mangli dosh ka haua! hindu samaj men larke aur larkiyon ki kundli milate samay mangli dosh par adhik jor diya jata hai. yadyapi larke ke pita is bat se vishesh chintit nahin hote kintu larki ke mata-pita keval yah sun kar hi chinta men par jate hain ki unki kanya mangli hai. is mangli dosh ka ‘haua’ itna bhayanak hota hai ki kuch log yah pata lagne par ki unki larki mangli hai nakli janmapatri banva lete hain. dakshin bharat men ise kuj dosh kahte hain.
tamilnadu evan keral ki asankhya larkiyon ke vivah men deri karane vala yahi mangli dosh hai. vahan log is dosh ke ‘haue’ se pareshan ho kar bari kathinai se kisi larke ke pita ko santusht kar pate hain. yadi larke ka pita mangli kanya se apne putra ka vivah karne ke lie taiyar ho gaya to vivah ho jata hai; anyatha punah naye larke ki talash, uske pita ki santushti aur is sthiti men punah pratiksha.
is prakar asankhya sundar, sushikshit evan svasth kanyaon ke vivah men mangli dosh ka ‘haua’ virodh, ya vilanb utpann kar raha hai. mangli dosh kya hai ?: mangli dosh tab mana jata hai, jab kundli men lagn, chaturth, saptam, ashtam, ya dvadash sthan men mangal baitha ho. lagn men mangal ho to svasthya par dushprabhav parta hai. vyakti svabhav se ugra evan jiddi hota hai. chaturth sthan men mangal hone par jivan men bhogopbhog ki samagri ki kami rahti hai. yahan sthit mangal ki saptam sthan par drishti parti hai, jo danpatya sukh par pratikul prabhav dalti hai.
saptam sthan men sthit mangal danpatya sukh (rati sukh) ki hani karne ke sath-sath patni ke svasthya ko bhi hani pahunchata hai. is sthan men sthit mangal ki dasham evan dvitiya bhav par drishti parti hai. dasham sthan ajivika ka tatha dvitiya sthan kutunb ka hota hai. atah in sthanon men sthit mangal ajivika evan kutunb par bhi apna prabhav dalta hai. ashtam sthan men sthit mangal jivan men vighnakarak, badhakarak evan anishtakarak mana gaya hai. is sthan men sthit mangal kabhi-kabhi danpti men se kisi ek ki mrityu bhi kar sakta hai. dvadash sthan men sthit mangal, vyakti ki kray shakti (vyay) ko prabhavit karne ke sath-sath saptam sthan par apni drishti ke dvara danpatya sukh ko bhi prabhavit karta hai. in 5 sthanon men se lagn, chaturth, saptam ya dvadash sthan men sthit mangal, apni drishti, ya yuti se saptam sthan ko prabhavit karne ke karan, danpatya sukh ke lie hanikarak mana gaya hai.
ashtam sthan ayu ka pratinidhi bhav hai tatha yah patni ka marak (saptam se dvitiya hone ke karn) sthan hota hai. atah is sthan ka mangal danpti men se kisi ek ki mrityu kar sakta hai. islie is sthan men bhi mangal ki sthiti achchi nahin mani gayi. jyotish shastra men in panchon sthanon men se kisi ek sthan men mangal hone par, mangal ke parne vale dushprabhav ko hi mangli dosh kaha jata hai. jis prakar lagn se ukt 5 sthanon men mangal hone par mangli yog, ya mangli dosh hota hai, usi prakar chandra lagn evan shukra se bhi ukt 5 sthanon men mangal hone par bhi mangli dosh hota hai. karan yah hai ki chandra lagn ka bhi lagn ke saman hi mahatva mana gaya hai tatha shukra vivah evan danpatya sukh ka pratinidhi grah hota hai. islie mangli yog, ya mangli dosh ki sankshipt paribhasha yah hai ki lagn, chandra lagn, ya shukra se pratham, chaturth, saptam, ashtam, ya dvadash sthan men mangal hone par mangli yog hota hai. dakshin bharat ke jyotish granthon men lagn ke sthan par dvitiya bhav ko grahan kiya gaya hai. atah vahan lagn adi se dvitiya, chaturth, saptam, ashtam ya dvadash sthan men mangal hone par kuj dosh (mangli dosh) mana jata hai, jaisa ki keral shastra men kaha gaya hai- ‘dhane vyaye va patale jamitre chashtame kuje. stri bharturvinash ch bharta ch strivinashanam..’ mangli dosh men 5 bhav hi vicharniya kyon ?: sukhi danpatya jivan ke lie nimnalikhit 5 vastuon ki avashyakta hoti hai-
1. achcha svasthya,
2. bhogopbhog ki samagri ki upalabdhi,
3. rati sukh,
4. anisht ka abhav tatha
5. samast avashyaktaon ki purti ke lie achchi kray shakti.
jyotish shastra men in panchon vastuon ke pratinidhi bhav lagn, chaturth, saptam, ashtam tatha dvadash mane gaye hain. lagn se svasthya ka vichar karte hain. chaturth bhav se bhogopbhog ki samagri ka vichar hota hai. yah bhav makan, bhumi, vahan evan ghar ke upakaran (bartan, farnichar adi) ka pratinidhi bhav hai. sukh evan manonukulta ka vichar bhi isi bhav se hota hai. surti, ya sanbhog ka vichar saptam bhav se hota hai. purush ki kundli men yah bhav patni ka tatha stri ki kundli men pati ka pratinidhitva karta hai. ashtam bhav jivan men ane vale vighn, badha, anisht evan mrityu ka dyotak hai. ayu ka vichar bhi isi bhav se hota hai.
dvadash bhav vyay, ya kray shakti ka dyotak hai. is prakar dekhte hain ki kisi ki kundli se uske danpatya jivan men ane vale sukh, ya duahkh ka jyotish shastra ki riti se vichar karte samay in panchon (lagn, chaturth, saptam, ashtam evan dvadsh) bhavon ki upeksha nahin ki ja sakti. kisi bhav ka fal shubh hoga, ya ashubh yah janne ka sarvamanya niyam yah hai: jo bhav apne svami, ya shubh grah se drishta-yut ho, vah jin vastuon ka pratinidhitva karta hai, unki vriddhi hoti hai. tatparya yah hai ki bhav men bhav ka svami ya shubh grah baitha ho, athva bhav ko uska svami, ya shubh grah dekhta ho, to bhav ka fal shubh hota hai. kintu bhav men pap grah baitha ho, ya pap grah bhav ko dekhta ho, to bhav ka fal ashubh hota hai. sukhamay danpatya jivan ke lie ukt 5 vastuon ki anivaryata ko nakara nahin ja sakta. kintu in panchon vastuon se sukh tabhi prapt ho sakta hai, jab inke pratinidhi bhavon men pap grah n to baithe hon aur n hi in bhavon ko dekhte hon. yahi karan hai
ki jyotish shastra men grah melapak ke in panchon bhavon par pap grahon ke prabhav ka vichar karne ki paranpra prachin kal se aj tak chali a rahi hai. vastavikta yah hai ki jis vyakti ki kundli men in panchon bhavon men se koi ek, ya adhik bhav pap grahon ke prabhav men hon, uske danpatya jivan men sukh ki hani ka yog ban jata hai. kundli men kul 12 bhav hote hain tatha gochriya kram se ghumta hua grah inhin men se kisi bhi bhav men baith jata hai. is prakar koi bhi grah, chahe vah shubh ho, ya papi, adhikatam 12 bhavon men baith sakta hai. inmen se ukt 5 bhav danpatya sukh ke nirnayak mane gaye hain, jinmen pap grah ke baithne se danpatya sukh ki hani hoti hai. is prakar yah nishkarsh niklta hai ki pap grah apne 12 bhavon ke paribhraman kal ka bhagan purti kal men se 5/12 kal tak danpatya sukh ke lie hanikarak hota hai. 5/12 ka man lagabhag 42 pratishat hota hai. atah kaha ja sakta hai ki pap grah apne sanpurn bhog kal men se 42 pratishat samay tak danpatya jivan ko hani pahunchata hai.
yadi pap grah ke bhagan bhog kal men 100 vyaktiyon ka janm man liya jae, to unmen se 42 pratishat logon ka danpatya jivan duahkhamay rahne ki sanbhavna banti hai. is prakar dekhte hain ki 5 bhavon men pap grah ki sthiti kul jansankhya ke 42 pratishat ko danpatya sukh se vanchit kar sakti hai. 42 pratishat ek bahut bara bhag hota hai. itne adhik logon ke danpatya jivan ko in pap grahon ke prabhav se kaise surakshit kiya jae? is prashn ne prachin maharshiyon evan acharyon ke man ko avashya vichlit kiya hoga. jyotish shastra ke pravartak rishiyon evan manishi acharyon ne bar-bar is ganbhir prashn par, dattachitt ho kar, vichar kiya tatha danpatya jivan ko prabhavit karne vale pap grahon ke is ashubh prabhav se bachav ka ek tarika khoj nikala, jise jyotish ki bhasha men grah melapak kahte hain.
grah melapak kya hai?: lagn, chaturth, saptam, ashtam evan dvadash bhav men pap grahon ki sthiti 42 pratishat logon ke danpatya sukh ko hani pahunchati hai. yah sthiti tab hoti hai, jab matra lagn se praranbh kar in bhavon men pap grahon ki sthiti ki sanbhavna ka vichar karte hain. yadi chandrama se tatha shukra se bhi, inhin panchon bhavon men pap grahon ki sthiti ko danpatya sukh ke lie hanikarak man liya jae, to yah pratishat kahan tak barh jaega, iski kalpana kar sakte hain. jyotish shastra men lagn ke saman hi chandra lagn ka bhi mahatva hai. vivah evan danpatya sukh ka pratinidhi grah shukra mana gaya hai.
islie janm lagn, chandra lagn evan shukra se ukt 5 bhavon men pap grahon ke prabhav par vichar kiya jata hai. yah prabhav itna vyapak hai ki sabhi log iski paridhi men a jate hain. is prabhav ko vyavhar men mangli dosh kahte hain. mangli dosh vale larke evan larkiyon ka danpatya jivan sukhamay ho sakta hai, yadi unka grah melapak achcha ho. grah melapak vah vidhi hai, jo yah batlati hai ki mangli larke, ya larki ka vivah kisse kiya jae tatha jo log mangli doshrhit hain, unke bhi sukhamay danpatya sanbandh ke lie melapak marg prashast karta hai. mangli yog evan uske parihar: mangli yog men pramukh bat yah mani gayi hai ki lagn, chaturth, saptam, ashtam evan dvadash sthan par pap prabhav parne se svasthya, bhogopbhog ke sadhan, rati sukh, anisht ka prabhav evan kray shakti ka hras hota hai, jo anttogatva danpatya sukh ko nasht kar deta hai.
islie jis prakar ukt 5 sthanon men mangal hone par danpatya sukh ko hani pahunchne ki sanbhavna banti hai, thik usi prakar in 5 sthanon men shani, surya, rahu, ya ketu hone par bhi danpatya sukh ko hani pahunch sakti hai. yahi karan hai ki jyotish shastra men manishi acharyon ne mangal, shani, surya, rahu evan ketu, in panchon grahon ko mangli yogkarak man liya hai. mangli yog ke dushprabhav men hras-vriddhi: mangli dosh lagn, chandrama, ya shukra se pratham, chaturth, saptam, ashtam, ya dvadash sthan men pap grah hoene par hota hai. kintu is yog ka prabhav sadaiv ek-sa nahin rahta, apitu is men hras-vriddhi hoti rahti hai. jab yah yog lagn se banta hai, to iska dushprabhav apekshakrit kam, ya kamjor hota hai. iski tulna men chandrama se mangli yog hone par iska dushprabhav adhik tatha shukra se sahyog hone par iska dushprabhav sarvadhik hota hai.
karan yah hai ki lagn sharir ka, chandrama man ka tatha shukra rati ka pratinidhitva karte hain. danpatya sanbandhon ko, sharir ki tulna men, man, ya svabhav jyada prabhavit kar sakta hai tatha in donon ki tulna men rati sukh sarvadhik mahattva rakhta hai. yah yog mangal, shani, surya, rahu evan ketu in 5 grahon se banta hai. pap grahon men mangal, shani, surya, rahu evan ketu uttarottar kam papi mane gaye hain. atah mangal se banne vale yog ki tulna men shani se banne vala yog kuch kam prabhav dalta hai. isi prakar surya, rahu evan ketu se banne vale yog bhi uttarottar kam prabhavshali hote hain. islie yah kaha ja sakta hai ki mangal, shani, surya, rahu evan ketu in grahon se banne vale yogon ka dushprabhav uttarottar kam hota jata hai.
is prakar mangal se banne vale yog ka dushprabhav sarvadhik tatha ketu se banne vale yog ka sabse kam hota hai. mangli yog lagn, chaturth, saptam, ashtam evan dvadash sthan men pap grahon ke baithne se banta hai. saptam sthan sakshat danpatya sukh ka pratinidhitva karta hai. atah is sthan men pap grah hone par yah yog adhik hanikarak hota hai. iski tulna men lagn men pap grah hone par is yog ke dushprabhav ki matra kuch kam ho jati hai. isse kam dushprabhav chaturth sthan men pap grah hone par, usse bhi kam dushprabhav ashtam sthan men pap grah hone par tatha sabse kam dushprabhav barhven sthan men pap grah hone par hota hai.
atah kaha ja sakta hai ki saptam, lagn, chaturth, ashtam evan vyay sthanon men pap grah hone se banne vale mangli yogon ka dushprabhav uttarottar kam ho jata hai. jyotish shastra ka ek sarvamanya niyam yah hai ki svarashi, mul trikon rashi, uchch rashi tatha mitra rashi men sthit grah bhav ka nash nahin karta, balki vah bhav ke fal ki vriddhi karta hai. kintu nich rashi ya shatru rashi men sthit grah bhav ko nasht kar deta hai. atah mangli yog grah ke svarashi, mul trikon rashi ya uchch rashi men hone par doshdayak nahin hota. kintu is yog ko banane vala grah nich ya shatru rashi men ho, to adhik doshdayak hota hai.
anubhav ke adhar par kaha ja sakta hai ki lagn, chaturth evan saptam sthan men pap grahon se banne vala yog tatha lagn, chaturth evan saptam sthan men matra mangal ya shani se banne vala yog danpatya jivan men ashubh parinam paida karne ka samathrya rakhte hain. kintu isse bhinn sthiti men banne vale yog ka danpatya jivan men bahut kam ya tatkalik prabhav parta hai. mangli yog ka parihar: grah melapak ki riti par prakash dalne se purva yah batla diya jae ki kuch paristhitiyon men mangli dosh prabhavhin ho jata hai. jo yog mangli dosh ko prabhavhin kar dete hain, ve iske parihar yog kahe jate hain. jyotish shastra ke prayah sabhi manak granthon men mangli yog ke parihar ka ullekh milta hai. parihar yog bhi atmakundligat evan parkundligat bhed se do prakar ke hote hain. var ya kanya ki kundli men mangli yog hone par usi ki kundli ka jo yog mangli dosh ko nishfal kar deta hai, vah parihar yog atmakundligat kahlata hai tatha var aur kanya men se kisi ek ki kundli men mangli yog ka dushprabhav dusre ki kundli ke jis yog se dur ho jata hai, vah mahattvapurn evan anubhut yog is prakar hai:
û kundli men lagn adi 5 bhavon men se jis bhav men bhaumadi grah ke baithne se mangli yog banta ho yadi us bhav ka svami balvan ho tatha us bhav men baitha ho ya use dekhta ho; sath hi saptamesh ya shukra trik sthan men n ho, to mangli yog ka ashubh prabhav nasht ho jata hai.
û yadi mangal shukra ki rashi men sthit ho tatha saptamesh balvan ho kar kendra trikon men ho to mangli dosh prabhavhin ho jata hai.
û var aur kanya men se kisi ek ki kundli men mangli yog ho tatha dusre ki kundli men lagn, chaturth, saptam, ashtam, ya dvadash sthan men shani ho, to mangli dosh dur ho jata hai.
û var aur kanya men se kisi ek ki kundli men mangli yog ho tatha dusre ki kundli men mangli yogkarak bhav men koi pap grah ho to mangli dosh nasht ho jata hai.
û jis kundli men mangli yog ho usmen shubh grah kendra trikon men tatha shesh pap grah trishday men hane tatha saptamesh saptam sthan men ho to bhi mangli yog prabhavhin ho jata hai.
û mangli yog vali kundli men balvan guru ya shukra ke lagn ya saptam men hone par athva mangal ke nirbal hone par mangli yog ka dosh dur ho jata hai.
û mesh lagn men sthit mangal, vrishchik rashi men chaturth bhav men sthit mangal, vrish rashi men saptam sthan men sthit mangal, kunbh rashi men ashtam sthan men sthit mangal tatha dhanu rashi men vyay sthan men sthit mangal mangli dosh nahin karta.
û mesh ya vrishchik ka mangal chaturth sthan men hone par, kark, ya makar ka mangal saptam sthan men hone par, min ka mangal ashtam sthan men hone par tatha mesh ya kark ka mangal vyay sthan men hone par mangli dosh nahin hota.
û jis kanudli men saptamesh ya shukra balvan ho tatha saptam bhav inse yut-drisht ho, us kundli men yadi mangli dosh ho to vah nasht ho jata hai.
û yadi mangli yogkarak grah svarashi, mul trikon rashi ya uchch rashi men ho to mangli dosh svayan samapt ho jata hai. yadi kisi larki ya larke ki kundli men shukra evan saptamesh balvan ho kar shubh sthan men sthit ho tatha saptam bhav par kisi bhi shubh grah ki drishti ho to us kundli men mangli dosh prabhavhin ho jata hai. is sthiti men mangli dosh se kisi prakar ki hani ki ashanka nahin karni chahie.
isi prakar jab kisi ki kundli men mangli yogkarak grah evan shukra par shubh grahon ka prabhav ho to bhi mangli yog danpatya jivan par kisi prakar ka dushprabhav nahin dal pata. mangli yog dekh kar kisi prakar ke vaham ya chinta men nahin parna chahie apitu kundli men saptam bhav saptamesh evan shukra ki sthiti tatha un par parne vale shubh ya ashubh prabhav ka dhyanpurvak adhyayan karna chahie. anek jagah dekha gaya hai ki mangli yog n hone par bhi matra saptam bhav, saptamesh evan shukra par pap grahon ka kuprabhav hone se danpatya jivan duahkhamay ban gaya.
melapak ka karya karne vale jyotishi bandhuon se ek bat vishesh rup se kahni chahie ki ve ‘bhavatbhavpteshch karkvshattattad falan chintyet’ is niyam ka upyog grah melapak men kar ke dekhen. yah niyam unke samaksh mangli dosh ya danpatya jivan ke bare men uthne vali ashankaon ka yatharth rup se samadhan karega.