti ke lie vahi ank ashubh bhi ho sakta hai.
yadi ap bhi apne jivan ki pratyek ghatnaon ki tarikhon, ankon ko not karen, to apko unmen ek silsila, ek taratamya dikhai dega. ya to ve ghatnayen kisi ank vishesh vali tarikh ko ghatit hui hongi ya sunishchit antral ke bad ghati hongi. isse apko yah gyat ho jayega ki kaun-sa ank apke lie shubh hai aur ap usi ke anusar karya karen, to apko anek labh honge. yunani darshanik evan mahan ankshastri paithagoras ka vishvas tha ki ankon men mahan shakti chipi hai. yunan men yah ek lokokti hi ban gayi thi ki ‘‘vishva ke rahasya ankon men hi chipe pare hain’’ usne kaha- ‘‘sabhi rachnaon, svarupon aur vicharon ka svami ank hai
aur yahi devtaon aur rakshason ka janak hai.’’ vastutah ankon ki lila bahut hi vichitra hai. inka aranbh shunya se hota hai aur ye shunya men hi vilin ho jate hain. inka pratinidhi ank 10 hai. yadi ham unhen unke kram men likhen aur adi ko ant se joren, to 10 ka ank hi prapt hota hai- 1-2-3-4-5-6-7-8-9 1 aur 9 ka jor = 10, 2 aur 8 ka jor = 10, 3 aur 7 ko jor = 10, 4 aur 6 ka jor = 10 shesh rah jata hai 5 ka ank. yah panchatatvon ka pratinidhitva karta hai.
panch parmeshvar, panchshil, panch anguliyan, panch acharan ke siddhant, panch dand, panch mukhya dravya, panch grah adi. bharat tatha chin men 5 ke ank ka bahut hi mahatva hai. bhartiya jyotish tatha yantra, mantra, tantra aur hastarekha vigyan men bhi ankon ka mahatva kisi se chipa nahin hai. jyotish shastra ki sabhi vidhaon men ‘ank-jyotish’ sabse saral vidya hai.
yadi ap ank ke rahasya (gahn-adhyayn) ko samajh len, to apke param mitra ke saman ank apki bahut sahayta karte hain, ank satya men hamare mitra ban kar hamen saflta de sakte hain.