mohabbat jiske dam se thi, vo is dharti ki jinat thi, vo jab bhi muskurati thi baharen khilkhilati thi... yah kahani hai khubsurti ki devi, muskurahton ke sailab aur mohabbat ke paigam ki, jiski nayika hain madhubala. mohabbat ki tarikh 14 farvri 1933 ko dilli ke ek behad garib parivar men unka janm hua tha. unke janm par n koi jashn, n koi hangama hua. ve 11 bhai-bahnon men panchvin santan thin. ek sadharan se parivar men sadharan si ghatna ki tarah ghati, par vo sadharan larki nahin thi. mumtaj begam jahan dehlvi nam unhane diya unke man-bap ne. bhagvan ne bachapan men unhen dhan-daulat to nahin diya lekin upar vale ne unhen khubsurti dene men koi kanjusi nahin ki. unki khubsurti men char-chand lagati thi unki hansi. mumtaj ek bar hansna shuru karti to fir rukne ka nam nahin leti thi. behad abhavon ke bich ki vo nanhin pari jaisi mumtaj hansne ka koi n koi bahana dhunrh hi leti thi. nanhin mumtaj ki man se ek fakir ne kaha tha ki ye larki bahut nam kamaegi, iske mathe par nur hai. mumtaj se fakir ne kaha tha tumse jald hi milenge shayad mumbai men.
achanak hi mumtaj ke pita ataulla khan ki naukri chali gai aur ve dane-dane ko mohtaj ho gaye. tabhi unhen fakir ki bat yad ai aur unhonne bambai jane ka faisla kar liya. matra nau sal ki umra men mumbai ki film indastri men kadam rakhne ke bad fir kabhi mumtaj ne piche murakar nahin dekha aur khud ko jin bulandiyon tak pahunchaya ye sabhi jante hain. fakir ki pas ki najron ne jis karishme ko pahchana tha use ham grahon ki najron se janenge aur samjhenge - madhubala ki kundli makar lagn ki hai. lagn men lagnesh shani ki panchmesh v dashmesh shukra ki yuti hai. shani chandra ke nakshatra aur brihaspati ke upanakshatra men hai. madhubala ki khubsurti ka karan bhi yahi tha. jyotish shastra men shukra kalatmak gatividhiyon, saundarya, bhautik gatividhiyon v samriddhi ka pratik mana jata hai. makar lagn men yogkarak shukra ne lagnesh se sanbandh banakar madhubala ko asim saundarya, adbhut abhinay kshamata ke sath hi vaibhav sampann bhi banaya. madhubala ka janm atyant garib parivar men hua tha. kutumb ke svami shani apne se dvadash bhav lagn men baithe hain.
dvitiya bhav men ashtamesh surya, navmesh budh v rahu se yut hokar sthit hai. dvitiya bhav par vyayesh brihaspati ki ashtam bhav se purn drishti hai. brihaspati surya ke hi nakshatra men hone ke karan ashtam ke ashubh prabhav ko barha rahe hain. marak bhav saptam ke svami chandrama ki mahadsha men madhubala ka janm hua. markesh mrityu athva mrityu tulya kasht pradan karte hain. apne bachapan ke 6-7 varsh madhubala ne atyant kasht aur abhav men bitae. uske bad mangal ki dasha praranbh hui. mangal shukra ke nakshatra aur shani ke upanakshatra men hain. shukra ka yogkari prabhav mangal ki dasha praranbh hote hi shuru ho gaya. madhubala men sudanrta thi, unhen abhinay v nritya gayan ka bhi shauk tha. unke pita ke pas jab ajivika ka koi sadhan nahin tha tab ek fakir ki bat unhen yad ai ki ye larki bahut nam kamaegi aur vah usse fir milega shayad mumbai men. fakir ki bat yad karke ve apne parivar ke sath mumbai a gaye. us fakir ki bhavishyavani ka prabhav tha ya madhubala ke apratim saundarya aur hunar ka asar, munbai ane ke bad mumtaj ne piche murakar nahin dekha. ji han mumtaj, madhubala ke mata-pita ne unka nam mumtaj hi rakha tha.
madhubala nam to unhen is film indastri ki charchit abhinetri devika rani ne diya tha aur isi nam se ve abhinay ki unchaiyon par ja baithi. madhubala ko matra 9 varsh ki umra men ‘basant’ film men mumtaj shanti ke bachapan ka rol karne ka mauka mila. pagar thi 100 rupye mahina. chunki unke pita ko dinabhar unke sath rahna tha islie unhen mehntane men milne the 50 rupye. un garibi ke dinon men 150 rupye mahine ki pagar ki khushkhbri ne mumtaj aur uske parivar ke chehre par muskurahat faila di. mangal unki kundli men sukhesh v labhesh hai. sath hi shadbal men sarvadhik bali hai. apni mahadsha men unhonne madhubala ki saflta ke raste tay kar diye aur mangal ki mahadsha ke samapt hote-hote madhubala ke abhinay ka asar filmi duniya men hone laga tha. aprail 1946 se shuru hui rahu ki mahadsha. rahu ki yuti bhagyesh budh se hai aur mangal ki purn drishti bhi hai. mangal ke yogkari asar ka prabhav rahu par purn rupen para. in shubh aur yogkari prabhavon ke karan hi matra 14 varsh ki umra men madhubala ko kedar sharma ne apni film ‘nilkml’ men bataur lid ektres lene ka nirnay liya.
yadyapi film jyada safal nahin hui lekin madhubala ke kam aur saundarya donon ne sabka man moh liya. lekin rahu ke sath ashtamesh surya aur shashthesh budh ki bhi yuti hai. iske sath hi vyayesh brihaspati ki purn drishti bhi hai. jab yogkari grah apna shubh prabhav dikhate hain to ashubh grahon ka ashubh prabhav bhi insan par parta hai. unki kismat shayad upar vale ne kuch harbri men likhi thi, jindgi men sab kuch tha aur kuch bhi nahin tha. duniyan ki najar se dekhen to unse jyada sukhi koi nahin tha aur unki najar se dekhen to unse jyada duahkhi koi nahin tha. bachapan ke khel, masti, udham kya hota hai ye madhubala ne kabhi jana hi nahin. unhen bachapan se hi parivar ka bharn-poshan karne vala kamau bachcha banna para. is indastri n unhen vakt se pahle hi bara bana diya aur isi dauran unhen ek bari bimari ne bhi ghera. unke dil men surakh tha. jab daektar ne yah bat unke pita ataulla khan ko batai tab dehlvi parivar par jaise gaj gir pari. unke pita ataulla khan ne madhubala aur apne parivar ke sabhi sadasyon ko hamesha ke lie munh band rakhne ke lie kaha kyonki ve profeshanal hona kya hota hai yah achchi tarah jante the.
unhen pata tha magar ye bat kisi ko pata chal gai to madhubala ka kariyar banne se pahle hi khatm ho jayega. hriday rog ke vichar hetu chaturth bhav aur karak surya ka vishleshan kiya jata hai. madhubala ki kundli men chaturthesh mangal ashtam bhav men vyayesh brihaspati v ketu se yut hokar sthit hai. surya dvitiya bhav men shashthesh budh aur rahu se yut hokar baithe hain. chaturth bhav par vyayesh brihaspati ki purn drishti bhi par rahi hai. chaturth bhav, chaturthesh aur surya tinon hi shashthesh, ashtamesh v dvadash bhav v bhaveshon ke sath hi rahu, ketu ke ashubh prabhav men hain. yahi karan hai ki madhubala ko hriday ki ganbhir bimari hui aur isi bimari ke karan 36 varsh ki alpayu men hi unki mrityu ho gai. itni ganbhir bimari ko apne sharir men dabae hue madhubala man hi man ghutti rahin aur is chamkte sansar ko muskurahten parosti rahin. ek or hriday rog ne madhubala ke sharir ko to kamjor kiya hi vahin dusri or prem men bar-bar asafal hone ke karan madhubala mansik rup se bhi tutti ja rahi thin. unke filmi jivan men ane vale lagabhag har purush ne unke saundarya ko to saraha, unhen sar ankhon par bhi baithaya lekin madhubala jivanabhar sachche prem ki talash men bhatkti rahin.
dilip kumar, kedar sharma, kamal amrohi, premnath, bharat bhushan, pradip kumar, kishor kumar adi anek purushon ka sath madhubala ko mila lekin kisi n kisi karan se sabhi se unka rishta jyada din nahin chala. lekin dilip kumar ko madhubala ne hamesha sachche dil se chaha aur dilip sahab ne bhi unka sath diya. un donon ki mohabbat ko sakar kiya ke. asif ne mughleajam banakar. par kismat ko kuch aur hi manjur tha. kuch galtfhmiyon ke chalte madhubala aur dilip kumar ka lagabhag 10-12 sal ka prem safar khatm ho gaya. saptamesh, saptam bhav, navmesh, navam bhav ka kisi bhi prakar ka sanbandh vyakti ke jivan men ek se adhik prem sanbandhon ka dyotak hota hai. jab pancham, lagn v saptam bhav ka sanbandh hota hai to jatak ko prem vivah men saflta milti hai. madhubala ki kundli men saptamesh chandra navam bhav men sthit hai, isi karan unke jivan men itne prem prasang hue. yadyapi lagnesh shani, panchmesh shukra v saptamesh chandrama tinon hi saptamesh chandra ke nakshatra men hain is karan unke prem sanbandhon men akarshan to raha lekin shani svayan apne hi upanakshatra men hai is karan madhubala hamesha ekakipan ka anubhav karti rahin aur panchmesh shukra, lagn, saptamesh chandrama, vyayesh brihaspati ke upanakshatra men hain is karan unke prem sanbandh nasht hote gaye.
madhubala ne kishor kumar se vivah bhi kiya aur kishor kumar bhi har sanbhav koshish karte the ki antim samay men ve madhubala ko khush rakhen lekin sitaron ka khel hi kuch aisa tha ki sab kuch hote hue bhi unke pas kuch bhi nahin tha. madhubala ka lagn, dvadshesh brihaspati tatha saptam bhav pirit tha. budh navmesh joki pitri bhav ke svami hain aur surya joki pitri karak hain donon hi rahu ke pap prabhav men hain aur dhan bhav men labhesh v vyayesh mangal tatha brihaspati se drisht hain. yahi karan hai ki madhubala ke pita ataulla khan ne madhubala ko abhinay kshetra men lakar kamai ka sadhan banane men koi sankoch nahin kiya aur sadaiv hi uski khushiyon men badhak bante rahe taki unke svarth purti men badha utpann n ho jae. madhubala ko apni kamai se koi matalab nahin tha. ve apne chote se jivan men khub kam karna chahti thin, svayan khush rahna chahti thin aur dusron ko khush rakhna chahti thin. unke pita unki kamai se aishoaram ka jivan vyatit kar rahe the. madhubala apni bimari aur akelepan ko apni hansi men chupae ek ke bad ek safal filmen deti ja rahi thin.
unke dard aur muskurahton ka khel 1954 men ek film ki shuting ke dauran ai khun ki ulti se sabke samne a gaya. unki bimari ki khabar midiya men ag ki tarah fail gai, par ab bahut der ho chuki thi. madhubala ki landan men hart sarjari bhi hui aur uske bad ve kuch sal tak jivit bhi rahin. madhubala jaldi-jaldi apni filmen puri karne men lagi thin kyonki vo janti thin ki unke pas bahut kam samay hai. 23 farvri 1969 ko unhonne apne jivan ki antim sans li. marne se pahle ve ek bar yusuf sahab (dilip kumar) ko dekhna chahti thin par unki ye akhiri tamanna bhi adhuri rah gain. madhubala ki mrityu brihaspati ki mahadsha aur budh ki antardasha men hui. brihaspati vyayesh v ashtam ke ashtamesh arthat tritiyesh hain. budh shashthesh hain. gochar men brihaspati unke janmakalin chandrama jo ki kanya men hai par se bhraman kar rahe the. lagnesh shani jo ki markesh bhi hain shukra v rahu ke sath min rashi par gocharasth the. mangal jo ki chaturthesh hain shashth se shashth arthat ekadash bhav vrishchik rashi par se gochar kar rahe the.
chandrama mesh rashi men bhraman kar raha tha. shashthesh budh makar rashi arthat lagn men hi virajman the. surya kunbh rashisth the. madhubala ke janm lagn men tritiyesh brihaspati ketu se yut hain. aisi yuti hriday rog ko darshati hai. brihaspati v ketu ke sath chaturthesh mangal ki yuti bhi hai. chaturth bhav se hriday ka vichar hota hai. isi karan madhubala ko janm se hi hriday rog tha. madhubala ki mrityu ke samay bhi gochar men brihaspati v ketu ki yuti kanya rashi men thi jo ki rog ki tivrata darshati hai. unke janmakalin brihaspati bhi vakri the aur mrityukalin brihaspati bhi vakri the. madhubala ki 36 varsh ki choti si jindgi pyar ki talash men bhatkti hui taklif ke viranon men ghul gai. unke jivan men pyar, udasi, algav, taklifon ke gahre ghav the. aj bhi unki chavi parde se sidhe dilon men utrti hai. unki bepnah khubsurti aur behtrin abhinay ko log hamesha yad rakhenge.