shri shukdev ji vitragi baba ne karm yogi maharaj parikshit ko katha ka rasasvadan karate hue kaha- rajan! srishtikatrta brahmaji ke mastishk men ek hi dhun hai, srishti ka abhivarddhan. apne sabhi putron ko unka ek hi adesh hai, srishti karo. kumaron ki bhanti maharshi kardam ne pita ki agya asvikar nahin ki. agya ko shirodharya karke das hajar varshon tak sarasvati nadi ke taur par bindusar tirth ke samip bhagvan shri hari ki aradhna ki. jagat niyanta jagdadhar prasann hue aur kardamaji ko darshan die. bhagvan ki vah bhavya murti surya ke saman tejomay thi. unke ek-ek ang ki kanti karoron-karoron kamdev ki chavi ko bhi dhumil karne vale thi. mahatma kardam ne bhagvan kamalanayan ki sundar stuti karte hue kaha- prabho! apke charan kamal bhavsagar se par jane ke lie jahaj hain. nath! ap svarup se nishkriya hone par bhi maya ke dvara sansar ka vyavhar chalane vale hain. apke charan kamal vandniya hain, main apko bar-bar namaskar karta hun. nishkapat bhav se ki gayi kardamaji ki stuti se prasann hokar kamalanayan bhagvan ne unke hriday ke bhav ko janakar kaha- maine pahle se hi uski vyavastha kar di hai.
prasiddh yashasvi samrat svayambhuv manu brahmavart men rahakar sat samudra vali sanpurn prithvi ka shasan karte hain. ve paramadharmagya maharaj maharani shatrupa ke sath apni rup yauvan, shil aur gunon se sanpann shyamlochna kanya devhuti ko lekar parson yahan ayenge aur apni kanya tumhin ko arpan karenge. vah sarvatha tumhare anukul hai. vah kanya tumhari samipyata se nau kanyaon ko janm degi tatha anshkla rup se tumhare virya dvara tumhari patni devhuti ke garbh se avtirn hokar main svayan sankhya shastra ki rachna karunga. mangalamay ashirvad pradanakar shrihri garur par savar ho kardamaji ke dekhte-dekhte apne nij dham baikunth lok ko sidhar gae. bhagvan narayan ka vachan siddh hua aur manu ji maharaj maharani shatrupa aur kanya devhuti ke sath svarnajatit rath par savar hokar jahan karuna ke vashibhut hue bhagvan ke netron se ansuon ki bunden girne se param pavitra jo bindu sarovar tha, us vriksh lataon se ghire hue param ramniya sthan par agni hotra se nivritt hokar baithe hue munivar kardam ke samip upasthit hokar unhen karabaddh pranam kiya, kardamaji ne bhi unhen ashirvad se prasann karte hue tin asan upasthit kie.
manuji v shatrupa ne asan grahan kiya par devhuti yah janakar ki yah mere hridyeshvar banne vale hain atah asan ka sparshakar prithvi rupi asan par baith gayi. kardam jinhonne samast indriyon ko apne vashibhut kiya hai. devhuti jiske bulane par devagan yagyamandap men sakshat upasthit hokar apni-apni ahutiyon ko svikar karte hain. jiske rup saundarya par vishvavsu gandharva muchrchit hokar viman se niche gir para. aj usi devhuti ko kardam ji ne bhagvan ki agya se manuji maharaj ke pranay nivedan - ‘‘ap is kanya ko svikar kijie.’’ ko shirodharya kar brahm vidhi se apna liya aur kaha- main apki sadhvi kanya ke sath santan hone tak hi grihasth dharmanusar jivn-yapan karunga, punah sannyas dharan kar lunga kyonki mujhe to bhagvan shri anant hi sabse adhik priya hain. manuji maharaj devhuti se premashru pragat karte hue shatrupa maharani ke sath brahmavart laut ae. kardam ji virat virateshvar shri hari ki aradhna karte hue maun ho gae. devhuti bhi vahan rahakar man-vachan karm se apne svami ki seva karne lagi.
unki har ichcha ko kamvasna, danbh, dvesh, lobh, pap aur mad ka tyagakar purn karte hue aur yah jante hue ki patidev daiv se bhi barhakar hain, bari savdhani purvak vishvas, pavitrata, gaurav, sanyam, shushrusha, prem aur madhur bhashnadi gunon se apne param tejasvi patidev ko santusht karne ka prayas kiya. ek din maharshi ka dhyan patni ki seva par gaya. shram aur kasht se ve durbal ho gayi thin. mastak ke sugandh sinchit kesh jata ban chuke the. keval valkaladharini tapsi thin ve. maharshi prasann hue aur devhuti ko divya drishti pradan karte hue kaha ki bhagavatprasad svarup vibhutiyan jo mujhe prapt hain, un par meri seva ke prabhav se ab tumhara bhi adhikar ho gaya hai. kardamaji ke is prakar kahne se apne pranaballabh ko sanpurn yogmaya aur vidhaon men kushal janakar devhuti ne kaha- dvijashreshth ! apne vivah ke samay jo pratigya ki thi ki garbhadhan hone tak main tumhare sath grihasth sukh ka upbhog karunga, uski ab purti honi hi shreyaskar hai.
prajapti kardam ne apni priya ki ichcha purn karne hetu usi samay yog men sthit hokar man ki gati se tej chalne vale ichchanusar bhog-sukh pradan karne vale sarvatra vicharan yogya sab sanpattiyon ki uttarottar vriddhi sanpann devtaon ko bhi durlabh divya viman men kamllochna devhuti ko jo mail ke jam jane se kantihin ho chuki thi, use bindusrovar men snanakar viman men charh jane ki agya di. shri vishnu bhagvan ke rache hue tirth men snan matra se hi devhuti ke sharir ka ek-ek ang kamniya, ramniya tatha manglik vastron-abhushnon adi se sushobhit ho gaya. yah sab kardamaji ki yogmaya se utpann ramniyon ke prabhav ka varchasva tha. sahastron das, dasiyon, ratnopakaran v sabhi lokottar aishvarya sanpann viman men varshon vicharan karte hue garhasthya sukhopyog ko bhogte hue nau putriyon ko prapt kiya. unmen kala marichi rishi se, anusuya ka atri rishi se, shraddha ka angira se, havirbhu ka pulastya se, gati ka pulah se, yukti ka katu se, khyati ka bhrigu se, arundhati ka vashishth se aur shanti ka atharva se maharshi kardam ne vivah kar diya. ye navakanyayen navdha bhakti ka svarup thin.
devhuti ne jab dekha ki mere pranadhan virakt hokar van men ja rahe hain to kahne lagi- dev ! main indriyon ke vishay men murh bani rahi. mainne apke param prabhav ko nahin jana. fir bhi ap jaise mahapurush ka sang manglkari hona chahie. in vishyon men lagakar to jivan vyarth chala gaya. main ab kiske ashray men apna jivan vyatit karungi, prannath tum binu jag manhi mauku sukhad kataun kachu nahin. jiya binu deh nadi bin bari, taisei nath purush binu nari. mahatma kardam ji ne devhuti ke marm vachan sunakar aur prabhu ke vardan ko janakar kaha- doshrhit rajkumari ! tum apne vishay men is prakar dukh n karo, tumhare garbh men avinashi vishnu shighra hi padharenge. tum niyam, sanyam, tap aur danadi karti hui shraddha v prempurvak bhagvan ka bhajan karo. anukul samay aya bhagvan madhusudan kardam ji ke virya ka ashray le devhuti ke garbh se is prakar prakat hue, jaise kashth men se agni. akash se pushpon ki varsha v devtaon ke vadya yantra bajne lage. gandharva gan karne lage. brahmaji sahit marichi adi rishi bhagvan purushottam lilabihari kapil ke darshanon ke lie padhare.
kardamaji ko aptakam, purnakam bhagvan ka darshan prapt hua aur vairagya ko prapt kar jangal men bhagvdaradhna karte hue golok dham ko prapt kiya. devhuti ne bhi prajapti kardam ko bhagvan ka mangalamay ashirvad prapt kar van jate hue roka nahin. bhagvan kapil ne mata ko sankhya shastra (tatvagyan) ka updesh kiya aur kaha- jo log ihlok, parlok aur in donon lokon men sath jane vale vasnamay lingdeh ko tatha sharir se sanbandh rakhne vale jo dhan, pashu evan grih adi padarth hain, un sabko aur anyanya sangrahon ko bhi tyagakar ananya bhakti se sab prakar mera hi bhajn-smarana-chintn-manan karte hain. unhen main mrityurup sansarsagar se par kar deta hun. main hi sakshat bhagvan hun, prakriti aur purush ka bhi prabhu hun tatha samast praniyon ki atma hun. tum mera hi bhajan karo. mata ka samadhan karke ve unki agya se samudra tat par chale gae. samudra ne unhen apne bhitar sthan diya. ve tinon lokon ko shanti pradan karne ke lie yogmarg ka avlanban kar samadhi men sthit ho gae.
siddh charan, gandharva, muni aur apsaragan unki stuti karte hain tatha sankhyacharyagan bhi unka sab prakar stavan karte rahte hain. mata devhuti ne bhi kapil bhagvan ke batae hue marg ka anusaran karte hue thore hi samay men putra, bhagvan v guru rup men sthit trilokadhipti nityamukt puran purushottam shri bhagvan ko prapt kar liya. jis sthan par mata ko siddhi prapt hui vah param pavitra kshetra triloki men ‘siddhapada’ nam se vikhyat hua. vahi ek nadi ke rup men parinat ho gaya jo siddhagan se sevit aur sab prakar ki siddhi dene vali hai. kapil bhagvan ka charitra bara hi kalyankari hai. jo is param pavan vishuddh charitra ka smaran, chintan, manan adi karte hain unhen sansar ke vishyon se vairagya prapt hokar prabhu charnon men shraddha, prem v bhav jagrit hota hai tatha ant samay men nashvar ho jata hai. ‘‘hari un tatsat.. tritiya skandh vishram..