pratyek samaj men vivah ke riti rivaj samaj ke pratishthit vyaktiyon ki upasthiti men dharmaguruon dvara sanpadit kiye jate rahe hain, isliye yah karya, alikhit hote huye bhi, sthayi mane jate rahe hain. lekin shayad ab, aj ke samay men, uski avashyakta nahin rah gayi hai ya nahin samjhi jati hai.
falasvarup ye sanbandh asthayi aur vivadaspad bante ja rahe hain. dharm shastron ne srishti vistar ke is karya (vivah) ko itna sthir, janm janmantar tak chalne vala aur anivarya bataya hai ki samaj har surat men ise anivarya hi manta aya hai.
parantu kya aj bhi is sanskar ka palan hota hai? shayad nahin. pashchatya sabhyata srishti vistar ke liye vivah ke bandhan ko anivarya nahin manti hai, unmukt ho kar stri v purush ka bina vivah kiye ek sath grihasth vyaktiyon ki tarah se rahna v jivnyapan karna dharmashastron ko chunauti dete pratit hote hain. yahi karan hai ki aj ke daur men stri-purush ke bich algav v shoshan ki ghatnaon ki vriddhi hoti ja rahi hai.