manav hriday men is prem ka sutrapat kyane, kab aur kin karnon se hota hai? aisa kya hai, is jvar men jo manushya ko antarman tak jhinjhor deta hai. prem ke lie uttaradayi grah: jyotishiya drishti se prem ko uddam tarangon par pahunchane men chandra, shukra, mangal, panchmesh, saptamesh grahon ka purn yogdan rahta hai. shastron men ‘chandrama manso jatah’ ke adhar par chandrama ko man ka karak svikar kiya gaya hai. yahi grah prem, hridyon men komal bhavnaon se ot-prot akarshak evan manas chanchalya ko utpann karta hai. chandrama ka man par purn adhikar hone ke karan ise usse sambandhit mansik bhavnaon, prasannataon evan udasinta ka karak bhi svikar kiya jata hai.
grahon men chandrama ki gati sarvadhik hoti hai. isi karan man ki gati ko bhi sarvadhik mana gaya hai. chunki kalpurush ki kark rashi chaturth bhav par parti hai aur kark rashi chandrama ke adhipatya men ati hai. chaturth bhav hriday ka bhav bhi kaha jata hai. atah hriday men udvelit samast bhavnatmak tarangon ka sutradhar chandrama ko hi mana gaya hai. shukra ko prem ka sampurn karak mana gaya hai. pashchatya jagat men shukra ko ‘vins’ kaha jata hai.
‘vins’ arthat prem ki devi. akashamandalasth shukra par yadi drishtipat kiya jae to yah grah shubh evan ujjval dikhai deta hai, jo ki anya grahon se sarvadhik sundar evan svachch pratit hota hai. yahi karan hai ki manav hriday men sundarata, madhurya evan utkrisht kalatmak bhavnaon ka netritva yahi grah karta hai, isilie kalatmak ruchiyon tatha sangit, chitrakla, abhinay adi men shukra ka pratinidhitva nirvivad hai. saundarya ka pramukh uddeshya hota hai, kisi ko bhi apni or akarshit karna, atah jin vyaktiyon ki kundaliyon men shukra atyadhik balvan hota hai usmen dusron ko apni or akarshit karne ka pramukh gun hoga aur yahi akarshan kalantar men prem ke rup men parivartit ho jata hai.
isi kram men mangal ko bhi sammilit kiya jata hai kyonki jab tak man men sthapit prem ko vyakt nahin kiya jaega vah prem nishfal hi kaha jaega. do viprit premi hridyon men prem ka suman to ankurit ho gaya hai, parantu yadi vah donon hi use abhivyakt n kar pane ke karan pushpit evan pallavit nahin ho to prem ki mahak nahin fail paegi. iske lie ek dusre se ijhar karne ka sahas bhi hona atyant avashyak hai aur yah sahas mangal pradan karta hai. atah prem ki prapti men mangal ka bali hona bhi atyant avashyak hai.
prem ke karak bhav: grahon ke bad hamen kundali ke antargat prem sambandh ko pradarshit evan vardhit karne vale bhavon par drishtipat karna chahie. vaise to janmang ke andar dvadash bhavon men kisi n kisi rup men apsi sambandh avashya hota hai, parantu kisi bhi prashn par drishtipat karne se purva us prashn se sambandhit bhavon par vishesh drishtipat kiya jata hai. isi prakar prem ko pradarshit evan vardhit karne men lagn, pancham evan saptam bhavon ka vishesh yogdan hai. lagn janmang ke antargat sharir ko pradarshit karta hai chanuki sabhi kriyaen sharir evan mastishk se sambandhit hoti hain.
sath hi lagn vyakti ki mansikta ko bhi pradarshit karta hai, islie lagn ka bali hona atyant avashyak hai. yadi lagn nirbal hoga, to vyakti ki bhavnaon evan unse juri mansikta men sudrirhta nahin a paegi jiski vajah se premi hriday ko anek vighn badhaon ka samna bhi karna par sakta hai. chaturth bhav hriday ka mana gaya hai. chunki hriday se hi hamare man ki samast bhavnaen juri hoti hain, atah hriday ki un samast bhavnaon ki prapti chaturth se dvitiya arthat pancham bhav ko mana gaya hai. pancham bhav ko maitri ka bhav bhi svikar kiya gaya hai. do dilon men premalap ke lie sarvapratham maitri ka hona atyant avashyak hai. yahi maitri jatak ko prem nauka par charhne men sahayta pradan karti hai.
yadi pancham bhav shubh prabhav men hai to vyakti ke antarik man men un prematmak bhavnaon ka prasaran sahaj hi ho jaega. saptam bhav kalatra athva viprit ling ka suchak hai. viprit paksh ke prati prem ki uddam lahron ko yahi apne andar antarnihit karta hai, atah saptam bhav pancham bhav ke pratikul ke rup men svayan ko pradarshit karta hai. katipay vidvanon ke mat men tritiya bhav, navam bhav, ekadash bhav ko sammilit kiya jata hai.
matanusar tritiya bhav parakram ka hai aur prem ka ijhar karne men vicharon evan ichchashakti ki sudrirhta ki avashyakta hoti hai aur in vicharon ko pradarshit evan abhivyakt karne ke lie sahas ki avashyakta hoti hai. yadi yah bhav bali nahin hoga to vyakti prem ka ijhar nahin kar payega aur uska prem man hi man apna dam tor dega. atah prem ko abhivyakti ka rup dene men parakram bhav, parakramesh evan parakram karak grah ka vishesh yogdan hai. isi prakar ekadash bhav ichchashakti ka hota hai. prem hoga athva nahin: premi hriday ke man men sarvapratham yahi prashn samupasthit hota hai ki uska kisi se prem sambandh sthapit hoga athva nahin. nimnalikhit katipay siddhanton ke dvara ham yah kah sakte hain ki:
1. yadi panchmesh evan saptamesh men paraspar drishti sambandh, yuti sambandh evan sthan parivartan sambandh ho to prem sambandh avashya hoga.
2. yadi chaturth bhav men shukra sthit ho to jatak viprit ling ki taraf atyadh iak akarshit hoga.
3. yadi lagn bhav men shukra sthit ho to jatak ka prem sambandh sthapit hoga.
4. yadi sarvashtakavarg men pancham bhav aur shukra se yut rashi ko 30 se adhik rekhaen prapt ho to jatak ke prem sambandh hone ki sambhavna adhik hoti hai.
5. yadi shukra-mangal evan chandra-shukra ki yuti ho to jatak ka prem sambandh sthapit hoga. lagn athva saptam bhav men chandrama sthit ho, athva saptamesh se chandrama yuti karte hue pancham, navam athva ekadash bhav men sthit ho, to prem sambandh sthapit hoga.
kundli 1: uprokt kundali dhanadhyavarg ke ek vyakti ki hai. iska ek sath hi parhne vali sundar larki se prem sambandh sthapit ho gaya. iski kundali men-
1. lagn kundali men saptamesh guru chaturth bhav men svarashi men sthit hai tatha panchmesh shani ki bhi tritiya drishti guru par par rahi hai.
2. panchmesh bhav men man ka karak chandrama sthit hai.
3. nirayan bhav chalit men panchmesh shani dvitiya bhav men shukra ki rashi tula men sthit hai jo ki chaturth bhav men panchmesh guru se yuti bhi kar raha hai.
4. nirayan bhav chalit men bhi panchmesh, saptamesh evan shukra ka sambandh ban raha hai. sath hi pancham bhav men chandra mangal ki yuti ne jatak ka sundar kanya ke sath prem sthapit kiya.
prem sambandh kab sthapit hoga ?:
vaise dekha jae to prem karne ki koi umra nahin hoti, n hi sima hoti hai. kaha bhi gaya hai ki pyar kiya nahin jata, ho jata hai tatha yah kisi bhi ayuvarg men aur kisi bhi ayuvarg ke sath ho sakta hai. jyotishiya drishti se nimnalikhit paristhitiyon men prem sambandh sthapit ho sakte hain:
1. janmakalin samay se gochravdhi men apne-apne bhinnashtak vargon men saptamesh evan panchmesh 5 ya 5 se adhik rekhaon par ho, tab prem sambandh sthapit hone ki sambhavna hoti hai.
2. shastron men kaha gaya hai ki saptamesh evan shukra ki dasha men jatak ko viprit ling ke prati adhik akarshan utpann hota hai. yadi saptamesh ki mahadsha, antardasha, pratyantardasha men panchmesh athva mangal ki dasha chal rahi ho, to jatak ke prem sambandh sthapit hone ki sambhavna ho sakti hai.
3. lagnesh ki mahadsha men panchmesh athva saptamesh ki antardasha ho, to jatak ka prem sambandh sthapit ho sakta hai.
4. ekadshesh ki dasha-antardasha ho, shukra ki antardasha ho evan ekadshesh mitra rashi men sthapit ho to jatak ko prem sambandh sthapit hone ki sambhavna hoti hai.
kundli 2: jatika ne intrnet evan fon par prem sambandh sthapit kiya jo ki shighra hi parvan charh gaya. shveta ki kundali men:
1. saptamesh shukra evan lagnesh mangal lagn bhav men yuti kar rahe hain.
2. chalit kundali men mangal evan shani ke sath panchmesh surya ki bhi yuti ho gayi hai.
3. saptamesh shukra jo ki dvitiyesh bhi hai, vahan budh jo ki sanchar madhyam ka sadhan hai ke sath yuti ho rahi hai. jiske karan jatika ka intrnet evan fon par pyar hua.
4. shveta ka prem sambandh jun 2007 men shuru hua jo ki ketu men shani ki antardasha ke dauran hua.shni pancham bhav men rahu se yuti kar raha hai tatha ketu ki pancham par purn drishti bhi ho rahi hai. tadanantar ketu men shani men budh ki pratyantardasha men shveta ka prem sambandh parvan charha. shukra panchmesh surya ke sath saptamesh shukra ki hi vrishabh rashi men yuti kar raha hai. is prakar pancham men sthit shani grah evan panchmesh surya ke sath budh ki pratyantardasha tatha bad men shukra ki dasha ne prem ko charam sima par pahuncha diya.
5. pancham bhav ka upanakshatra bhi ketu hai, jiski mahadsha chal rahi thi. prem kahan, kis jagah par hoga ?: agrim prashn jatak ke man men rahta hai ki yah prem sambandh rishtedari men hoga, mitravarg men hoga athva shikshan sansthan men hoga athva kisi anya jagah par hoga.
iske pratyuttar men nimnalikhit paristhitiyan ho sakti hain:
1. yadi panchmesh athva saptamesh ka sambandh dvitiya bhav se ho raha ho to jatak ka sambandh apne nikatasth kautumbik athva rishtedari men hota hai.
2. yadi saptamesh evan panchmesh ka sambandh ho athva saptamesh pancham bhav men ho to sahpathi athva mitra varg men prem sambandh sthapit hota hai.
3. yadi saptamesh athva panchmesh ka sambandh ho, budh bali ho tatha vah bhi in bhavon se sambandh banae, to adhunik sanchar ke madhyamon arthat intaranet, fon adi se prem sambandh sthapit hota hai.
4. yadi saptamesh evan panchmesh ka ashtam evan navam bhav se bhi sambandh bane, to yatra ke dauran prem sambandh sthapit hota hai.
5. yadi panchmesh evan saptamesh ka sambandh shashth evan dasham bhav se ho to sahakarmi se prem sambandh sthapit hone ki sambhavna hai.
6. yadi panchmesh evan saptamesh ka sambandh ekadash bhav se ho, to jatak ka prem sambandh bare bhai athva bahan ke madhyam se ho sakta hai.
kundli 3: uprokt men, is jatak ne apni chachi ki bhatiji se prem sambandh sthapit kiya jo ki vivah sambandh men bhi parivartit ho gaya aur vartaman men jatak sukhamay jivan vyatit kar raha hai. prem sambandh janvri, 1997 men prarambh hua tatha 26 farvri 2000 ko vivah sutra men parivartit ho gaya.
1. lagn kundali men saptamesh mangal pancham bhav men sthit hai.
2. chalit kundali men bhi mangal pancham bhav men hai, sath hi lagnesh prem ka karak shukra panchamasth ho gaya.
3. prem jab shuru hua, tab rahu men guru ki antardasha chal rahi thi.
4. jatak ka prem sambandh apni chachi ki bhatiji se hua jo ki bare bhai ki larki thi. is rishte ke anusar chachi ka shashth bhav hua tatha unke bare bhai ka shashth se ekadash arthat chaturth bhav hua.
inki beti ka pancham bhav arthat chaturth se pancham bhav arthat ashtam bhav hua. ashtam bhav men guru ki dhanu rashi hone ke karan tritiya bhavasth guru ki saptam par drishti bhi hai, atah guru ki antardasha men jatak ka prem sambandh prarambh hua.