pandit jagdanba prasad gaud akhil bhartiya jyotish sanstha sangh ke kshitij ke ek dedipyaman sitare the. unka yun achanak brahmalin hona n keval aifas balki unke lakhon chahne valon ke lie atyant kshatipurn hai. gaud sahab se hamare sanbandh atyant purane hain. pichle 20 varshon se ye hamare parivar se jude huye the aur bansal sahab se atmik rup se prem karte the. unhin ke mukharbind se sune unke jivan ke kuch ansh unke pathkon ke lie prastut kar rahi hun.
gaud sahab ka janm panjab men sunam men hua tha. unke dada ji pandurga das gaud vahan ke vikhyat jyotishi the aur unka kafi nam tha. lekin unke pita ko jyotish men dilachaspi nahin thi. ve adhat ka vyapar karte the. ek din gaud ji jab bachche the to ghar ki baithak men ek patri mili jismen kuch paise rakhe the to bal sulabh utsukta men unhonne puri almari chan mari ki shayad kuch aur paise mil jaen aur isi khoj ne unke mastishk men is vidya ko janne ki utsukta bhar di.
ve un janm patriyane ko lekar unke bare men janne ki koshish karne lage. ghar men rakhi jyotish ki kitabane ka adhyayan karne lage aur 12 varsh ki ayu tak unhonne shri koteshvar giri ji maharaj ko apna guru bana liya tha aur unse diksha grahan kar li thi. pita ne unhen vyapar men lagane ki bahut koshish ki parantu unka man vyapar men nahin lagta tha. ve ghar se bhag kar sabhi akhadane ke sadhu santon se milne v unki seva men hi apna sara samay nikal dete the.
pratyek kunbh mele men juna akhade ke sath jana aur koi bhi karya jaise chanvar jhulana adi saharsh svikar karte. inhonne jagranv men mahavir dal ke pradhan ke rup men bhi karya kiya aur 1972 se puri tarah se adhyatm v jyotish se jud gaye. tabhi se subah evan sayankal men durga saptashati v rudri ka path unki dinacharya men shamil tha. yah path to unhone man sarovar ki kathin yatra ke dauran bhi nahin choda tha. pandit ji ko sabhi dharmik sthalon ki yatra karne men bahut anand ata tha.
kathin se kathin yatra ve sahaj hi paidal kar lete the. apne jivan kal men ve panch bar mani mahesh, panch bar amrnath, asankhya bar kunbh mele men, kamakhya devi, chintapurni, ilahabad men prayag raj ke darshan karne gaye. dharmik yatraen v dainik puja path unke jivan ka mahatvapurn hissa tha. iske bina unhen jivan men anand hi nahin ata tha. pichle chalis varshon se navratra men sirf ubla pani pite the tatha sara samay puja men hi vyatit karte the.
pichle pandrah varshon se akhil bhartiya jyotish sanstha sangh ke panjab prant ke garvanar ke rup men karyarat the aur hajaron ki sankhya men unhonne vahan ke vidyarthiyon ko jyotish ki shiksha pradan ki. munden estrolaeji par atyant gyanavardhak pustak likhi aur anek bar dilli men ashtak varg v munden par karyashala bhi ki jismen sau se bhi jyada vidyarthiyon ne bhag liya. fyuchar samachar men pichle kai varshon se lagatar ‘grah sthiti evan vyapar’ par likh rahe the aur apne pathkon men atyant priya the.
duniya bhar se unke pas bajar ki jankari lene ke lie fon ate the. panjab ke adhti dur-dur se unke pas akar jankari lete the aur munafa kamate the. gaud sahab atyant hi saral, sanskari, kartavyanishth evan samarpit vyakti the. fyuchar paeint, aifas ke prati unka samarpan vastav men prashansniya hai. unka asamyik nidhan n keval unke parivar balki aifas parivar ke lie bhi atyant kshati purn hai.
gaud sahab ke jivan ka adhikansh samay puja path men vyatit hota tha isi karan unhonne apni antim shvans yog mudra men hi chodi aur unhen leshmatra bhi kasht nahin hua. apne nam ke anurup jagdanba ji ke ananya bhakt the aur isilie man jagdanba ne apne priya putra ko bina kasht die apni god men samet liya. 5 mai ko ludhiyana men unhen apne vidyarthiyon ko padhane ke lie jana tha.
is din apne sahakarmiyon se jaldi ane ka vada karke ae the islie dopahar 12 baje bhojan ke bad 10 minat aram karne ke lie apne kaksh men chale gaye. 10 minat bad jab putra uthane gaya to yog mudra men baithe-baithe brahmalin ho gaye the. ishvar se karabaddh yahi prarthana hai ki ve sada margadarshak ban aifas v unke vidyarthayon ko prerna dete rahen aur jyotish ke prati unke samarpan ki tarah sabhi usi tarah is vidya par samarpit ho sakane yahi unke prati sachchi shraddhanjli hogi.
svargiya gaud sahab ki kundli ka jyotishiya vishleshan jyotish ke anusar mesh lagn ke jatkon ka janm adhyatmikta v sansarikta men samanjasya sthapit karne ke lie hota hai. gaud sahab ke vyaktitva men in donon gunon ka sundar samavesh tha. inki ruchi pathn-pathan v puja-path men to thi hi sath hi inhonne jyotish ki satyata sthapit karne ke lie athak prayas kiye. ludhiyana shahar ke log inko pandit ji ke nam se jante the.
desh-videsh ke vyapari varg ki inke prati vishesh shraddha bhavna thi kyonki inhen jyotish vidya se n keval jatak balki bajar ki teji-mandi ki purnataya satik bhavishyavani karne ki vishesh yogyata prapt thi. gaud sahab ki janmapatri men mesh lagn par chandrama v shukra ki drishti ke prabhav se ye bade shalin v sajjan vyakti the. lagn men ketu, pancham bhav men budh v panchmesh ki guru v gupt vidyaon ke karak ashtamesh se yuti ke karan inhen jyotish ka vishesh gyan prapt hua.
apki kundli men panchmesh surya, navmesh guru tatha lagnesh evan ashtamesh mangal ki yuti chathe bhav men ek sath ho rahi hai aur sabhi ki drishti vyay bhav (barhven bhav) par hone se unka adhikansh samay puja path, tirth yatra, dharmik karyon evan vrat adi men vyatit hua. pancham sthan par sthir rashi sinh par budh ki sthiti hone se tatha sath hi navansh men panchmesh surya v chaturthesh chandrama ki brihaspati ke navmansh men sthit hone se inka jyotish vidya ke prati atyant lagav tatha samarpan ka bhav jivan paryant bana raha.
gaud sahab ki kundli men anek achche yog hain jinka vishleshan yahan diya ja raha hai. vashi yog surya se dvadash sthan men chandra ko chodakar yadi koi anya grah ho to yah yog banta hai. inki kundli men surya se barhven bhav men budh hone se yah yog purn rup se ghatit ho raha hai jiske falasvarup ye udyami, uchch vichar evan satvik pravritti ke vyakti the. vimal yog yadi janmakundli men barhve bhav ka svami duahsthan men ho aur vah ashubh grah se yukt athva drisht ho to yah yog banta hai.
inki kundli men barhvane bhav ka svami guru ashubh sthan men ashubh grah mangal se yukt hai jiske karan ve sukhi, sadguni achche karyakatrta evan samadarshi prakriti ke udar vyakti the. sunfa yog yadi kundli men surya ko chodakar chandrama se dusre bhav men koi grah ho to yah yog banta hai. inki kundli men chandrama se dusre bhav men shani sthit hone se yah yog ghatit ho raha hai.
is yog ke karan ve dharmik, yashasvi, guni tatha panjab prant men akhil bhartiya jyotish sanstha sangh ke gavarnar bhi bane rahe. apki kundli men lagnesh mangal evan do shubh grah shukra tatha chandra ki lagn par drishti hone se ap sachcharitra, katrtavyanishth, saral evan mridu svabhav ke vyakti the. gaud sahab ke akasmik mrityu ke karan inki ayu ke sanbandh men jyotishiya grah yog ka vichar karen to adhikansh rup se inki kundli men madhyam ayu yog ghatit ho raha hai. madhyayu yog lagnesh v ashtamesh mangal purnataya ast hai.
jivan men raksha kavach pradan karne vala guru lagn se chathe v chandrama se dvadash bhav men sthit hokar shakat yog ka nirman kar raha hai. atah nirbal hokar suraksha dene men asamarth hai. anya shubh grah chandrama v shukra pidit v balhin hain, sath hi papakartari men bhi hain. budh grah bhi shani se drisht hokar papi ho gaya hai. is prakar kundli men lagnesh, guru, budh, shukra v chandrama adi sabhi shubh grahon men se ek bhi bali n hone ke karan inka shani ashtamasth hone ke bavjud bhi ayu yog kamjor hi raha.
vartaman samay men shani ki sadhesati chal rahi thi aur shani saptam bhav par chandra ke upar chal rahe the islie unki patni se bichoh kara ke unhen ghor kasht diya. jaimini jyotish ke anusar yadi atmakarak grah se dvitiyesh aur ashtamesh (donon men jo bali ho), vah yadi panafar sthan 2, 5, 8, 11 men ho to madhyayu hoti hai.
inki kundli men budh atm karak grah hai usse dvitiya sthan svami svayan budh hi hai aur vah panafar sthan pancham men hai jiske fal svarup inki madhyayu hui. anya jaimini sutra ke anusar yadi lagnesh aur ashtamesh dvisvabhav rashi men ho to madhyayu hoti hai. inki kundli men mangal lagnesh tatha ashtamesh hokar dvisvabhav kanya rashi men hai jisse madhyayu yog banta hai.
bina pida mrityu yog fal dipika jyotish granth ke anusar yadi janmakundli men dvadshesh saumya grah ki rashi athva saumya grah ke navmansh men ho to bina pida kasht ke mrityu hoti hai. inki kundli men dvadash bhav ka svami grah brihaspati saumya grah budh ki rashi men hai evan navmansh men bhi budh ki hi rashi men hai jiske falasvarup inki mrityu bina kasht v pida sahe hui.
punarjanm yog fal dipika granth ke anusar hi yadi dvadshesh mangal se sanbandh sthapit karta ho to jatak marnoprant shighra prithvi par janm leta hai. inki kundli men dvadash bhav ka svami brihaspati mangal ke sath hone se yah yog bana raha hai jisse unki shighra prithvi par dobara janm lene ki sanbhavna ban rahi hai.