gurubrrahma, gururvishnu, gururdevo maheshvarah. guru sakshat paranbrahm, tasmai shri gurve namah.. guru hi brahma hain, guru hi vishnu hanai, gurudev hi mahesh bhi hain arthat guru sakshat param bahm hain. atah he gurudev ! apko shat-shat naman. guru ka mahatmya adikal se hi saiapit hai. guru ke mahatmya ka bakhan karna surya ko diya dikhane ke saman hai. guru ke prati hi samman athva shraddha suman arpit karne ke uddeshya se guru parva athva guru purnima ka tyauhar manaya jata hai. guru parva har varsh ashadh mas ki purnima ko hota hai. is varsh guru parva 22 julai, 2013 ko hai. guru shabd do alg-alag shabdon- ‘gu’ tatha ‘ru’ ka mel hai. ‘gu’ ka shabdik arth hota hai- andhakar tatha ‘ru’ ka shabdik arth hota hai andhakar ko mitane vala. atah guru ka arth hua vah mahan vyakti jo agyanta evan mudhta rupi andhkar ko mitakar gyan evan buddhi rupi prakash pradan kare.
guru hamare jivan ke abhinn ang hain. guru ki mahima evan kripa ke bina hamara uddhar nahin ho sakta. yadi ham ‘guru-parva’ ki aitihasik prishthabhumi ki or drishtipat karen to pate hain ki vibhinn dharmavalambiyon ne apne-apne dharm ke mahan guruon ko samman pradan karne ke lie is parva ki paripati banayi. hindu dharm men yah parva maharshi ved vyas jo hindu mahakavya ‘mahabhart’? ke rachyita v prachin bharatavarsh ke sabse sammanit guru hain tatha jinhen guru-shishya paranpra ka adarsh mana gaya hai, unhin ke samman men hindu dharm ke anuyayi guru-parva manate hain. bauddh dharm ke anuyayiyon ke lie yah divas atyant mahatvapurn islie hai kyonki bhagvan buddh ne bodhgya men gyan ki prapti ke uprant apna pratham updesh sarnath men isi din diya tha. jain dharm ke anusar yah manyata hai ki 24 ven tirthakar vardhaman mahavir ne ‘kaivalya’ ki prapti ke uprant isi din indrabhuti gautam ko apna pratham shishya banaya tatha svayan guru kahlae. bharat varsh ki to hamesha hi apne gurujnon ko samman pradan karne ki paranpra rahi hai.
chahe dharm, jati, samuday jo bhi ho kintu guru to hamesha pujniya hi hota hai. shastron men thik hi kaha gaya hai- yasmanmaheshvarah sakshat kritva manuvvigraham. kripya gururupen magnaproddharati prajaah.. svayan maheshvar hi manushya rup dharan karke, kripapurvak, guru rup men, maya se bandhe jivon ka uddhar karte hain. guru dur se dekhne par bilkul am manushya se dikhte hain. par jaise-jaise ham unke samip jate hain, unki mahanta evan vishalta ke darshan pate hain tatha hamen ahsas hota hai ki jo ham jaisa dikhta hai, vah bilkul ham jaisa nahin hai. isilie jo bhi sachche guru ke pas gaya, usne guru ko bhagvan kaha hai. guru apna sara samay aur samathrya shishyon ke utthan evan uddhar men laga dete hain. sampurn dhara ke kalyan hetu lok hitkari karya hi guru ka uddeshya hota hai.
jis samay sachche guru mil jaen, us samay ahan ko mitakar unki sharan men chale jana chahie aur ve hamen jis prakar updesh den ya shiksha den, chahe hamen vah galat hi malum pade, dusre logon ya pustakon se uski pushti n hoti ho, fir bhi bina soche-vichare andhvishvasi banakar us par chal padna chahie. jab tak shishya men guru ke prati purn shraddha, sankalp, vishvas evan samarpan ki bhavna nahin hogi, guru prasad durlabh hai. jo shishya agya palan karne men laprvahi karte hain, samy-samay par shikayten karte hain, apni chinta ap karte hain aur jo unki bat par vishvas n karke dil men kutark karte hain, man men kapat bhav rakhte hain, aise log bich bhanvar men hi rah jate hain. uttar kand men guru ka varnan kag bhushanudi evan garud sanvad men is prakar aya hai: guru ki avhelna ko shiv ji bhi sahan nahin kar sake, yadyapi guru ko koi harsh ya vishad nahin hua.
fir bhi shishya shiv ji dvara abhishapit hua aur guru kripa se vanchit raha. atah yah nirvivad sthapit satya hai ki gyanarjan ki donon vidhaon- apra arthat sansarik gyan tatha para arthat adhyatmik gyan ki purn prapti bina guru ke sannidhya evan ashirvad ke sanbhav nahin hai. khasakar adhyatmik uddeshya men lage logon ke lie guru ki sahayta anivarya evan apriharya hai. adhyatmik kalyan ke lie bhagvan shiv ko sabse bada guru mana gaya hai. ye samy-samay par kisi n kisi rup men, shishyon ko sadhna ka gupt marg pradarshit kar gupt rahasyon ko samjhakar tirohit ho jate hain. kintu unke bhi ingit marg ka anusaran karne ke lie ihlaukik guru ka sannidhya evan margadarshan avashyak hai.
adhyatm vah rahasya hai jisko jan lene par manushya jivn-maran ke rahasyon se parichit ho jata hai. adhyatmik utthan ke lie kuch shaktiyon ko jagrit karna avashyak hai. satsang, manan, shraddha, prem, vishvas aur abhyas jaisi shaktiyon ke dvara is marg parasani se panv rakha ja sakta hai. jo gyan indriyon, man evan buddhi se pare hai, yani jis gyan dvara adi, anadi, avinashi param brahm ko jana jata hai, unka anubhav kiya jata hai, unka sakshat darshan kiya jata hai, in antarang rahasyon evan gupt gyan ko sadguru ke sannidhya evan margadarshan men hi atmasat kiya ja sakta hai. is vidya ka gyan n to vani dvara aur n hi lekhni dvara diya ja sakta hai. ise to guru-shishya paranpra ke antargat, guru apni atma se shishya ki atma men ‘pashyanti vani’ dvara pahunchate hain. is len-den men gyan ki ushnata evan tivrata madhur ho jati hai.
yahi yatharth gyan hai. isi gyan ko adhyatmik gyan kahte hain. maharshi vedavyas, buddh, mahavir, ramkrishn parmhans adi aise mahan guru hue jinhonne apne shishyon ko gyanvani tatha margadarshan se adhyatmik vaitrni par karvai tatha guru ke mahatmya ko sansthapit kiya.