manav jivan men shakun evan svapn ka prabhav- kab, kahan aur kaise? dae0 shuddhatmaprakash jain jyotish ko triskandh kaha gaya hai- siddhant, sanhita aur hora. kalantar men siddhant ke do bhag aur hue-pahla tantra aur dusra karan. sanhita men multah muhurt, grahon ke udyastadi ke fal, grahchar evan grahn-faladi hi the. bad men shakun aur svapnadhyay ismen aur sanyukt ho gaye. is prakar sanhita ka svarup hora, ganit aur shakun mishrit ho gaya. ajakal jyotish shastra panchaskandhi ho gaya hai. prashn aur shakun alag se skandh man liye gaye hain. manav jivan men svapnon ki bhumika aur unke fal vichar par ki charcha ki jayegi. svapnon ke madhyam se vyakti ke achar-vichar, vyavhar adi ke bare men vichar kiya jata hai. nai pirhi ke kuch navyuvak sanbhvtah is bare men hansenge ki yah bhi koi vidya hai, lekin iski pramanikta ke vishay men sandeh karna anupyukt hai, kyonki is gyan ka pratipadan prachin rishiyon, maharshiyon ne gahan anusandhan evan parikshan ke bad kiya tha. rishi parampara ki mul pustaken to aj upalabdh nahin hain, lekin arsh manishiyon dvara rachit parampara granth ramayan, mahabharat, brihat sanhita, basantraj shakun adi granth, lok vishvas evan svanubhav hi iske praman hain. iske atirikt ayurved ke choti ke vidvan acharya charak aur acharya sushrut ne bhi shakunon ka ullekh kiya hai. svapnashastra ko samjhne evan adhyayan karne ki prerna dete hue chandogyopnishad men ek katha ati hai ki uddalak nam se prasiddh arun ke putra ne apne putra shvetketu se kaha ki he saumya! tu mere svapnant ko vishesh rup se samajh le. jis avastha men yah purush sota hai us samay yah sat se sampann ho jata hai. yah apne svarup ko prapt ho jata hai isi se ise svapiti kahte hain, kyonki us samay yah sva apne ko hi prapt ho jata hai. jainadarshan ke prathmanuyog ke granthon men ek prasang ata hai ki jab tirthankar bhagavanton ka janm hota hai tab unki mata ko 16 svapn dikhai dete hain. yah ek sarvabhaum tathya hai. un svapnon ko rani pratah apne pati se kahti hai. maharaj unka fal batate hain ki rani! tumhare garbh men ek trilokpujya atipunyavan jivatma a raha hai. is prasang se bhi yah svatah siddh hai ki svapnon ka vastavik arth avashya hota hai. iske atirikt bhi iski pramanikta ke vishay men yadi manovishleshnvad ke janak suprasiddh manovishleshnvadi singamand frayad ka nam nahin len to shayad yah prakaran adhura hi rahega. singamand frayad ne apne chikitsalay men kai manorogiyon ko unke svapnon ka adhyayan karke hi svasth kiya tha aur svapnon ke bare men usne svayan likha hai- ‘‘svapnon ki apni bhasha hoti hai. purane logon ka yah vishvas ki svapn bhavishya ki or ishara karte hain, bilkul sahi hai.’’ frayad ne apne svapnon ko likha. unke arthon ka vishleshan kiya. in svapnon par usne ek pustak likhne ka nishchay kiya. usne apne aur rogiyon ke ek sahasra svapnon ko adhar manakar unka vishleshan kiya aur arth bataye. panch varsh ke ghor parishram ke bad usne svapnon par anusandhan sambandhi ek pustak ‘‘intarapreteshan aef drimsa’’ likhi jismen usne ek hajar svapnon ka vishleshan prastut kiya. usko vishvas tha ki is pustak ke dvara svapnon ke ve ashcharyajanak aur guptatam arth aur rahasya, logon ke samaksh ayenge jinki ve shatabdiyon se khoj kar rahe the. is pustak ka arambh karte hue usne likha- ‘‘is pustak men yah dikhane ka prayas kiya jayega ki svapnon ki vyakhya karne ke lie ek manovaigyanik vidhi hai. iska arth yah nahin hai ki jaisa svapn dekha, vaisa fal hamen bhugtna parega, yani ham partantra ho gaye- aisa nahin hai. apitu ye sab karma- filaesfi par adharit hai. svapn aur shakun bhi karm ke adhar par mane gaye hain. jiv apne jivnkal mane bhinna-bhinn prakar ke karm karta hai. sabhi karmon ko ek sath bhog pana sambhav nahin hai. prarabdh ke shubhashubh jaise bhi karm fal ko lekar jiv utpann hota hai use shakun aur svapn, jyotish adi sabhi usi rup men pratibimbit karte hain. svapn kaise ate hain, is vishay men ayurved ka mat hai ki pratyek manav men hita nam ki 72 hajar nariyan hoti hain, jo hriday se lekar sampurn sharir men vyapt hain. sharir ka aisa koi bhi bhag nahin hai, jahan ye nariyan nahin hon. rudhir sanchar inhin nariyon dvara hota hai. nari do prakar ki hoti hain- svapn nari aur jagrat nari. man hriday se nikalakar hita nari (svapn nari) men pravesh kar svapn dekhta hai aur jab nariyon dvara buddhi bahar jakar bahya vishyon ko grahan karti hai. tabhi jiv jagrat avastha ko prapt hota hai. maharshi charak ke anusar darun svapn ka sambandh manovha nari se hai- manovhanan purnatvad doshairtiblaistribhiah. srotsan darunan svapnan kale pashyati darune..- charak sanhita, indriya sansthan, 5/30 yogvashishth men bhi svapn ko chitt ki bhumi se utpann mana gaya hai- anakrantendriyachchidro yatah kshubdho'ntarev sah. sanvidanubhavatyashu s svapn iti kathyate.. -yogvashishth sthiti prakaran, 16/33 chitt hi men vasna athva sanskaron ka vas hota hai. atah chitt hi svapn ka sutradhar hai. yogvashishth ke anusar netradi indriyon ke chidron ke akraman kiye bina antahkaran men kshubdh hokar jo padarthon ko sanvit anubhav karta hai usi ko svapn kahte hain. svapn mukhya rup se char prakar ke bataye gaye hain. pahla daivik, dusra shubh, tisra ashubh aur chaitha mishrit. daivik svapn karya ki suchna dete hain. shubh svapn karyasiddhi ki suchna dete hain ashubh svapn karya ki ashubh suchna dete hain aur mishrit svapn mishrit faldayak hote hain. sigamand frayad ke anusar svapn do prakar ke hote hain- pratham mul pravritti ke aveg jo sadharntya daman kiye jate hain, ve sote samay puri shakti ke sath avchetan par dabav dalte hain, dusre koi tivra ichcha jo jagrat avastha men tript nahin hui, vah ichcha avchetan star se shakti bator kar bahar ane ke lie dabav dalti hain aur uska sarthak arth hota hai. svapnon ke vishay men kuch baten ullekhniya hain. pahli, svapnon ki smriti jagrat avastha ki smriti se kahin adhik hai. svapn ve smritiyan late hain jo vyakti bhul jate hain aur jo jagrat avastha men unki pahunch ke bahar hain. dusri, svapn simarhit hain. ye sanketon men ate hain. svayan svapnadrishta unke arth nahin janta. anek bar bachapan ki ve ghatnayen svapnon men dikhti hain jinko damn-kriya dvara daman karke bhula diya jata hai. mansik rogiyon ke svapnon men ve baten samne ati hain, jo darshak ki praurhavastha se nahin, balki uske bhule bachapan se ati hain. svapn manav ke purva itihas ko kholakar samne rakh dete hain. svapnon ka fal kab milta hai- is sambandh men brihaspatikrit svapnadhyay men likha hai ki yadi ratri ke dvitiya yam yani prahar men svapn dekhe to 6 mahine men fal hoga. yadi tisre prahar men svapn dekhe to tin mahine men fal hoga. arunoday ke samay svapn dekhne se das din men fal milega. prayah avchetan man ke arthon ko aur usmen vas karne vali ichchaon ko janna bahut kathin hai, kintu ek bat nirvivad hai ki avchetan man ki ichchayen svapnon men chadm rup men rahti hain. kabhi-kabhi svapn bahut kasht dene vale hote hain, jinko dekhakar svapnadrishta chintit ho uthta hai aur harbrakar nind se jag jata hai. sigamand frayad kahte hain ki svapnon dvara ya to samjhauta hota hai ya avchetan man ki kuch ichchayen chadm rup men tript hoti hain. yahi karan hai ‘aham’ chetan ho uthta hai aur nind khul jati hai aur vah avchetan ki ichchaon par niyantran kar leta hai. kabhi-kabhi avchetan ‘aham’ par cha jata hai aur kabhi-kabhi ‘aham’ adhik shakti lagakar avchetan ke prabhav ko kam kar deta hai. yadi sote samay avchetan man ka prabhav ‘aham’ par adhik hai aur sota ‘aham’ usse takkar nahin le sakta to vah sachetan ho uthta hai. pratyek svapn nind men khalal dalta hai. svapn ek prakar se nind ka prahri hai. vah rat ko pahra deta hai aur jab vah bahar ke akraman se raksha nahin kar pata to vah sote ‘aham’ ko jaga deta hai. yadi pahle ashubh svapn dikhe aur bad men koi shubh svapn dikhe to svapnadrishta shubh svapn ke fal ko hi pata hai. bure svapn ko dekhakar yadi vyakti so jaye aur ratri men hi kisi se kah de to bure svapn ka fal nasht ho jata hai athva pratahkal uthakar ishtadev ko namaskar kar svapna-fal ko kahakar uski nivritti ki prarthana karni chahie. jo vyakti svapn dekhakar punah so jata hai vah manushya svapn se milne vale shubh ya ashubh fal ko nahin pata hai. islie shubh svapn ko dekhne par samjhdar vyakti ko fir se nahin sona chahie aur shesh ratri ko bhagavadbhajan karte hue vyatit karna chahie. sansar men svapn dene vale nau bhav bataye gaye hain. suna hua, anubhav kiya hua, dekha hua, dekh hue ke saman, chinta se, prakriti vikriti se, devta se aur pap-punya se svapn dekhe jate hain. inmen se prarambhik chah prakar ke svapnon ka to shubh ya ashubh fal vilamb se prapt hota hai baki bad vale tin prakar ke svapn shighra hi fal dene vale hote hain. kaha gaya hai- raterhasashch shokachch bhayanmutrapurishyoah. pranashtavastu chintato jatah svapno vritha bhavet.. arthat rati, has, shok, bhay, malmutra-veg aur ishtaviyog ki chinta se dekha hua svapn vyarth ho jata hai. sigamand frayad dvara svapn vishleshan ka ek namuna dekhiye ki ve kis prakar svapnon ka vishleshan evan vyakhya karte the- svapn isaprakar hai- ‘‘ek navyuvak kisi ke ghar do char din ke lie atithi ban kar gaya. vah ghar use bahut akarshit laga. vahan rahte hue uski ichcha us ghar men kuch din aur rahne ki hui. is ghar men rahte hue use svapn dikha ki ghar men taje lagaye gaye paudhon men kaliyan fut ain hain aur unmen ful lage hain.’’ is svapn ki vyakhya frayad ne isaprakar ki hai- navyuvak us ghar men adhik din rahna chahta tha. kaliyon ke futne se aur barhne men samay lagta hai. atah uska sapna uski ichcha ko spasht rup men prakat n karke aspasht rup se prakat karta hai. vah us ghar men us samay tak rahna chahta tha jis samay tak kaliyan ful ban jayen. dae0 paripurnanand varma ne apni pustak ‘‘pratik shastra’’ ke prishth sankhya 310 par shubh fal pradan karne vale svapn is prakar bataye hain- 1. sarasvati, 2. vishnu, 3. shshankr-parvati, 4. chandrama aur hiran, 5. mitra 6. tota, 7. faldar vriksh, 8. ganga nadi, 9. surya, 10. vanik, 11. garud, 12. bhara ghara, 13. dharmaraj, 14. ravan, 15. lakshmi, 16. ram-lakshman, 17. hanuman, 18. kokila, 19. mayur aur 20. machli. isi prakar unhonne ashubh fal dene vale svapn isaprakar bataye hain- 1.shukar, 2. kutta, 3. lavak pakshi, 4. sukha vriksh, 5. mrityu, 6. yamdut, 7. gadha, 8. kushti, 9. thela, 10. andha vyakti, 11. laraku striyan, 12. dasi, 13. murga, 14. suna mandir, 15. chanchal stri, 16. chor taskar, 17. billi, 18. siyar, 19. shukracharya, 20 durvasa rupi sadhu. prachya vidya ke jyotishvishayak shastron men kuch svapnon ke fal isaprakar bataye gaye hain- ‘‘jo vyakti svapn men sinh, ghore, hathi, bail athva rath par charhta hai vah raja hota hai. jiske dahine hath men safed sarp kate to use panch din men sahasron rupye ka labh hota hai. svapn men manushya jiska sir kate ya jo kate ve donon rajya prapt karte hen. ling chedan hone se purush tatha yoni chedan hone se stri purush rupi dhan ko prapt hoti hai. svapn men jis purush ka jihva-ched ho vah kshatriya ho to sarvabhaum raja hota hai yadi anya koi ho to mandaleshvar hota hai. jo purush shvet hathi par charhakar nadi ke kinare dahi-bhat khata hai vah sampurn prithvi ka bhog karta hai. jo purush svapn men surya chandrama ke mandal ko khata hai vah prithvipti hota hai. jo svapn men apna ya dusre manushya ka mans khata hai vah samrajya prapt karta hai. jo mahal par charhakar achche pakvann khakar agadh jal men tairta hai vah raja hota hai. jo purush svapn men vaman ya vishtha khay tatha uska apman n kare to vah avashya raja hota hai. jo svapn men mutra, virya ya rudhir pan karta hai aur sharir men tel malta hai vah dhanvan hota hai. jo kamaladal ki shayya par baithakar khir khata hai, vah manushya rajya prapt karta hai. jo manushya svapn men fal, fulon ko khata ya dekhta hai uske angan men lakshmi lautti hai. jo svapn men dhanush par ban charhata hai vah shatrudal ko jitakar nishkantak rajya karta hai aur svapn men dusre ka vadh athva bandhan karta hai athva ninda karta hai vah purush lok men dhanvan hota hai.