ek tha taigar maharashtra ke betaj badshah shri bala sahab keshav thakre ki mrityu ke pashchat sarkar raj ka surya ast ho gaya. unke jivan ki samiksha karen to ve vastav men sher ki jindgi jie aur jab sansar se kuch kiya to bhi lakhon ki sankhya men ikatthi hui janta ne ‘maharashtra ke taigr’ ko dil se ashrupurn shraddhanjli di. yah bal thakre ji ka joshila andaj hi tha jisne unhen shiv sainikon ka bhagvan bana diya tha. bal thakre ji ka janm 23 janvri 1927 ko pune men hua (kuch jagah ise 1926 dikhaya gaya hai lekin hamare hisab se 1927 hi unke vyaktitva par khara utrta hai). unhonne ar. ke. lakshman ke sath angreji dainik fri pres jarnal men 1950 ke dashak ke ant men kartunist ke taur par apna kariyar shuru kiya aur 1960 men unhonne kartun saptahik ‘marmik’ ki shuruat karke naye raste ki taraf kadam barhaya.
is saptahik men aisi samagri hua karti thi jo ‘marathi manush’ men apni pahchan ke lie sangharsh karne ka jajba bhar deti thi. unke marathi samarthak mantra ki lokapriyata ne hi unhen pure maharashtra ka masiha bana diya. 19 jun 1966 ko thakre ji ne shivsena ki sthapna ki aur marathiyon ki tamam samasyaon ko hal karne ki jimmedari apne sir par le li. unhonne marathiyon ke lie naukri ki suraksha mangi jinhen gujrat aur dakshin bharat ke logon se kari pratispardha ka samna karna par raha tha. bal thakre ji ne maharashtra men marathiyon ki ek aisi sena banai, jinka istemal ve vibhinn kapra milon aur anya audyogik ikaiyon men marathiyon ko naukriyan adi dilane men kiya karte the. unke inhin prayason ne unhen ‘hindu hriday samrat’ bana diya. unhen unke shiv sainik bhagvan ki tarah pujte the aur unke virodhi bhi unke is kad se puri tarah vakif the.
halanki thakre ji ne khud kabhi koi chunav nahin lara parantu shivsena ko ek purn rajnitik dal bana diya aur unke shiv sainik baelivud sahit vibhinn udyogon men majdur sangthnon ko niyantrit karne men lage the. shiv sena ne jald hi apni jadane jama lin aur 1980 ke dashak men marathi samarthak mantra ke sahare brihanmunbai nagar nigam par kabja kar liya. 1995 men bhajpa ke sath gathbandhan kiya aur rajniti men utar kar satta ka svad bhi chakha. logon evan unke rajnitik virodhiyon ka manna tha ki ve rimot kantrol se sarkar chalate the jabki unhonne mukhyamantri ka pad kabhi nahin sanbhala. ve aksar khud bari jimmedari lene ki bajay king mekar banna jyada pasand karte the. kuch logon ke anusar maharashtra ka yah sher apne ap men ek sanskritik adarsh tha. thakre ji apne samarthakon se jyada ghulna milna pasand nahin karte the aur ek duri bana kar apne behad suraksha vale avas ‘matoshri’ ki balkni se avam ko darshan diya karte the.
prasiddh dashhra railiyon men unke joshile bhashan sunne lakhon ki bhir umrti thi. agar apko yad ho to hindi men bani film ‘sarkar’ thakre ji ke jivan par hi adharit thi, amitabh bachchan ji ne unke jivan ka atyant jivant abhinay kiya tha. thakre ji hindu dharm, samaj v rashtra ke kattar samarthak the.unke samarthakon ne kai bar munbai men hindu virodhi filmon ka bahishkar kiya. apne mukhapatra ‘samna’ men apne sampadkiya sanbodhan men ve kafi talkh evan alochnatmak andaj men apne vichar vyakt kiya karte the aur sachin tendulakar, shahrukh khan koi bhi unke nishane se nahin bacha. bal thakre ke bhatije raj thakre ne vaicharik matbhedon ke chalte shivsena se alag hokar maharashtra navnirman sena ka nirman kar liya lekin marathi janmanas inhen bal thakre ke pratimurti aur uttaradhikari ke rup men dekhti haie kyonki inki karyashaili aur bal thakre ki karyashaili men kafi samanta hai.
bal thakre ke putra uddhav thakre vigat kafi varshon se shivsena ka kushlta se netritva kar hi rahe hain, ab dekhna hai ki ye donon bal thakre dvara pradatt virasat ke uttaradhikariyon ke rup men maharashtra ki rajniti ko kya disha pradan karte hain. aiye ab karen bala sahab thakre ji ki janmakundli ka vishleshn: bala sahab thakre ji ki janm kundli men anek mahatvapurn grah yog vidyaman hain jinke prabhav se ye apne jivnkal men antim sans tak ek yoddha ki bhanti jie. ruchak yog - inki janmakundli men mangal ke svagrihi hokar kendra men hone se ruchak yog ban raha hai. is yog ke prabhav se inka vyaktitva prabhavshali, adamya sahas, uchch parakram, sfurti v nirbhayata se paripurn tha tatha apne dharm ke prati kattar bhavnaen bhi kut-kut kar bhari thin. inke andar uchch koti ki sangthnatmak shaktiyan thin. adhiyog - chandrama se chathe bhav men shubh grah ke hone se yah yog banta hai.
inki kundli men chandrama se chathe bhav men brihaspati ke hone se adhiyog ban raha hai. is yog ke karan thakre ji uchch man, pratishtha ke sath shivsena ke senanayak bane. is yog ke prabhav se unke andar netritva kshamata ke vishesh gun bhi vidyaman the. shivsainik unki pratyek agya ka palan ek raja ki agya ki bhanti karte the. veshi yog: surya se dvitiya bhav men grah hone se veshi yog banta hai. inki kundli men surya se dvitiya bhav men brihaspati grah hone se yah yog ban raha hai. is yog ke shubh prabhav se ve spashtavakta evan satyavadi pravritti ke vyakti the jiske karan inhonne jivan men apne siddhanton se kabhi samjhauta nahin kiya aur apni dharmik astha aur hindutva ke prati apne vicharon se kabhi nahin jhuke. uttam yog: surya se chandrama navam bhav men hone se inki kundli men uttam yog ban raha hai. is yog ke prabhav se unke jivan men yash, man-pratishtha, buddhi, kaushal, dhan, vaibhav ki prapti hui.
inke antim samay men mrityu ke pashchat bhi lakhon karoron log inke antim darshanon ke lie shivaji park pahunche. kalanidhi yog: janmakundli men dvitiya athva pancham bhav men yadi guru ho tatha budh, shukra se yut ya drisht ho to yah yog banta hai. inki janmapatrika men brihaspati dvitiya bhav men sthit hai tatha budh aur shukra kundli men ek sath hone se kalanidhi yog ban raha hai. is yog ke shubh prabhav se ve ek uttam kartunist, kalavid tatha lekhak the aur isi yog ke karan film ki jani mani hastiyon se inke achche sanbandh the tatha puri film indastri men thakre ji ka achcha khasa dabdba tha. in yogon ke atirikt thakre ji ki kundli men lagnesh shani labh bhav men, chandrama bhagya sthan men tatha lagn men yogkarak do shubh grah shukra tatha budh hone se evan lagn par lagnesh ki drishti hone se inko dirgh ayu prapt hui.
dharm sthan ka svami navmesh budh, karmesh shukra evan krur grah ashtamesh surya ki yuti lagn men hone se inmen dharmik kattarata ka gun vishesh rup se vidyaman tha. inke lie inhonne jivan men kathor nirnay lene men bhi hichkichahat mahsus nahin ki. lagn men surya, budh, shukra ki yuti tatha dvitiya bhav men guru ki sthiti ke prabhav se thakre sahab prabhavshali v akarshak vyaktitva ke dhani, kushal vakta tatha hasya v vyangya se yukt kushal patrakar the. navam bhav men chandrama ki sthiti v bhagyesh ke lagnasth hone ke karan marathi logon ke bharan poshan v hindutva ki raksha ka bira uthakar masiha ban gae aur maharashtra men visheshrup se lokapriya hue.
kundli men chathe ghar men rahu ki sthiti lagn men surya, budh aur shukra ka uttam yog, janta men lokapriyata ke chaturth bhav men ruchak yog tatha navam bhav men prabal shatruhanta yog banane vale v uchch koti ki pratishtha dilane vale chandrama ki shreshth sthiti tatha dvitiya bhav men guru ke karan inhonne apni bebaki v apne mukhapatra samna men apni nirbhik tippaniyon ke prabhav se rashtriya rajniti men vishesh sammanit darja hasil kiya. vartaman samay men inki budh ki mahadsha men brihaspati ki antardasha chal rahi thi. brihaspati grah is lagn ke lie akarak hai tatha ashtam se ashtam sthan ka svami hokar marak bhav men sthit hai. gochar men shani ki sarhesati chal rahi hai evan lagnesh shani ke upar ashubh grah rahu ka gochar bhi chal raha hai. in sabhi grahon, gochar v dashaon ke chalte is mahan vyaktitva ki jivan yatra purn hui.