jhuth fareb ke lie kukhyat pakistan ke sainik tanashah janaral parvej musharraf sahab ki kundli kafi dilachasp hai. kabhi janmakundli men baithe grah unhen apne desh ke sarvottam pad par asin kar dete hain to kabhi unhen apne hi desh men svayan ko bachane ke lie bhagna padta hai. ane vala samay unke lie kaisa rahega is sanbandh men ham dalte hain ek najar unke jivan men hui ghatnaon evan kundli men sthit grahon par. 16 march 2013 ko jaise hi pakistan men am chunavon ki tithi ki ghoshna hui to char-panch varshon se svanirvasan ka jivan ji rahe mahatvakankshi parvej musharraf 24 march 2013 ko dubai se 1 bajakar 15 mi. men apne vatan vapas a gaye. unki janm kundli, grah, nakshatron se nahin lagta ki pakistan ke am chunavon men unki koi aham bhumika hogi ya is chunav men unke ane ya n ane se pakistan men koi fark padega.
iska ek najara unhen bhi 29 march 2013 ko sindh haikort ke bahar dekhne ko mil gaya jab ek vakil ne unke upar juta fanka jo unki nak par laga, is vakiya se ve apni lokapriyata ko svayan bhi jan gaye hain islie unhonne char jagah se apni namjdgi ke parche bhare hain. pakistan ke sainik tanashah janaral tatha vishva men jhuth fareb ke lie kukhyat parvej musharraf ka janm 11 agast 1943 ko (nahar vali haveli) dariya ganj dilli men pratah 5 bajakar 44 mi. 56 sekend men kark lagn tatha vrishchik rashi men hua. parvej musharraf sahab ka lagnesh chandrama vrishchik rashi aur dhanu navmansh ke sath pancham men sthit hai
jo ki ek bahut bada rajyog ban gaya hai, sath hi jyeshtha men chandrama aur lagn men ravi, rahu,brihaspati, lagn men guruchandal yog, panchmhapurush yog, surya ki upasthiti ne in yogon ka svarup badalakar ekadam viprit kar diya hai, jiske karan unka svabhav ugra, svarthi, krur, anushasnhin jhuth bolne men mahir, uddand vyaktitva ban gaya hai. 12 aktubar 1999 ko ratri 12 baje ke as-pas janta dvara chuni hui sarkar ke pradhanmantri navaj sharif ka takhtapalat diya aur loktantra ka gala ghant diya. aprail mai 1999 men bharat ke sath dhokha, fareb kiya aur hajaron sainikon ko bhi marva diya. kai bachche anath, kai mahilayen vidhva huin, kai mata-pitaon ne apne bachche khoe. iske lie inhen kargil ka mastaramaind mana jata hai. dvitiya sthan men shukra budh ki sthiti ne inhen chalak, atmamugdh, yojnakar, kutnitigya, jhuth bolne men mahir bana diya hai.
dvitiyesh surya lagn man brihaspati ke sath sthit hone se kushagra buddhi, kushal yojnakar, kushal vartakar aur shatir, apni batan manvane men mahir bana diya hai. parvej musharraf sahab ek sena ke adhikari se pakistan ke rashtrapti bane, yah tarika bhale hi galat kaha ja sakta hai fir bhi ve us samay saja se bachakar aur desh chodakar jane men kamyab ho gaye. pancham sthan men vrishchik rashi ka chandrama nichbhang rajyog ka srijan kar raha hai. islie hi chandrama ki vinshottari dasha men tatkalin pradhanmantri navaj sharif ne jyeshthata kram ko najar andaj karte hue inhen janaral banaya, bad men inhin ke dvara pradhanmantri ko pad se apadasth karte hue desh nikala kiya gaya tatha 12 aktubar 1999 ko ye janaral ke sath-sath loktantra ki hatya karte hue svayan hi pakistan ke rashtrapti bhi ban gaye.
lagn men rahu aur brihaspati ke karan ye kuch samay tak donon padon par bane rahe aur virodh ko dabane ya is vishay se dhyan hatane ke lie hi kargil yuddh kiya gaya. kargil ke misaedvenchar ki saja kort marshal ki karyavahi honi thi so isse bachne ke lie unhonne pakistan ki chaynit loktantrik sarkar ka takhta hi palat diya. ap dusri bar bhi anushasnhinta ki saja se uprokt yogon ke karan hi bach nikle, us samay chandrama ki vinshottari dasha men surya ka antar tha. yah ravi maharaj ki hi kripa thi jo itne bade apradh karke bhi parvej musharraf sahab ko saja ke badle puraskrit kar gaye, shashthesh brihaspati ka lagn men rahu, surya ke sath sthit hona aur mangal dvara drisht hona unke bhavi jivan ke khatron ka sanket aur bhavishya men in khatron se sachet hone ki chetavni bhi de rahe hain, unhen apne kukrityon ki yad dilva rahe hain.
unke jivan men 20 aktubar 2008 se 20 aktubar 2026 tak ka samay kisi bhi prakar se achcha nahin hai. unhen har prakar se sachet aur savdhan rahna chahie. bhagyesh brihaspati uchch ka hokar lagn men hans yog bana raha hai, sath hi rahu ke sath guru chandal yog aur surya ke sath brihaspati ast bhi ho gaye hain jiska prabhav achcha nahin hoga aur iska samna abhi unhen karna hoga. vinshottari dasha kram men 2 julai 2011 se 26-11-2013 tak ka samay achcha nahin hai. yah samay parvej musharraf sahab ke lie achcha nahin, 11 mai 2013 ke pakistan ke am chunavon men unki aur unki parti ki koi bhumika nahin hogi. 16 julai 2013 se 26 navanbar 2013 tak ka samay bahut hi kharab hai.
fir se nyayalay ke chakkar lagane padenge. janta ka akrosh jhelna padega, man-samman ghatega hamle bhi ho sakte hain. 24 navanbar 2013 se 2 aktubar 2016, yah jivan ka ab tak ka sabse kharab samay sabit hoga. un par arop siddh ho sakte hain, unko koi badi saja mil sakti hai, sath hi un par koi janleva hamla ho sakta hai.
unke sath koi anhoni bhi ho sakti hai. unhonne jo apne svarth ke lie kargil men kiya un sainikon ki vidhvaon, anath bachchon ki hay parvej musharraf sahab ko kurbani dekar chukani padegi, pakistan ke bhi grah yog asthirta, arajkta, videshi hastakshep ke hain. navaj sharif sahab ko sarkar banane ka mauka milega.