vaivahik jivan sukhamay n ho to kuch logon ko thana-kachhri ke chakkar jivanaparyant lagane parte hain, to kuch logon ko chutkara ati shighra mil jata hai. kuch logon ki aisi majburi hoti hai ki ve jivan bhar chatptane ke bad bhi is bandhan se mukt nahin ho pate hain. kuch vyakti itne sukhi hain ki unhen pata hi nahin lagta ki jivan kab nikal gaya. akhir yah sab hota kyon hain? kyon log vivah karke pachtate hain aur kyon ve bhi pachtate hain, jo samay par vivah nahin kar pate hain?
jyotish shastra se vivah vishleshan jyotish shastra men is vishay par vishad rup se charcha ki gai hai. is vishay men gahrai se utrne se purva yah janna avashyak hai ki jyotish men sabhi vishyon ko hamne kul 12 bhavon men vibhajit kiya hai, jo janmakundli ke 12 bhav/khane hain. inmen se satven bhav ka sanbandh vivah se hota hai. satven bhav ka svami grah kahan hai, satven bhav men kaun si rashi hai, kin grahon ki yuti ya sthiti hai, saptamesh kis bhav men aur kis grah se yuti ya drishti se prabhavit ho raha hai adi sabhi baten vicharniya hain. yah kafi gahra aur duruh vishay hai. sankshep men yadi ham charcha karen to sarvapratham hamen yah vichar karna hoga ki satven bhav men kaun si rashi hai. saptam bhav men 12 rashiyon ka fal
- mesh rashi - jatak ki patni krur, chanchal, pap karmon men sanlagn, kathor tatha lobhi hoti hai.
- vrish rashi - jatak ki stri ka svabhav vinamra, shant, acharvan, pativrat dharm ka acharan karne vali tatha puja-path men lagi rahne vali hoti hai.
- mithun rashi - stri sundar, dhani, rupvan, gunvan, tatha achche vastrabhushan dharan karne vali hoti hai.
- kark rashi - sundar, saubhagyashalini, gunvan v achchi sangti vali hoti hai.
- sinh rashi - aisi stri ugra svabhav vali, chanchal, durbal, alp santan vali aur dusron men ruchi lene vali hoti hai.
- kanya rashi - jatak ki patni satyavadi, nyayapriya, dhani, sundar v saubhagyavan hoti hai.
- tula rashi - vyakti ki patni prasiddhi vali, vinit, sahnshil, dharmik v anek gunon se yukt hoti hai.
- vrishchik rashi - jatak ki patni kanjus, kalakar, anek doshon se yukt v pranyhin hoti hai.
- dhanu rashi - jatak ki patni kathor sharir vali, nimn, buddhihin tatha shant svabhav vali hoti hai.
- makar rashi - is rashi vali stri dusht, nirlajj, jhagralu v kharab svabhav vali hoti hai.
- kunbh rashi - kunbh rashi hone par stri pati parayan, dharmik parantu shankalu svabhav vali hoti hai.
- min rashi - saptam bhav men min rashi hone par patni rogini, adharmik, pranyhin tatha kalah priya hoti hai.
isi prakar saptam sthan par sthit rashi ke svami ka svabhav, uski sthiti tatha anya grahon ka us par prabhav adi ka bhi purn vivaran dekhna hota hai. usi se gyat hota hai ki danpatya jivan kiska kitna sukhi hai ya lagatar jatak dukh hi bhog raha hai. yadi ap ka danpatya jivan sukhi hai aur ap purn rup se santusht hain, to fir ap ko koi upay nahin karna chahie. kintu yadi ap pareshan v chintit hain aur ap chahte hain danpatya jivan ko anandamay banana to apko kuch upay karne ki atyant avashyakta hai.
ye samadhan apko kab aur kaise karne hain, is bat ki jankari apki kundli ka vishleshan kar ek anubhvi jyotishi bata sakta hai. vivah badha nivaran upay yadi vivah men nirantar vilanb ho raha hai, vivah yogya ayu niklti ja rahi hai athva apni ruchi v yogyata ke anurup jivnsathi nahin mil pa raha ho to nimn mantra ka jap karna labhaprad rahega. he gauri shankrardhangi yatha tvan shankarapriya. tatha man kuru kalyani kant kanta sudurlabham.. yah kafi prachlit mantra hai.
iske lie apne puja sthal par man parvati athva shiv-parvati ka chitra sthapit karen. sanbhav ho to parad shivling bhi mandir men sthapit karen tatha dhup-dip jalakar rudraksh mala par pratidin ek mala uprokt mantra ka jap karen. karya purn hone tak mantra jap jari rakhen. shighra vivah ke anya mantra:-
1.un katyayni mahamaye mahayoginyadhishvari. nandagop sutan devi patin men kuru te namah.. is mantra ki jap-vidhi uproktanusar vahi hai. is mantra ka jap karne ke lie ap katyayni devi ka yantra apne puja sthan par sthapit karen.
2. un devendrani namastubhyan devendrapriyabhamini. vivahan bhagyan arogyan shighran labhan ch dehi me.. uprokt vidhinusar is mantra ka jap karen.
3. un vijay sundarim klin. uprokt mantra ka 11 mala pratidin jap karen. is mantra ka jap vivah yogya larka ya larki svayan kar sakte hain. vidhi vahi hai. dhup-dip jalayen. shanti se ekagrachitt hokar baithen. vishvas rakhen fal avashya prapt hoga.
4. patnin manorman dehi manovritanusarinim. tarini durg sansar sagarasya kulodbhavam.. navratri se uprokt mantra ka jap karen evan man durga ka ashirvad deta hua chitra athva katyayni yantra apne puja sthal par lal vastra bichakar sthapit kar len. dipak prajjvalit kar pushp, dhup-dip arpit karen. yah upay vivah badha dur karta hai.
5. un namah manobhilashit varan dehi hrin, un gaura parvati devyai namah.. uprokt mantra ka jap kisi mah ke shukla paksh ke pratham somvar se aranbh karen. shiv-parvati ka chitra puja grih men lagayen. dhup-dip adi karke pratidin jap karen. sadhna ke prabhav se ek se do mah ki avdhi men hi saflta mil jaegi.
yadi saflta men deri ho to bhi mantra jap jari rakhen. shighra vivah hetu totke - budhvar ko pratahkal - un gan ganptye namah mantra ki ek mala pratidin karen aur ganeshji ko mandir men sava kilo ya sava pav modk/ laddu ka prasad charhayen. ise 7 bar ya 21 bar karen. isse vivah men ane vali badhaen samapt hoti hain.
- som pradosh vrat ke din ghar men katyayni yantra lagayane aur shiv-parvati ki aradhna karen. iske pashchat 51 mala katyayni mantra ka jap karen. is prayog ke prabhav se vivah men ane vali sabhi badhaane ka samadhan avashya hota hai.
- kisi bhi shukla paksh ke antim somvar ke din kisi bhi siddh shivling par jal charhayen athva ghar men parad shivling rakhakar un namah shivay mantra ka 21 mala jap karen. aisa karne se vivah badha avashya dur hoti hai aur jab tak karya purn n ho nirantar nitya jap karte rahen.
- 45 din lagatar pipal vriksh par jal charhayen aur dipak bhi jalayen to vivah sanbandhi manokamna purn hoti hai.
- yadi manglik dosh ke karan vivah men badha a rahi hai to yah upay labhdayak siddh hoga
- shukla paksh men manglvar ko pratahkal hanuman mandir men jayen. lal vastra, gur-chane ka prasad (chana bhuna hua), chameli ka tel, sindur, dhupabatti v fulmala adi sath le jayen.
chameli ka tel, ful mala hanuman ji par charhayen, sindur lagayen v apne shighra vivah ke liye prarthana karen. gur chane ka bhog lagakar prasad bachchon ko bant den. lal vastra murti par charhayen ya bahar kisi per par bandh den aur apni manokamna dohrayen. lagatar sat manglvar ko aisa karne se shighra vivah ke yog bante hain. yadi shani grah ki udasinta ke karan vivah men badha a rahi hai, to nimn upay karen:
- shanivar ko din ke samay shani mandir ya navagrah-mandir men jaen aur sava kilo sarson ka tel aur 250 gram kale til shani mandir men charhayen. tatpashchat apne sare karya vidhivat purn karne ke lie prarthana karen.
- shanivar ko pipal ke vriksh par jal charhayen, shani ki shanti ke lie prarthana karen tatha sayan kal ke samay pipal ke niche til ke tel ka dipak jalayen. shani grah se apni manokamna ki purti ke lie prarthana bhi karen. aisa karne se dosh shant hokar shighra vivah ka yog banega.
- yadi tula rashi ka surya saptam bhav men upasthit hai arthat surya apni nich rashi men sthit hai ya saptamesh par drishti ya yuti dvara sanbandh bana raha hai, to bhi shighra vivah men badha ati hai. is samasya ka samadhan yah hai- shiv mandir ya vishnu bhagvan ke mandir men tanbe ka bartan dan karen aur tanbe ke bartan men jal bhar kar, usmen roli, lal ful v chaval adi dal kar surya mantra un ghrini suryay namah ka jap karte hue surya ko jal arpit karen.
dusra mantra: un adityay vidmahe martanday dhimhi tanno suryah prachodyat. surya ko pratidin jal dene ka upay shukla paksh ke ravivar se aranbh karen.
- yadi janm kundli men rahu ka gochar saptam bhav se ho raha ho to vivah men vilanb hota hai. aisi sthiti men shukla paksh men shanivar ke din jata vala nariyal 21 bar sir se utar kar bahte jal men pravahit karen. yadi vivah men atyadhik vilanb ho raha hai ya rahu ke sath kisi anya pap grah shani, mangal ya surya ki yuti ho, to nariyal ke sath 108 gomed bhi bahte hue jal men pravahit karen.
- yadi janmakundli men danpatya jivan se sanbandhit koi duryog hai arthat saptamesh gyarhven ya barhven bhag men hai tatha us par kisi ashubh grah ka prabhav bhi hai, to vat vivah karna uchit hoga. iska karan yah hai ki saptamesh ekadash ya dvadash men hone se jatak ya jatika ka pratham vivah asafal hone ki sanbhavna rahti hai. yah sthiti kai bar saptamesh ke dasham ya tritiya bhav men hone se bhi dekhi gayi hai.
aise men saptamesh par kisi anya grah ka pap prabhav avashya hona chahie. vat vivah ya kunbh vivah ek pratikatmak vivah hota hai tatha isse yah dharna ki jati hai ki jatk/jatika ka pratham vivah sanpann ho gaya aur vivah men asflta ka khatra tal gaya. yah vivah avashyakta tatha sthaniya paranpra ke anusar vat, tulsi, vishnu ji ki murti adi ke sath kiya jata hai. vivah ke pashchat ghat athva vishnuji ki murti ko jal men visarjit kar diya jata hai. dakshin bharat men larkiyon ka vivah kele ke tane ke sath bhi kiya jata hai.
var-vadhu men se yadi ek mangli hai aur dusra paksh nahin hai to bhi is vivah ki jarurat parti hai. aise jatkon ko munga athva pukhraj dharan karvana bhi labhaprad tatha shubhaprad hota hai. savitri vrat athva manglagauri vrat bhi aise jatkon ke lie labhaprad hota hai.
- kanya ke vivah men yadi lagatar deri ho rahi ho aur yogya var nahin mil raha ho, to yah totka shighra faldayak hota hai. brihaspativar ko subah ke samay snanadi ke pashchat kanya besan ke 108 laddu svayan banaye aur pile rang ki tokri men pila kapra bichakar ladduon ko usmen rakhe. apni shraddhanusar kuch dakshina bhi charhaye. is tokri ko najdik ke shiv mandir men charhakar a jaye. charhate samay apna vivah shighra hone ki prarthana bhagvan shiv ke sammukh kare. manokamna shighra purn hogi.
- vivah men deri dur karne ke lie kanya ko 16 somvar ko vrat karna chahie. us din shiv mandir men jakar jalabhishek karke man parvati ka shringar karna chahie. apne vivah shighra hone ki prarthana karte hue kanya ko shiv-parvati ke madhya gathjor bhi bandhna chahie.
- vivah men vilanb hone ki sthiti men shukravar ko bhagvan bholenath par jalabhishek karna chahie. un namah shivay ka jap karte hue shivling par 100 ful aur 108 belapatra bhi charhayen. yadi belapatra kam upalabdh ho, to inki nyunatam sankhya 21 avashya honi chahie. sat shukravar lagatar yah prayog karne se manokamna avashya purn hogi.
- vivah yogya larke ya larki ko ek purana tala, jo khula hua ho, ko apne sir se sat bar ulta utar kar, kisi chairahe par brihaspativar ko sayankal ke samay chor dena chahie. isse shighra vivah tay hota hai.
- vivah yogya larke ya larki ko pile vastra dharan karna chahie. yadi pile vastra dharan karna sanbhav n ho to ek pila reshmi rumal hamesha apne pas rakhna chahie.
- yadi vivah ke prastav ane ke bad bhi vivah nishchit nahin ho pa raha ho to vivah vatrta ke lie ane vale mehmanon ko draing rum men is tarah se baithayen, jisse unka munh draing rum ke andar ho, darvaje ki taraf n ho. isse rishta shighra tay hota hai.
- yadi vivah nishchit hokar sagai tut jati ho to vivah tay karte vakt larke ya larki ke mata-pita ko apne jute ya chappal utar kar baithna chahie.
- vivah yogya larke ya larki ko jab bhi kisi vivahotsav men bhag lene ka avasar prapt ho to larke ya larki ko lagai jane vali menhdi apne hathon par avashya lagayen, labhdayak hoga. jo bhi totka athva mantra path ap ko ruchikar lage aur apki samajh men bhali-bhanti a jaye, use purn shraddha v bhakti ke sath apnaen. vidhi purvak karen aur apne jivan ko safal tatha anandamay banaen.