mrityu bhay se mukti dilae mahamrityanujay mantra pan. narendra rudra mahamrityunjay mantra ke jap se mrityu par vijay pai ja sakti hai. yah bat sunne men kuch acharaj bhari malum parti hai, par aise saikron vrittant hain jinse is mantra ki kshamata siddh hoti hai. atra shastra men guru se diksha lekar hi mantra jap karne ka vidhan hai. diksha ke bina safal hone men atyadhik samay lagta hai ya saflta milne men sandeh hota hai. is ati bhautiktavadi yug men dhairyapurvak diksha lene vale evan mantra sadhna karne vale log kam hain. yadi vidhipurvak mantra ka jap kiya jae to saflta avashya milti hai. yadi uchit guru se mantra diksha sanbhav n ho, to jap se purva ek kagaj par shuddh mantra likhakar apne ishtadev ko samarpit karen aur unhen pranam kar purn shraddha se gyarah bar is tarah path karen mano sakshat samne guruji ko suna rahe hon. isse mantra diksha purn hoti hai. uske bad jap aranbh karna chahie. vyaktigat mahatvakankshaon ki purti evan bhautik sukhon ki prapti hetu anek devi-devtaon ke mantron ki aradhna ki ja sakti hai. ganbhir rogon evan mrityu tulya kashton ke nivarnarth ya ishvar prapti hetu mahamrityunjay mantra ka vidhipurvak jap karna chahie. mahamrityanujay mantra mantron men raja hai. yah mritsanjivni mantra hai. ise rognashak v shantidayak mantra bhi mana gaya hai. aisi manyata hai ki mrityunjay mantra jap se rogashayya par para rogi shighra rogmukt ho jata hai. rog ya anisht ki ashanka hone par is mantra ka jap svayan bhi kiya ja sakta hai. mahamrityunjay yantra ka chitra lagakar is mantra ka jap sava lakh ki sankhya men paintalis din men puri nishtha evan pavitrata se kiya jae, to rogi ko nishchit rup se labh milta hai. shiv puran men is mantra ka bahut hi sundar varnan milta hai. prachin kal men kshuv namak ek mahatejasvi raja hue, jo chyavan rishi ke putra dadhichi ke mitra the. in donon men kisi prasang par vivad hua jo tinon lokon men maha anarthakari siddh hua. us vivad men ved ke vidvan shivabhakt dadhichi ne charon varnon men brahman ko shreshth bataya. is par dhan-vaibhav ke mad se mohit raja kshuv ne prativad kar kaha, ‘‘kshatriya (raja) samast varnon aur ashramon ke palak evan prabhu hain. islie raja hi shreshth hai. islie main sarvatha apke lie pujniya hun.’’ raja kshuv ka yah mat shrutiyon aur smritiyon ke viruddh tha. ise sunakar bhrigukulbhushan munishreshth dadhichi ko bara krodh aya aur unhonne kshuv ke mastak par baain mukke se prahar kiya. is par raja kshuv ne krodhatur hokar vajra se dadhichi ko kat dala. dadhichi ne us marnasann avastha men shukracharya ka smaran kiya. unhonne akar dadhichi ke angon ko purvavat jor diya. shivabhakt shiromni tatha mrityunjay vidya ke pravartak shukracharya ne shivpujan kar mahamrityanujay mantra ka updesh diya. ¬ tryambank yajamhe sugandhin pushtivardhanam. urvarukmiv bandhnanmrityormukshiya mamritat.. laghurup ¬ haun jun sah ¬ bhurbhuvah svah ¬ tryambakan yajamhe sugandhin pushtivardhanam urvarukmiv bandhnanmrityormukshiya mamritat svah bhuvah ¬ sah jun haun ¬.. mahamrityanujay mantra ki vyakhya ‘tryambakan yajamhe’ ham bhagvan tryanbak ka yajan karte hain. trayanbak ka arth hai tinon ke janak shiv. vah bhagvan surya, som aur agni-tinon mandlon ke janak hain. satva, raj aur tam tinon gunon ke maheshvar hain. atmatatva, vidyatatva aur shiv tatva-in tinon tatvon ke; ahvniya, garhapatya aur dakshinagni in tinon agniyon; sarvatra upalabdh hone vale prithvi, jal evan tej in tinon murt bhuton ke (athva satvik adi bhed se trividh bhuton ke), tridiv (svarga) ke, tribhuj ke, tridhabhut ke, brahma, vishnu aur shiv-tinon devtaon ke ishvar mahadev hi hain. ‘sugandhnia pushtivardhanam’. jaise fulon men uttam gandh hoti hai, usi prakar sabhi bhuton men, tinon gunon men, samast krityon men, indriyon men, anyanya devon men aur ganon men shiv hi sarbhut atma ke rup men vyapt hain. atah sugandhyukt evan sanpurn devtaon ke ishvar hain. un antaryami purush shiv se prakriti, brahma, vishnu, muniyon aur indriyon sahit devtaon ka poshan hota hai, islie vah ‘pushtivardhaka’ hain. ‘urvarukmiv bandhnanmrityormukshiya mamritat’, arthat ‘prabho! jaise kharbuja pak jane par lata ke bandhan se chut jata hai, usi prakar main mrityurup bandhan se mukt ho jaun, kintu amritapad (moksha) se prithak n houn.’ vah rudradev amritasvarup hain. jo punyakarm se, tapasya se, svadhyay se, yog se athva dhyan se unki aradhna karta hai, use nutan jivan prapt hota hai. bhagvan shiv svayan hi apne bhakt ko mrityu ke sukshm bandhan se mukt kar dete hain, kyonki vahi bandhan aur moksh dene vale hain thik usi tarah, jaise urvaruk arthat kharbuje ka paudha apne fal ko svayan hi lata ke bandhan men bandhe rakhta hai aur pak jane par svayan hi use bandhan se mukt kar deta hai. yah mrit sanjivni mantra sarvottam hai. bhagvan shiv ka smaran karte hue is mantra ka jap karane. jap aur havan ke pashchat abhimantrit kiya hua jal pien tatha shiv ka dhyan karte rahen. isse mrityu ka bhay nahin rahta hai. is prakar munishreshth dadhichi ko updesh dekar shukracharya bhagvan shankar ka smaran karte hue apne sthan ko laut gae. unki bat sunakar unke nirdesh ke anusar dadhichi ne van men vidhipurvak mahamrityunjay mantra ka jap kar bhagvan shiv ko prasann kiya. bhagvan shiv ke var mangne hetu kahne par munishreshth dadhichi ne tin var mange. meri haddiyan vajra ho jaen koi mera vadh n kar sake main sarvatra adin rahun-kabhi mujhmen dinta n ae. is prakar mahamrityunjay mantra mrityu par vijay dilane vala amaratva pradan karne vala hai.
Kya aapko lekh pasand aaya?
Subscribe