kasht hi nahin sukh-samriddhi bhi deta hai kalasarp yog gautam patel, sitesh kumar panchaili, rima arora rahu aur ketu ko is nabh mandal ke do binduon ki sangya di gai hai. dusre shabdon men rahu aur ketu ki dhuri par hi sanpurn nabh mandal bhraman kar raha hai. yadi janmank men rahu aur ketu ko bindu manakar rahu se ketu tak ya fir ketu se rahu tak ek sidhi rekha khinchne se sare grah is rekha ke kisi bhi ek or a jaen to is grah sthiti ko kal sarp yog mana gaya hai. parivartan arthat kal chakra ki gati ke anusar utthan-patan ya fir utar-charhav prakriti ka niyam hai. yadyapi vartaman men prachlit manyata yah hai ki kalasarp yog ek atyant sankat janak, kalah karak, anishtakari, kashtakar aur dukhdayi yog hai, tathapi yah ek atyant kalyankari, yash, kirti, shri sanpannata, samriddhi aur prasiddhidayak yog bhi hai. vaise to kalasarp yog se grast jatak ka jivan chakra kolhu ke bail ki bhanti ghumta rahta hai, lekin fir bhi vah itihas ke pannon par apna nam svarnaksharon men ankit karta rahta hai. aisa jatak gagnchunbi, unchai ko bhi chumta hai aur gahan gart men bhi dubta hai. bhav ke anusar 12 aur lagn ke anusar 12 arthat 12 g 12 = 144, arthat udit golarddh ke bhed ke anusar 144 aur anudit golarddh ke bhed ke anusar 144 g 2 = 288 prakar ke kal sarp yog hote hain. jab kalasarp yog rahu se lekar ketu tak banta hai tab vah udit golarddh kahlata hai aur jab ketu se lekar rahu tak banta hai tab anudit golarddh kahlata hai. iske atirikt jab koi ek grah inki pakar se bahar niklne men safal ho jata hai tab 288 g 7 = 2016 prakar ke anshik kalasarp yog ban jate hain. chunki kul 2016 prakar ke kalasarp yog aur anshik kalasarp yog sanbandhi vyaktigat udaharan prastut karna lagabhag asanbhav hai, islie keval bhav ke anusar rahu se ketu tak athva ketu se rahu tak matra 12 prakar ke kalasarp yogon ka vyaktigat udaharan sahit varnan agrankit hai . anant kalasarp yog yadi pratham bhav men rahu, saptam bhav men ketu aur shesh sabhi grah rahu-ketu ke ek or sthit hon to is grah sthiti ko anant kal sarp yog kahte hanai. svatantra bharat ki janm kundli men pratham se saptam bhav tak bana anant kal sarp yog vidyaman hai. tadnusar rahu pratham sharir tatha mastishk bhav men sthit hokar pancham santan bhav, saptam vyapar vyavsay-udyog tatha pati-patni athva viprit ling bhav aur navam dharm bhav ko purn drishti se dekh raha hai. faltah bharat ko rajnitik daliya samasyaon se jujhna para raha hai. adhikadhik jansankhya vriddhi, vyaparik, vyavsayik athva audyogik ghotale tatha balatkar aur dharmik unmad sursa ke munh ke saman failte hi ja rahe hain. is prakar bharat ko nirantar sangharsh karna par raha hai. kulik kalasarp yog yadi dvitiya bhav men rahu, ashtam bhav men ketu aur shesh sabhi grah rahu-ketu ya ketu-rahu ke ek or sthit hon to is grah sthiti ko kulik kal sarp yog kaha jata hai. svargiya rajesh pailat ka janm ek garib ghar men hua. jivan men sangharsh karte hue unhonne vayusena ki pratiyogita pariksha uttirn ki aur pailat jaisa uchch koti ka pad grahan kiya, jiske lie tvarit aur thos nirnay lene ki kshamata nitant avashyak hai. nirbal mansik shakti ka vyakti kabhi bhi aise pad hetu upyukt nahin hota. unki kundli men mithun rashisth kalasarp uchch mansik star aur paripakvata ka dyotak hai. jivan men kuch naya kar dikhane ki abhilasha, umang aur utsah ka hi parinam hai ki unhonne rajniti men utar kar kendriya mantri ka pad bhi prapt kiya aur unhen lokapriyata bhi mili, lekin ashtam ka ketu durghatana dvara asamay maut ka karan bana. vasuki kalasarp yog yadi tritiya bhav men rahu, navam bhav men ketu aur shesh sabhi grah rahu-ketu ke ek or sthit hon to is grah sthiti ko vasuki kalasarp yog kaha jata hai. dhirubhai anbani ki janm kundli men tritiya bhav se navam bhav tak bana vasuki kalasarp yog vidyaman hai. tadnusar rahu tritiya parakram bhav men sthit hokar saptam sathi bhav, navam bhagya bhav aur ekadash labh bhav ko purn drishti se dekh raha hai. rahu ke parakram sthan men hone ke karan ve puri jindgi sangharsh karte rahe. shankhpal kalasarp yog yadi chaturth bhav men rahu, dasham bhav men ketu aur shesh sabhi grah rahu-ketu ya ketu-rahu ke ek or sthit hon to is grah sthiti ko shankhpal kal sarp yog kaha jata hai. sachin ki kundli men bhi shankhpal kal sarp yog vidyaman hai. iske karan unhen khyati to prapt hui, lekin anek bar chot lagne ke karan purn pratibha pradarshan nahin kar pae, nitya nae nae kirtiman sthapit karne ke bavjud kaptan ki pari lanbe samay tak nahin chala pae. padm kalasarp yog yadi pancham bhav men rahu, ekadash bhav men ketu aur shesh sabhi grah rahu-ketu ke ek or sthit hon to is grah sthiti ko padm kalasarp yog kaha jata hai. shri nelsan mandela ki kundli men padm kalasarp yog vidyaman hai jiske karan unhonne apni buddhi ka prayog kar dakshin afrika men sarvochch sthan prapt kiya, lekin isi dosh ke karan unhen anek bar jel yatra karni pari evan anek prakar ke kasht sahne pare. mahapadm kalasarp yog yadi shashtham bhav men rahu, dvadash bhav men ketu aur shesh sabhi grah rahu-ketu ke ek or sthit hon to is grah sthiti ko mahapadm kalasarp yog kaha jata hai. vishva prasiddh vidvan pan. suryanarayan vyas ki janm kundli men shashth se dvadash bhav tak mahapadm kalasarp yog vidyaman hai. tadnusar rahu shashtham pratispardha bhav men sthit hokar dasham karm bhav, dvadash vyay bhav aur dvitiya uchch shiksha bhav ko purn drishti se dekh raha hai. faltah ve ujjain jaise chote se nagar men vikram vishvavidyalay, vikram kirti mandir, sindhiya prachya vidya shodh pratishthan aur kalidas akadmi jaisi mahan sansthaon ka nirman kar sake. padm vibhushan, sahitya vachaspati aur di. lit. jaisi upadhiyon se sammanit, anek granthon ke rachyita pan. vyas vikram jaise yashasvi patra ke sanpadak bhi rahe. isi yog ne unhen svadhinta andolan ka prakhar krantikari banaya. sare sansar men pujya pan. vyas apne kutunb, parivar, bandhujnon aur nagar men prayah upekshit hi rahe. takshak kalasarp yog yadi saptam bhav men rahu, pratham bhav men ketu aur shesh sabhi grah rahu-ketu ya ketu-rahu ke ek or sthit hon to is grah sthiti ko ‘takshak kal sarp yog’ kaha gaya hai. samrat akabar ki janm kundli men pratham se saptam bhav tak takshak kalasarp yog vidyaman hai. tadnusar rahu saptam uttaradhikari bhav men sthit hokar ekadash labh bhav, pratham sharir bhav aur tritiya parakram bhav ko purn drishti se dekh raha hai. faltah din-e-ilahi dharm ke pravartak yashasvi samrat akabar mahan ka balyakal vaibhvhin tatha sangharshamay vyatit hua. yadyapi ve apne parijnon tatha parivarjnon ki or se udvign rahte the. putra salim (jahangir) aur rajput patni jodhabai se unke matbhed sarvavidit hain fir bhi ve chakravarti samrat akabar mahan ki upadhi se vibhushit hue. karkotak kalasarp yog yadi ashtam bhav men rahu, dvitiya bhav men ketu aur shesh sabhi grah rahu-ketu ya ketu-rahu ke ek or sthit hon to is grah sthiti ko karkotak kal sarp yog kaha jata hai. prasiddh abhinetri smita patil ki janm kundli men dvitiya se ashtam bhav tak karkotak kalasarp yog vidyaman hai. tadnusar rahu ashtam mrityu bhav men sthit hokar dvadash vyay bhav, dvitiya kutunb bhav aur chaturth bhautik sukh bhav ko purn drishti se dekh raha hai. faltah smita patil ko saikron upalabdhiyon ke sath khyati to mili, sitaron ke sansar men sthapit bhi huin, kintu unhen sharirik sukh, kautanubik tatha parivarik sukh, dampatya sukh, ya bhautik sukh kisi bhi sthiti men nahin mil paya. itna hi nahin unki mrityu bhi asamay hui. vah alpayu men achanak chal basin. shankhchur kalasarp yog yadi navam bhav men rahu, tritiya bhav men ketu aur shesh sabhi grah rahu-ketu ke ek or sthit hon to is grah sthiti ko shankhnad ya shankhchur kal sarp yog kaha jata hai. shri ram kathakar shri murari bapu ki janm kundli men navam se tritiya bhav tak shankhnad ya shankhchur kal sarp yog vidyaman hai. tadnusar rahu navam dharm bhav men sthit hokar lagn sharir, tritiya parakram aur pancham vidya, buddhi aur vivek bhav ko purn drishti se dekh raha hai. faltah vartaman men shri murari bapu lokapriya evan apekshakrit sarvadhik vyast shri ram kathakar hain. aj ve ganv-ganv, nagr-nagar aur desh-videsh men lok kalyankari, manvtavadi shri ram ka sandesh pahuncha rahe hain. grihasthashrami hote hue bhi unka sanpurn jivan parmarth ke lie hi samarpit hai. yahan yah ullekhniya hai ki papi grah bhi trikon men sthit hone se punya fal pradan karte hain. ghatk/patak kalasarp yog yadi dasham bhav men rahu, chaturth bhav men ketu aur shesh sabhi grah rahu-ketu ke ek or sthit hon to is grah sthiti ko ghatak ya patak kalasarp yog kaha jata hai. shrimti maragret thaichar briten ki pratham nirvachit mahila pradhanmantri thin. unki janm kundli men kalasarp yog hote hue bhi anya raj yogon ki vajah se ve do bar lagatar briten ki pradhanmantri banin. is janm kundli men chaturthesh aur panchmesh shani lagn men hai. navmesh budh bhi lagn men hai. dasham bhav ka svami chandrama ekadash bhav men sthit hai tatha us par guru ki drishti hai. shash yog bhi ban raha hai. dasham bhav men sthit rahu bhi yogkarak shani ki drishti pa raha hai. is grah sthiti ke karan ve pradhanmantri banne men safal huin aur kalasarp yog unke lie badhak nahin ban saka. vishadhar kalasarp yog yadi ekadash bhav men rahu, pancham bhav men ketu aur shesh sabhi grah rahu-ketu ke ek or sthit hon to is grah sthiti ko vishakt ya vishadhar kalasarp yog kaha jata hai. shri narayan datt tivari ki janm kundli men ekadash se pancham bhav tak vishakt ya vishadhar kalasarp yog vidyaman hai. tadnusar rahu ekadash labh bhav men sthit hokar tritiya parakram bhav, pancham vidya, buddhi aur vivek bhav aur saptam sahyogi bhav ko purn drishti se dekh raha hai. faltah shri tivari ke jivan men nirantar pad parivartan hote rahe hain. ve uttar pradesh ke mukhya mantri rahe, vidhan sabha men vipaksh ke neta rahe, kendriya mantri rahe, parti ke bhi mahatvapurn padon par padasth rahe. unhen sadaiv rajnitik sankat ka samna karna para hai. sheshnag kalasarp yog yadi dvadash bhav men rahu, shashtham bhav men ketu aur shesh sabhi grah rahu-ketu ya ketu-rahu ke ek or sthit hon to is grah sthiti ko shesh nag kalasarp yog kaha jata hai. pan. javahar lal nehru ki kundli men spasht sheshnag kal sarp yog hai kyonki pratyek bhav men grah upasthit hai. surya dvitiyesh hokar pancham bhav men krurta de raha hai. chandrama lagnesh hokar svagrihi hai panrtu papakrant hai. spashtatah chandra rahu aur shani ke madhya hai tatha dashmesh mangal dasham se shashth hai. budh dvadash aur tritiya bhavon ka svami hokar chaturth bhav men labhesh shukra se yuti kar raha hai. shukra yadyapi svagrihi hai par labh bhav se shadashtak hai. saptamesh shani ashtam hokar saptam bhav se shadashtak yog bana raha hai tatha sukh bhav par uski drishti hai. is sthiti ke karan unka sanpurn jivan sangharshamay raha tatha unhen putra santan ka abhav raha. patni ka sath bhi lanbe samay tak nahin raha, vahin damad ki mrityu ka dukh jhelna para. anek bar jel gae. chin ke hamle ko sahan nahin kar sake aur mrityu asamay hui. samasya: yadyapi kalasarp yog dhari jatkon ko uchchatam upalabdhiyan prapt hui hain tathapi kisi bhi vyakti ne is yog ko shreshth nahin mana hai. sabhi ne ise umrta-ghumrta kala badal, sundar shabdon men kahen to saghan krishn meghmala aur ek shabd men kahen to kali ghata hi kaha hai. kal, karal, klesh, kasht, pira, vyatha, vedna, chot, ghat, sanghat, tap, santap, paritap, pashchatap, manastap, hras, hani, kshati, vipatti, ashanti, yantrana, yatna, durghatana, prakop, viplav, vidroh, upadrav, uthl-puthal aur umr-ghumar hi kaha hai. samanyatah yah mana jata hai ki kalasarp yog dhari jatak ko jivan bhar sangharshon ka samna karna parta hai. ek gaya to dusra aur dusra gaya to tisra, inke jivan men sada sankton ka tanta laga rahta hai. inhen bhanti-bhanti ki prakritik vipdaen aur daivi prakop jhelne parte hain. inmen sharirik aur mansik durbalata ke karan nirasha ki bhavna jagrat hoti hai. kutunbiyon dvara inka vyarth virodh hota hai. jatak sadaiv dhan ke lie tarste rahte hain. inhen parakram aur yuktiyukt prayas karne par bhi saflta nahin milti. vidyarjan men badhaen upasthit hoti hain. inke kandhon par rin ka bhari bojh bana rahta hai. mitra vishvasghat karte hain. svasthya sanbandhi vikar utpann hote rahte hain. kes mukdmon ke makar jal men jakar jate hain aur kabhi-kabhi to inhen bandigrih bhi jana parta hai. inka vivah vilanb se hota hai. santan sukh prapt nahin hota aur yadi prapt ho bhi jae to dampatya jivan men katuta utpann ho jati hai aur kabhi-kabhi to sanbandh vichched tak ho jata hai. inki mrityu asamyik hoti hai, jivan bhar bhogna parta hai. maran tulya kasht tatha choti-moti durghatanaen hoti hi rahti hain. bhagya inse ruth jata hai. yathayogya kam upalabdh nahin hota. kam mila to usmen anekanek archnen upasthit ho jati hain. apekshakrit kam labharjan hota hai. bhinna-bhinn vishyantargat inka vyay adhikadhik hota rahta hai. is prakar inka jivan vibhinn trasdiyon se ghira rahta hai. faltah inke lie apna jivan nirvah karna atyant kathin ho jata hai. ye apne jivit sharir ka bojh dhote-dhote lagabhag purnatah thak jate hain. ye sabhi sthitiyan sab par lagu nahin hoti, par rahu-ketu ki sthiti ko dekhte hue uparyukt tathyon men se ek ya do tathya avashya satya hote hain. in kashton ke nivaran ke lie kalasarp dosh ki shanti karana avashyak ho jata hai. kalasarp dosh ki shanti ke pashchat upalabdhiyan to prapt hoti hi hain, lekin sangharshamay jivan ke kasht shantipurvak kat jate hain.