shakun shastra men kak tantra vichar  

shakun shastra men kak-tantra vichar rajiv ranjan kaua ek sarvasulabh pakshi hone ke sath-sath nyayadhish ke rup men pratishthit shanigrah ka vahan bhi mana gaya hai, islie isse sanbandhit shakun vishvasniya aur tatkal prabhavi hote hain. aiye janen uski vividh kriyaon ke pratifal kauon ke prakar: shakunshastra ke anusar kauon ki panch prajatiyan mani gai hain- brahman, kshatriya, vaishya, shudra tatha antyaj. 1. brahman kak - jis kaue ka sharir lanba v bhari, lanbi chonch, lanba mukh, ganbhir shabd aur atyant shyamavarn hota hai, vah brahman kak kaha jata hai. 2. kshatriya kak: pile netra, nila mukh, shyam tatha shvet varn mishrit, rukha shabd bolne vala, atyant shur kak, kshatriya kak kaha jata hai. 3. vaishya kak: aisa kaua kuch shvet nilavarn yukt, shvet-shyam chonch vala, atyant rukhe shabd se hin hota hai. 4. shudra kak: yah kaua rakh arthat bhasm jaise rangvala, bahut karkash shabd yukt, krishang, chapal aur atyadhik rukha hota hai. 5. antyaj kak: rukhe sharir aur sukshm mukh vala, niahshank, lanbe kandhe, sthir mukh aur shabd vala aur sthir buddhi kak antyaj kaha jata hai. kak-shakun men mukhya rup se brahman kak ke alava shyam kanth vale kak ka bhi shakun grahan kiya ja sakta hai. shvet kak se sanbandhit shakun nishfal mane gae hain. kaue se sanbandhit shakun: yatra ke samay yadi kaua madhurvani bolta hua dahini taraf se nikle aur usi taraf se urta hua nikal jae to sarvarth siddhiprad hota hai. yatra ke lie niklte samay yadi kaua samne a jae to us samay yatra ke lie nahin nikle anyatha karyasiddhi nahin hoti hai. marg men jate samay yadi kak toran par baitha ho to bhi manovanchit siddhi milti hai. kaua yadi bhumi ko torta ya khodta hua dikhe to bhari labh hota hai. kantovale vriksh par baithakar bar-bar bolnevala kaua kleshaprad mana gaya hai, atah yatra se bachna chahie. yadi pani se bhare ghare par charhakar mridu svar men kaua bole to dhan v uttam bhojan ki prapti tatha premi ka sanyog hota hai. marg men yatra ke samay mastak par kaua bit kar de to kasht aur rog hota hai. kaua yadi apne chonch men vastra ka tukra lekar urta dikhe to labh hota hai. suryoday ke samay yadi kauane ka samuh ek sath dikhe to labh hota hai. suryoday ke samay yadi kauon ka samuh ek sath dikhe to us kshetra men kashtaprad ghatnaen hoti hain. yahi ghatna dopahar men ho to bhi kashtakarak hota hai. sayankal men ya suryast ke samay kauon ka samuh a jae to raja athva choron se bhay hota hai. suryoday ke samay ghar ke samne kaue ka bolna samman, pratishtha tatha dhan men vriddhi karnevala mana gaya hai. kaua yadi sukhe vriksh par baithakar rudan svar kare to us mausam men varsha nahin hoti hai. dhul men snan karta hua kaua yadi jal men dekhakar shabd kare athva jal men snan kar bhumi ko dekhe to bhi achchi varsha hoti hai. yadi ratri kal men kaue ke samuh dhvani karen to us kshetra par bhari vipatti ati hai. ghar ke darvaje par baithakar yadi kaua pankh farfrae to panch din ke andar agni ka upadrav hota hai. mukhya dvar par baithakar madhur avaj men bolnevala kaua shanti aur dhan pradan karne vala hota hai. ghar ke age baithakar, ghar ko dekhta hua yadi kaua krur svar men bole to bhi dhan ki hani hoti hai. kaue ka deh (manav sharir) par baithne sanbandhi shakun kaua yadi ghora, hathi athva purush ke mastak par baithe to unka avashya nash hota hai. dhanadhya ke sir par baithe to dhan ka nash, dahine kandhe par mrityu, baen kandhe par manbhang, pith par baithne se shatru bhay athva bhai ka nash. dahine pair par baithe to mahan kasht hota hai. baen charan par baithta ho to stri tatha putra ka nashak mana gaya hai. kauon ke ghonslon ki sthiti tatha andon adi ki prakriti se sanbandhit kshetra ke bare men bhi jana ja sakta hai. vaishakh mas men yadi kaue ka ghonsla purva disha ki shakha par ho to achchi vrishti, kushlta, harsh, nirogta tatha rashtra ka abhyuday. agnikon men ho to alpavrishti, chorabhay, agnibhay, kalah tatha shatruon dvara deshbhang ka suchak tatha vriksh ki dakshin dali par ho to alpavarsha, himpat, rogane ka prakop, shatruon se yuddh tatha avyavastha ki sthiti banti hai. rnaityakon men bana kaue ka ghonsla andhi, alpavrishti, upadrav, durbhiksh tatha yuddh ka suchak hota hai. pashchim disha men ghonsla ho to samay par varsha, lok men nirogta, kshem, subhiksh, sanpda ki vriddhi tatha manushyon men harsh ke yog bante hain. vayavyakon men sthit kaue ka ghonsla andhi, alpavrishti, chuhon ka upadrav, udveg, pashuon ki hani, ann ka nash tatha mahavirodh ki sthiti banata hai. vriksh ki uttar disha ki shakha par bana ghonsla suvrishti, kshem, subhiksh, saukhya, nirogta, vriddhi tatha samriddhi ka suchak hota hai. ishan kon men bana ghonsla bhi kashtasuchak hota hai. kaue ka ghonsla yadi vriksh ki choti par bana ho to ati varsha. vriksh ke madhya bhag men madhyam varsha ka suchak hota hai. kaue ke ghonsle ka vriksh ke bilkul niche sthit hona alp vrishti ka suchak hai jisse rogon ki vriddhi tatha choron ka upadrav bhi hota hai. utpat shanti: yadi kaue dvara kie gae kisi vyavhar se apshkun ki suchna mili ho to nimnalikhit upay karne chahie. utpat dekhte hi turant hi snan kar len. samathryanusar dan den. us din upvas rakhen tatha ishtadev ki puja archana men vyast rahen. ratri men prithvi par asan bichakar shayan karen aur pratahkal uthakar snanoprant gayatri mantra ka 108 bar jap karen. shakti ke anusar gurujnon ko dan den. brahmacharya ka palan karen. kauon ko dahi, chaval khane ke lie den. shanivar ko visheshrup se havan, dan, vastra dan aur anumat tirth men snanadi karen. kak dvara shubhashubh gyan: ek prayog ashtami tatha chaturdashi tithi ko apne ghar ke samip sthit kisi aise vat vriksh ko chunane jahan kauon ka nivas ho. iska avashya dhyan rakhen ki vah vatvriksh apke ghar se dakshin disha ki or na ho. isi tithi ko sayankal men is vatvriksh ke pas jaen aur us par rahne vale kauon ko nyota den. pratahkal us vriksh ke niche ke sthan ko saf-suthra kar gay ke gobar se lip dena chahie. iske bad chaikor mandal banakar brahma, vishnu aur surya bhagvan ke panchopchar pujan ke bad vriksh ke kauon ka avahn karna chahie. kauon ko dene ke lie ghi, dahi, chaval, gur adi ko milakar ek dher banaen aur in mantron se kauon ke lie yah bali (bhojn) rakh den - un indray namah. un yamay namah . un varunay namah. un dhanday namah . un bhutnathay namah. vayas balijan grihantu men svaha. bali ki samagri ko vahin chorakar a jaen tatha chip kar dekhen ki kaue ne kis disha se bali ko khana praranbh kiya tha. vibhinn dishaon se sanbandhit fal is prakar hote hain. purva-chitt ki shanti aur sukh men vriddhi. agney kon- agni bhay. dakshin- ann tatha dhan ka nash. rnaitya kon- dhan labh. pashchim - ichchit dhan ki prapti vayavya kon - alp vrishti. uttar - sukh, arogya tatha ichchit dhan ki prapti. ishan kon - abhisht labh. charon taraf se kaue ek sath khane lagen to karya ka fal mishrit. yadi bali hetu pradatt pind ko n khae, balki idhr-udhar bikher den to bhayotpadak sthiti hoti hai. kak-shakun se sanbandhit fal kab? vipra kak dvara kie gae shakun ka fal tatkal milta hai. kshatriya kak tin din men fal deta hai. shudra kak das dinon men fal deta hai. antyaj kak pandrah dinon men fal deta hai.