vaham ka ilaj to hakim lukman ke pas bhi nahin tha to fir kaise dur hoga sima ka vahm? ap sabhi ke sanpark men kabhi n kabhi aisa vyakti avashya aya hoga jise vaham ki bimari hoti hai. yah bimari kisi bhi tarah ki ho sakti hai. kuch log lagatar hath dhote rahte hain kyonki unhen lagta hai ki hath gande hain. isi tarah kuch bar-bar tale ko chek karte hain ki kahin khula to nahin rah gaya ya fir bar-bar safai is had tak karte hain ki ghar men jina dushvar ho jata hai. angreji men is bimari ko ---ocd obsessive compulsive disorder kahte hain aur iska medical treatment bhi chalta hai parantu is bimari ko puri tarah khatm hone men kafi samay lag jata hai. aisa hi kes abhi hal hi men dekhne ko mila. sima ka bachapan ek madhyam vargiya parivar men bita jahan sab sanyukt parivar men rahte the.
usne apna bachapan apni dadi, tai, bua ko dekhte hue bitaya. jaisa ki pahle bujurg chua chut jyada mante the uski dadi, tai adi bhi kafi safai rakhti thi aur hath dhone par kafi jor deti thi. parivar men unka kafi dabdba tha aur sab unki baton ko mante the. sima ke vivah ke pashchat vah munbai a gain aur apne pati ke sath ek achchi sosayti men ek achche flait men rahne lagin. sabhi kuch thik-thak chal raha tha. sima bhi apne parivar ki tarah saf-safai ka pura khyal rakhti thi. uske pati shailesh bhi uska pura sath dete the aur kisi bhi kam men anyatha hastakshep nahin karte the. unke yahan do putriyon ne janm liya jinka laln-palan sima bade pyar se kar rahi thi par uske svabhav men thoda-thoda parivartan a raha tha.
uska dhyan jyada se jyada dhul mitti saf karne men laga rahta. usko bachchon ka bahar jana ya kisi ka ghar men ana bilkul nahin suhata tha. usko lagta tha ki bachche bahar jaenge to gande hokar aenge, fir se nahlana padega, kapde dhone padenge aur koi aega to uske ane se ghar ganda hoga aur fir se puri safai karni padegi. isi soch ke chalte usne bachchon ka ghar se bahar jana band kar diya. ve keval skul jate aur skul se ane ke bad bhi unka baig alag rakh diya jata taki usse koi vastu chu n jae aur bahar se bhi unki saheliyan nahin a sakti thin. pahle to sima padosiyon se bat karti thi lekin is dar se ki kahin ve andar n a jae usne sabse bat karna hin band kar diya.
shailesh ke kisi bhi dost ka ana use pasand nahin tha aur agar kabhi a bhi jae to shailesh ko unhen bahar hi le jana padta. aise men kuch din ke lie shailesh ke mata-pita rahne ke lie a gaye to shailesh ne rahat ki sans li ki shayad sima ab kuch badal jae par sima ka rang dhang vahi raha. vah to ab sara din hi safai men lagi rahti. khana banane ka to samay hi nahin milta tha. kam vali bai bhi uski chikchik se tang akar kam chod kar chali gai. koi bhi uske sath kam karne ko taiyar nahin thi kyonki vah bartanon ko das bar dhulvati thi. natija yah hua ki ghar ke sare kam ka bojh shailesh ki mata ji par a gaya.
vah bechari khana banana, bartan saf karna, uske pita ki seva karna adi men jarurat se jyada vyast ho gai aur unke svasthya par pratikul prabhav padne laga aur ek din jab unke sanyam ki sima bhi par ho gai to ve donon apne ghar vapis chale gaye. shailesh apne budhe man bap ko apne ghar rakhna chahte the aur unki seva karna chahte the par sima ke age unki ek n chali unko bhi laga ki man ka vapis jana hi achcha hai varna yahan to vah kolhu ke bail ki tarah kam men hi lagi rahegi. bachche ab bade ho rahe the par sima ki mansik bimari badhti ja rahi thi. uski bahut minnaten kar shailesh use daktar ke pas le gaye. daktar ki davai ka panch taka hi fayda hua.
ab usne kabhi-kabhi bajar jana shuru kar diya tha par baki gatividhiyan usi tarah chal rahi thi. han ajakal usne tivi par jyotishiya program dekhna jarur shuru kar diya tha. vah sara din isi tarah ke program dekhti rahti hai aur tarh-tarah ke upay sochti rahti hai. ghar men koi chipkli a jae to mano ghar men bhuchal a jata hai. sima to chandi ki tarah uske piche pad jati hai aur jab tak chipkli ghar se nikal n di jae ghar men sabhi ka rahna dubhar ho jata hai. shailesh jab tur se vapis ate to unka saman achut ki tarah alag rakh diya jata taki koi use chu n sake.
ghar men kabhi -kabhi tin char din tak khana nahin banta tha kyonki bartan hi saf nahin hote the. ghar ka sara saman bikhra pada rahta hai kyonki sima sabko bar-bar pochti rahti hai. sima ki kundli ka jyotishiya vishleshan sima ki kundli ke kendra bhav evan trikon bhavon men koi bhi shubh ya ashubh grah nahin hai. sabhi kendra rikt hain jiske karan sima men vivek evan sochne samjhne ki shakti men kami hai. falit granthon ke anusar yadi brihaspati pap yukt ya pap drisht ho to aisi sthiti men vyakti ko mansik rog athva mati bhram hone ki sanbhavna rahti hai. sima ki kundli men brihaspati ketu ke sath hone se pap yukt hai tatha shani aur rahu ki drishti bhi padne se brihaspati pap drisht hai jiske karan uski mati bhramit hai. jyotish ratnakar ke anusar yadi budh akarak hokar lagnesh ke sath 6, 8 ya 12 sthanagat ho to jatak mansik rog se grasit hota hai.
sima ki kundli men bhi lagnesh surya akarak budh ke sath chathe bhav men sthit hai jiske falasvarup vah bhi ek tarah ke mansik rog se grasit hai. sima ki kundli men mankarak grah chandrama ka lagnesh surya tatha budh se shadashtak yog bhi ban raha hai jiske karan vah apni buddhi aur man ka paraspar samanjasya nahin bitha pa rahi hai aur unki nakaratmak soch unke vyaktitva par havi ho jati hai aur use yahi lagta hai ki jo vah kar rahi hai vahi sahi hai. sima ki kundli men man rupi chandrama, buddhi rupi budh, gyan rupi brihaspati tinon hi ashubh sthiti men hain lekin satoguni grah brihaspati ki lagnesh v budh par drishti hone se yah bhram atyadhik safai tak hi simit raha aur ismen adhik ashubhta nahin ai.
pati sthan ka svami grah shani chalit men bhagya sthan men hone se use apne pati ki sahanubhuti aur purn samarthan bhi prapt hai aur unki or se koi avhelna nahin mil rahi hai. jaimini jyotish ke anusar atmakarak grah shani akarak hokar lagn se ashtam bhav men rahu ke sath baithe hain aur dusre bhav ko dekh rahe hain jisse sima ki buddhi, vani aur sochne samjhne ki shakti pratikul rup se prabhavit ho rahi hai. labh sthan chandrama tatha dhan sthan men brihaspati evan bhagyesh mangal ki bhagya bhav par drishti hone se inhen apne jivan kal men dhan sanpatti v bhautik sukh sadhnon ki kami nahin rahegi. pichle satrah varsh se inki budh ki dasha chal rahi thi.
chunki budh akarak hokar lagn se shashth sthan par tatha chandra se ashtam hai islie budh ki dasha men jyada bhramit rahi hai aur apni nakaratmak v vahmi soch pure parivar par ladti rahi. jun 2013 se inki ketu ki dasha aranbh ho rahi hai. ketu guru ke sath saumya rashi kanya men sthit hai. sima ka vaham kuch kam ho sakta hai. unhen daktari ilaj ke sath 5-6 ratti ka pukhraj dharan karna chahie. budh aur shani grah ka dan bhi unke lie labhkari rahega aur unko sadbuddhi pradan karega.
shailesh bahut pareshan hai ki ve kya karan, kis tarah sima ki is mansik bimari ka ilaj kiya jae taki vah aur am aurton ki tarah apni ghar grihasthi chala saken.