ras lila- krishn raslila ka nam ate hi shri krishn bhagvan ji ki lilaon ka chitran antar hriday patal par ubhar ata hai. krishn ka nachna, gana, bajana, ghumna, hansna, muskurana sab varnan jisne jitna parha ya jana hai sab ankhon ke samne a jata hai. kya kabhi socha hai ki unhonne aisi lila kyon ki ? kya shri krishn hamesha nachte gate rahte the? nahin - aisa nahin hai ki shri krishn hamesha nachte gate rahte the- yah to unke jivan ka bas ek hissa tha. bhagvan shri krishn ne 16 sal tak ras lila ki jiska udeshya manav jivan men ise ek mahatvapurn sthan dena tha kyonki yahi ras lila pure jivan ko prabhavit kar jivan ko rasamay bana deti hai. iska sidha arth yah hai ki ap apne jivan ki prakriya ko hi nritya bana len. yogik paranpra men srishti ko hamesha urja ya panch bhuton ke nritya ke rup men darshaya gaya hai.
aj vaigyanik bhi ek tarah se urja ka nritya ke rup men varnan karte hain. isi tarah srijan ek nritya hai aur pralay bhi ek nritya hai. yah ek vaigyanik tathya hai ki srishti men sab kuch urja ka nritya hai. yah nritya anandamay hoga ya kasht dega ye ap par nirbhar karta hai, kyonki ap men apne vivek ka istemal karke khud ko anandamay ya dukhi banane ki kshamata hai. lekin urja ka khel har samay chalta rahta hai. krishn lila hamen yahi sikhati hai - har pal jagrukta ke sath jivant hona n ki vivshta ke sath. jab paristhitiyan apko bebas kar deti hain, tab jivant hona bahut mushkil ho jata hai, ap nistej ya sust ho jate hain. agar ap bhi jivan ke sath nritya karenge to paristhitiyan ap ke vash men hongi. agar apko lagta hai ki jivan ko apna nritya badal dena chahie, to ap is prakriya men khud ko mar denge kyonki jab bhi ap nistej ho jate hain ap anjane men maut ko amantran de rahe hote hain.
ap jab-jab jivan ki paristhitiyon ya dikkaton se bhagenge dhire-dhire nistej ho kar mrityu ko bulava dete hain kyonki mrityu usi pal nahin ati, vo thora-thora karke kishton men ati hai, to jab-jab ap jivan se bachna chahenge-dhire-dhire apke sath mrityu ghatit hogi. jyadatar log javani men vastav men jivant the, lekin kuchek logon ko chorakar, umra barhne par unmen pahle jaisi jivantta nahin rahti jabki ve kamyab hote hain aur apna jivan paise, parivar aur bachchon ke sath achchi tarah se ji rahe hote hain, par dhire-dhire ras rahit, gati rahit ho jate hain. lila ka lakshya yahi hai ki ap har din ke 24 ghante jivant bane rahen. ap is bat ka chayan n karen ki kya achcha hai aur kya achcha nahin hai ya fir iska ki kisi chij men bhagidari karen ya n karen.
agar ap kuch samay tak aise rahen to ap mrityu ko dur bhaga denge aur jivan ko urjavan bana lenge. jivan urja ka nritya hai. agar ap khud ko jagrukta se aisa karne denge to ap bhi jivan ke sath nritya karenge. ye raslila hamare jivan ka ek hissa bhi ban sakti hai agar ap chahen . jivan to vaise hi nritya to kar hi raha hai. kuch chijen apki marji se ho rahi hain kuch nahin. par yah mahatvapurn nahin hai. mahatvapurn yah hai ki ap jivit hain aur ap jivan ke nritya ka anand le rahe hain. yahi jivan ki ras lila hai yahi jivan hai yahi shri krishn ki ras lila hai. nirantar anand ki gati men raho, har samay jivan ki ras lila ka anand lo.