bhartiya sanskriti men santan ka vishesh kar putra santan ka vishesh mahatva hai. is lok aur parlok ki sukh-shanti ke lie putra ki avashyakta batai gai hai. pun namak narak se tran karane vala hi putra hai. jin danptiyon ko putra ka abhav hota hai ve god lekar apni ichcha ki purti karte hain. kya jatak god jayega. is prashn ka uttar jatak ki kundli men nimnalikhit yogon ki upasthiti dekhakar diya ja sakta hai:
1. kark ya sinh rashi men pap grah hone par.
2. chandrama athva surya pap grahon ke sath hon ya unse drisht hon.
3. chaturth evan dasham bhav men pap grahon ki upasthiti ho.
4. surya ya chandrama shatru kshetri grahon se yut hane.
5. ashtamesh pap grah se yut hokar dasham bhav men gaya ho.
6. navam bhav ya navmesh char ya dvisvabhav rashigat balvan hone tatha shani se yut athva drisht hone par - jatak avashya god jata hai.
kundli 1- 21.09.1947, 10.30, jodhpur kark rashi men pap grah. pahla sutra lagu. chandrama pap grah ke sath hai, surya pap grah se dekha jata hai navam bhav men char rashi hai, navmesh char rashi men hai, navam bhav shani se drisht hai. jatak apne tau ke god gaya, karoron ki sampatti ka svami bana.
kundli 2 - 12.06.1896, 09.00, lakhnau jatak yuvavastha ke bad god gaya. dekhiye- sinh rashi men pap grah ketu hai. chandrama pap grah mangal se dekha jata hai. chaturth sthan men pap grah shani hai. navmesh brihaspati char rashi men hai, balvan hai evan shani se drisht hai.
kundli 3- 11.12.1879, 2.13, akola jatak ka janm sadharan parivar men hua lekin god chale jane ke karan bahut dhan sanpatti prapt hui. jivan men khub dan-punya mila. samajik sansthaon ki sthapna ki, chanda diya. chandrama pap grah mangal se dekha jata hai. chaturth evan dasham bhav men pap grah rahu-ketu baithe hain. surya pap grah ke sath to nahin hai, pap grah mangal se avashya dekha ja raha hai. navmesh shukra char rashi men hai, balvan hai. navmesh shani se nahin dekha jata. navam bhav par shani ki avashya drishti hai.