bharat men bhagvti ke anek aise siddhapith evan mandir hain, jinke sanbandh men bahut kam log jante hain, unhin men se ek shritripur-sundri ka aitihasik mandir bhi hai. rajasthan ke dakshinanchal men aravli ki upatyakaon se ghira hua yah kshetra nadiyon, jalashyon evan prakriti ki suramya vadiyon se achchadit hai, jise bansvara kaha jata hai. vagvar pradesh ka yah kshetra ati prachinkal se dharm kshetra raha hai.
bansvara ko choti kashi ki sangya di jati hai. yahan vividh devi-devtaon ke prasiddh puratan asankhya mandir hain jinhen nirman kala, shilp aur apni bhavyata ke lie sanpurn pradesh hi nahin apitu pure bharatavarsh men prasiddhi prapt hai. vagvar kshetra pauranik punyasthali raha hai. skandapuran men yah kshetra ‘gupt pradesh’, raja bhoj ke samay ke shilalekhon men ‘sthali mandl’ tatha puranon men ‘kumarika khand’ v ‘vaguri kshetra’ ke nam se uddhrit hai. is kshetra men pravahit ajastra salila ‘mahi’ ko puranon men ‘kaliyuge mahi ganga’ ki sangya di gai hai.
devarshiyon ne is matrika pradesh ke triveni sangam beneshvar tirth ke divya saundarya ke ullekh ke sath ismen snan karne ko ati mahimamay mana hai. aisi pavan mahi nadi ke kshetra men pura mahatva ke anek mandiron men bansvara jila mukhyalay se 20 kimi. dur talvara ganv ke pas ‘mahalay umrai’ ganv ke nikatasth janglon men tripursundri mandir sthit hai. ise aranbh men ‘‘tartai mata’ ke nam se jana jata tha.
kaha jata hai ki mandir ke as-pas pahle kabhi tin durg the. shaktipuri, shivpuri tatha vishnupuri namak in tin puriyon men sthit hone ke karan devi ka nam tripura sundri para. mandir kshetra ati ramniya, shant, jagrit tatha darshaniya sthan hai jahan rajasthan evan parosi rajya gujrat, madhyapradesh v desh ke anya kshetron se tirth yatri prativarsh man ke darshanarth ate hain evan manovanchit fal prapt karte hain.
shritripur-sundri ka yah sthan kitna prachin hai, is sanbandh men koi likhit praman upalabdh nahin hai. kintu vartaman mane mandir ke uttari bhag men samrat kanishk ke samay ka ek shiv-ling vidyaman hai. atah logon ka vishvas hai ki yah sthan kanishk ke purva-kal se hi pratishthit raha hoga.
kuch vidvan tisri shatabdi ke purva se is sthan ka astitva mante hain; kyonki pahle yahan ‘gadhpoli’ namak aitihasik nagar tha. ‘gadhpoli’ ka arth hai- durgapur. ajakal yahan ‘umrai’ namak ganv hai. gujrat, malva aur marvar ke shasak tripura sanudri ke upasak the. gujrat ke solanki raja siddh raj jaysinh ki ye isht devi rahin. man ki upasna ke bad hi ve yuddh prayan karte the. kaha jata hai ki malva naresh jagdesh parmar ne to man ke shri charnon men apna shish hi kat kar arpit kar diya tha.
usi samay raja siddharaj ki prarthan par man ne putravat jagdev ko punarjivit kar diya tha. shilalekhon ke anusar ‘shritripursundri-mandir’ ka jirnonddhar lagabhag nau sau varsh purva san. 1147 vi. men panchal jati ke patabhai chandabhai luharne karaya tha. ukt mandir ke pas bhagi (fati) khan namak sthan hai, jahan kisi samay lohe ki khadan thi. panchal jati ke log isse loha nikalte the.
yah bat san. 1102 vi. ke as-pas ki hai. kinvadanti hai ki ek din mata bhavani bhikharin ke rup men bhiksha mangne khadan ke dvar par pahunchi, kintu panchalon ne koi dhyan nahin diya, jisse ve rusht ho gayin aur sari khadan tutakar baith gai. kitne hi log usmen dabakar mar gaye. yah fati hui khadan aj bhi mandir ke pas dikhayi deti hai. mata ko prasann karne ke liye patabhai chandabhai panchal ne mandir aur talvara ka ‘patela’ talab banvaya.
punah ukt mandir ka jirnonddhar 19vin shatabdi men karaya gaya. san. 1930 vi. men panchal-samaj dvara mandir par naya shikhar charhaya gaya. san. 1991 vimen ukt samaj ne mandir ka punah jirnoddhar karvaya. mandir ko vartaman bhavya rup dene ka karya san 1977 i. men sanpann kiya gaya. vartaman samay men shritripursundri ka vishal mukhya mandir hai.
mukhya mandir ke dvar ke kivar adi chandi ke bane hain. garbh mandir men bhagvti ki kale patthar ki ashtadasha-bhuja vali bhavya pratima pratishthit hai. bhaktajan unhen tartai mata, tripursundari, mahatripursundari adi namon se sanbodhit karte hain. man bhagvti sinhvahini hain. 18 bhujaon men divya ayudh hai. sinh ki pith par ashtadal kamal hai, jis par virajman bhagvti ka dahina pair mura hua hai aur bayan pair shriyantra par adhrit hai.
bhagvti ki pratima ke prishtha-bhag men, prabhamandal men ath choti-choti devi murtiyan hain, jo apne-apne vahnon par asin hain. pratyek devi ke hath men ayudh hain. man ke piche pith par 42 bhairvon aur 64 yoginiyon ki bahut hi sundar murtiyan ankit hain. bhagvti ki murti ke dayin aur bayin or ke bhagon men shrikrishn tatha anya deviyan aur vishisht pashu ankit hain aur dev-danv-sangram ki jhanki drishtigat hoti hai.
man bhagvti ki pratima bahut hi sundar aur akarshak hai. puratan kal men is mandir ke piche ke bhag men madachitt anek mandir the. karan, san 1982 i. men khudai karte samay unmen se anek murtiyan prapt huin hain, janmen se bhagvan shiv ki ek bahut hi sundar murti pramukh hai. shiv ji ki jangha par parvati virajman hain aur ek or riddhi-siddhi sahit ganesh tatha dusri or svami kartikey hain. man tripura ke ukt mandir men pratidin upaskon aur darshanarthiyon ki bhir lagi rahti hai. navratron men yahan ka mela darshaniya hota hai.
sanpurn bangad (bansvara aur dungrpur ka kshetra), panchmhal (gujrat), mandsaur, ratlam, chabua aur indaur (madhya-pradesh) tatha mevar (rajasthan) ke bhakt sahastron ki sankhya men is devi-mandir men akar apni bhakti-bhavna ko sarthak karte rahte hain. adivasi log pratyek ravivar ko darshanarth ate hain aur apne lok-giton dvara man ka stavan karte hain. mandir ghrit ki akhand jyoti se aharnish prakashit rahta hai. panchal jati ke log man tripura ko apni ‘kul devi’ mante hain. pratyek ashvin aur chaitra ke navratron men tatha kartikey shukla purnima ko yahan yagya ka ayojan hota hai.